1 Kolitiyani 11 - The Keyagana NT and 25 OT books

¹ Kalaisiʼmo akame nehuva kavaʼmo hutapa nakame hiyo.

Aʼnemogimo anauʼapimogi apaiyafiʼmo maisayafeʼmo apakenopaleʼmo aiʼa ati nekaya kavafeʼmo huʼniya gemae

² Lapakaemo muki afinaʼmo nagaefeʼmo lapakesamo afitetapa aliʼna lapaya maleteʼna aliʼna lapamiʼnova gemo akame nehayaʼmofeʼmo lapao ke heʼnaeʼmo, alagepa kavaʼmo nehae, huʼna nehuve.

³ Nehuvaʼmonanafa mago gemo afisayafeʼmo nahauʼniye. Gotiʼa Kalaisi agenopagana huno maiʼnenoʼaeʼmo yagaino neʼate. Kalaisiʼa muki Kalisitini ve anagaʼmogi apakenopagana huno maiʼneno yagaino neʼapate. Ve anagaʼmogimo aʼne anagaʼmogi apakenopagana huʼa maiʼneʼapaeʼmo yagaiʼa neʼapatae.

⁴ Muki ve anagaʼmogimo apakenopaleʼmo aiʼa ati kaeliʼneʼa nunumuʼmo huge Goti geʼamo aeʼa hakalo huʼa hapa paige nehisayana apakaiʼapimo apavagage yaʼmo aliʼa neʼapamiye.

⁵ Muki aʼne anagaʼmogimo apakenopaleʼmo aiʼa ati okaeʼneʼa nunumuʼmo huge Goti geʼamo aeʼa hakalo huʼa hapa paige nehisayana apakenopamo aliʼa hosu huʼa neʼatayaʼmofeʼmo apavagage hisiya kavaʼmo haneʼniye. Apayokaʼmo heʼa havavi huʼa atalesayaʼmoʼmo lusi kava huno apavagage hisiya kavaʼmo haneʼniya kava huno apakenopaleʼmo aiʼa ati nokaesayana apavagage hisiya kavaʼmo haneʼniye.

⁶ Aʼnemogimo apakenopaleʼmo aiʼa ati okaesayana apayokaʼmo heʼa havavi huʼa atalesaya kavaʼmo haneʼniye. Apayokaʼmo lagauʼa ataleteʼa heʼa havavi huʼa atalesayana apavagage hugiyaʼmofeʼmo apakenopaleʼmo aiʼa ati kaeʼa alisaya kavaʼmo haneʼniye.

⁷ Vemo Goti auneʼamo maige Goti ha le konali yaʼamo maige huʼnayaʼmofeʼmo apakenopaleʼmo aiʼa ati okaesaya kavaʼmo haneʼniyaʼmonanafa aʼnemo vemogi ha le konali yaʼapimo maiʼnae.

⁸ Vemo aʼnefatiʼmo alo osuʼnifa aʼnegeʼmo vefatiʼmo alo huʼniyaʼmofeʼmo vemogi ha le konali yaʼapimo aʼnemo maiʼnae.

⁹ Gotiʼa ve kanomoʼa a kanomo ha maesiyafeʼmo alo osuʼnifa a kanomokeʼmo ve kanomo ha maesiyafeʼmo alo huʼniye.

¹⁰ Huʼniyaʼmofeʼmo enisole vayaʼmogimo apaketeʼapaeʼmo, anauʼapimogi geʼapimo afeʼalumelaga neʼmaiye, huʼa hisayafeʼmo aʼnemogimo apakenopaleʼmo aiʼa ati kaeʼa alisaya kavaʼmo haneʼniye.

¹¹ Aʼnemogi apaiyafiʼmo maigayaʼmonanafa Ala kava neʼmoʼa, veʼageʼmo oʼmaigae huno huge aʼneʼageʼmo oʼmaigae huno huge hutenoʼaeʼmo vemogi aʼnemo hapa maege aʼnemogi vemo hapa maege huteʼa magokepiʼmo lokaeʼa maigae, huno hu maleʼniye.

¹² Aʼnemo vefatiʼmo afole aiʼnaya kava huʼa vemo aʼnefatiʼmo afole neʼaiyaʼmonanafa muki kavaʼamo Gotitegatikeʼmo afole neʼaiye.

¹³ Aʼnemogimo vayaʼai apaulagaleʼmo apakenopaleʼmo aiʼa ati okaeʼneʼa nunumuʼmo hisayana kanale hugifiye. Lapakaitapigeʼmo alita fako hutapa lapakesamo afiyo.

¹⁴ Ma mopafi kavafeʼmo hutaeʼmo, Vemogimo yatala apayokaʼmo hanesiyaʼmoʼmo apavagage hisiya kavaʼmo haneʼniyaʼmonanafa

¹⁵ aʼnemogimo yatala apayokaʼmo hanesiyaʼmoʼmo konali yaʼapimo haneʼniye, huta lagesamo afisupiye. He, Gotiʼa aiʼa ati kaesayafeʼmo aʼne anagaʼmo yatala apayokaʼmo apamiʼniye.

¹⁶ Mago vayaʼmogimo mani gelefeʼmo ge vaisayafeʼmo nehisayana lagaeʼe muki Goti siosiʼale siosiʼaleʼmo maiʼnaya vayaʼmogiʼeʼmo alu kavaʼmo nosune.

Ala kava neʼmo kave neʼyaʼmo neʼnaya kavafeʼmo huʼniya gemae

¹⁷ Hemenimo mago kavatapieʼmo lapa paigesuve. Mani kavafeʼmo lapao ke heʼnaeʼmo alagepa kavaʼmo nehae, huʼna nosuve. Alita anupa nehaya kavatetiʼmo alagepa kavaʼmo afole noʼaifa hosu kavakeʼmo afole neʼaiye.

¹⁸ Hogoteʼna lapa paiʼnaeʼmo, Mago vayaʼmogimo, aliʼa anupa huʼa neʼmaiya afinaʼmo aliʼa fako huʼa apaote apaote huʼa neʼmaiye, huʼa naha paiʼnageʼnaeʼmo alagi lama gegeʼmo huʼnegae, huʼna nagesamo afiʼnove.

¹⁹ Fatago kavaʼmo nehaya vayaʼmogi afole yategamo afole aisayafeʼmo aliʼa fako huʼa apaote apaote huʼa maisaya agufa kavaʼmo haneʼniye.

²⁰ Alita anupa hutapa maiʼnetapaeʼmo Ala kava neʼmo kave neʼyaʼmo nesayafeʼmo alagepa hutapa alita anupa hutapa noʼmaiye.

²¹ Lapakaemo afa neʼyaʼmo nesayafeʼmo mono nopiʼmo alita anupa hutapa magokepi maiʼnetapaeʼmo apakava oʼmaitapa magoʼamogitapamo malage hutapa neʼnae. Magoʼamogitapamo lapaka tege magoʼamogitapamo alopa aniʼmo netetapa negi nagi kavaʼmo huge hutapa neʼmaiye.

²² Notapifiʼmo neʼyaʼmo nege aniʼmo nege hisaya notapimo ohaneʼnifiye. Hosu kavaʼmo hutapa neʼyaʼmo neʼnetapaeʼmo siosi vayaʼaifeʼmo ina agufa vayaʼmo maiʼnae, huta hutetapa kagemi yaʼapimo ohaneʼniya vayaʼmo apavagage yaʼmo alita neʼapamiye. Mani kavatefeʼmo na agufa gemo lapa paiguve. Lapao ke heʼnaeʼmo alagepa kavaʼmo nehae, huʼna hisufiye. Vaehae. Ani agufa gemo alagi osuguve.

²³ Ala kava neʼmoʼa naha paiʼnigeʼna lapa paiʼnaeʼmo, Ala kava neʼmo kutulu yaʼmo aliʼniya vekamo Yutasiʼa avaleno apamiʼniya haniʼilagamo peleti mayamo aliʼniye.

²⁴ Aliʼneno Gotifeʼmo hao ke heteno akaya heno aliʼnenoʼaeʼmo, manimona nagufaʼnimo haneʼniye. Lapakaetefeʼmo aiʼa atalagaugae. Hemenimo nagaefeʼmo lapakesamo afitapa ho hisayafeʼmo mani kavaʼmo hutapa nete nete hutapa maiyo, huno hapa paiʼniye.

²⁵ Neʼyaʼmo neteʼapaeʼmo ani kavaʼmo huno kapumo aliʼnenoʼaeʼmo, Mani kapufi haneʼniya aniʼmo kolaʼniye. Kolaʼniletiʼmo saufa kotalakemo hu malesuva kolaʼnimo haneʼniye. Muki afinaʼmo mani aniʼmo neʼnetapaeʼmo nagaefeʼmo lapakesamo afitapa ho hiyo, huno hapa paiʼniye.

²⁶ Lapakaemo muki afinaʼmo mani peleti mayamo nege mani aniʼmo nege nehutapaeʼmo Ala kava neʼmo faliʼniya kavafeʼmo ava gemo aetapa hakalo hume hume neʼvisagenoʼaeʼmo halate eminegaiye.

²⁷ Ani kavaʼmo haneʼniyaʼmofeʼmo mago vayaʼmogimo Ala kava neʼmo peleti mayamo nesayafeʼmo hisaya afinaʼmo alagepa huʼa apakesamo oʼafiʼneʼa fikumo nege Ala kava neʼmo kapufati aniʼeʼmo nesayafeʼmo alagepa huʼa apakesamo oʼafiʼneʼa fikumo nege huʼnisayaʼmoʼmo Ala kava neʼmo agufaʼaʼe kolaʼaʼeʼmo aliʼa hosu huʼa ategae.

²⁸ Vayaʼmogimo hogoteʼa apamete apamete huʼa apakaiʼapi apaipafi kavaʼapimo aliʼa fako huʼa ateteʼa alo hu maleʼneʼapaekeʼmo peleti mayaʼe aniʼeʼmo nesaya kavaʼmo haneʼniye.

²⁹ Peleti mayaʼe aniʼeʼmo aliteʼapaeʼmo Ala kava neʼmo agufaʼae, huʼa oʼageʼa fikumo neʼnisayaʼmoʼmo apakaiʼapigeʼmo hanageke yaʼmo aligae.

³⁰ Lapakaepatiʼmo mago vayaʼmogi ani kavaʼmo huʼa fikumo aliʼa neʼnayaʼmofeʼmo lokiya oʼvaige kaita hapauge huʼnigeʼa mago vayaʼamo ago faliʼnae.

³¹ Lagaitigeʼmo laipafi kavatimo alita fako hisunageʼmo Gotiʼa alino fako huno lateteno kayoʼmo olamigiye.

³² Gotiʼa ma mopafi vayaʼmo agoti huno apatetenoʼaeʼmo hosu kavaʼmo huʼnae, huno hisiya afinaʼmo apakaegiʼeʼmo magokepi lokaeta oʼmaisunafeʼmo Ala kava neʼmoʼa ago alino fako huno lateteno kayoʼmo nelamiye.

³³ Ani kavatefeʼmo konagaʼnimogitapamo Ala kava neʼmo kave neʼyaʼmo nesayafeʼmo alita anupa hutapa maiʼnetapaeʼmo konagatapimogifeʼmo apakava maiʼnetapa magokepi lokaeta maiʼnetapa neʼyaʼmo neyo.

³⁴ Mago vayaʼamogitapamo lapaka tesigetapaeʼmo hogotetapa notapifiʼmo neʼyaʼmo neyo, Gotiʼa kavatapimo alino fako huno lapateteno kayoʼmo olapamigiye. Nagaemo lapakaetegamo uʼnaeʼmo mago alu kavaʼatapimo aliʼna api aiʼna lapategauve.