1 Kolitiyani 14 - The Keyagana NT and 25 OT books

Goti Aunemeʼamoʼmo Goti aliʼyaʼamo alisayafeʼmo hogote yaʼmo neʼapamiya kavafeʼmo huʼniya gemae

¹ Lapau lapayamopafiʼmo lapausiya kavaʼmo alisayafeʼmo lapaya mukiki hutapa vegala aelitutapa atafaiyo. Lapakaemo Goti Aunemeʼamoʼmo neʼapamiya himamuʼamo Goti aliʼyaʼamo alisaya himamuʼamo alisayafeʼmo lapaʼye hino. Hogotetapa Gotitegati gemo alinitetapa aeta hakalo hutapa hapa paisaya himamuʼamo alisayafeʼmo lusi kava huno lapaʼye hino.

² Alu apake alu apakemo neʼaiya vayaʼmogi afisaya agufa gefatiʼmo nosayaʼmofeʼmo vayaʼaifeʼmo ge nosafa Gotifekeʼmo ge nehae. Apakaemo alino fala ki maleʼniya gemo Goti Aunemeʼaletiʼmo aliʼa afole aiʼa ateteʼa hapa nepaiye.

³ Hapa nepaiyaʼmonanafa Gotitegati gemo alini eʼa aeʼa hakalo huʼa hapa nepaiya vayaʼmogimo aliʼa lokiya vaiʼa apatege alagepa kavaʼmo hisayafeʼmo aliʼa he tiʼa apatege hanageke yaʼmo neʼaliya vayaʼmo hapa maege nehae.

⁴ Alu apake alu apakemo neʼaiya vayaʼmogi apakaiʼapigeʼmo hapa neʼmayaʼmonanafa Gotitegati gemo alini eʼa aeʼa hakalo huʼa hapa nepaiya vayaʼmogimo siosi vayaʼmo hapa neʼmae.

⁵ Mukiʼamogitapamo alu lapake alu lapakemo aisayafeʼmo nahauʼniyaʼmonanafa mukiʼamogitapamo Gotitegati gemo alinitetapa aeta hakalo hutapa hapa paisayafeʼmo magoʼe huno nahauʼniye. Alu apake alu apakemo neʼaiya vayaʼmogimo siosi vayaʼmo hapa maesayafeʼmo aliʼa afe leʼa hapa opaisageʼapaeʼmo Goti geʼamo aeʼa hakalo huʼa hapa nepaiya vayaʼmogimo aeʼa neʼapakasae.

⁶ Konagaʼnimogitapae, huʼna, Nagaemo lapakaetegamo uʼna avaʼyi huteʼnaeʼmo alu nage alu nagemo aisuvana haiya kava huʼna lapa maegauve. Lapa oʼmaegauvaʼmonanafa Gotiʼa alino nave liʼniya gemo lapa paisufi afisaya agufa gemo huʼna lapa paisufi Gotitegatiʼmo geʼamo aliʼna aeʼna hakalo huʼna lapa paisufi aliʼna lapaya malesufi huʼnisuvana lapa oʼmaegauve.

⁷ Mago afaʼa maisiya yaʼamo ohaneʼniya yateʼmo amaginageno age aiʼniya ageʼe gitamo amaginageno age aiʼniya ageʼeʼmo haneʼniye. Alu age alu agemo oʼaisiyana haiya kava huta agemo afita aeto hugune.

⁸ Ani kavaʼmo huno pikulimoʼa alagepa huno age oʼaisiyana kamemo hisaya vayaʼmo alo osugae.

⁹ Ani kavaʼmo hutapa afisaya agufa apakefatiʼmo hapa opaisayaʼmoʼmo haiya kava huʼa afigae. Getapimo afaʼageʼmo uno kasaegaiye.

¹⁰ Ma mopafi vayaʼmogimo alu apake alu apakemo neʼaigenoʼaeʼmo muki ani neʼaiya apakeʼamoʼmo aepaʼamo haneʼniye.

¹¹ Mago vekamoʼmo hisiya gemo oʼafiʼnaeʼmo, alu nofi vekamo maiʼniye, huʼna hisugenoʼaeʼmo nagaefeʼmo alu nofi vekamo maiʼniye, huno hugiye.

¹² Lapakaemo Goti Aunemeʼamoʼmo alino neʼapamiya himamuʼamo Goti aliʼyaʼamo alisaya himamuʼamo alisayafeʼmo lapaya mukiki nehayaʼmofeʼmo hogotetapa muki siosi vayaʼmo hapa maesaya yaʼmo aliʼnetapaekeʼmo hapa maeyo.

¹³ Nehayaʼmofeʼmo alu apake alu apakemo neʼaiya vayaʼmogimo huʼapaeʼmo, ani gemo aliʼna afe leʼna hisuvafeʼmo himamukamo namiyo, huʼa nunumuʼmo hiyo.

¹⁴ Alu nagemo aiʼna nunumuʼmo hisuvana nauneʼnameʼmoʼa nunumuʼmo nehiyaʼmonanafa nagesamoʼa alagamo alino afole aino oʼatesigeno apakesafiʼmo alagamo oʼaegaiye.

¹⁵ Oʼaegaiyaʼmofeʼmo na agufa kavaʼmo huguve. Nauneʼnamepatiʼe nagesafatiʼeʼmo nunumuʼmo huguve. Nauneʼnamepatiʼe naipa nagesafatiʼeʼmo yokemo huguve.

¹⁶ Lapaunelapameʼekeʼmo nunumuʼmo hisageʼapaeʼmo haiya kava huʼa saufa vayaʼmo apakesamo afiʼa fatago hugefeʼmo nehisaya vayaʼmogimo nunumuʼmo hisaya gelefeʼmo he lama ge, huʼa afaʼa hugae. Getapimo oʼafigayaʼmofeʼmae.

¹⁷ Lapakaemo Gotifekeʼmo alagepa nunumuʼmo hutapa hao ke nehayaʼmonanafa neʼafiya vayaʼmo hapa noʼmae.

¹⁸ Nagaemo alu nage alu nagemo aiʼna aeʼna lapakaseʼnovaʼmofeʼmo Gotifeʼmo hao ke nehovaʼmonanafa

¹⁹ nagaemo siosi vayaʼmo aliʼa anupa huʼa maisaya yateʼmo naya magokayagaʼa kefatiʼmo afisaya agufa gemo huʼna hapa paisuvafeʼmo nahauʼniyaʼmonanafa muki teni tauseniʼa kefatiʼmo alu nage alu nagemo aiʼna hapa paisuvafeʼmo oʼnahauʼniye.

²⁰ Konagaʼnimogitapae, huʼna, mafaʼne anagaʼmogimo neʼafiya agufa lapakesamo oʼafiyo. Vayaʼaitegamo hosu kavaʼmo osisayafeʼmo aise mafaʼnegana hutapa maiyo. Maigayaʼmonanafa gemo aepaʼamo afisayafeʼmo alopa vayakana hutapa maiyo.

²¹ Ala kava neʼmoʼa keʼaepa geʼamo mukufiʼmo avoʼmo kae maleʼniya gemoʼa hunoʼaeʼmo, Nagaemo mani vayaʼaifeʼmo alu apakemo neʼaiya vayaʼai apavayafati gemo alu haopalegamo maiʼnaya vayaʼai apavayafatiʼmo hapa paiguvaʼmonanafa ani gemo oʼafigae, huno huʼniye.

²² Huʼniyaʼmofeʼmo Gotiʼa apakesamo afiʼa fatago nehaya vayaʼaifeʼmo alu apake alu apakefatiʼmo hapa painoʼaeʼmo, amuse huʼna nolapatove, huno alino apave nolifa apakesamo afiʼa fatago nosaya vayaʼmo alu apakefatiʼmo alino apave neliye. Apave neliyaʼmonanafa Gotitegati gemo alini eʼa aeʼa hakalo huʼa hapa nepaiya vayaʼmogi apakesamo afiʼa fatago nosaya vayaʼaifeʼmo hapa nopaifa apakesamo afiʼa fatago nehaya vayaʼaifekeʼmo hapa nepaiye.

²³ Muki siosi vayaʼamo eʼa aliʼa anupa huʼa maiʼneʼapaeʼmo alu apake alu apakemo neʼaisageʼapaeʼmo saufamo apakesamo afiʼa fatago hugefe nehisaya vayaʼmogimofi apakesamo afiʼa fatago osuʼnaya vayaʼmogimofi huʼa eʼa afiteʼapaeʼmo negi nagi gemo nehaya vayaʼmo maiʼnae, huʼa hugae.

²⁴ Hugayaʼmonanafa alita anupa huta maiʼnetapaeʼmo mago vayaʼamogitapamo Gotitegati gemo alita aeta hakalo hutapa hapa nepaisagenoʼaeʼmo mago agesa afino fatago osuʼnisiya vekamoʼmofi saufamo agesa afino fatago hugefeʼmo nehisiya vekamoʼmofi huno eno neʼafisigenoʼaeʼmo Goti geʼamoʼmo aipafiʼmo kevegana huno haeteno agoti huno atesigenoʼaeʼmo hosu kavaʼamo agegaiye.

²⁵ Aipafiʼmo fala kiʼnisiya kavaʼamo aulagaleʼmo afole aisigeno agetenoʼaeʼmo mopafiʼmo asagauno aiteno Gotifeʼmo mono nehunoʼaeʼmo, Lama gemo nehuve, huno, Gotiʼa lapakaeʼeʼmo magokepi lokaeno neʼmaiye, huno aeno hakalo huno lapa paigiye.

Mono kavaʼmo alino api aino ateʼniya gemae

²⁶ Konagaʼnimogitapae, huʼna, mani gemo nehuvaʼmofeʼmo na kava hisaya kavaʼmo haneʼniye. Afiyo, lapakaemo alita anupa huta maiʼnetapaeʼmo mukiʼamogitapamo lapamete lapamete hutapa ge nehae. Mago vekamoʼmo yokemo lekana paino huge mago vekamoʼmo alino lapaya malege mago vekamoʼmo Gotiʼa alino ave liʼniya gemo lapa paige mago vekamoʼmo alu age aige mago vekamoʼmo alu agemo alino afe leno lapa paige hutapa neʼmaiye. Lapakaemo ika ika kavaʼmo osutapa siosi vayaʼmo alita lokiya vaitapa apatesayafeʼmo muki kavaʼmo alita alagepa hutapa hiyo.

²⁷ Alu apakemo neʼaiya vayaʼmogimo geʼapifatiʼmo hisayafeʼmo huʼapaeʼmo lole vekalaʼmofi loleʼe magoʼe vayaʼmogimofi huʼa ge hute hute hisagenoʼaeʼmo magoke vekamoʼmo ani gemo alino afe leno lapa paigiye.

²⁸ Mago vekamoʼmo ani gemo alino afe leno lapa paisiya vekamo oʼmaisigenoʼaeʼmo alu age neʼaiya vekamoʼmo siosi vayapiʼmo ge osuno afaʼa maiʼneno agaiʼa aipafiʼmo huge Gotifeʼmo huge huno maino.

²⁹ Lole vekalaʼmofi loleʼe magoʼe vayaʼmogimofi huʼa Gotitegati gemo alini eʼa aeʼa hakalo huʼa hapa nepaiya vayaʼmogimo lapa paisaya gemo alita fako hutapa afiyo.

³⁰ Gotiʼa anifiʼmo mago maiʼnisiya vekaeʼmo mago gemo ha paisigenoʼaeʼmo ge hisiya vekamoʼmo ge huno hano hutesigenoʼaeʼmo alu vekamoʼmo lapa paigiye.

³¹ Mukiʼamogitapamo Gotitegatiʼmo alisaya gemo aeta hakalo hutapa hapa paite hapa paite hugae. Hisageʼapaeʼmo mukiʼamogimo alagepa huʼa afiteʼa alige lokiya vaiʼa maige hugae.

³² Gotitegati gemo alini eʼa aeʼa hakalo huʼa hapa nepaiya vayaʼmogimo apakaiʼapi apauneʼapameteʼmo neʼyagaiye.

³³ Ani kavatefeʼmo Gotiʼa apano aeteʼa apavamusa gemoʼmo nehiya agufa kavaʼmo aepa vekamo oʼmaiʼnifa alagepa huʼa magokepi lokaeʼa maisaya kavaʼmo aepa vekamo maiʼniye.

³⁴ Lapakaemo muki siosiʼale siosiʼaleʼmo alita anupa huta maisaya afinaʼmo aʼne anagaʼmogimo ge osuʼa afaʼa maigae. Aʼnemogimo ge osuʼa afeʼalumelaga maisaya kavaʼmo haneʼniye. Keʼaepa gemoʼmo ani agufa gemo huʼniye.

³⁵ Aʼnemogimo mago gemo loka huʼa ge huʼa apafi gesayafeʼmo hisayana uʼa noʼapifilagamo anauʼapimogifeʼmo apafigegae. Aʼnemogimo siosi vayaʼmo aliʼa anupa huʼa maisayapiʼmo ge hisayana apavagage hisiya kavaʼmo haneʼniye.

³⁶ Lapakaemo Goti gemo aepa vayaʼmo maiʼnafiye. Goti geʼamo lapakaetefekeʼmo eʼnifiye.

³⁷ Lapakaepatiʼmo magoʼamogimo, Gotitegati gemo aliniteta aeta hakalo huta hapa nepauna vayaʼmo maiʼnone, huʼa nehisafi Goti Aunemeʼamoʼmo alino lamiʼnigeta himamuʼamo aliʼnone, huʼa nehisafigeʼa avoʼmo nekaovanageno lapakaetegamo ani avoʼmo visigetapaeʼmo lekana paitapa afitetapaeʼmo Ala kava neʼmoʼa, hiyo, huno huʼniya gemo haneʼniye, hutapa hugae.

³⁸ Mago vekamoʼmo geʼnimo oʼafisiyana gemo alagi oʼafi vekamo maigiye.

³⁹ Konagaʼnimogitapae, huʼna, Ani kavatefeʼmo Gotitegati gemo alinitetapa aeta hakalo hisayafeʼmo lapaya mukiki hutapa vegala aeyo. Alu apake alu apakemo aisaya vayaʼaifeʼmo haʼao hutapa osiyo.

⁴⁰ Alita anupa hutapa maiʼnetapaeʼmo muki kavaʼamo hisayafeʼmo alagepa kavaʼageʼmo hutetapa api kavaʼmo hiyo.