1 Kolitiyani 9 - The Keyagana NT and 25 OT books

Poloʼa muki kavaʼamo hisuva himamuʼnimo haneʼniyaʼmonanafa nosuvanagi nakame hiyo, huno huʼniya gemae

¹ Nagaemo apa vekamo maiʼnove. Kalavusifiʼmo oʼmaiʼneʼna muki kavaʼamo afaʼa hisuva kavaʼmo haneʼniye. Nagaemo Ala kava netimo Yesuʼmo naulagafatiʼmo ago ageʼnove. Ala kava netetiʼmo aliʼyaʼmo aliʼnogetapaeʼmo lapakaemo alagamo aegekana hutapa aeʼnae.

² Mago vayaʼmogimo nagaefeʼmo, apa vekamo oʼmaiʼniye, huʼa nehayaʼmonanafa aliʼyaʼniletiʼmo Goti mafaʼneʼamo ago hamaleʼnayaʼmofeʼmo Goti apa vekaʼamo maiʼniye hutapa afaʼa hugae. Lapakaetegamo uʼna apa aliʼyaʼnimo aliʼnogetapaeʼmo Goti mafaʼneʼamo hamaleʼnageʼa mago vayaʼmogi lapakeʼnayanageʼa Polo apa aliʼyaʼamo maiʼnae, huʼa hugae.

³ Nagenoka huʼa nafi geʼapaeʼmo maku make huʼa neʼnataya vayaʼaifeʼmo ge huʼna naha maeʼna hisuvafeʼmo aliʼyaʼmo aliʼnogeʼapaeʼmo Kolitiyani vayaʼmogi Goti mafaʼneʼamo hamaleʼnae, huʼna nehuve.

⁴ Goti aliʼyaʼamo neʼaluvaʼmofeʼmo aliʼyaʼniletiʼmo lapakaemo neʼyaʼe aniʼeʼmo fikumo namisaya himamuʼnimo ohaneʼnifiye.

⁵ Mago Goti apa vayaʼamogimogi Ala kava neʼmo agufale aganaʼamogimogi Pitamogi huʼa Kalisitini hamaleʼnaya aʼneʼapimo apavaleliʼa uʼnae. Ani kavaʼmo hisuva himamuʼnimo ohaneʼnifiye.

⁶ Nagaeʼe Manamasiʼeʼmo laʼagaitiʼageʼmo neʼyaʼmo nesuʼa aliʼyaʼmo alitetaʼa afaʼa oʼatalesuʼafiye.

⁷ Haiya ati vayaʼmogimo kamemo nehuʼapaeʼmo apakaiʼapimo neʼyaʼapimo kahauya huʼa neʼnae. Haiya vayaʼmogimo hoya vaiteʼapaeʼmo hoyaʼapifatiʼmo neʼyaʼmo aliʼa noʼnae. Haiya vayaʼmogimo pulumaka afuleʼmo yagaiʼa maiʼneʼapaeʼmo nuʼanuʼamo noʼnae.

⁸ Ma mopafi kavafeʼmo aeʼna kalafefa gemo nehuvaʼmonanafa Goti keʼaepa geʼamoʼa mani kavafeʼmo magoke agufa gemo huʼniye.

^9-10 Moseseʼa avoʼmo kae maleʼniya keʼaepa gemoʼa hunoʼaeʼmo, pulumakamogi apaiyaletiʼmo mago neʼyaʼmo haletiʼyaʼamo aeʼa haleteʼapaeʼmo oʼnesayafeʼmo apavayaleʼmo nofi kitapa oʼapateyo, huno huʼniye. Gotiʼa pulumakaekeʼmo agesamo afino hu maleʼnifi lagaeʼefeʼmo huʼniye. He lagaeʼefeʼmo mani gemo huʼniye. Aiʼyu neʼaiya vayaʼe hoyafatiʼmo neʼyaʼmo neʼaliya vayaʼmogiʼeʼmo aliʼyaʼmo neʼaliʼapaeʼmo, mago neʼyaʼmo afole aisigeta aligune, huʼa huteʼa agava maiʼneʼa apavayagunagu hisayafeʼmo avoʼmo kae maleʼniye.

¹¹ Aunemeʼe avina yaʼmo lapakaeteʼmo ago hakale maleʼnone. Hakale maleʼnona hoyafatiʼmo lagufale yaʼmo alisunana kanale osugifiye.

¹² Mago mono vayaʼmogimo lapakaetegatiʼmo apakufale yaʼmo alisaya himamuʼapimo haneʼnisiyana lagaeʼeʼmo alisuna himamutimo magoʼe huno haneʼniye. Fikumo alisuna himamutimo haneʼniyaʼmonanafa afaʼa oʼaliʼnone. Lapakaetegatiʼmo amega lagufale yaʼmo oʼalita Kalaisifeʼmo alagepa faigoko geʼamo lapakaemo afisaya kaʼmo oʼakanisunafeʼmo muki alu kana ya alu kana yaʼmo aliʼnone.

¹³ Yu vayaʼai alopa mono nopiʼmo aliʼyaʼmo neʼaliʼapaeʼmo mono nopatiʼmo neʼyaʼapimo neʼaliye, hutapa oʼafiʼnafiye. Ofalinimo neʼmalaya hiʼyalamuteʼmo aliʼyaʼmo neʼaliya vayaʼmogimo hiʼyalamutetiʼmo ameʼamo aliʼa neʼnae, hutapa oʼafiʼnafiye.

¹⁴ Ani kavatefeʼmo Ala kava neʼmoʼa hunoʼaeʼmo, Alagepa faigoko geʼnimo aeʼa hakalo huʼa hapa nepaiya vayaʼmogi aliʼyaʼmo neʼaliyaʼmofeʼmo apakufale yaʼmo fikumo aliyo, huno huʼniye.

¹⁵ Huʼniyaʼmonanafa muki yaʼmo alisuvafeʼmo himamuʼniletiʼmo afaʼa oʼaliʼnove. Hemenimo lapakaetegatiʼmo mago yaʼmo fikumo alisuvafeʼmo mani avoʼmo nokaove. Aliʼyaʼniletiʼmo nagufale yaʼmo fikumo alisuvafeʼmo oʼnahauʼniyanageʼna hogoteʼna faliteʼnaekeʼmae. Aliʼyaʼniletiʼmo nagufale yaʼmo noʼaluvaʼmofeʼmo amuse nehuve. Fiku yanageno mago vekamoʼmo amuse nehuva geʼnimo aeno ati kaegaiye.

¹⁶ Alagepa faigoko geʼamo aeʼna hakalo huʼna hapa nepauvaʼmofeʼmo amuse hisuva kavaʼmo afaʼa ohaneʼniye. Alagepa faigoko geʼamo aeʼna hakalo huʼna hapa paisuvafeʼmo Gotiʼa kalavusi huno nateʼniyaʼmofeʼmo alu katetiʼmo afaʼa faiʼna kasalo paeʼna visuva kaʼmo alagi ohaneʼniye. Vaehae, huʼna, alagepa faigoko geʼamo aeʼna hakalo huʼna hapa opaisuvana nagaetegamo hosu kavaʼmo afole aisigeʼna alagepa huʼna oʼmaiguve.

¹⁷ Aeʼna hakalo huʼna hapa paisuvafeʼmo nagaiʼnimo lekana paiʼna nateʼnovesinana miyaʼnimo namiyo, huʼna afaʼa huvesinaʼmonanafa kalavusifiʼmo maiʼnogeno aliʼyaʼaleʼmo navaleno nateʼniye.

¹⁸ Inagi miyaʼnimo na agufa yaʼmo haneʼniye. Miyaʼnimo noʼaluvaʼmonanafa aliʼyaʼniletiʼmo alisuva himamuʼnilefeʼmo nagufale yaʼmo oʼaliʼna alagepa faigoko geʼamo fikumo aeʼna hakalo huʼna hapa nepauva kavakeʼmo miyaʼnimo haneʼniye.

¹⁹ Nagaemo mago vayaʼai aliʼyaʼmo oʼaliʼnofa afa vekamo maiʼnovaʼmonanafa asole vayaʼmo Gotitegamo apavaleliʼna esuvafeʼmo muki vayaʼai aliʼyaʼapimo neʼaluva vekamo maiʼnove.

²⁰ Yu vayaʼmo apavaleliʼna esuvafeʼmo Yu vayaʼmogimo nehaya kavaʼmo nehuʼna Yu vekagana huʼna maiʼnove. Nagaemo keʼaepa gemo afeʼalumelagamo neʼmaiya vayaʼmo apavaleliʼna esuvafeʼmo keʼaepa gemo afeʼalumelagamo neʼmaiya vayaʼaitegamo uʼna aliʼyaʼmo neʼaliʼnaeʼmo keʼaepa gemo afeʼalumelagamo oʼmaiʼnovaʼmonanafa keʼaepa gemo afeʼalumelaga vekagana huʼna maiʼnove.

²¹ Keʼaepa gemo oʼaliʼnaya vayaʼmo apavaleliʼna esuvafeʼmo Yu nofi vayapati oʼmaiʼnaya vayaʼaitegamo uʼna aliʼyaʼmo neʼaliʼnaeʼmo keʼaepa gemo oʼaliʼniya vekagana huʼna maiʼnove. Goti keʼaepa geʼamo amagiʼna ataleteʼna afaʼa maiʼnove, huʼna nosufa Kalaisi keʼaepa geʼamo afeʼalumelagamo maiʼnove.

²² Maiʼneʼna apavaleliʼna esuvafeʼmo alagepa huʼa oʼafiʼnaya Goti mafaʼneʼaitegamo uʼna aliʼyaʼmo neʼaliʼnaeʼmo apakaekana huʼna maiʼnove. Alu kava alu kavatetiʼmo magoʼe vayaʼmo apavaleliʼna esuvafeʼmo alu kava alu kavaʼmo nehaya vayaʼaitegamo uʼna aliʼyaʼmo neʼaliʼnaeʼmo alu kava alu kavaʼmo nehuve.

²³ Alagepa faigoko geʼamo aino atagu faesiyafeʼmo mani kavaʼmo nehuve. Alagepa faigoko geʼaletiʼmo fiku naha maeno namisiya yaʼmo muki vayaʼeʼmo magokepi alisunafeʼmo ani kavaʼmo huʼna maiʼnove.

²⁴ Asole vayaʼmogimo nagu nagu huʼa yokalomo nelayaʼmonanafa magoke vayaʼmogigeʼmo aeʼa apakaseteʼa maleʼnaya yaʼmo neʼaliye. Ani kava hutapa aeta agasetapa hetamatapimo alisayafeʼmo nagu nagu hiyo.

²⁵ Muki alu yokalo alu yokaloʼamo nelaya vayaʼmogimo aeʼa apakasesayafeʼmo alu kava alu kavaʼmo huteʼa apakufaleʼmo yagaiʼa neʼapatae. Apakaemo kasalisiya yaʼmo alisayafeʼmo ani agufa kavaʼmo nehayaʼmonanafa lagaemo okasalino hanege hanege huno hanesiya hetamatimo alisunafeʼmo laya mukiki nehune.

²⁶ Nehunaʼmofeʼmo nagaemo fikumo nagu nagu nosufa magoke api kateʼmo aulu heʼna ageʼneʼna nagu nagu huʼna neʼuve. Nayatetiʼmo siki kavetamo nehuʼnaeʼmo yasimo neʼamagufiye.

²⁷ Haʼao, nagufamo amagiʼna aliʼna kanale huʼna ateteʼna yagaiʼna neʼatove. Fiku yanageʼna vayaʼaifeʼmo alagepa faigoko gemo aeʼna hakalo huʼna hapa paiʼnovanageno alino fako huno natalesigeʼna hetamaʼnimo oʼaliguve.