1 Kolitiyani 4 - The Keyagana NT and 25 OT books

Apa vayaʼaifeʼmo huʼniya gemae

¹ Lapakaemo lagaefeʼmo hutapaeʼmo, Apakaemo Kalaisi aliʼyaʼamo neʼaliya vayaʼmo maiʼnae. Aliʼyaʼmo afoʼamo muki yaʼaleʼmo vayaʼmogi neʼyagaiya kava huʼa apakaemo Gotiʼa alino fala ki maleʼniya geʼaleʼmo yagaiʼneʼa neʼapamiya vayaʼmo maiʼnae, hutapa lapakesamo afiyo.

² Aliʼyaʼmo afoʼamoʼmo alino amufa apamiʼniya vayaʼmogigeʼmo ani aliʼyateʼmo afaʼa yagaigae.

³ Lapakaeʼe mago ma mopafi vayaʼeʼmo hutapaeʼmo, alagepa aliʼyaʼmo neʼaliye, hutapa nehisafi hosu aliʼyaʼmo neʼaliye, hutapa nehisafi alita fako hutapa neʼnatesayana ina agufa kavaʼmo nehae, huʼna nagesamo neʼafuve. Inagi nagaiʼnimo, alagepa aliʼyaʼmo neʼaluve, huʼna osuge, hosu aliʼyaʼmo neʼaluve, huʼna osuge huteʼna aliʼyaʼnieʼmo aliʼna fako huʼna noʼatove.

⁴ Nagupi mafaʼnemoʼmo hunoʼaeʼmo, hosu kavaʼmo nehane, huno nosiyaʼmonanafa alagepa vekamo maiʼnove, huʼna afaʼa osuguve. Alino fako huno natesiya vekamo Ala kava nekeʼmo maiʼniye.

⁵ Maiʼniyaʼmofeʼmo Gotiʼa Ala kava neʼmo eminesiya afinaʼmo lekana pai maleʼniyaʼmofeʼmo afole oʼaiʼniyanagi hogotetapa alita fako hutapa oʼapateyo. Agaemo eminenoʼaeʼmo hanipiʼmo huʼa fala nekiya kavaʼe apaipa nekaliya kavaʼapiʼeʼmo afole yateʼmo alino afole aino ategaiye. Ani afinaʼmo Gotiʼa muki vayaʼmogimo aliʼyaʼapimo aliʼnaya yatefeʼmo, alagepa aliʼyaʼmo aliʼnae, huno hapa paitesigeʼapaeʼmo apamete apamete huʼa hetamaʼapimo aligae.

⁶ Konagaʼnimogitapae, huʼna, Lahapa maesuvafeʼmo muki mani gemo nagaiʼniʼe Apolosiʼefeʼmo laʼava gemo huʼna avoʼmo kae maleʼnove. Tisa vayaʼaifeʼmo lapakesamo afitetapaeʼmo Goti mukufiʼmo avoʼmo kae maleʼniya gemo ataletapa aeta oʼagasesayafeʼmo mani agufa laʼava gemo huʼna avoʼmo kae maleʼnove. Himuʼnamu gemo hutetapa mago tisa vekamo agiʼaleʼmo alita asaga hutapa atege mago tisa vekamo agiʼaleʼmo alita afepi atege hisaya agufa gemo osiyo.

⁷ Ina laʼmo aeto agufa vayaʼmo alino hamaleno lapateʼniye. Na agufa yaʼmo aliʼnaya yatapimo Gotiʼa olapamiʼniye. Haʼao, muki yatimo lamiʼniye, hutapa nehisayana na kava higetapaeʼmo olapamiʼniyesina agufa kavatefeʼmo lapakitapileʼmo alitapa asaga hutapa nelapatae.

Poloʼa ge hapaugekana agufa gemo huno hapa paiʼniya gemae

⁸ Nahauʼnimogitapae, huʼna, muki yaʼmo alisuna afinaʼmo afole oʼaiʼniyaʼmonanafa lapakaemo hogotetapa ago alitapa havai teʼnae. Malage hutapa kagemi yaʼapimo haneʼniya yahauve vayakana hutapa alita hamaleʼnae. Vaehae, huʼna, lapakaeʼeʼmo magokepi ohamaleʼnonaʼmonanafa hogote kini vayakana hutapa hamaleʼnae. Lapakaemo hogote kini vayaʼmo maisayafeʼmo nahauʼniye. Lapakaemo lama ge kini vayaʼmo maisageta lagaemo kini vayaʼmo hamaleteta lapakaeʼeʼmo magokepi lokaeta maigune.

⁹ Gotiʼa apa vayaʼamogitaeʼmo, henaga vayaʼmo maiʼnae, huno alino apave liʼniye, huʼna nagesamo neʼafuve. Lagaemo agoti huʼa apateteʼapaeʼmo vayaʼai apaulagaleʼmo faligae, huʼa huʼnageʼa maiʼnaya vayakana huta maʼnone. Gotiʼa alino afole aino lateʼnigeta ma mopafi vayaʼai apaulagaleʼe enisole vayaʼai apaulagaleʼeʼmo mago soʼmo nehaya agufa kavakana huta maiʼnonageʼapaeʼmo aulu lahaeʼa nelagae.

¹⁰ Lagaemo Kalaisitefeʼmo neʼmaunageʼapaeʼmo negi vayaʼmo maiʼnae, huʼa nehayaʼmonanafa lapakaemo Kalaisipiʼmo maiʼnetapaeʼmo agetetapa afiʼnaya vayaʼmo maiʼnae. Lokiya noʼvauna vayaʼmo maiʼnonaʼmonanafa ago lokiya neʼvaiya vayaʼmo maiʼnae. Vaehae, nahauʼnimogitapae, huʼna, Ala lapakimo nelapamiyaʼmonanafa lagaefeʼmo, ina agufa vayaʼmo maiʼnae, huʼa nehae.

¹¹ Laga tege anifeʼmo lahauge hosu kukenamo vaige huta maime maime eta hemeniʼeʼmo ani kava huta neʼmaune. Lamagige lamagige huʼa neʼmaigenoʼaeʼmo notimo ohaneʼnigeta nata vayaʼmo maiʼnone.

¹² Neʼyatimo nesuna yaʼmo alisunafeʼmo lokiya aliʼyaʼmo neʼalune. Huʼa faipa huʼa nelatagetaeʼmo, Gotiʼa lahapa maeno, huta nehune. Apaini huʼa nelatagetaeʼmo afaʼa maiʼnone.

¹³ Huʼa faipa huʼa nelategetaeʼmo falu fala gemo huta aeta atagaina huta hapa nepaune. Lagaemo atupa yaʼmo aliniʼuʼa yaga auʼa neʼatalaya yakana huta maiʼneta oʼaniʼya yakana huta maime maime eta hemeniʼeʼmo ani kava huta maiʼnone.

¹⁴ Lapavagage hisiyafeʼmo mani avoʼmo nokaovaʼmonanafa nahau nayamopafiʼmo nahauʼniya mafaʼneʼnimo maiʼnayaʼmofeʼmo alagepa hutapa afisayafeʼmo ehetapiye, huʼna mani avoʼmo nekaove.

¹⁵ Teni tauseniʼa tisa vayaʼmogi Kalaisipiʼmo yagaiʼa nelapataya tisa vayaʼmo maiʼnisayaʼmoʼmo afotapimoʼmo magokeʼageʼmo maiʼniye. Nagaemo Kalaisifeʼmo alagepa faigoko geʼaletiʼmo mafaʼneʼnimo aliʼna lapateteʼna Kalaisi Yesupiʼmo afotapimoʼnamo maiʼnove.

¹⁶ Maiʼnovaʼmofeʼmo lapao ke heʼnaeʼmo nehuva kavaʼmo nagetetapaeʼmo akame hutapa hiyo.

¹⁷ Lapakaemo ani kavaʼmo hisayafeʼmo Timotiʼa nahau nayamopafiʼmo nahauʼniya mafaʼneʼnimo aliʼna ateʼnovanageno lapakaetegamo ugiye. Agaemo Ala kava nepiʼmo maiʼnenoʼaeʼmo oʼataleno alagepa aliʼyaʼmo neʼaliye. Agaemo Kalaisi Yesupiʼmo maiʼneʼna nehuva kavafeʼmo nava gemo huno lapaipa lapakesamo alino he tino lapategaiye. Nagaemo mani kavafeʼmo muki haopalega siosiʼale siosiʼaleʼmo maiʼnaya vayaʼmo aliʼna apaya neʼmalove.

¹⁸ Lapakaepatiʼmo mago vayaʼamogimo huʼapaeʼmo, Poloʼa lagaetegamo oʼmegaiye, huʼa huteʼa himuʼnamu gemo nehayaʼmonanafa

¹⁹ Ala kava neʼmoʼa hauʼnisiyaʼmoʼmo aise afinaʼmo utesigeʼna lapakaetegamo afaʼa uguve. Uʼna avaʼyi huteʼnaeʼmo himuʼnamu gemo nehaya geʼageʼmo oʼafiguvaʼmonanafa Goti lokiyaʼamo apaipafiʼmo afole aiʼnifi, huʼna agegauve.

²⁰ Gotiʼa ani vayaʼai apaipafiʼmo yagaino neʼapatesiyaʼmoʼmo geʼagekeʼmo osuʼa Goti lokiyaʼaletiʼeʼmo alagepa kavaʼmo hugae.

²¹ Nagaemo kayoʼmo aliniʼna visufi nahau nayamopafiʼmo nahauʼninageʼna yuna naipamo aliniʼna visufigi na agufa kavafeʼmo lapauʼniye.