1 Kolitiyani 7 - The Keyagana NT and 25 OT books

Veleʼmo maige aʼmo alige hisaya kavafeʼmo huʼniya gemae

¹ Hemenimo avoʼmo kaeta ge huta nafi geʼnaya kavafeʼmo lahapa paigesuve. Vemogimo aʼmo oʼaliʼa afa maisaya kavaʼmo kanale kavaʼmo haneʼniye.

² Haneʼniyaʼmonanafa kumai kavaʼmo lusi kava huno afole neʼaiyaʼmofeʼmo muki magoke magoke ve anagaʼmogimo apakaiʼapi aʼapigeʼmo alisageʼa muki magoke magoke aʼne anagaʼmogimo apakaiʼapi anauʼapimogitekeʼmo maisageʼa hisaya kavaʼmo haneʼniye.

³ Ve anagaʼmogimo apakufamo aʼneʼapimo apamisayafeʼmo ka oʼakaniʼa afaʼa apamisaya kavaʼmo haneʼniye. Ani kava huʼa aʼne anagaʼmogimo apakufamo anauʼapimogi apamisayafeʼmo ka oʼakaniʼa afaʼa apamisaya kavaʼmo haneʼniye.

⁴ Aʼnemogimo apakaiʼapi apakufaleʼmo yagaiʼa oʼapategafa anauʼapimogigeʼmo yagaiʼa apategae. Ani kava huʼa vemogimo apakaiʼapi apakufaleʼmo yagaiʼa oʼapategafa aʼneʼapimogigeʼmo yagaiʼa apategae.

⁵ Mago yalavelaʼmoganimo magoke agufa gemo huʼanaeʼmo, laʼaote laʼaote hutaʼa maiʼnetaʼa neʼyaʼmo oʼnetaʼa mosiʼnetaʼaeʼmo nunumuʼmo huguʼae, huʼana hisaʼamoʼmo aise afinaʼmo anaote anaote huʼana havaeʼneʼanaeʼmo nunumuʼmo huteʼanaeʼmo halate magokepi lokaeʼana havaegaʼae. Lapakufaleʼmo alagepa hutapa yagaitapa olapatesageno Sataniʼa humi lapateteno lapayateʼmo aligiyanagi magokepiʼmo lokaetapa havaeyo.

⁶ Veleʼmo maiyo, huʼna huge aʼmo aliyo, huʼna huge nehuva gemo keʼaepa gemo nosuvaʼmonanafa ani kavaʼmo afaʼa hugae, huʼna nehuve.

⁷ Nagaemo maiʼnova kava huʼa muki ve anagaʼmo maisayafeʼmo nahauʼniye. Nahauʼniyaʼmonanafa Gotiʼa alu kava alu kavaʼmo huʼa maisaya agufa lokiyaʼamo magoke magoke vayaʼmo fikumo apamite apamite huʼniye.

⁸ Nagaemo veleʼmo oʼmaiʼnaya aʼne anagaʼmogitapaenagi aʼmo oʼaliʼnaya ve anagaʼmogitapaenagi kogu aʼneʼaifenagi huʼna hemenimo lapa paiʼnaeʼmo, neʼmauva kava hutapa lapaote lapaote hutapa maisaya kavaʼmo kanale kavaʼmo haneʼniye, huʼna lapa nepauve.

⁹ Lahapa nepauvaʼmonanafa lapakufaleʼmo afaʼa yagaitapa olapatesayana veleʼmo maige aʼmo alige hutapa maiyo fiku yanageno lahapaʼye hugiye.

¹⁰ Nagaemo veleʼmo maiʼnaya aʼne anagaʼmogitapaʼe aʼmo aliʼnaya ve anagaʼmogitapaʼefeʼmo lahapa paiʼnaeʼmo, Aʼnemogitapae, huʼna, anautapimogimo apataletapa oʼviyo.

¹¹ Aʼnemogimo anauʼapimogimo apataleʼa visayana uʼa alu veleʼmo oʼmaiʼa afaʼa maiyo. Afaʼa maisayafeʼmo ohapauʼnisiyana halate eʼa anauʼapimogiʼeʼmo magokepi lokaeʼa maiyo. Anauʼapimogitapae, huʼna, aʼnetapimo hapa faitapa oʼapataleyo. Nagaiʼnimo mani gemo nosuvaʼmonanafa Ala kava neʼmoʼa hu maleʼniye.

¹² Nagaemo hapa opaiʼnova vayaʼaifeʼmo hapa paigesuve. Ala kava neʼmoʼa hiyo, huno osuʼnifa nagaiʼnimo lahapa paiʼnaeʼmo, Mago konagatimoʼa aʼamoʼmo agesamo afino fatago osuʼnisiyaʼmoʼmo aʼaʼeʼmo magokepi lokaeʼana maisaʼafeʼmo hauʼnisiyaʼmoʼmo hafaino oʼatalesiya kavaʼmo haneʼniye.

¹³ Mago a kanomoʼa anauʼamoʼmo agesamo afino fatago osuʼnisiyana anauʼamoʼeʼmo magokepi lokaeʼana maisaʼafeʼmo hauʼnisiyaʼmoʼmo ataleno oʼvisiya kavaʼmo haneʼniye.

¹⁴ Apakesamo afiʼa fatago nehaya aʼnemogimo apakesamo afiʼa fatago osuʼnaya anauʼapimogi Gotiʼa hapa maesiyafeʼmo ma mopafi vayapatiʼmo apavaleʼa apaote apateʼnageʼa maiʼnae. Ani kava huʼa apakesamo afiʼa fatago nehaya anauʼapimogimo apakesamo afiʼa fatago osuʼnaya aʼneʼapimo Gotiʼa hapa maesiyafeʼmo apavaleʼa apaote apateʼnageʼa maiʼnae. Apavaleʼa apaote oʼapateʼnaesinana mafaʼnetapimo oʼaniʼyaʼapimo faiʼniya malaga mafaʼnegana huʼa maiʼnaesinaʼmonanafa mafaʼnetapimo apaote mafaʼnemo maiʼnae.

¹⁵ Maiʼnayaʼmonanafa apakesamo afiʼa fatago osuʼnaya vayaʼmogimo, lapataleta uta laoteʼmo maigesune, huʼa hisayana afaʼa uʼa maigae. Visageʼapaeʼmo apakesamo afiʼa fatago nehaya ve aʼnemogimo kalavusifiʼmo oʼmaiʼnayaʼmonanafa Gotiʼa alagepa huta magokepi lokaeta maisunafeʼmo keya aeno ge huʼniye.

¹⁶ Aʼnemogitapae, huʼna, lapakaemo, anautimogiʼeʼmo magokepi lokaeta maisunana apakufamo alita katita apatesupi, hutapa lapakesamo afiyo. Anauʼapimogitapae, huʼna, lapakaemo aʼnetiʼeʼmo magokepi lokaeta maisunana apakufamo alita katita apatesupi, hutapa lapakesamo afiyo.

¹⁷ Ala kava neʼmoʼa alu kava alu kavaʼmo hutapa maisayafeʼmo lokiyaʼamo lapamete lapamete huno lapamiʼniyanagi ani kavaʼmo hutapa maiyo. Gotiʼa lapakaefeʼmo keya aeno ge huʼniya afinaʼmo haiya kava huta maiʼnopi hutapa lapakesamo afitetapaeʼmo ani kavaʼmo hutapa maiyo. Mani keʼaepa gemo muki siosiʼale siosiʼaleʼmo maiʼnaya vayaʼaifeʼmo aliʼna apaya neʼmalove.

¹⁸ Gotiʼa keya aeno ge huʼniya afinaʼmo Yu vayaʼmogitapa lapakufamo ago lagauʼnisayana halate apakufamo olagauʼnaya vayakana hutapa oʼmaiyo. Gotiʼa keya aeno ge huʼniya afinaʼmo lapakufamo olagauʼnisayana lapakufamo olagaiyo.

¹⁹ Lagufamo lagauʼnisafi olagauʼnisafi afaʼa ina agufa kavaʼmo haneʼniye. Hogote kavaʼmo haneʼniyana Goti keʼaepa geʼamo akame nehuna kavaʼmo haneʼniye.

²⁰ Gotiʼa keya aeno ge huʼnigetapa eta maiʼnaya kava hutapa maiyo.

²¹ Gotiʼa keya aeno ge huʼnigetapaeʼmo afa vayaʼmo maiʼnetapa afa aliʼyaʼmo aliʼnaya vayaʼmo maiʼnafiye. Kanalene, hutetapa lahapausoli osiyo. Osugayaʼmonanafa hatu maeno lapatesigetapa afaʼa maisaya kaʼmo haneʼnisiyana ani kateʼmo utetapa nofitapimo hatu maetapa ataletapa afaʼa maiyo.

²² Ala kava neʼmo kalavusifiʼmo maiʼneʼa aliʼyaʼmo neʼaliya vayaʼaifeʼmo keya aeno ge huteno apakupi mafaʼnemo hatu maeno apateʼnigeʼa Ala kava neʼmo afa vayaʼamo maiʼnae. Kalaisiʼa afaʼa maiʼnaya vayaʼaifeʼmo keya aeno ge huteno nofi aeno apateʼnigeʼa nofiteʼmo maiʼneʼa aliʼyaʼamo neʼaliya vayaʼmo maiʼnae.

²³ Mukiʼamogitapae, huʼna, Kalaisiʼa alopa miyatetiʼmo ago miya faiʼniyanagi ma mopafi vayaʼmogi kalavusifiʼmo lapakupi mafaʼnemo oʼmaino.

²⁴ Konagaʼnimogitapae, huʼna, Gotiʼa keya aeno ge huʼnigetapa eta maiʼnaya kava hutapa Gotiʼeʼmo magokepiʼmo lokaeta maime maime viyo.

Aʼmo oʼalige veleʼmo oʼmaige huʼnaya vayaʼaifeʼmo huʼniya gemae

²⁵ Aʼmo oʼalige veleʼmo oʼmaige huʼnaya kavafeʼmo ge hutapa nafi geʼnae. Veleʼmo oʼmaige aʼmo oʼalige huʼnaya vayaʼaifeʼmo Ala kava netegatiʼmo mani keʼaepa gemo oʼaliʼnovaʼmonanafa Gotiʼa hau huno nateʼniya kavatetiʼmo lama gemo nehuva vekamo maiʼneʼnaeʼmo nagesamo afiteʼnaeʼmo lahapa nepauve.

²⁶ Hemenimo kana alisuna afinaʼmo afole aisiyafeʼmo nehiyaʼmofeʼmo nagesamo afiʼnaeʼmo, haiya kava hutapa maiʼnisafi ani kavakeʼmo hutapa maiyo.

²⁷ Veleʼmo maiʼnisayana apataletapa oʼviyo. Aʼmo aliʼnisayana hapa faitapa oʼapataleyo. Aʼmo oʼaliʼnisayana aʼmo oʼalitapa afaʼa maiyo.

²⁸ Mani gemo huvaʼmonanafa aʼmo alisayana hosu kavaʼmo afaʼa osugae. Mago veʼeʼmo magokepi lokaeʼa ohavaeʼnisaya aʼmafaʼnemogimo veleʼmo maisayana hosu kavaʼmo osugae. Veleʼmo maige aʼmo alige huʼnisaya vayaʼmogi ma mopafi maiʼneʼapaeʼmo hanageke yaʼmo aligae. Faitapa kasalo paesayafeʼmo nahauʼnigeʼnaeʼmo mani gemo lahapa nepauve.

²⁹ Konagaʼnimogitapae, huʼna, Geʼnimo aepaʼamo haneʼniyana kanatimo aupa afinaʼmo haneʼniye. Hemeni afinatetiʼmo aʼmo aliʼnisaya vayaʼmogimo aʼapieʼmo apakesa alaʼamo oʼafiʼa aʼmo oʼaliʼnaya vayakana huʼa maime maime visaya kavaʼmo haneʼniye.

³⁰ Ma mopafi kavafeʼmo yulagefa neʼaisaya vayaʼmogimo yulagefa noʼaiya vayakana huʼa maime maime visaya kavaʼmo haneʼniye. Ma mopafi kavafeʼmo apamogaga neʼaisaya vayaʼmogimo apamogaga noʼaiya vayakana huʼa maisaya kavaʼmo haneʼniye. Miya faiʼa aliʼnisaya vayaʼmogimo miya faiʼa oʼaliʼnaya vayakana huʼa maisaya kavaʼmo haneʼniye.

³¹ Ma mopafi kagemi yatefeʼmo aliʼyaʼmo neʼalisaya vayaʼmogimo ma mopafi yafekeʼmo apakesamo afiteʼa atafauʼa alagi huʼa oʼmaisaya kavaʼmo haneʼniye. Ma mopaʼe ma mopafi kavaʼeʼmo alagi ago hano hisiyafeʼmo hogo nehiye.

³² Lahapausoli osutapa afaʼa maisayafeʼmo nahauʼniye. Aʼmo oʼaliʼnaya vayaʼmogimo Ala kava neʼmo aliʼyaʼalefeʼmo, Ala kava neʼmoʼa amuse huno latesiyafeʼmo na kavaʼmo hugune, huʼa apakesamo neʼafiye.

³³ Neʼafiyaʼmonanafa aʼmo aliʼnaya vayaʼmogimo aʼneʼapimogimo amuse huʼa apatesayafeʼmo hapauʼnigeʼapaeʼmo ma mopafi yafekeʼmo apakesamo neʼafiye.

³⁴ Ani kava huʼa maiʼneʼapaeʼmo lole apakesamo neʼafiye. Veleʼmo oʼmaiʼnaya aʼmafaʼne anagaʼmogimo Ala kava neʼmo aliʼyaʼalefeʼmo apakesamo neʼafiye. Apakaemo apakufaʼe apauneʼapameʼeʼmo amiteʼa agaetefeʼmo eʼa apaote maisayafeʼmo hapauʼniyaʼmonanafa veleʼmo maiʼnaya aʼnemogimo ma mopafi kavafekeʼmo apakesamo afiteʼapaeʼmo anauʼapimogi amuse huʼa apatesayafeʼmo na kavaʼmo hugune, huʼa apakesamo neʼafiye.

³⁵ Mani gemo huʼna lapatafauʼna lapatesuvafeʼmo nosufa lahapa maesuvafekeʼmo nehuve. Lapakaemo Ala kava neʼmo aliʼyaʼalefeʼmo lole lapakesamo oʼafitapa atafautapa alagi hisayafekeʼmo nahauʼniye.

³⁶ Afoʼapimogitapae, huʼna, aʼmafaʼnetapimo kositeʼapaeʼmo veleʼmo uʼna maigesuve, huʼa nehisagetapaeʼmo haʼao, huʼna hisuvana agaetegamo hosu gemo huguve, hutapa hisayana hapauʼnisiya kavaʼmo afaʼa hugae. Kanalenageno veleʼmo uno maisiya kavaʼmo hosu kavaʼmo ohaneʼniye.

³⁷ Ohaneʼniyaʼmonanafa magoʼamogitapamo lokiya lapakesamo afitapaeʼmo, veleʼmo uʼa oʼmaigae, hutapa hisageʼapaeʼmo aʼmafaʼnetapimogi veleʼmo maigesuve, huʼa osisagetapa apavaletapa oʼapamisayana kanale kavaʼmo haneʼniye.

³⁸ Afoʼapimogimo apavaleʼa apamisaya kavaʼmo kanale kavaʼmo haneʼniyaʼmonanafa Afoʼapimogimo apavaleʼa oʼapamisaya kavaʼmoʼa aeno agaseʼniya kavaʼmo haneʼniye.

³⁹ Inagi mago a kanomoʼmo anauʼamoʼmo ofalino afaʼa maiʼniya afinaʼmo atafauno alagi huno maiʼniye. Anauʼamoʼmo falisigenoʼaeʼmo hatu maeno atesigeno uno hauʼnisiya veleʼmo afaʼa maigiyaʼmonanafa Kalisitini vekalekeʼmo maino.

⁴⁰ Veleʼmo uno maigiyaʼmonanafa veleʼmo uno oʼmaino afaʼa maisiyana magoʼe huno amogaga aigiye, huʼna nagesamo neʼafuve. Nagaeʼeʼmo Goti Aunemeʼamo aliʼnove, huʼna nagesamo neʼafuve.