1 Kolitiyani 6 - The Keyagana NT and 25 OT books

Goti mafaʼnemogimo konagaʼapimogi agoti huʼa neʼapataya kavafeʼmo huʼniya gemae

¹ Lapakaepatiʼmo magoʼamogi ge vaiteʼapaeʼmo konagaʼapimogi agoti huʼa neʼapatae. Haiya kava hutapa lapavagage osigetapa Goti apaote vayaʼalegamo apavalelita oʼutapa malaga vayaʼmo fatago huʼa noʼmaiya vayaʼmogi agotileʼmo apavalelitapa neʼvae.

² Goti apaote vayaʼamogimo muki ma mopafi vayaʼmo agoti huʼa apategae, hutapa oʼafiʼnafiye. Lapakaemo muki ma mopafi vayaʼmo agoti hutapa apategayaʼmofeʼmo aise kavaʼmo afaʼa alita fako osugafiye.

³ Lagaemo enisole vayaʼmo agoti huta apategaune, hutapa oʼafiʼnafiye. Ani kava hugunaʼmofeʼmo ma mopafi kavaʼmo magoʼe huta afaʼa alita fako hugune.

⁴ Hugunaʼmofeʼmo ma mopafi kavatefeʼmo agoti hutapa apatesayafeʼmo hutapaeʼmo na kava higetapa malaga vayaʼmo siosifiʼmo apaki ohaneʼniya vayaʼmogi agoti gemo neʼafiyategamo apavalelitapa neʼvae.

⁵ Lapakaepatiʼmo magoke vekamo ageteno afiʼniya vekamoʼmo konagatapimo kavaʼamo afaʼa alino fako huno atesiya vekamo oʼmaiʼnifiye. Lapavagage hino.

⁶ Vaehae, huʼna, lapakaemo afaʼa alita api aita noʼapatayaʼmonanafa apakesamo afiʼa fatago nosaya vayaʼaitegamo apavalelitapa neʼvae.

⁷ Lapakaitapimo agoti hutapa nelapatayaʼmofeʼmo agotimo aeta neʼagasesafi noʼagasesafigeno Sataniʼmo ago aeno lapakaseʼniye. Lapakaetegamo hosu kava nehisagetapaeʼmo afaʼa maisayaʼmoʼmo kanale hugiye. Lapakae yaʼmo kumayaʼmo alisagetapaeʼmo afaʼa maisayaʼmoʼmo kanale hugiye.

⁸ Kanale hugiyaʼmonanafa agoti hutapa neʼapatayaʼmofeʼmo konagatapimogitegamo hosu kavaʼmo nehae. Lapakaemo lapakaitapi konagatapimogi yaʼmo kumayaʼmo neʼaliye.

⁹ Hosu kavaʼmo nehaya vayaʼmogimo Gotiʼa yagaino neʼapateya koteʼmo uʼa haiʼa oʼmaigae, hutapa oʼafiʼnafiye. Lapakaitapieʼmo humi olapateyo. Kumai kavaʼmo nehaya vayaʼmofi aigofe gotiʼapimogi apakame nehaya vayaʼmofi alu vayaʼai aʼnemo apayate neʼaliya vayaʼmofi vemogi aʼnegana huʼa kumai kavaʼmo nehaya vayaʼmofi negafo negafo huteʼa magokepi lokaeʼa neʼmaiya kavaʼmoʼa kumai kavakana agufa kavaʼmo nehaya vayaʼmofi

¹⁰ kumayaʼmo neʼaliya vayaʼmofi hapaʼye nehiya vayaʼmofi aniʼmo neteʼa negi nagi gemo nehaya vayaʼmofi huʼa faipa huʼa neʼapataya vayaʼmofi koli yaʼmo aliʼa apamiteʼa kumayaʼmo neʼaliya vayaʼmogimofi huʼa Gotiʼa yagaino neʼapateya koteʼmo uʼa haiʼa oʼmaigae.

¹¹ Hogotetapa magoʼamogitapamo ani agufa vayaʼmo maiʼnae. Maiʼnayaʼmonanafa Kalaisiʼa ani faleno lapateʼnigeno Goti Aunemeʼamoʼa lapavaleno lapaote lapateʼnigeno Gotiʼa Ala kava netimo Yesu Kalaisi agiʼaletiʼe Aunemeʼaletiʼeʼmo, naulagaleʼmo fatago vayaʼmo maiʼnae, huno lapa paiʼniye.

Kumai kavafeʼmo huʼniya gemae

¹² Lapakaemo, Muki kavaʼaeʼmo afaʼa hisuna kavaʼageʼmo haneʼniye, hutapa nehayaʼmonanafa he, lapakaemo afaʼa hugayaʼmonanafa muki ani hisaya kavaʼamoʼmo alagi lahapa oʼmaesiya agufa kavaʼmo haneʼniye. Muki kavaʼamo afaʼa huguvaʼmonanafa fiku yanageno mago kavaʼmoʼa yagaino nategaiye, huʼna nehuve.

¹³ Lapakaemo hutapaeʼmo, Neʼyaʼmo lagupamo yaʼmo haneʼnigeno lagupamoʼmo neʼyaʼmo neʼne, hutapa nehayaʼmonanafa Gotiʼa neʼyaʼe vayaʼmogi apakupaʼeʼmo alagi alino hano huno atalegaiye. Gotiʼa kumai kavaʼmo hisunafeʼmo lagufamo alo huno olateʼnifa Ala kava netefekeʼmo alo huno lateteno Ala kava neʼmoʼa lagufaleʼmo yagaino latesiyafeʼmo alo huno lateʼniye.

¹⁴ Gotiʼa Ala kava neʼmo alino he tino ateʼniya kava huno himamuʼaletiʼmo lagaeʼeʼmo alino he tino lategaiye.

¹⁵ Lapakufamo Kalaisi agufafi alu ya alu yaʼamo haneʼniye, hutapa oʼafiʼnafiye. Haneʼniyaʼmofeʼmo Kalaisi agufafi haneʼniya yaʼamo aliʼna kumai a kanomo agufaʼeʼmo magokepi lokaeʼna atesufiye. Haʼao, alagi atalegeno hano hino.

¹⁶ Mago vekamoʼmo kumai a kanoʼeʼmo magokepi lokaeʼana havaesaʼagenoʼaeʼmo magoke anakufageʼmo alino hamalegaiye, hutapa oʼafiʼnafiye. Ani kavatefeʼmo Goti mukufi gemoʼa hunoʼaeʼmo, lole kanolaʼmoganimo magoke anakufageʼmo alino hamalegaiye, huno huʼniye.

¹⁷ Huʼniyaʼmonanafa mago vekamoʼmo Ala kava neʼeʼmo aiʼana lokaesaʼagenoʼaeʼmo agaeʼeʼmo magoke anauneʼanameʼmo alino hamalegaiye.

¹⁸ Kumai kavaʼmo hisaya kavategatiʼmo ataletapa lapaune heyo. Muki alu hosu kavaʼamo amega apakufaleʼmo kavaʼmo haneʼniyaʼmonanafa kumai kavaʼmo nehaya vayaʼmogimo apakaiʼapi apakufamo aliʼa hosu huʼa neʼatae.

^19-20 Lapakufamo aote Aunemeʼamo mono noʼamo haneʼniye, hutapa oʼafiʼnafiye. Gotiʼa Aunemeʼamo ago lapamiʼnigeno lapaipafiʼmo neʼmaiye. Lapakaemo lapakaitapi vayaʼmo oʼmaiʼnafa Yesu Kalaisiʼa lapakaemo ago miya faiʼniyaʼmofeʼmo lapaunelapamepatiʼe lapakufaletiʼeʼmo Goti agiʼalekeʼmo alita asaga hutapa ateyo.