1 Kini 21 - The Keyagana NT and 25 OT books

Ehapiʼmo Nemoti nofi hoyaeʼmo haʼye huʼnigeno kamitimo amagiʼniya gemae

¹ Mago Yesali taonifi vekamo Nemotiʼmo nofi hoyaʼamo kini vekamo Ehapi alopa noʼamo haopaleʼmo Yesali taonifiʼmo haneʼniye. Ehapiʼe ati vayaʼaʼeʼmo Siliya vayaʼeʼmo alopa kamemo huʼa hano huteʼa henagaʼamo

² Ehapiʼmo Nemotifeʼmo ina gemo huno ha painoʼaeʼmo, Kagae nofi hoyamo nagae noʼmo haopaleʼmo haneʼniyaʼmofeʼmo kagaemo hakika nategeʼna ani mopafiʼmo neʼya hoyamo aliʼna vaigesuve. Kagaemo hakika natesanaʼmoʼmo inagi nagaemo alu nofi hoyaʼnimoʼmo ani kagae nofi hoyamo aeno aga seʼniya hoyamo kategauve. Kagaemo monieʼmo kahauʼnisiyaʼmoʼmo nagaemo kanale miyatetiʼmo hoyamo miya faiguve, huno ha paiʼniye.

³ Ha paiʼniyaʼmonanafa Nemotiʼmo kini vekaeʼmo hunoʼaeʼmo, Haʼao, ani gemo alagi atalegeno hano hino. Ala kava neʼmoʼa ani mopamo naginago vayaʼmo apamiʼniya mopamo aliʼnovaʼmofeʼmo okategauve, huno ha paiʼniye.

⁴ Ehapiʼmo ani Yesali taonifi vekamo Nemotiʼmo huʼniya gemo afitenoʼaeʼmo aipafiʼmo ge hauteno hosu aipamo kaliʼnigeno noʼafiʼmo uno haino hipaʼaleʼmo havaeʼnenoʼaeʼmo augosamo kegiʼyalegamo aino afe leʼniye. Agaemo neʼyaʼmo oʼneʼniye. Nemotiʼa hunoʼaeʼmo, Naginago vayaʼmogi aliʼnaya mopamogeʼna okategauve, huno ha paiʼniyaʼmofeʼmae.

⁵ Henagaʼamo aʼamo Yeyemeʼmo agaetegamo uno agetenoʼaeʼmo agaefeʼmo ha painoʼaeʼmo, Na agufa kavaʼmo higekaeʼmo hosu kaipamo kaliʼnigeka neʼyaʼmo nesanayafeʼmo nokahaiye, huno ge huno afi geʼniye.

⁶ Agaemo ha painoʼaeʼmo, Nagaemo Yesali taonifi vekamo Nemotifeʼmo huʼnaeʼmo, Nofi hoyakamo miya faigesuve. Monieʼmo okahausigeʼnaeʼmo nagaemo alu nofi hoyamo kategauve, huʼna huʼnogenoʼaeʼmo, Nagaemo nofi hoyaʼnimo okategauve, huno naha paiʼniyaʼmofeʼmae, huno ha paiʼniye.

⁷ Yeyemeʼmo ani gemo afitenoʼaeʼmo, Kagaemo Isaleli vayaʼaiteʼmo yagaika neʼapatane. He tika kamogaga aika neʼyaʼmo no. Nagaemo Nemoti nofi hoyamo aliʼna kamiguve, huno ha paiʼniye.

⁸ Inagi Yeyemeʼmo avoʼmo kaeteno ani avoteʼmo Ehapi agiʼe alagena yaʼaʼeʼmo hu maleteno Yesali taonifi vayatama vayaʼaitegaʼe ala vayaʼaitegaʼeʼmo atalegeno uʼniye.

⁹ Ani avoʼmo ina ge huno kaeʼniye. Lapakaemo neʼyaʼmo mosisayafeʼmo mago afinaʼmo lekana pai maleyo. Ani afinaʼmo lapakaemo Yesali taonifi vayaʼaifeʼmo ge hisageʼa eʼa aliʼa anupa hugae. Nemotiʼmo ani alita anupa hutapa maisayapiʼmo afaʼa ategeno hogote siyateʼmo fai maino.

¹⁰ Lole hosu vekalaʼmo agae haopaleʼmo anategeʼana maiʼneʼanaeʼmo anakaemo gemo agaepiʼmo aliʼana faiʼana ateteʼanaeʼmo ina gemo huʼanaeʼmo, Nemotiyo, huʼana, Kagaemo Gotitegaʼe kini vekalegaʼeʼmo hosu gemo huʼnane, huʼana hugaʼae. Lapakaemo Nemotiʼmo taonifatiʼmo malagamo avalelituta lamita yafa kayotetiʼmo kamitimo amagisageno faligiye, huno avoʼmo kaeʼniye.

^11-12 Inagi apakaemo Yesali taonifi vayatama vayaʼmogiʼe ala vayaʼmogiʼeʼmo ani avoʼmo aliteʼapaeʼmo inagi apakaemo Yeyemeʼmo huʼniya gemo akame huʼa neʼyaʼmo mosisayafeʼmo mago afinaʼmo lekana paiteʼa vayaʼaifeʼmo ge huʼnageʼa eʼa aliʼa anupa huʼnae. Apakaemo Nemotiʼmo hogote siyateʼmo aliʼa ateʼnageno fai maiʼniye.

¹³ Inagi lole hosu vekalaʼmo eʼana Nemoti haopaleʼmo fai maiʼneʼanaeʼmo anakaemo vayaʼai apaulagaleʼmo gemo huʼana aliʼana Nemotipikeʼmo faiʼana ateteʼana huʼanaeʼmo, Nemotiʼmo Gotifenagi kini vekaenagi huno afiʼnoʼageno hosu gemo huʼniye, huʼana huʼnaʼae. Vayaʼmogimo ani gemo afiteʼapaeʼmo Nemotiʼmo taonifatiʼmo avaleliʼa malaga uʼa lamiʼa yafa kayotetiʼmo kamitimo amagiʼnae.

¹⁴ Apakaemo Yeyemetegamo ina ge huʼa ge huʼa atalageno uʼniye. Apakaemo Nemotiʼmo yafa kayotetiʼmo ago amagiʼnageno faliʼniye, huʼa huʼnae.

¹⁵ Yeyemeʼmo ani gemo afitenoʼaeʼmo Ehapifeʼmo ha painoʼaeʼmo, Nemotiʼmo afaʼa oʼmaiʼnifa ago faliʼniyaʼmofeʼmo uka Nemotiʼmo Yesali taonifi vekamoʼmo nofi hoyaʼaeʼmo kagaeteʼmo maketi osuguve, huno huʼniya hoyaʼamo aliyo, huno ha paiʼniye.

¹⁶ Inagi Ehapiʼmo ani Nemotiʼmo ago faliʼniye, huno ha paiʼniya gemo afitenoʼaeʼmo agaemo ani nofi hoyamo alisiyafeʼmo he tino uʼniye.

Ala kava neʼmoʼa Ehapifeʼmo, hosu kavaʼmo huʼnane, huno ha paiʼniya gemae

¹⁷ Ani afinaʼmo Ala kava neʼmoʼa Ilaiyaʼmo Tisame taonifi vekaeʼmo ina gemo huno ha paiʼniye.

¹⁸ Kagaemo he tikuka Isaleli kini vekamo Ehapiʼeʼmo fotu hiʼao. Agaemo Sameliya kotegamo maiʼniya vekamoʼmo uno Nemoti nofi hoyamo alisiyafeʼmo ani hoyafiʼmo maiʼniye.

¹⁹ Kagaemo agaefeʼmo ina gemo huka ha paiyo. Ala kava neʼmoʼa kagaefeʼmo hunoʼaeʼmo, Kagaemo ani vekamo ago kamitimo amagitekaeʼmo hemenimo nofi hoyaʼaʼeʼmo alisanafeʼmo nehapiye, huno hutenoʼaeʼmo ina gemo huka ha paikaeʼmo, Kala anagaʼmogi Nemoti kolaʼmo sagani sagani huʼa neʼnaya koteʼmo kagae kolaʼeʼmo sagani sagani huʼa negae, huno naha paiʼniye, huka ha paiyo, huno ha paiʼniye.

²⁰ Ha paiʼnigeno Ilaiyaʼmo Ehapitegamo uʼnigeno Ehapiʼmo Ilaiyafeʼmo ha painoʼaeʼmo, Kame vekaʼnimogae, huno, nagaefeʼmo kahauya hulikeka nageʼnapiye, huno huʼnigeno, Kagaeteʼmo hosu kavaʼmoʼa yagaino katesigeka Ala kava neʼmo aulagaleʼmo hosu kavaʼmo huka kalavusi aliʼyaʼamo alisanafeʼmo kagufamo maketi hu maleʼnanaʼmofeʼmo kagaefeʼmo kahauya huliʼneʼna kageʼnove.

²¹ Ala kava neʼmoʼa kagaefeʼmo hunoʼaeʼmo, Afiyo, huno, Nagaemo lusi hanageke yaʼmo kagaeteʼmo aliʼna afole aiʼna ategauve. Nagaemo muki kagae nofi vayaʼmo kamitimo apamagiguve. Kagae nofi vayapatiʼmo muki kalavusi aliʼyaʼmo neʼaliya ve anagaʼe afaʼa maiʼnaya ve anagaʼeʼmo aliʼna hano huʼna apatalegauve.

²² Kagaemo Isaleli vayaʼmogi hosu kavaʼmo hisayafeʼmo aika apavayu hulika eʼnana kavatetiʼmo nagaemo naipa leʼyaʼmo alika namiʼnanaʼmofeʼmo afamo anaga vayakamo kini vekamo Yelamoʼmo Nimati mafaʼnemo afamo anaga vayaʼaʼe kini vekamo Mesaʼmo Ahaiya mafaʼnemo afamo anaga vayaʼaʼeʼmo maiʼnaya agufa kavaʼmo huʼa maigae.

²³ Ala kava neʼmoʼnamo huʼnaeʼmo, Falisiya afinaʼmo agufaʼamo kala anagaʼmogimo Yesali taonimo kegiʼya haopaleʼmo negae.

²⁴ Kagae afamo anaga vayapatiʼmo taonifiʼmo falisayaʼmoʼmo apakufaʼamo kala anagaʼmogimo negae. Taonimo malagamo mago falisayaʼmoʼmo inagi apakufaʼamo hakiki anagaʼmogimo negae, huno naha paiʼniye, huno ha paiʼniye.

²⁵ Ehapi aʼamo Yeyemeʼmo Ehapiʼmo hosu kavaʼmo hisiyafeʼmo alino he tino ateʼniyaʼmofeʼmo Ehapiʼmo hosu kavaʼmoʼa agaeteʼmo yagaino atesigeno Ala kava neʼmo aulagaleʼmo hosu kavaʼmo huno kalavusi aliʼyaʼamo alisiyafeʼmo agufamo maketi hu maleʼniye. Muki vayaʼmogimo ani agufa hosu kavaʼmo alagi osuʼnageno Ehapiʼmo muki vayaʼmo aeno apaka seno alopa hosu kavaʼmo huʼniye.

²⁶ Ala kava neʼmoʼa Emo nofi vayaʼmogi mopaʼapimo alino Isaleli vayaʼmo apamisiyafeʼmo alino hapa faino apataleʼniya vayaʼmogimo huʼnaya agufa hosu kavaʼmo Ehapiʼmo huʼniye. Agaemo Gotiʼa avenatuʼnaʼmo heno neʼataleya agufa kavaʼmo huno aigofe gotigitefeʼmo monoʼmo huʼniye. Emo vayaʼmogi huʼnaya agufa kavaʼmo huʼniye.

²⁷ Ehapiʼmo Ilaiyaʼa huʼniya gemo afitenoʼaeʼmo lusi kava huno alino amalagiteno kukena yaʼamo alino apake aiteno kogu kukenamo alino vaitenoʼaeʼmo neʼyaʼmo mosige kogu kukenamo vaino alinino havaege yulagefa aige huno maiʼniye.

^28-29 Inagi Ala kava neʼmoʼa Ilaiyafeʼmo ha painoʼaeʼmo, Ago, huno, Ehapiʼmo naulagaleʼmo agaiʼamo alino afepiʼmo ateʼniye. Agaemo ani kavaʼmo huʼniyaʼmofeʼmo afaʼa maisiya kanaʼaleʼmo alopa hosu kavaʼmo aliʼna afole aiʼna oʼategauve. Ve mafaʼneʼamo maisiya afinakeʼmo Ehapi afamo anaga vayaʼaleʼmo alopa hanageke yaʼmo aliʼna afole aiʼna ategauve, huno ha paiʼniye.