1 Kolitiyani 3 - The Keyagana NT and 25 OT books

Goti aliʼyaʼamo neʼaliya vayaʼaifeʼmo huʼniya gemae

¹ Konagaʼnimogitapae, huʼna, Nagaemo Goti Aunemeʼamoʼmo hauʼniya kavaʼmo akame nehaya vayaʼaifeʼmo hapa nepauva agufa gemo huʼna lahapa opaiʼnofa apakufamoʼmo hauʼniya kavaʼmo akame nehaya vayaʼaifeʼmo hapa nepauva agufa gemo huʼna lahapa paiʼnove. Lapakaemo aise afinaʼmo Kalaisipiʼmo maiʼnetapaeʼmo nute mafaʼnegana hutapa maiʼnae.

² Lapakaemo alopa vayaʼmogi neʼnaya agufa neʼyaʼmo nesayafeʼmo alo osutapa afaʼa maiʼnageʼnaeʼmo nuʼmo lapamiʼnove. Alo osutapa maiʼnetapaeʼmo hemeniʼeʼmo alo osutapa afaʼageʼmo maiʼnae.

³ Lapakufamoʼmo hauʼniya kavaʼmo akame huʼnayanagetapa hemeniʼeʼmo afaʼageʼmo akame nehae. Lapakaitapifiʼmo lapaipa kafa hapaege ge vaige alita fako hutapa alu vaya alu vayaʼmo maige hutapa maiʼnetapaeʼmo lapakufamoʼmo hauʼniya kavaʼmo akame nehutapa ma mopafi vayakana hutapa maiʼnae.

⁴ Mago vayaʼamogitapamo Polo vayaʼamo maiʼnone, hutapa huge mago vayaʼamogitapamo Apolosi vayaʼamo maiʼnone, hutapa huge hutetapaeʼmo lapakufamoʼmo hauʼniya kavaʼmo akame nehae.

⁵ Poloʼnamo ina laʼnamo maiʼnogeno Apolosiʼa ina laʼmo maiʼniye. Laʼagaemo Goti aliʼyaʼamo neʼaluʼa vekalaʼmo maiʼnoʼagetapaeʼmo laʼagaetetiʼmo lapakesamo afita fatago huʼnae. Ala kava neʼmoʼa laʼamiʼniya aliʼyaʼamo neʼaluʼae.

⁶ Nagaemo avina yaʼmo hakaleʼnogenoʼaeʼmo Apolosiʼa aniʼmo lakiʼniyaʼmonanafa Gotiʼa alino hageno ateʼniye.

⁷ Avina yaʼmo nehakaleya vekaʼe aniʼmo nelakiya vekaʼeʼmo ina agufa vekalaʼmo maiʼnaʼaʼmonanafa Gotikeʼmo alino hageno neʼateya vekamo ala agi vekamo maiʼniye.

⁸ Avina yaʼmo nehakalaya vayaʼe aniʼmo nelakiya vayaʼmogiʼeʼmo magoke agufa aliʼyaʼmo neʼaliyanageʼa haiya agufa kavaʼmo huʼa aliʼyaʼapimo neʼalisafigeʼa ani kava huʼa miyaʼapimo apamete apamete huʼa aligae.

⁹ Laʼagaemo Gotiʼeʼmo lokaetaʼa aliʼyaʼamo neʼaluʼagetapaeʼmo lapakaemo Goti hoyaʼagana hutapa maige noʼagana hutapa maige huʼnae.

¹⁰ Gotiʼa fikumo naha maeno namiʼnigeʼnaeʼmo hogoteno ageno alagepa huʼneno noʼmo nekiya vekagana huʼna maiʼneʼnaeʼmo faiʼna ateʼnova yateʼmo mago alu vayaʼmogimo noʼmo nekiye. Mukiʼamogimo, haiya kava huta noʼmo nekupi, huʼa ageteʼa alagepa huʼa yagaiʼa atesaya kavaʼmo haneʼniye.

¹¹ Yesu Kalaisiʼa noʼmo faiʼa neʼataya yafakana huno maiʼnigeʼna faiʼna ateʼnovanageʼa mago alu yafateʼmo noʼmo faiʼa atesaya yafaʼmo ohaneʼniye.

¹² Mago vayaʼmogimo goli yafatetiʼmofi siluva yafatetiʼmofi alagepa yafatetiʼmofi huʼa aliniʼeʼa faiʼna ateʼnova yafateʼmo noʼmo nekiye. Mago vayaʼmogimo yosaletiʼmofi hopaletiʼmofi hiʼyagofaletiʼmofi huʼa aliniʼeʼa no nekiye.

¹³ Kalaisi afinaʼmo afole aisigeʼapaeʼmo haiya kava huʼa noʼmo kiʼnisafigeno henagaʼamo afole yateʼmo alino afole aino ategaiye. Atamo lesiya afinaʼmo muki vayaʼai aliʼyaʼapimo alino apave ligiye. Atamoʼmo muki vayaʼai aliʼyaʼapimo amalageka hugiye. Alagepa aliʼyaʼmo aliʼnafi hosu aliʼyaʼmo aliʼnafi huno apamalageka hugiye.

¹⁴ Aliniʼeʼa noʼmo ki maleʼnisaya yaʼmo olesigeʼapaeʼmo miyaʼapimo aligae.

¹⁵ Lesiyaʼmoʼmo miyaʼapimo lageso hisigeʼa noʼmo kiʼnaya vayaʼmo afela oseʼa afaʼa maigayaʼmonanafa noʼamo nelegenoʼaeʼmo aeno akalo paetaleno aune heno uʼniya vekagana huʼa maigae.

¹⁶ Lapakaemo magokepi lokaeta maiʼnetapaeʼmo Goti mono noʼamo maiʼnageno Goti Aunemeʼamoʼmo lapakaepiʼmo maiʼniye, hutapa oʼafiʼnafiye.

¹⁷ Mago vekamoʼmo Goti mono noʼamo heno halagape vaino atalesigenoʼaeʼmo Gotiʼa alino agoʼya lagauno atalegaiye, Goti mono noʼamo aote noʼmo haneʼniyaʼmofeʼmae. Lapakaemo ani aote mono noʼamo maiʼnae.

¹⁸ Lapakaitapieʼmo humi olapateyo. Lapakaepatiʼmo mago vekamoʼmo ma mopafi vayaʼmogi afiteʼa ageʼnaya agufa gemo afitenoʼaeʼmo, ageteʼna afiʼnova vekamo maiʼnove, huno agesamo neʼafisiyana ageteno afiʼniya geʼamo ataleteno, negi vekamo maiʼnove, huno hino. Huno hisiyana lama geleʼmo ageteno afiʼniya vekamo hamalegaiye.

¹⁹ Ma mopafi vayaʼmogi afiteʼa ageʼnaya kavaʼmo Goti aulagaleʼmo negi nagi kavaʼmo haneʼniye. Ani kavatefeʼmo Goti mukufi gemoʼmo hunoʼaeʼmo, Afiteʼa ageʼnaya vayaʼmogimo avame name kavaʼmo nehagenoʼaeʼmo Gotiʼa aneʼaifiʼmo hegekana huno neʼapatafaiye, huno huʼniye.

²⁰ Magoʼe gemo Goti mukufiʼmo haneʼniya gemoʼa hunoʼaeʼmo, Ala kava neʼmoʼa afiteʼa ageʼnaya vayaʼmogimo apakesamo neʼafiya kavaʼmo agetenoʼaeʼmo, afaʼa inagufa yane, huno nehiye, huno huʼniye.

²¹ Huʼniyaʼmofeʼmo lapakaemo vayaʼaifeʼmo amuse osiyo. Muki yaʼe vayaʼeʼmo lapakaitapi yaʼmo haneʼniye.

²² Poloʼagi Apolosiʼagi Pitaʼagi ma mopagi ofaliʼa afaʼa neʼmaiya kavanagi nefaliya kavanagi hemeni afinanagi afole aisiya afinanagi muki yanagi huno lapakaitapi vayaʼe yaʼeʼmo haneʼniye.

²³ Lapakaemo Kalaisi vayaʼamo maiʼnageno Kalaisiʼa Goti vekaʼamo maiʼniye.