1 Kolitiyani 16 - The Keyagana NT and 25 OT books

Ofalini monimo malesaya kavafeʼmo huʼniya gemae

¹ Hemenimo Yuta kotega apaote vayaʼmo hapa maesiya ofalini monieʼmo ge hugesuve. Galesiya kotega siosiʼale siosiʼaleʼmo maiʼnaya vayaʼaifeʼmo, hiyo, huʼna hapa paiʼnova agufa gemo huʼna hiyo, huʼna lapa nepauve.

² Alisaya monifatiʼmo hogote afinaʼmo sateʼae sateʼaeʼmo lapamete lapamete hutapa alita fako hutapa Gotiʼa na magiʼmo lapamiʼnisifi ani kava hutapa alita fako hutapa maleme maleme viyo. Esugetapaeʼmo ofalini monieʼmo kahauya hutapa alita anupa hutapa oʼmalesayafeʼmo hemenigeʼmo malege malege hutapa maiyo.

³ Nagaemo lapakaetegamo uʼna avaʼyi huteʼnaeʼmo lekana paitapa apateʼnisaya vayaʼmo avoʼmo kaeʼna apamiteʼna aliʼna apatesugeʼa ofalini monimo aliniʼa Yulusalemu taonifiʼmo ugae.

⁴ Inagi nagaegiʼeʼmo visuna kaʼmo hanesiyana nagaegiʼeʼmo ugune.

Poloʼa hisiya kavafeʼmo huʼniya gemae

⁵ Nagaemo Masetoniya kotegamo uʼna aeʼna agaseʼna lapakaetegamo uguve. He, hogoteʼna Masetoniya kotegamo uʼna aeʼna agaseʼna uguve, huʼna nagesamo neʼafuve.

⁶ Uʼna lapakaeʼeʼmo magoʼe afinaʼmo maiteʼna visufi yasimo alino hano hutesigeʼnaeʼmo visufi huʼna afaʼa oʼafiʼnove. Lapakaemo lapataleʼna alu kotega visuva afinaʼmo afaʼa naha maegae.

⁷ Hemenimo uʼna lapakaeʼeʼmo aise afinaʼmo maisuvafeʼmo oʼnahauʼniye. Gotiʼa henagaʼamo he, huno hisigeʼnaeʼmo uʼna lapakaeʼeʼmo yatala afinaʼmo maiguve.

⁸ Mani Efasasi taonifiʼmo maite maite huliʼna neʼvisugenoʼaeʼmo Petikosi afinaʼmo afole aitesigeʼnaeʼmo ataleʼna uguve.

⁹ Maniletiʼmo asole vayaʼmogi nagaefeʼmo kame huʼa neʼnataya vayaʼmo maiʼnayaʼmonanafa Gotiʼa kaʼmo valino nateʼniyanageʼna magoʼe huʼna lusi aliʼyaʼmo alisuva kavaʼmo huʼniye.

¹⁰ Ala kava neʼmo aliʼyaʼamo neʼaluva kava huno Timotiʼa aliʼyaʼmo neʼaliyaʼmofeʼmo lapakaetegamo uno avaʼyi hisigetapaeʼmo koli hisiya agufa kavaʼmo osiyo.

¹¹ Fiku yanageno mago vekamoʼmo hunoʼaeʼmo, ina agufa vekamo maiʼniye, huno huteno akameʼyamo amigiyanagi ha maegenoʼao nagaetegamo alagepa huno eno. Agaeʼe mago konagatimogiʼeʼmo aiʼa atagi neʼa esayaʼaeʼmo apakava neʼmauve.

¹² Konagatimoʼmo Apolosifeʼmo ava gemo haneʼniye. Nagaemo agaefeʼmo, konaga vayatiʼeʼmo Kolitiyani taonifilagamo uvo, huʼna ha paiʼnogenoʼaeʼmo hemenimo ohauʼniyaʼmonanafa kaʼmo hanesiya afinaʼmo afaʼa ugiye.

¹³ Yagaitapa maiyo. Goti vayaʼamogimo apakesamo afiʼa fatago nehaya gelefeʼmo he titapa lokiya vaitapa maiyo. Alopa vayatama vayakana hutapa lokiya vaitapa maiyo.

¹⁴ Muki kavaʼmo nehutapaeʼmo lapau lapayamopafiʼmo lapaino.

¹⁵ Lapakaemo Setefanasi afamo anagaʼamo ago apakeʼnae. Galiki kotegamo hogoteʼa Goti mafaʼnemo hamaleteʼapaeʼmo apakaiʼapiekeʼmo apakesamo oʼafiʼa apaote vayaʼmo hapa maesayafeʼmo lusi aliʼyaʼmo neʼaliye.

¹⁶ Konagaʼnimogitapae, huʼna, lapao ke hovanagi, ani agufa vayaʼai apaiyafiʼe apakaeʼeʼmo magokepi lokaeʼa aliʼyaʼmo neʼaliya vayaʼai apaiyafiʼeʼmo maiʼnetapa apakame hiyo.

¹⁷ Lapakaemo nagaetegamo afaʼa oʼmeʼnayaʼmofeʼmo nahau nehugeʼapaeʼmo Setefanasiʼagi Fotiyunetasiʼagi Akaikasiʼagi huʼa nagaetegamo eʼnageʼnaeʼmo namogaga aiʼnove.

¹⁸ Naipamo aliʼa falu huʼa nateʼnaya kava huʼa lapaipamo aliʼa falu huʼa lapateʼnae. Ani agufa vayaʼaifeʼmo, alagepa vayaʼmo maiʼnae, hutapa hutetapa geʼapimo afiyo.

Ge apamamaeno ge huʼniya gemae

¹⁹ Mani Esiya kote siosiʼale siosiʼaleʼmo maiʼnaya vayaʼmogimo ge lapamamaeʼnae. Akuvilaʼe Pilisilaʼeʼmo noʼanifiʼmo aliʼa anupa huʼa mono nehaya siosi vayaʼmogiʼeʼmo magoʼe huʼa ge lapamamaeʼnae.

²⁰ Muki manileʼmo maiʼnaya konagamogiʼeʼmo ge lapamamaeʼnae. Lapakaemo magoke magoke hutapa konagatapimo ge apamamaeteta hapaetapa neyo.

²¹ Hemenimo nagaemo Poloʼnamo avoʼmo nekaya kayoʼmo aliʼneʼna, ge lapamamaeʼna gemo huʼna avoʼmo nekaove.

²² Ala kava nefeʼmo hapau apayamopafiʼmo nohapaiya vayaʼmo Gotiʼa alagi apatalesigeʼa afela heyo. Ala kava netimo emikeno.

²³ Ala kava neʼmo Yesuʼa fikumo lapa maeno lapamino.

²⁴ Mukiʼamogitapaeʼmo Kalaisi Yesupiʼmo nahau nayamopafiʼmo nahauʼniye.