1 Kolitiyani 5 - The Keyagana NT and 25 OT books

Siosi vekamoʼmo kumai kavaʼmo huʼniya kavafeʼmo huʼniya gemae

¹ Mago vayaʼmogimo lapakaepatiʼmo kumai kavafeʼmo faigoko gemo nagaetegamo huliʼa eʼnae. Mago vekamoʼmo afoʼamo aʼmo aliʼniye, huʼa huʼnae. Ani agufa kumai kavafeʼmo ma mopafi vayaʼmogi, nosuna kavane, huʼa nehae.

² Haiya kava higetapa lapakitapileʼmo alitapa asaga hutapa nelapatae. Himuʼnamu kavaʼmo osutapa lusi kava hutapa yulagefa aitetapa ani vekamo alita hafaita malaga atalesaya kavaʼmo haneʼniye.

³ Lapakaeʼeʼmo lokaeʼna oʼmaiʼnovaʼmonanafa nauneʼnameʼamoʼmo lapakaeʼeʼmo magokepi lokaeno maiʼnigeʼna lapakaeʼeʼmo magokepi lokaeʼna maiʼnegekana huʼna Ala kava neʼmo Yesu Kalaisi agiʼaletiʼmo hosu kavaʼalefeʼmo aliʼna fako huʼna ateʼnove.

^4-5 Alita anupa hutapa maiʼnisagenoʼaeʼmo nauneʼnameʼamo lapakaeʼeʼmo magokepi lokaeno maiʼnisigetapa Ala kava neʼmo Yesu Kalaisi himamuʼaletiʼmo ani vekamo alitapa Satani ayapiʼmo ateyo. Sataniʼa kayoʼmo amisigenoʼaeʼmo agufamoʼmo hauʼniya kavaʼamo hano hisigeno Ala kava neʼmo Yesu afinaʼmo Gotiʼa ani vekamo aunemeʼamo alino katino atesiyafeʼmo alitapa Satani ayapiʼmo ateyo.

⁶ Lapakitapileʼmo alita asaga hutapa nelapataya kavaʼmo alagi alagepa kavaʼmo nosae. Peleti maya falaovafiʼmo aise yaʼatomo aliʼa ateʼnageno uneno huno muki falaovamo alino ko sino neʼate, hutapa oʼafiʼnafiye.

⁷ Hosu kavaʼmoʼa alino ko sino neʼateya agufa yakana huno haneʼniyanagi alita ataletetapa saufa peleti mayamo ko nosiya peleti mayagana hutapa maiʼnetapa lapaote maiyo. Lapaote vayaʼmo maiʼnayaʼmofeʼmae. Kalaisiʼa hopa afinaʼmo Pasova sipisipitigana huno maiʼnenoʼaeʼmo ofalini kavatefeʼmo agaiʼa agufaʼamo lagaetefeʼmo Gotiʼmo amiʼniyaʼmofeʼmo hosu kavatapimo alitapa ataleyo.

⁸ Hopa afina kavaʼmo hisunafeʼmo hosu kavaʼmo osuge hanageke yaʼmo alita oʼapamige huteta ani kava huta atafa peleti mayamo alino ko sino neʼateya peleti mayamo alita atalegetao. Yaveyave laipamo aliʼneta lama gemo huteta ani kava huta ko nosiya peleti mayamo alita hopa afina kavaʼmo higetao.

⁹ Hogoteʼna avoʼmo kaeʼna lapamiʼnaeʼmo, kumai kavaʼmo nehisaya vayaʼeʼmo magokepi lokaetapa oʼmaiyo, huʼna avoʼmo ago kaeʼna lapamiʼnove.

¹⁰ Nagaemo ma mopafi vayaʼaifeʼmo nagesamo oʼafiʼnofa siosi vayaʼaifekeʼmo nagesamo afiteʼna ani avoʼmo kaeʼnove. Ma mopafi vayapatiʼmo kumai kavaʼmo nehaya vayanagi magoʼe yaʼmo alisayafeʼmo hapaʼye nehiya vayanagi kumayaʼmo neʼaliya vayanagi aigofe gotiʼapimogitefeʼmo mono nehaya vayanagi huʼa maiʼnayaʼmofeʼmo apakaeʼeʼmo magokepi lokaeta oʼmaita laote maisuna kaʼmo ohaneʼniye.

¹¹ Hemenimo avoʼmo kaeʼnaeʼmo, Kalisitini konagamo maiʼnone, huʼa nehaya vayaʼmogi kumai kavaʼmo nehafi hapaʼye nehifi aigofe gotiʼapimogitefeʼmo mono nehafi huʼa faipa huʼa neʼapatafi aniʼmo neteʼa negi nagi kavaʼmo nehafi koli yaʼmo aliʼa apamiteʼa kumayaʼmo neʼalifi huʼa neʼmaiya vayaʼeʼmo magokepi lokaetapa oʼmaiyo. Ani agufa vayaʼeʼmo magokepi lokaeta maiʼnetapa neʼyaʼmo oʼneyo.

^12-13 Malaga vayaʼmo aliʼna fako huʼna apatesuva agufa aliʼyaʼnimo ohaneʼniye. Gotiʼa alino fako huno apategaiyaʼmonanafa lapakaemo lapakaitapimo siosifiʼmo neʼmaiya vayaʼmo alita fako hutapa apatesaya kavaʼmo haneʼniyaʼmofeʼmo Lapakaemo ani hosu vekamo alita malaga hafaitapa ataleyo.