1 Kolitiyani 2 - The Keyagana NT and 25 OT books

Poloʼa Kalaisiʼmo malipu yosaleʼmo nili aiteʼa aliʼa he tiʼa ateʼnaya kavafeʼmo huʼniya gemae

¹ Konagaʼnimogitapae, huʼna, Nagaemo Gotitegatiʼmo aliʼnova gemo aeʼna hakalo huʼna lahapa paisuvafeʼmo lapakaetegamo uʼnaeʼmo muki geʼamo alagepa huʼa afiʼneʼa nehaya vayaʼmogimo nehaya agufa gemo huʼna afiteʼna ageʼnova geʼniletiʼmo lahapa opaiʼnove.

² Hogoteʼna naipafiʼmo, apakaeʼeʼmo uʼna magokepi lokaeʼna maiʼneʼnaeʼmo muki kavafeʼmo nage kaniʼna ataleʼneʼna Yesu Kalaisifekeʼmo nagesamo afiʼneʼna Yesu Kalaisiʼmo malipu yosaleʼmo nili aiteʼa aliʼa he tiʼa ateʼnaya kavafekeʼmo nagesamo afiʼneʼna aeʼna hakalo huguve, huʼna lokiya vaiʼna nagesamo afiʼnove.

³ Nagaemo lapakaetegamo uʼnaeʼmo lokiya oʼvaiʼna koli nehuʼnaeʼmo lusi kava huʼna atete huʼna maiʼnove.

⁴ Nagaemo ma mopafi vayaʼmogi afiteʼa ageʼnaya geletiʼmo apakesamo nefaiya agufa geletiʼmo ge osuge aeʼna hakalo huʼna lahapa opaige huʼnovaʼmonanafa nagaemo lahapa nepaugenoʼaeʼmo Goti Aunemeʼamoʼmo himamuʼaletiʼmo lapaipafiʼmo alino lapave liʼnigetapaeʼmo, alagi lama gemo haneʼniye, hutapa huʼnae.

⁵ Lapakaemo afiteʼa ageʼnaya vayaʼmogi nehaya agufa geʼapieʼmo lapakesamo afitapaeʼmo, nahau vaigiye, hutapa osutapa Goti himamuʼaekeʼmo lapakesamo afita fatago nehutapaeʼmo, nahau vaigiye, hutapa hisayafeʼmae.

Gotiʼa afiteno ageʼniya kavafeʼmo huʼniya gemae

⁶ Ani agufa gemo nehayaʼmonanafa alopa vayaʼaifeʼmo afiteta ageʼnona geletiʼmo hapa nepaune. Ma mopafi vayaʼmogi afiteʼa ageʼnaya agufa geletiʼmo hapa opaige ma mopafiʼmo maiʼneʼa yagaiʼa neʼapataya vayaʼmogi afiteʼa ageʼnaya agufa geletiʼmo hapa opaige nehune. Henagaʼamo apakaemo ina agufa vayaʼmo maigae.

⁷ Hapa nopaunaʼmonanafa Gotiʼa alino fala ki maleʼniyanageʼa afaʼa oʼagesaya geʼaletiʼmo Gotiʼa afiteno ageʼniya geletiʼmo hapa nepaune. Gotiʼa ma mopamo alo osuʼnenoʼaeʼmo ha le konali yaʼamo alisunafeʼmo ani gemo hu maleʼniye.

⁸ Muki ma mopafiʼmo maiʼneʼa yagaiʼa neʼapataya vayaʼmogimo ani afiteno ageʼniya geʼamo alagi oʼafiʼnae. Afiʼnaesinana ha le konali Ala kava neʼmo malipu yosaleʼmo nili aiteʼa aliʼa he tiʼa oʼateʼnaesine.

⁹ Apakaemo oʼafiʼnayaʼmonanafa avoʼmo kae maleʼniya gemoʼa hunoʼaeʼmo, Gotiʼa agaefeʼmo hapau apayamopafiʼmo hapauʼniya vayaʼmogi alisayafeʼmo muki vayaʼmo alo huno apateʼniya yaʼmo apaulagafatiʼmo oʼagege apakesafatiʼmo oʼafige apaipafiʼmo afole oʼaige huʼniya yaʼmo haneʼniye, huno huʼniye.

¹⁰ Muki vayaʼmogimo Oʼageʼnayaʼmonanafa Gotiʼa Aunemeʼaletiʼmo alino lave liʼniye. Goti Aunemeʼamokeʼmo Goti agesafiʼmo fala kino haneʼniya geʼamo neʼageyaʼmofeʼmae.

¹¹ Vayaʼmogimo mago vekamo agesamo neʼafiya kavaʼamo noʼagayaʼmonanafa agaiʼa aunemeʼamokeʼmo neʼage. Ani kava huʼa vayaʼmogimo Gotiʼa agesamo neʼafiya kavaʼamo noʼagayaʼmonanafa agaiʼa Aunemeʼamokeʼmo neʼage.

¹² Lagaemo Gotiʼa fiku laha maeno lamiʼniya yaʼmo agesunafeʼmo ma mopafi vayaʼai apauneʼapameʼmo oʼaliʼnopa Gotitegatikeʼmo Aunemeʼamo aliʼnone.

¹³ Lagaemo ma mopafi vayaʼmogi magoke magoke gemo aliʼa laya maleʼnaya geʼaletiʼmo ge osuta Goti Aunemeʼamoʼmo magoke magoke gemo alino lamitenoʼaeʼmo alino laya maleʼniya geʼaletiʼmo ge nehune. Lagaemo apauneʼapametefeʼmo Goti Aunemeʼamoʼmo alino lamiʼniya geletiʼmo alita apaya neʼmalone.

¹⁴ Goti Aunemeʼamo oʼaliʼnisaya vayaʼmogimo Goti Aunemeʼamoʼmo alino neʼapamiya geʼaeʼmo ohapauʼnigeʼa noʼaliye. Apakaemo huʼapaeʼmo, negi nagi gemae, huʼa apakesamo neʼafiye. Aunemeʼaletikeʼmo afiʼa aeto hisaya agufa gemo haneʼniyaʼmofeʼmo afaʼa afiʼa aeto osugae.

¹⁵ Afaʼa oʼafigayaʼmonanafa Goti Aunemeʼamo aliʼnaya vayaʼmogigeʼmo muki geʼamo afiteʼa aliʼa fako nehayaʼmonanafa afa vayaʼmogimo afaʼa afiʼa aliʼa fako osugae.

¹⁶ Ani kavatefeʼmo Goti geʼamoʼa hunoʼaeʼmo, Ina lagimo Ala kava neʼmoʼa agesa neʼafiya agesamo ageteʼa afaʼa aliʼa aya malegae, huno huʼniye. Aliʼa aya malesaya agufa vayaʼmo alagi oʼmaiʼnayaʼmonanafa lagaemo Kalaisi aipa agesamo aliʼnone.