1 Kolitiyani 8 - The Keyagana NT and 25 OT books

Aigofe gotiʼapimogi neʼapamiya ofalinimo neʼnaya kavafeʼmo huʼniya gemae

¹ Hemenimo aigofe gotiʼapimogi afu ameʼamo ofalinimo neʼapamiya kavafeʼmo avoʼmo kaegesuve. Lapakaemo, Mukiʼamogitamo afiʼnone, hutapa nehaya gemo lama gemo nehae. Afiteʼa ageʼnaya kavaʼmoʼa ala vayaʼmo maiʼnone, huʼa nehaya agufa himuʼnamu kavaʼmo alino afole aino neʼateyaʼmonanafa hapau apayamopafiʼmo nehapaiya kavaʼmoʼa alino lokiya vaino neʼapate.

² Afiʼnone, huʼa nehaya vayaʼmogimo magoke alagepa gemo alagi oʼafiʼnae.

³ Oʼafiʼnayaʼmonanafa Gotifeʼmo hapau apayamopafiʼmo nehapaiya vayaʼmo apakeno aeto hutenoʼaeʼmo vayaʼnimo maiʼnae, huno nehiye.

⁴ Nehiyaʼmofeʼmo aigofe gotiʼapimogi afu ameʼamo neʼapamiya ofalinimo nesupi oʼnesupi ani kavafeʼmo avoʼmo kaegesuve. Aigofe gotiʼapimogimo ma mopafi ina agufa yaʼmo haneʼnigeno magoke Gotiʼa agaiʼageʼmo maiʼniyana mago alu gotigimo alagi oʼmaiʼnae, huta ago afiʼnone.

⁵ Vayaʼmogimo apaki aeʼapaeʼmo, gotitimogitapae, huʼa apaki neʼaya gotiʼapimogimo ma mopafi maiʼnisafi kokuʼnapiʼmo maiʼnisafi huʼa maiʼnisayana asole aigofe gotiʼapimogi maige asole aigofe ala kava vayaʼapimo maige huʼnae.

⁶ Maiʼnayaʼmonanafa ago afiteta ageʼnonana magoke Gotiʼa afotimoʼmo maiʼniye. Agaemo muki yaʼmo afoʼamoʼmo maiʼnigeta agaetefeʼmo afaʼa maiʼnone. Ani kavaʼmo huno magoke Ala kava netimo maiʼniye. Agaemo Yesu Kalaisiʼa maiʼnigeno Gotiʼa agaetetiʼmo muki yaʼamo alo hu maleʼniye. Lagaemo agaetetiʼmo afaʼa maisuna yaʼmo aliteta maiʼnone.

⁷ Maiʼnonaʼmonanafa muki vayaʼmogimo mani lama gemo alagi oʼafiʼnae. Mago vayaʼmogimo yatala afinaʼmo aigofe gotiʼapimogitefeʼmo mono huʼnayaʼmofeʼmo hemenimo ofalini neʼapamiya ameʼamo neʼneʼapaeʼmo, aigofe gotigimo apamiʼnaya ofalinimo ameʼamo netaeʼmo hosu kavaʼmo nehune, huʼa apakesamo afigae. Yuʼilaga vekaʼapimoʼmo alagepa huno oʼafiʼniyaʼmofeʼmo ofalini ameʼamo neʼneʼapaeʼmo yuʼilaga vekaʼapimo aliʼa hosu huʼa neʼatae.

⁸ Neʼatayaʼmonanafa neʼyaʼmo neʼnisupi oʼneʼnisupigeno Gotiʼa ani kavatefeʼmo amuse huno olategaiye. Ofalini afumo ameʼamo oʼnesunana magoʼe huta hosu kavaʼmo huta oʼmaigune. Ofalini ameʼamo nesunana magoʼe huta alagepa kavaʼmo huta oʼmaigune.

⁹ Oʼmaigunaʼmofeʼmo alagepa hutapa kava yagaiyo. Hosu kavanagetapa kalavusifiʼmo oʼmaitapa afaʼa maiʼnetapaeʼmo negaune, hutapa nehaya kavaʼmoʼa lokiya oʼvaiʼnaya vayaʼmo apaiyafiʼmo hapaesigeʼapaeʼmo hosu kavapiʼmo asagauʼa aigae.

¹⁰ Mago alagepa huno oʼafiʼnisiya vekamoʼmo lapakesiyana ageʼnaya vayaʼmogitapamo aigofe gotiʼapimogi mono nopiʼmo maiʼnetapa neʼyaʼmo neʼnesageno lapaketenoʼaeʼmo, aigofe gotiʼapimogi apamiʼnaya ofalinimo afaʼa negauve, huno agesamo afigiye.

¹¹ Alagepa hutapa ageʼnaya kavatetiʼmo alagepa huno oʼafiʼniya konagatimotefeʼmo Kalaisiʼa falino ateʼniya konagatimoʼmo netenoʼaeʼmo alagi afela hegaiye.

¹² Lapakaemo konagatapimogi yuʼilaga vekaʼapimo alita hosu hutapa atetetapa apakaetegamo hosu kavaʼmo nehutapaeʼmo Kalaisitegaʼeʼmo ani hosu kavaʼmo nehae.

¹³ Nehayaʼmofeʼmo afumo ameʼamo neʼnovanageno konagaʼnimoʼmo hosu kavaʼmo hisigeʼnaeʼmo halate afumo ameʼamo alagi oʼnegauve. Hosu kavapiʼmo asagauno oʼaisiyafeʼmo afumo ameʼamo oʼnegauve.