1 Kolitiyani 12 - The Keyagana NT and 25 OT books

Goti Aunemeʼamoʼmo fikumo neʼapamiya kavafeʼmo huʼniya gemae

¹ Konagaʼnimogitapae, huʼna, Goti Aunemeʼamoʼmo fikumo neʼapamiya kavafeʼmo ava gemo afisayafeʼmo nahauʼnigeʼnaeʼmo lapa paigesuve.

² Lapakaemo ago ageʼnayana malaga vayaʼmo maiʼnagenoʼaeʼmo lapavalelino uno apake noʼaiya negi aigofe gotiʼapimogitegamo lapateʼnigetapa hosu kateʼmo uʼnae.

³ Uʼnayaʼmofeʼmo mani gemo afisayafeʼmo nahauʼniyanagi Goti Aunemeʼamoʼmo alino he tino neʼapateya vayaʼmogimo, Yesuʼa hosu vekamo maiʼniyanageno alagi afela hegaiye, huteʼa afaʼa huʼa faipa huʼa noʼatae. Goti Aunemeʼamoʼmo alino he tino oʼapateʼnisiyana Yesufeʼmo Ala kava neʼmo maiʼniye, huʼa afaʼa osugae.

⁴ Alu ya alu yaʼamo fikumo neʼapamiya kavaʼmo haneʼniyaʼmonanafa magoke Aunemeʼamokeʼmo alino neʼapamiye.

⁵ Ala kava netefeʼmo alu aliʼya alu aliʼyaʼamo haneʼniyaʼmonanafa magoke Ala kava neʼmo maiʼniye.

⁶ Alu kava alu kavaʼamoʼmo lokiyaʼamo haneʼniyaʼmonanafa magoke Gotiʼa alino lokiya vaino neʼapate.

⁷ Goti Aunemeʼamoʼmo muki siosi vayaʼmo apamete apamete huʼa hapa maesayafeʼmo muki vayaʼai apaipafiʼmo maiʼnigeʼa apakaemo alu kava alu kavatetiʼmo aliʼyaʼmo neʼaliye.

⁸ Goti Aunemeʼamoʼmo mago vayaʼamogimo alagepa faigoko geʼamo aeʼa hakalo huʼa hapa paisayafeʼmo lokiyaʼamo apamige mago vayaʼamogimo alagepa geʼamo aliʼa apaya malesayafeʼmo lokiyaʼamo apamige nehiye.

⁹ Magoke Aunemeʼamo maiʼneno ani Aunemeʼamokeʼmo mago vayaʼamogimo magoʼe huʼa apakesamo afiʼa fatago hisayafeʼmo lokiyaʼamo apamige mago vayaʼamogimo kaita hapauʼnisiya vayaʼmo aliʼa hapageʼa apatesayafeʼmo lokiyaʼamo apamige nehiye.

¹⁰ Goti Aunemeʼamoʼmo mago vayaʼamogimo aeto agufa noʼagaya aune kavaʼmo hisayafeʼmo lokiyaʼamo apamige mago vayaʼamogimo Goti geʼamo aeʼa hakalo huʼa hapa paisayafeʼmo lokiyaʼamo apamige mago vayaʼamogimo Goti Aunemeʼaletiʼmo ani gemo nehafi alu aunemeʼaletiʼmo ani gemo nehafi huʼa aliʼa fako huʼa apatesayafeʼmo lokiyaʼamo apamige mago vayaʼamogimo alu apake alu apakemo aisayafeʼmo lokiyaʼamo apamige mago vayaʼamogimo ani alu apake alu apakemo aliʼa afe leʼa hisayafeʼmo lokiyaʼamo apamige nehiye.

¹¹ Ani kavaʼmo aepa vekamo magoke Aunemeʼamo maiʼnenoʼaeʼmo mani Aunemeʼamokeʼmo hauʼnigenoʼaeʼmo ani kavaʼmo huno neʼapamiye.

Magoke agufamo haneʼniyaʼmonanafa muki agufafiʼmo alu ya alu yaʼamo haneʼniya gemae

¹² Mago vekamoʼmo magoke agufamo haneʼniyaʼmonanafa muki agufafiʼmo alu ya alu yaʼamo haneʼniye. Agufafiʼmo asole yaʼamo haneʼniyaʼmonanafa magoke agufamo haneʼniye. Ani kavaʼmo huno Kalaisi agufamo haneʼniye.

¹³ Ani kavatefeʼmo Kalaisiʼa mukiʼamogitamo Aunemeʼaletiʼmo agufafiʼmo faleno lateʼnigeta magoke agufaʼamo maiʼnone. Ani kavaʼmo huno Aunemeʼamo lamiʼnigeta aniʼmo negekana huta neteta aliʼnone. Mukiʼamogitamo Yu vayanagi Yu nofi vayapatiʼmo oʼmaiʼnaya vayanagi kalavusifi maiʼneʼa afa aliʼyaʼmo neʼaliya vayanagi afaʼa neʼmaiya vayaʼmogi huta magoke Kalaisi agufaʼamo maiʼnone.

¹⁴ Agufafiʼmo magoke agufa yaʼageʼmo ohaneʼniyaʼmonanafa muki agufafiʼmo alu ya alu yaʼamo haneʼniye.

¹⁵ Aiyamoʼa, ayaʼmo ohaneʼnovaʼmofeʼmo agufafi yaʼmo ohaneʼnove, huno hisiyana agufafi yaʼmo ohaneʼnifiye. Haʼao haneʼniye.

¹⁶ Agesamoʼa, aulagamo ohaneʼnovaʼmofeʼmo agufafi yaʼmo ohaneʼnove, huno hisiyana agufafi yaʼmo ohaneʼnifiye. Haʼao haneʼniye.

¹⁷ Muki agufafiʼmo haneʼniya yaʼamoʼmo aulagaʼageʼmo haneʼniyesinana haiya kava huno gemo neʼafiyesine. Muki agufafiʼmo haneʼniya yaʼamoʼmo agesaʼageʼmo haneʼniyesinana haiya kava huno atumo aisiya atumo afiyesine.

¹⁸ Ani kavaʼmo huno ohaneʼniyaʼmonanafa Gotiʼa hauʼnigenoʼaeʼmo agufafi alu ya alu yaʼamo ani kavaʼmo huno alo hu maleʼniye.

¹⁹ Agufafiʼmo haneʼniya yaʼamo magoke agufa yaʼageʼmo haneʼniyesinana agufaʼamo ohaneʼniyesine.

²⁰ Ohaneʼniyesinaʼmonanafa muki agufafiʼmo haneʼniya yaʼamo haneʼnigenoʼaekeʼmo magoke agufamo haneʼniye.

²¹ Aulagamoʼa ayafeʼmo hunoʼaeʼmo, Aliʼyakamo ohaneʼniyanageka oʼmaisanageʼna nagaiʼnigeʼmo maisuvana kanale huʼna maiguve, huno afaʼa ha opaigiye. Agenopamoʼa aiyaeʼmo hunoʼaeʼmo, Aliʼyakamo ohaneʼniyanageka oʼmaisanageʼna nagaiʼnigeʼmo maisuvana kanale huʼna maiguve, huno afaʼa ha opaigiye.

²² Agufafiʼmo mago haneʼniya yafeʼmo hutaeʼmo, lokiya noʼvaiya yaʼmo haneʼniye, huta lagesamo neʼafunaʼmonanafa aliʼyaʼamo haneʼniye.

²³ Lagufafiʼmo mago haneʼniya yafeʼmo ala agimo ohaneʼniya yaʼmo haneʼniye, huta lagesamo neʼafuna yafeʼmo ala agimo neʼamune. Lagufafiʼmo mago haneʼniya yateʼmo oʼagesaya yaʼmo haneʼniye, huta lagesamo neʼafuna yatileʼmo aita ati kaeta konali yaʼmo neʼmalone.

²⁴ Lagufafiʼmo mago haneʼniya yaʼmoʼa agaiʼamo alagepa huno haneʼnigeʼa aulu heʼa neʼagaya yateʼmo konali yaʼmo noʼmalone. Gotiʼa Kalaisi agufafiʼmo haneʼniya yaʼamo alino magokepi lokae maleʼneno agi ohaneʼniya yaʼmo ala agimo amiʼniye.

²⁵ Agufafiʼmo haneʼniya yaʼamoʼa alino fako huno aote aote huno ohaneʼnisigeno muki agufafiʼmo haneʼniya yaʼamo alu ya alu yaʼaeʼmo alagepa huʼa apakesamo afisayafeʼmo alo hu maleʼniye.

²⁶ Agufafiʼmo mago haneʼniya yaʼafatiʼmo agafu nekisigenoʼaeʼmo muki agufafiʼmo haneʼniya yaʼafatiʼmo agafukeʼmo kigiye. Agufafiʼmo mago haneʼniya yaʼmoʼa ala agimo alisigenoʼaeʼmo muki agufafiʼmo haneʼnaya yaʼamogimo apamogaga aigae.

²⁷ Ani kavaʼmo huno haneʼnigetapa Kalaisi agufaʼamo maiʼnetapaeʼmo agufafiʼmo alu ya alu yaʼamo maiʼnae.

²⁸ Gotiʼa muki siosifiʼmo neʼmaiya vayaʼmo alu aliʼya alu aliʼyaʼamo alisayafeʼmo lekana paino apateʼniye. Apa vayaʼmo hogote vayaʼmo lekana paino lateʼniye. Napa tu vayaʼmo agaetegati gemo alini eʼa aeʼa hakalo huʼa hapa nepaiya vayaʼamo lekana paino apateʼniye. Napa tali vayaʼmo aliʼa apaya neʼmalaya vayaʼamo lekana paino apateʼniye. Aeto agufa noʼagaya aune kavaʼmo nehaya vayaʼmo lekana paino apatege kaita nehapaiya vayaʼaina aliʼa hapageʼa neʼapataya vayaʼmo lekana paino apatege hapa neʼmaya vayaʼmo lekana paino apatege yagaiʼa neʼapataya vayaʼmo lekana paino apatege alu apake alu apakemo neʼaiya vayaʼmo lekana paino apatege huʼniye.

²⁹ Muki vayaʼamogi apa vayaʼmo maiʼnafiye. Muki vayaʼamogi aliʼa apaya neʼmalaya vayaʼmo maiʼnafiye. Muki vayaʼamogi aeto agufa noʼagaya aune kavaʼmo nehafiye.

³⁰ Muki vayaʼamogi kaita nehapaiya vayaʼmo aliʼa hapageʼa neʼapatafiye. Muki vayaʼamogi alu apake alu apakemo neʼaifiye. Muki vayaʼamogi alu apake alu apakemo aliʼa afe leʼa hapa nepaifiye.

³¹ Inagi hogote yaʼmo fikumo neʼapamiya yaʼmo alisayafeʼmo lokiya vaitapa lapaʼye hino. Hemenimo hogote kavaʼmo aeno agaseʼniya kavaʼmo aliʼna lapave liguve.