1 Kolitiyani 10 - The Keyagana NT and 25 OT books

Isaleli vayaʼaifeʼmo, ehetapiye, huno hapa paiʼniya gemae

¹ Konagaʼnimogitapae, huʼna, Muki laginago vayaʼmogimo Moseseʼa akame huʼa uʼnaya kavafeʼmo lapakesamo afisayafeʼmo nahauʼniye. Muki vayaʼamogi hiyaʼmo uneno nehiya hiyaʼmo afeʼalumelaga maiʼneʼa akame huʼa uʼnae. Akame huʼa uʼnageno aniʼmoʼa folagapiʼmo aino akaka vaeʼnigeno mopamo hau huʼnigeʼa uʼnae.

² Gotiʼa hiyapiʼe anipiʼeʼmo Mosesetefeʼmo faleno apateʼnigeʼapaeʼmo Moseseʼa akame huʼa uʼnae.

³ Muki vayaʼamogimo magoke agufa neʼyaʼmo Goti Aunemeʼamoʼmo apamiʼniya neʼyaʼmo aliʼa neʼnae.

⁴ Ani kava huʼa magoke agufa aniʼmo Goti Aunemeʼamoʼmo apamiʼniya aniʼmo magokepi neʼnae. Apakaemo Goti Aunemeʼamoʼmo apamiʼniya aniʼmo apakaeʼeʼmo magokepi lokaeno uʼniya yafapatiʼmo emineʼniya aniʼmo neme neme uʼnae. Ani yafaʼmo Kalaisiʼa maiʼniye.

⁵ Uʼnayaʼmonanafa Gotiʼa aise vayaʼaifeʼmo amuse huno apateteno muki asole vayaʼaifeʼmo amuse huno oʼapateno kaʼme kotegamo ago apamagiʼnigeʼapaeʼmo apaote apaote huʼa apakufaʼamo faliʼa kasalime uʼnae.

⁶ Ani kavaʼmo alino lave lisiya aune kavaʼmo haneʼniye. Apakaemo hosu kavafeʼmo hapaʼye huʼniya kava huta lagaeʼeʼmo lahaʼye osisiyafeʼmo mani gemo huʼniye.

⁷ Apakaemo aigofe gotiʼapimotefeʼmo mono huʼnaya agufa kavaʼmo osiyo. Goti mukufi gemoʼa ani hosu kavafeʼmo hunoʼaeʼmo, Vayaʼmogimo neʼyaʼmo nege aniʼmo nege hisayafeʼmo maiʼneʼapaeʼmo omo hagesayafeʼmo he tiʼnae, huno huʼniye.

⁸ Apakaepatiʼmo magoʼamogimo kumai kavaʼmo huʼnagenoʼaeʼmo magoke afinaʼmo 23 tauseniʼa vayaʼmo kamitimo apamagiʼnigeʼa faliʼnae. Ani agufa kavaʼmo lagaeʼeʼmo afaʼa osigetao.

⁹ Apakaepatiʼmo magoʼamogimo Ala kava nefeʼmo apakesamo afiʼa fatago osuʼnayaʼmofeʼmo amalageka huʼnagenoʼaeʼmo nagaloʼyave anagaʼmogimo hapaeʼnageʼa faliʼnae. Mani agufa kavaʼmo huta lagaeʼeʼmo Ala kava neʼmo afaʼa amalageka osigetao.

¹⁰ Apakaepatiʼmo magoʼamogimo alagepa huʼa oʼmaiʼnayaʼmofeʼmo hagalu hagalu huʼa ge neʼnagenoʼaeʼmo vayaʼmo neʼapamagiya enisole vekamoʼmo emineno kamitimo apamagiʼniye.

¹¹ Apakaetegamo afole aiʼniya kavaʼmoʼa alino lave lisiya aune kavaʼmo haneʼniyaʼmofeʼmo lagaefeʼmo ehetapiye, huno nehiye. Hemenimo ma mopamo alagi hano hisiyafeʼmo nehiya afinaʼmo maiʼnone.

¹² Maiʼnonaʼmofeʼmo lapakaemo lokiya vaita he tita maiʼnone, hutapa lapakesamo neʼafisayana asagauta aigayanagi ehetapiye.

¹³ Lapakaetegamo aeto aeto agufa lapamalagekaʼmo hisaya kavaʼmo muki vayaʼaitegamo apamalageka nehiya kavakeʼmo afole aiʼniye. Gotiʼa huguve, huno nehiya kavaʼmo alagi nehiya vekamo maiʼniyaʼmofeʼmo lapamalageka hisiya kavaʼmoʼa aeno lapakasesiya kaʼmo afaʼa valino oʼategaiye. Lapamalageka hisigetapaeʼmo asagauta oʼaitapa he titapa maisayafeʼmo faita kasalo paesaya kaʼmo afaʼa valino lapategaiye.

Ala kava neʼmo neʼyaʼe hosu apaune vayaʼai neʼyaʼeʼmo oʼnesuna kavaʼmo haneʼniye, huno huʼniya gemae

¹⁴ Nahau nayamopafiʼmo nahauʼniya vayaʼmogitapae, huʼna, ani kavatefeʼmo aigofe gotiʼapimogitefeʼmo mono nehaya kavategatiʼmo ataletapa lapaune heyo.

¹⁵ Afiʼnaya vayaʼaifeʼmo hapa nepauva agufa gemo huʼna lahapa paiʼnaeʼmo geʼnimo afitetapa lapakaitapigeʼmo alita fako hutapa lapakesamo afiyo.

¹⁶ Lagaemo Ala kava neʼmo neʼyaʼmo nesunafeʼmo aote kapumo aliʼneta Gotifeʼmo hao ke heta nunumuʼmo nehune. Mani kapufi aniʼmo Kalaisi kolaʼamo netetaeʼmo afalu afalugana huta neʼnone. Ani kavaʼmo huta peleti mayamo akaya heta netaeʼmo Kalaisi agufaʼamo neʼnone.

¹⁷ Magoke peleti mayamo haneʼniya kava huta mukiʼamogita magoke vayaʼmo maiʼnone. Magoke peleti mayafatiʼmo neʼnonaʼmofeʼmo magoke vayaʼmo maiʼnone.

¹⁸ Isaleli nofi vayaʼaifeʼmo lapakesamo afiyo. Sipisipi afumo lugoʼamo hatagauʼa hiʼyalamuteʼmo maleʼnaya afumo ameʼamo neʼnaya vayaʼmogimo hiʼyalamuteʼmo haneʼniya gotitefeʼmo mono nehae.

¹⁹ Geʼnimo aepaʼamo na agufa gemo hisuve. Malaga vayaʼaifeʼmo nehuvana aigofe gotiʼapimogimo neʼapamiya ofalinimo lama ge yaʼmo haneʼniye huʼna nehufi aigofe gotiʼapimogimo lama ge yaʼmo haneʼniye, huʼna nehuve.

²⁰ Haʼao, afaʼa nosuvaʼmonanafa malaga vayaʼmogi ofalinimo Gotiʼmo noʼamifa hosu apaune vayaʼmo neʼapamiye. Lapakaemo mani ofalinimo ameʼamo netetapaeʼmo hosu apaune vayaʼeʼmo magokepi lokaetapa maisayafeʼmo oʼnahauʼniye.

²¹ Lapakaemo Ala kava neʼmo kapufati aniʼe hosu apaune vayaʼai kapufati aniʼeʼmo alagi oʼnesaya kavaʼmo haneʼniye. Ala kava neʼmo hiʼyalamutetiʼe hosu apaune vayaʼai hiʼyalamutetiʼeʼmo alagi oʼnesaya kavaʼmo haneʼniye.

²² Lagaefeʼmo Ala kava neʼmoʼa aipa kana huno lateteno kaino faisiyafeʼmo alita he tita atesunafeʼmo nehupiye. Lagaemo lokiyatimoʼa Ala kava neʼmo lokiyaʼamo aeno agasesifiye.

²³ Lapakaemo, muki agufa kavaʼmo afaʼa hisuna kavaʼageʼmo haneʼniye, hutapa nehayaʼmonanafa muki ani hisaya kavaʼamoʼa alagi laha oʼmaesiya kavaʼageʼmo haneʼniye, huʼna nehuve. Muki kavaʼamo afaʼa hisuna kavaʼageʼmo haneʼniye, hutapa nehayaʼmonanafa ani kavaʼmo hisuna kavaʼmoʼa lokiya vaino olategaiye.

²⁴ Mukiʼamogitapamo lapakaitapigeʼmo alagepa huta maisayafekeʼmo lapaʼye nehisigetapa kahauya osutapa muki vayaʼamo alagepa huʼa maisayafeʼmo lapaʼye nehinagetapa kahauya hiyo.

²⁵ Situvapatiʼmo ameʼamo fikumo miya faitetapaeʼmo yuʼilaga vekatapilefeʼmo maketi hu maleʼnisaya vayaʼaifeʼmo, haiyategatiʼmo alinita eʼnae, hutapa apafi oketapa fikumo afaʼa alitapa neyo.

²⁶ Ma mopaʼe muki ma mopafiʼmo haneʼniya yaʼeʼmo Ala kava neʼmo yaʼageʼmo haneʼniye.

²⁷ Mago apakesamo afiʼa fatago osuʼnisaya vayaʼmogimo ge huʼapaeʼmo, etapa neʼyaʼmo neyo, huʼa ge hisagetapaeʼmo utapa nesayafeʼmo lapauʼnisiyana afaʼa utapa lapamisaya neʼyaʼmo afaʼa neyo. Yuʼilaga vekatapieʼmo lapakesamo afitapaeʼmo haiyategatiʼmo aliniʼa eʼnae, hutapa lapakesamo oʼafitapa fikumo afaʼa neyo.

²⁸ Fikumo afaʼa negayaʼmonanafa mago vekamoʼmo, mani ameʼamo ofalini ameʼa haneʼniye, huno lapa paisiya ameʼamo oʼneyo. Agaefeʼmo lapakesamo afige agupi mafaʼnelefeʼmo lapakesamo afige hutetapaeʼmo oʼneyo. Ma mopaʼe muki ma mopafiʼmo haneʼniya yaʼeʼmo Ala kava neʼmo yaʼageʼmo haneʼniye.

²⁹ Yuʼilaga vekatapieʼmo osuʼnofa yuʼilaga vekaʼalefeʼmo nehuve. Mani gemo huvaʼmonanafa lapakaemo hutapaeʼmo, na kava higeʼapaeʼmo mani agufa apakesamo neʼafiyaʼmofeʼmo mani neʼyaʼmo afaʼa oʼnegaune.

³⁰ Neʼyaʼmo aliʼnetaeʼmo Gotifekeʼmo hao ke heteta nesunana na kava higeʼapaeʼmo hosu kavaʼmo huʼnae, huʼa hugae, hutapa naha paigae.

³¹ Inagi lapakaemo muki kavaʼmo hisaya afinaʼmo neʼyaʼmo nege aniʼmo nege nehutapaeʼmo Goti agiʼalekeʼmo alita asaga hisayafekeʼmo muki kavaʼmo hiyo.

³² Yu nofi vayanagi Yu nofi vayapatiʼmo oʼmaiʼnaya vayanagi siosi vayanagi huno vai lamino hapaesigeʼa hosu kavapiʼmo asagauʼa oʼaisayafeʼmo lapakesamo afitetapa apaulagaleʼmo alagepa kavaʼageʼmo hiyo.

³³ Nehuva kavaʼmo nagetetapa ani kavaʼmo hiyo. Muki vayaʼmo hapa maesuvafeʼmo muki kavaʼamo nehuve. Alagepa huʼna maisuvafeʼmo nagesamo noʼafufa Gotiʼa apakufamo alino katino apatesigeʼa alagepa huʼa maisayafekeʼmo nagesamo neʼafuve.