1 Kolitiyani 1 - The Keyagana NT and 25 OT books

^1-2 Gotiʼa agaiʼamo hauʼnigenoʼaeʼmo Yesu Kalaisi apa vekaʼamo maisuvafeʼmo keya aeno ge huʼnigeʼnaeʼmo nagaemo Poloʼnaʼe konagatimoʼmo Sosatenisiʼeʼmo Kolitiyani siosi vayaʼmogitapaeʼmo ge lapamamaeʼnoʼae. Gotiʼa Kalaisi Yesupiʼmo aeno kalo paeno lapateteno lapavaleno alino lapaote lapateʼniya vayaʼamo maisayafeʼmo keya aeno ge huʼniye. Laʼagaemo lapakaeʼe muki haopalega maiʼnaya vayaʼmogiʼeʼmo Yesu Kalaisiʼa Ala kava netimo Ala kava neʼapimo agiʼalefeʼmo ge nehaya vayaʼefeʼmo mani avoʼmo nekaoʼae.

³ Gotiʼa Afotimoʼe Ala kava netimo Yesu Kalaisiʼeʼmo fikumo lahapa maeʼana lapamiʼanageno lapaipamoʼmo falu hino.

Poloʼa Gotifeʼmo hao ke heʼniya gemae

⁴ Gotiʼa Kalaisi Yesutetiʼmo fikumo lahapa maeno lapamiʼniya kavatefeʼmo muki afinaʼmo Gotiʼnimofeʼmo hao ke nehove.

⁵ Ani kavatefeʼmo Gotiʼa Kalaisipiʼmo maiʼnagenoʼaeʼmo muki kavatefeʼmo lusi kava huno lahapa maeno lapamiʼnigetapaeʼmo alagepa hutapa aeta hakalo hutapa hapa paige muki yaʼmo alagepa hutapa agege hutapa maiʼnae.

⁶ Lagaemo Kalaisife ava gemo aeta hakalo huta lapa paiʼnonagenoʼaeʼmo ani gemoʼa lapaipafiʼmo lamino lokiya vaino haneʼniyaʼmofeʼmae.

⁷ Ani kava hutapa maiʼnetapaeʼmo lapaunelapameʼmo yafeʼmo kafu osutapa Ala kava netimo Yesu Kalaisiʼa afole aisiyafeʼmo agava maiʼnae.

⁸ Agaemo atupa afinaʼmo he titapa maisayafeʼmo lokiya vaino lapateme lapateme neʼunoʼaeʼmo Ala kava netimo Yesu Kalaisiʼa agaiʼa afinaʼmo vaiʼmo afaʼa olapamigiye.

⁹ Gotiʼa mafaʼneʼamo Ala kava netimo Yesu Kalaisiʼeʼmo magokepi lokaeta afalu afalugana hutapa maisayafeʼmo keya aeno ge huʼniye. Agaemo halate alino alu gemo osugifa huguve, huno nehiya gemo alagikeʼmo nehiye.

Alu apaipa alu apaipamo kaliʼnaya kavafeʼmo huʼniya gemae

¹⁰ Konagaʼnimogitapae, huʼna, Ala kava netimo Yesu Kalaisi agiʼaletiʼmo ge huʼnaeʼmo, Alita fako hutapa alu vaya alu vayaʼmo oʼmaitapa magoke vayaʼmo maiʼnetapa magoke agufa geʼageʼmo hutapa maiyo. Alagepa hutapa magokepi lokaeta maitetapa magoke lapaipa lapakesamo alita maiyo.

¹¹ Konagaʼnimogitapae, huʼna, Kilovi vayaʼamogimo lapakaitapi lapakaitapimo ge neʼvaiye, huʼa lapava gemo huʼa naha paiʼnae.

¹² Ani kavafeʼmo, lapakaemo alu ge alu gemo nehae. Mago vayaʼamogimo, Poloʼmo akame nehune, huʼa huge mago vayaʼamogimo Apolosiʼmo akame nehune, huʼa huge mago vayaʼamogimo Pitaʼmo akame nehune, huʼa huge mago vayaʼamogimo Kalaisiʼmo akame nehune, huʼa huge nehae.

¹³ Kalaisiʼa folagapatiʼmo heno apalo atino aluga aluga huno maiʼnifiye. Poloʼnamo lahapa maesuvafeʼmo malipu yosaleʼmo nili aiteʼa aliʼa he tiʼa nateʼnafiye. Lapakaemo nagiʼnilefeʼmo aniʼmo faleʼnafiye.

¹⁴ Nagaemo loleko vekalaʼmo Kilipasiʼe Gaiyasiʼeʼmo aniʼmo faleʼna anateʼnovaʼmofeʼmo Gotifeʼmo hao ke nehove.

¹⁵ Ani kavaʼmo huʼnovaʼmofeʼmo mago vayaʼmogi, Polo agiʼalefeʼmo aniʼmo faleno lateʼniye, huʼa afaʼa osugae.

¹⁶ He, Setefanasi afamo anagaʼamo aniʼmo faleʼna apateʼnove. Magoʼe vayaʼmo aniʼmo faleʼna apateʼnisufi ago nage kaniʼniye.

¹⁷ Kalaisiʼa uʼna aniʼmo faleʼna apatesuvafeʼmo alino nateʼnigeʼna oʼuʼnofa alagepa faigoko geʼamo aeʼna hakalo huʼna hapa paisuvafekeʼmo alino nateʼnigeʼna uʼneʼna nehuve. Nagaemo alagepa huʼa gemo afiʼneʼa alagepa gemo nehaya agufa vayaʼmogi geʼapiletiʼmo aeʼna hakalo huʼna hapa paisuvafeʼmo alino nateʼnigeʼna oʼuʼnove. Fiku yanageʼna Kalaisiʼa malipu yosaleʼmo faliʼniya kavafeʼmo ava gemo aeʼna ati kaesugeno aliʼyaʼmo oʼaligiye.

Kalaisiʼa Goti ayamufaʼamo maiʼniya gemae

¹⁸ Ani kavatefeʼmo huʼapaeʼmo, Alino apagoʼya lagauno apatalesiya kateʼmo neʼvaya vayaʼmogimo Kalaisiʼa malipu yosaleʼmo faliʼniya kavaʼmo ava geeʼmo, negi nagi gemae, huʼa nehae. Nehayaʼmonanafa Gotiʼa lagufamo alino katino latesiya kateʼmo neʼuna vayaʼmogitamo, mani gemo Goti ayamufaʼamo haneʼniye, huta lagesamo neʼafune.

¹⁹ Ani kavatefeʼmo Goti mukufiʼmo avoʼmo kae maleʼniya gemoʼa hunoʼaeʼmo, Nagaemo afiteʼa ageʼnaya vayaʼmogi afiteʼa ageʼnaya geʼapimo aliʼna hano huʼna atalegauve. Ageʼnaya vayaʼmogi afiʼnaya apakesamo aliʼna atalegauve, huno hu maleʼniye.

²⁰ Hu maleʼniyaʼmofeʼmo afiteʼa ageʼnaya vayaʼmo hemenimo haiyatega maiʼnae. Avoʼmo kae maleʼnaya gemo afiteʼa ageʼnaya vayaʼmo hemenimo haiyatega maiʼnae. Vayaʼmogi geʼapileʼmo ge huʼa aeʼa ati nekaya vayaʼmo hemenimo haiyatega maiʼnae. Gotiʼa ma mopafi vayaʼmogi afiteʼa ageʼnaya kavaʼmo alino lave linoʼaeʼmo negi nagi kavaʼmo haneʼniye, huno ago alino lave liʼniye.

²¹ Gotiʼa afiʼniya geʼaletiʼmo ani kavafeʼmo hunoʼaeʼmo, afiteʼa ageʼnaya kavatetiʼmo nageʼa aeto osugae, huno huteno kaʼmo akani maleʼniye. Agaemo negi nagi gemo haneʼniye, huʼa apakesamo neʼafiya faigoko geʼamo aeta hakalo huta hapa nepauna geʼaletiʼmo Kalaisifeʼmo apakesamo afiʼa fatago nehaya vayaʼai apakufamo alino katino neʼapate.

²² Yu nofi vayaʼmogimo huʼapaeʼmo, noʼagona agufa alagena aune kavaʼmo alita lave liyo, huʼa nehageʼapaeʼmo Galiki nofi vayaʼmogimo ageteʼa afisaya kavafekeʼmo kahauya nehae.

²³ Nehayaʼmonanafa lagaemo Kalaisiʼa malipu yosaleʼmo nili aiteʼa aliʼa he tiʼa ateʼnaya kavafekeʼmo ava gemo aeta hakalo huta hapa nepaunageʼapaeʼmo Yu vayaʼmogimo ani gemo afiteʼapaeʼmo hosu apaipamo kaliteʼa apaiyamo faiʼa lo aeteʼa heleve huʼnageʼapaeʼmo Yu nofi vayapatiʼmo oʼmaiʼnaya vayaʼmogimo ani gemo afiteʼapaeʼmo, negi nagi gemo huʼnae, huʼa nehae.

²⁴ Nehayaʼmonanafa Gotiʼa keya aeno ge huʼniya vayapiʼmo Yu nofi vayanagi Yu nofi vayapatiʼmo oʼmaiʼnaya vayaʼmogi, Kalaisiʼa Goti ayamufaʼaʼe ageteno afiʼniya kavaʼaʼeʼmo maiʼniye, huʼa ageʼa aeto nehae.

²⁵ Na kava higenoʼaene. Mago vayaʼmogimo Gotiʼa ageteno afiʼniya geʼaeʼmo negi nagi gemo haneʼniye, huʼa apakesamo neʼafiyaʼmonanafa Gotiʼa mani negi nagi geʼaletiʼmo vayaʼmogi afiteʼa ageʼnaya geʼapimo ago aeno agaseʼniye. Ani kavaʼmo huʼa mago vayaʼmogi Gotiʼa nehiya kavafeʼmo huʼapaeʼmo, lokiya noʼvaiya kavaʼmo nehiye, huʼa apakesamo neʼafiyaʼmonanafa Gotiʼa lokiya noʼvaiya kavaʼaletiʼmo vayaʼmogi nehaya lokiya kavaʼapimo ago aeno neʼagase.

²⁶ Konagaʼnimogitapae, huʼna, Gotiʼa lapakaefeʼmo keya aeno ge huʼniya afinaʼmo haiya agufa vayaʼmo maiʼnonagenoʼaeʼmo ge huʼnifi, hutapa lapakesa afiyo. Lapakae folagapiʼmo asole vayaʼmogimo ma mopafi vayaʼai apaulagaleʼmo afiteʼa ageʼnaya vayaʼmo oʼmaige apayamufa vayaʼmo oʼmaige ala apaki vayaʼmo oʼmaige huʼnae.

²⁷ Gotiʼa afiteʼa ageʼnaya vayaʼmo apavagage yaʼmo alino apamisiyafeʼmo ma mopafi vayapatiʼmo oʼafiʼnaya vayaʼmo lekana paino apateʼniye. Gotiʼa lusi kava huʼa apayamufa neʼvalaya vayaʼmo apavagage hisiya yaʼmo alino apamisiyafeʼmo apayamufa noʼvalaya vayaʼmo lekana paino apateʼniye.

²⁸ Apaki ohaneʼniya vayaʼmo lekana paino apatege ma mopafi vayaʼmogimo, apakaemo ina agufa vayaʼmo maiʼnae, huʼa nehaya vayaʼmo lekana paino apatege huʼniye. Ala apaki vayaʼmo alino afepi apatesiyafeʼmo oʼmaiʼnegekana huʼa neʼmaiya vayaʼmo lekana paino apateʼniye.

²⁹ Muki vayaʼmogimo apakaiʼapiekeʼmo apamogaga oʼaisayafeʼmo nehiye.

³⁰ Gotiʼa Kalaisi Yesupiʼmo faleno lapateʼnigetapa maiʼnae. Gotiʼa Kalaisiʼmo alino hamaleno ateʼniyanageta Gotitegatiʼmo ageteta afisuna agufa kavaʼmo hamaleʼniye. Ina kava huno Kalaisiʼa Goti aulagaleʼmo fatago vayaʼmo maisunafeʼmo fatago kavatimo maiʼniyanageno hemenimo magoʼe magoʼe huno alino alagepa huno nelateyanageno muki hosu kavapatiʼmo lagufamo alino katino lategaiye.

³¹ Ani kava nehiyaʼmofeʼmo avoʼmo kae maleʼniya gemoʼa hunoʼaeʼmo, Muki hapao ke heteʼa apamogaga neʼaiya vayaʼmogimo Ala kava nefekeʼmo hao ke heteʼa apamogaga aiyo, huno huʼniye.