1 Pita 1 - The Keyagana NT and 25 OT books

¹ Nagaemo Pitaʼnamo Yesu Kalaisi apa vekaʼamo maiʼneʼnaeʼmo Goti vayaʼamo kalagaʼmo hageta uteta hutapa Ponitasi kotega maige Galesiya kotega maige Kapanosiya kotega maige Esiya kotega maige Mitiniya kotega maige huʼnaya vayaʼmogitapaeʼmo mani gemo avoʼmo nekaove.

² Gotiʼa muki yaʼmo afoʼamoʼmo lapaketenoʼaeʼmo, mafaʼneʼnimo maigae, huteno lekana paino lapateʼniye. Aunemeʼamoʼmo lapakaemo Yesu Kalaisifeʼmo ava gemo afitetapa akame hisageno Yesu Kalaisi kolaʼaletiʼmo aino fuli fuli huno faleno lapatesiyafeʼmo alino lapaote vayaʼamo lapateʼniye. Lusi kava huno fikumo lapa maeno lapamisaʼageno lapaipamoʼmo falu hino.

Agava maiʼneta lavayagunagu nehuna kavafeʼmo huʼniya gemae

³ Lagaemo Goti agiʼaleʼmo Ala kava netimo Yesu Kalaisi afoʼamo agiʼaleʼmo alita auleta ategetao. Lusi kava huno hau huno lateʼniyaʼmofeʼmo Yesu Kalaisiʼa faliʼniyatetiʼmo ago alino he tino ateʼniya kavatetiʼmo saufa vayaʼmo halate alino lateʼniye. Lagaemo afole aisiya kavatefeʼmo agava maiʼnetaeʼmo lama geʼalefeʼmo lavayagunagu huta maisunafeʼmo ani kavaʼmo huʼniye.

⁴ Afoʼapimogi yaʼmo mafaʼneʼapimogi neʼaliya kava huta Gotiʼa agaiʼa yaʼmo alisunafeʼmo kokuʼnapi yateʼmo yagaino nelate. Ani yaʼmo alagi okasalige hosuge atafa osege nehiyanageno alagepa huno hanege hanege huno afaʼa hanegaiye.

⁵ Gotiʼa himamuʼaletiʼmo yagaino lapatege lapakesamo afita fatago nehaya kavatetiʼmo yagaino lapatege nehiyanageno lapakufamo alagi alino katino lapategaiye. Gotiʼa alo huno maleʼniyanageno henagaʼamo afole aigiye.

⁶ Ani kavafeʼmo lapamogaga neʼaiyaʼmonanafa lapa maesiya hanageke yaʼmo hemenimo aise afinaʼmo aliʼnageno lapaipamoʼmo kana huʼniye.

⁷ Gotiʼa lapakesamo afita fatago nehaya kavafeʼmo amalageka huno agegenoʼaeʼmo, Lama ge kavaʼmo haneʼniye, huno hisiyafeʼmo hanageke yaʼmo lapamiʼniye. Vayaʼmogimo hano hisiya goli yafaʼmo atafiʼmo kaeʼa age nekaya kava huno Gotiʼa lapakesamo afita fatago nehaya kavaʼmoʼa alopa monileʼyaʼmo aeno agaseʼniya kavaʼmo goli yafaʼmo ago aeno agaseʼniya kavaʼmogeno amalageka huno age neke. Agegenoʼaeʼmo lama ge kavaʼmo haneʼninagenoʼaeʼmo Yesu Kalaisiʼa afole aisiya afinaʼmo ala lapakitapimo lapamige ha le konali yaʼamo lapamige lapakitapileʼmo alino asagauno lapatege hisiyafeʼmo amalageka huno age neke.

⁸ Yesu Kalaisiʼmo lapaulagafatiʼmo oʼageʼnayaʼmonanafa agaefeʼmo lapau lapayamopafiʼmo nelapaiye. Hemenimo oʼageʼnayaʼmonanafa agaefeʼmo lapakesamo afita fatago hutetapa lusi kava hutapa lapamogaga neʼaiye. Lapaipafiʼmo lapamogaga neʼaiyaʼmonanafa lapavayafatiʼmo ge hisayafeʼmo lapavayamoʼmo kana nehiye. Lapamogaga neʼaiya kavaʼmoʼa muki ma mopafi yafeʼmo apamogaga neʼaiya kavaʼmo aeno agaseʼniye.

⁹ Lapakesamo afita fatago nehaya kavaʼmoʼa alagamo aeʼnigeno Gotiʼa lapakupi mafaʼnemo alino katino lapateʼniye.

¹⁰ Akeyaʼvilaga vayaʼmogimo Gotitegati gemo alini eʼa aeʼa hakalo huʼa hapa paiʼnaya vayaʼmogi ani lapakufamo alino katino lapatesiya kavatefeʼmo apayamukiki huʼa lusi kava huʼa kahauya huʼnae. Apakaemo apaune gemo huʼapaeʼmo, Gotiʼa fikumo lapa maeno lapamigiye, huʼa huʼnae.

¹¹ Kalaisi Aunemeʼamo apaipafiʼmo maiʼniya Aunemeʼamoʼmo hogoteno hunoʼaeʼmo, Kalaisiʼa kana yaʼmo alitenoʼaeʼmo ala agiʼe ha le konali yaʼeʼmo aligiye, huno hapa paiʼnigeʼapaeʼmo, hainu afinaʼmo afole aisifi, huʼa huge haiya katetiʼmo afole aisifi, huʼa huge huteʼapaeʼmo agesayafeʼmo kahauya huʼnae.

¹² Gotiʼa hunoʼaeʼmo, lapakaitapilefeʼmo ani aliʼyaʼmo noʼalifa henagaʼamo afole aisaya vayaʼaitefeʼmo ani aliʼyaʼmo neʼaliye, huno hapa paiʼniye. Hemenimo apa vayaʼmogita Aote Aunemeʼamo kokuʼnapatiʼmo alino ateʼnigeno emineʼniya Aunemeʼamo himamuʼaletiʼmo mani alagepa faigoko geʼamo lapa nepaune. Enisole vayaʼmogiʼeʼmo ani kavaʼmo aepaʼamo agesayafeʼmo nehapaiye.

Lapaote kavaʼmo hiyo, huno huʼniya gemae

¹³ Ani alagepa faigoko gemo afole aiʼniyaʼmofeʼmo alagepa huta afisayafeʼmo lapakesamo alo hutetapa lapakufaleʼmo yagaita lapateyo. Yesu Kalaisiʼa emineno vayaʼai apaulagaleʼmo afole aitenoʼaeʼmo fikumo laha maeno lamigiye, huta ani geʼaekeʼmo lapakesamo afitetapa agava maiʼnetapa lapavayagunagu hutapa maiyo.

^14-15 Lapakaemo gemo neʼafiya mafaʼnegana hutapageʼmo maiyo. Hogotetapa Goti geʼamo oʼafiʼnetapaeʼmo amega lapakufamoʼmo hauʼniya kavaʼmo akame hutapa maiʼnayaʼmonanafa hemenimo lapakaefeʼmo keya aeno ge huʼniya vekamo alagepa aote vekamo maiʼniya kava hutapa muki kavaʼamo nehutapaeʼmo alagepa lapaote vayaʼmo maiyo.

¹⁶ Na agufa gemo huʼniyaʼmofeʼmae. Goti mukufiʼmo avoʼmo kae maleʼniya gemoʼmo hunoʼaeʼmo, Alagepa naote vekamo maiʼnovaʼmofeʼmo alagepa lapaote vayaʼmo maiyo, huno huʼniye.

¹⁷ Nunumuʼmo nehutapaeʼmo, Afotimogae, hutapa agi neʼaya vekamoʼmo vayaʼai amega apakufalefeʼmo agesamo noʼafifa muki vayaʼaitegamo magoke aiyaya kavakeʼmo huno alagepa huno alino fako huno neʼapateyaʼmofeʼmo ma mopafiʼmo kalaga vayaʼmo maiʼnetapaeʼmo koli hutapa maime maime viyo.

¹⁸ Lapakinago vayaʼai kavaʼmoʼa alagepa huno lapa oʼmaesiya agufa kavakeʼmo hogotetapa akame huʼnae. Ani agufa kavategatiʼmo ago miya faino hatu maeno lapateʼniya kavafeʼmo ava gemo ago afiʼnae. Kalaisiʼa hano hisiya yaʼmo siluva yafatetiʼmofi goli yafatetiʼmofi huno miya faino olapateʼnifa

¹⁹ alopa monileʼyaʼmo aeno agaseʼniya kolaʼaletiʼmo miya faino hatu maeno lapateʼniye. Kalaisiʼa alagepa sipisipimo mago hosu yaʼmo ohauʼniya sipisipigana huno maiʼneno faliʼniye.

²⁰ Gotiʼa ma mopaʼe kokuʼnaʼeʼmo alo osuʼnenoʼaeʼmo akeyaʼvilagamo ani aliʼyaʼmo alisiyafeʼmo Kalaisiʼa ago lekana paino ateteno henagaʼamo lapakaetefeʼmo alino afole aino ateʼniye.

²¹ Lapakaemo agaetetiʼmo Gotifeʼmo lapakesamo afita fatago nehae. Agaemo faliʼniyatetiʼmo ago alino he tino ateteno ha le konali yaʼamo amiʼnigetapaeʼmo Gotifeʼmo lapakesamo afita fatago hutetapa agava maiʼnetapaeʼmo lapavayagunagu nehae.

²² Lama gemo afitetapaeʼmo lapaipamo sese huta atetetapa konaga vayatapieʼmo lama ge huno lapau lapayamopafiʼmo lapauʼniyaʼmofeʼmo lokiya kavaʼmo hutapa yaveyave lapaipafatiʼmo lapau lapayamopafiʼmo lapaino.

²³ Gotiʼa kasalisiya avina yatetiʼmo halate alino olapateʼnifa okasalisiya avina yaʼmo aunemeʼe gemo hanege hanege huno hanesiya geʼaletiʼmo halate alino lapateʼnigetapa mafaʼneʼamo maiʼnae.

^24-25 Goti mukufi gemoʼa ani kavatefeʼmo hunoʼaeʼmo, Muki vayaʼai amega apakufaʼamo kahaugana huno haneʼniye. Konali yaʼapimo kahaumo ausegana huno haneʼniye. Kahaumo leno falu netegenoʼaeʼmo auseʼamo asagauno neʼaiyaʼmonanafa Ala kava neʼmo geʼamo alagi hanege hanege huno hanegaiye, huno huʼniye. Apakaemo mani alagepa faigoko geʼamo ago aeʼa hakalo huʼa lapa paiʼnae.