1 Kolitiyani 13 - The Keyagana NT and 25 OT books

Hapau apayamopafiʼmo nehapaiya kavafeʼmo huʼniya gemae

¹ Nagaemo ma mopafi vayaʼai apakefatiʼe enisole vayaʼai apakefatiʼeʼmo nagemo neʼaisuvana nahau nayamopafiʼmo oʼnahauʼnisigeʼna veloʼmo neʼamagigenoʼaeʼmo afa agemo aige yaveʼyamo neʼamagigenoʼaeʼmo afa agemo aige nehiya kava huʼna afa gemo nehuguve.

² Gotitegati gemo aliniʼneʼna aeʼna hakalo huge muki fala kiʼniya gemo afige muki gemo alagepa huʼna afige Gotifeʼmo magoʼe huʼna nagesamo afiʼna fatago nehuʼnaeʼmo avemo afaʼa aliʼna yaga auʼna alu yategamo atalege huʼna neʼmaisuvana nahau nayamopafiʼmo oʼnahausiyaʼmoʼmo ina agufa vekamo maiʼnove.

³ Nagaemo muki kagemi yaʼnimo kagemi yaʼapimo ohaneʼnisiya vayaʼmo apamiʼna hano hisuvafeʼmo apamite apamite huʼna apamige vayaʼmo hapa maeʼna faliʼna apatesuvafeʼmo atamoʼmo leno nasagalisigeʼna falige huʼnisuvana nahau nayamopafiʼmo oʼnahausiyaʼmoʼmo ani agufa kavaʼaʼnimoʼa naha oʼmaegaiye.

⁴ Hapau apayamopafiʼmo nehapaiya vayaʼmogimo apakaetegamo hosu kavaʼmo nehageʼapaeʼmo malage huʼa hosu kavaʼapimo anonaʼapileʼmo hosu kavaʼmo osuʼa vase huʼa yuna apaipamo kaliʼnigeʼa magokepi lokaeʼa neʼmaiye. Ani agufa hapau apayamopafiʼmo nehapaiya vayaʼmogimo apaipa kafamo ohapaege apakaiʼapi apakiʼapileʼmo aliʼa asaga osuge hogote vayaʼmo maiʼnone, huʼa apakesamo oʼafige nehae.

⁵ Hapau apayamopafiʼmo nehapaiya vayaʼmogimo vayaʼaitegamo himuʼnamu kavaʼmo osuge apakaiʼapigeʼmo alagepa huʼa maisayafeʼmo hapaʼye nehigeʼa kahauya osuge malage huno apaipamo olege huʼa neʼmaiye. Vayaʼmogimo apakaetegamo mago hosu kavaʼmo huʼnageʼapaeʼmo hosu kavaʼapimo lekana paiʼa apaipafiʼmo noʼmalae.

⁶ Apakaemo vayaʼai hosu kavaʼapieʼmo apamogaga noʼaifa lama gemo akame nehaya vayaʼai kavafekeʼmo apamogaga neʼaiye.

⁷ Apakaemo kana yaʼmo aliʼa apamiʼnageʼapaeʼmo afaʼa alige lama gemo nehae, huʼa apakesamo afige alagepa kavaʼmo hugae, huʼa apakava maiʼneʼa apavayagunagu huge apaini huʼa neʼapatageʼapaeʼmo anonaleʼmo apaini huʼa oʼapateʼa kaʼapilekeʼmo oʼataleʼa uge uge huʼa maige nehae.

⁸ Hapau apayamopafiʼmo nehapaiya kavaʼmo alagi hano osugiyaʼmonanafa hemenimo apaune vayaʼmogi apaune gemo huge mago vayaʼmogi alu apake alu apakemo aige apaune kava huʼa agege nehaya agufa kavaʼamo alagi hano hugiye.

⁹ Hemenimo lagaemo aiseʼamo afiʼneta aeta hakalo huta hapa nepaunaʼmonanafa

¹⁰ henagaʼamo alagepa huta ageteta afisuna afinaʼmo afole aisigetaeʼmo hemenimo ika ika huta neʼafuna kavaʼmo alagi hano hugiye.

¹¹ Mafaʼnemo maiʼneʼnaeʼmo mafaʼnegana huʼna ge huge naipafiʼmo agege nagesamo afige huʼna maiʼnove. Kosiʼna alopa vekamo maiʼnaeʼmo mafaʼneʼnileʼmo maiʼneʼnaeʼmo nehuva kavaʼmo ago ataleʼnove.

¹² Hosu laveʼyofatiʼmo apaugosamo neʼagaya kava huta hemenimo hani huʼnigeta alagepa huta noʼagonaʼmonanafa henagaʼamo Ala kava neʼmo augosafiʼmo ageta alagepa hugune. Hemenimo aiseʼamo neʼagovanageʼna Gotiʼa nageʼniya kava huʼna henagaʼamo alagi ageʼna alagepa huguve.

¹³ Hemenimo loleʼe magoʼe kavaʼmo haneʼniyana apakesamo afiʼa fatago nehaya kavaʼmo hanege alagepa kavaʼmo afole aigiye, huʼa huteʼa agava maiʼneʼa apavayagunagu nehaya kavaʼmo hanege hapau apayamopafiʼmo nehapaiya kavaʼmo hanege huʼniyanageno alagi hanege hanege huno hanegaiye. Mani loleʼe magoʼe kavapatiʼmo aeno agaseno hogote kavaʼmo haneʼniyana hapau apayamopafiʼmo nehapaiya kavaʼmo haneʼniye.