1 Kini 20 - The Keyagana NT and 25 OT books

Ehapiʼmo Siliya vayaʼeʼmo kamemo huteno huno aeno apaka seʼniya gemae

¹ Meniheʼneʼmo Siliya kini vekamoʼmo muki ati vayaʼamo apavaleno alino anupa huno apateʼnigeʼa alo huteʼa uʼa kame hapaesayafeʼmo huʼnae. Alu kini vayaʼmo teti tuʼa vayaʼmogimo ha maeʼa kamemo hisayafeʼmo hosiʼapimo apavalege kame hisaya talalamo alige huliʼuʼa mukiʼamogimo Sameliya taonileʼmo faiʼa vego huʼneʼa kame hapaeʼnae.

² Kamemo huteʼapaeʼmo Meniheʼneʼmo vayaʼmo alino apateʼnigeʼa taonifiʼmo uʼa haiʼa Isaleli kini vekamo Ehapifeʼmo ha paiʼapaeʼmo, Meniheʼneʼmo hunoʼaeʼmo,

³ Siluvakagi golikagi aʼne anagakafatiʼmo alagepa apaulagamo apakeʼnaya aʼne anaganagi mafaʼne anaganagi huʼa nagaiʼni yaʼmo hanege nagaiʼni vayaʼmo maige huʼnae.

⁴ Isaleli kini vekamo Ehapiʼmo geʼaleʼmo aeno atagaina hunoʼaeʼmo, O kini vekamo ala vekanimogae, huno, huʼnana gelefeʼmo huguve. Nagaiʼnigi muki yaʼnigi vayaʼnigi huno kagaika yaʼageʼmo haneʼniye, huno huʼniye.

⁵ Inagi henagaʼamo vayaʼmo halate alino apategeʼa Ehapitegamo eʼa Ehapifeʼmo ha paiʼapaeʼmo, Meniheʼneʼmo hunoʼaeʼmo, Hogoteʼna huʼnaeʼmo, Kagaemo siluvakagi golikagi aʼnekagi mafaʼnekagi huka namiyo, huʼna kaha paiʼnovaʼmonanafa

⁶ egamo mani hemeni agufa afinaʼmo nagaemo aliʼyaʼnimo neʼaliya vayaʼmo aliʼna apatesugeʼa uʼa kagae nopinagi aliʼyakamo neʼaliya vayaʼmogi nopinagi huʼa uʼa haiʼa kahauya huʼa kahauʼniya yaʼmo aligae, huno ha paiʼniye.

⁷ Ani gemo huno ha paiʼniyaʼmofeʼmo Isaleli kini vekamoʼmo muki Isaleli vayatama vayaʼaifeʼmo ge huʼnigeʼa eʼnageno hapa painoʼaeʼmo, Lahapao ke hovanagi afiyo, huno, ani vekamoʼmo alino hosu hunoʼageʼmo latesiya kavaʼmo nehiye. Hogoteno aʼne anagaʼnigi mafaʼne anagaʼnigi siluvaʼnigi goliʼnigi huʼna amisuvafeʼmo huʼniye. Huʼnigeʼnaeʼmo nagaemo ani gelefeʼmo kanalene, huʼna huʼnove.

⁸ Inagi muki vayatama vayaʼmogiʼe muki vayaʼmogiʼeʼmo ha paiʼapaeʼmo, Geʼamo afiteka kanalene huka osuvo, huʼa huʼnae.

⁹ Inagi Ehapiʼmo Meniheʼneʼmo alino apateʼnigeʼa eʼnaya vayaʼaifeʼmo hapa painoʼaeʼmo, Lapakaemo ala vekaʼnimo kini vekaeʼmo ha paitapaeʼmo, hogoteno huʼniya gelefeʼmo kanalene, huʼna huʼnovaʼmonanafa ani henagaʼamo huʼniya gelefeʼmo kanalene, huʼna afaʼa osuguve. Inagi apakaemo ataleʼuʼa Meniheʼnefeʼmo Ehapiʼa huʼniya gemo ha paiʼnae.

¹⁰ Meniheʼneʼmo ani gemo afitenoʼaeʼmo, Asole ati vayaʼnimogi uʼa Sameliya taonimo aliʼa hosu huʼa atalesageno aise mumusopa alino ha malegaiye. Apakaemo ani kavaʼmo osisayaʼmoʼmo gotiʼnimogimo afaʼa ani kava huʼa nagaemo aliʼa hosu huʼa natalegae, huno lokiya ge huno agoʼyamo ataleʼniye.

¹¹ Isaleli kini vekamoʼmo geʼaleʼmo aeno atagaina hunoʼaeʼmo, Meniheʼnefeʼmo ina ge hutapa ha paiyo. Ati vekamoʼmo kame hisiyafeʼmo kame hisiya kukena yaʼmo alino neʼvaiya vekamoʼmo kame huno aeno apaka setenoʼaekeʼmo kame nehiya kukena yaʼamo asagino ataleʼniya ati vekamoʼmo amogaga neʼaiya kava huno afaʼa amogaga oʼaigiye, hutapa ha paiyo, huno hapa paiʼniye.

¹² Kini vekamo Meniheʼneʼe alu kini vayaʼeʼmo seli noʼapifiʼmo maiʼneʼa aniʼmo neʼa maiʼnae. Meniheʼneʼmo Ehapiʼa huʼniya gemo afitenoʼaeʼmo ati vayaʼaeʼmo, Alo hiyo, huno hapa paiʼnigeʼa Sameliya taonifiʼmo maiʼnaya vayaʼeʼmo kamemo hisayafeʼmo alo huʼnae.

¹³ Ani afinaʼmo mago Gotitegati gemo alinineno aeno hakalo nehiya vekamoʼmo kini vekamo Ehapitegamo malage huno eno ha painoʼaeʼmo, Ala kava neʼmoʼa hunoʼaeʼmo, Ani Meniheʼneʼmo asole ati vayaʼamo apakeʼnapiye. Hemenimo nagaemo apavaleliʼneʼna kayapiʼmo apatesugeka nagetekaeʼmo nagaiʼniekeʼmo Ala kava neʼmo maiʼniye, huka nagegane, huno huʼniye.

¹⁴ Ehapiʼa ani gemo afitenoʼaeʼmo, Ala kava neʼmoʼa ina latetiʼmo hugiye, huno ge huno afi geʼnigenoʼaeʼmo, Ala kava neʼmoʼa hunoʼaeʼmo, Muki koteʼmo yagaiʼa neʼapataya vayaʼmogi neya vayaʼapimogi kame huʼa aeʼa apaka segae, huno ha paiʼnigeno, Ina laʼmo ati vayaʼaiteʼmo yagaino apategaiye, huno ge huno afi geʼnigenoʼaeʼmo, Kagaekeʼmae, huno ha paiʼniye.

¹⁵ Inagi kini vekamo Ehapiʼmo ani neya ati vayaʼaifeʼmo ge huʼnigeʼa tu hataleti teti tuʼa vayaʼmo eʼa aliʼa anupa huʼa maiʼnae. Henagaʼamo agaemo muki Isaleli ati vayaʼaifeʼmo ge huʼnigeʼa seveni tauseniʼa vayaʼmo eʼa aliʼa anupa huʼnae.

¹⁶ Apakaemo kamemo hisayafeʼmo feluga kukuʼmo taonimo ataleʼa neʼvageʼapaeʼmo Meniheʼneʼe ha maesaya kini vayaʼeʼmo seli noʼapifiʼmo maiʼneʼa aniʼmo neʼa maiʼneʼa aepa faiʼa negi nagi huʼnae.

¹⁷ Hogote vayaʼmo neʼyagaiya neya vayaʼmo uʼnageno Meniheʼneʼmo mago ati vayaʼamo alino apateʼnigeʼa Isaleli vayaʼmo apakesayafeʼmo uʼapaeʼmo ani Isaleli ati vayaʼmo neʼageʼa apaketeʼapaeʼmo, Mago vayaʼmo Sameliya taonifatiʼmo neʼae, huʼa ha paiʼnae.

¹⁸ Inagi Meniheʼneʼmo hapa painoʼaeʼmo, Lapakaemo uta kamemo lahaesayafeʼmo neʼesafi kamemo hisaya kavafeʼmo ohapaigeʼapaeʼmo lagaefeʼmo laha paisayafeʼmo neʼesafigi ohapaetapa apatafaiyo.

¹⁹ Apakaemo ani yagaiʼnaya neya Isaleli ati vayaʼmo uʼa hogotetageʼa muki ami vayaʼmo apakame huʼa uʼnageʼa Siliya vayaʼmo kamemo hapaesayafeʼmo uʼnae.

²⁰ Kamemo aepa faiʼa huʼapaeʼmo magoke magoke Isaleli neya vayaʼmogimo magoke magoke Siliya ati vayaʼeʼmo kamemo huteʼa kamitimo hapaeʼnageʼa faliʼnayaʼmofeʼmo muki Siliya vayaʼmo apaune heʼnageʼapaeʼmo Isaleli vayaʼmogimo apavegala aeʼnae. Apavegala aeʼnageno Meniheʼneʼmo hosiʼaleʼmo fai maiteno aune heno faino kasalo paeʼniye. Agaeʼe mago hosileʼmo fai maiʼneʼa kamemo nehaya ati vayaʼaʼeʼmo apaune heʼa faiʼa kasalo paeʼnae.

²¹ Inagi Isaleli kini vekamo Ehapiʼe ati vayaʼaʼeʼmo Sameliya taonifatiʼmo uʼa Siliya ami vayaʼmo hosileʼe talalafiʼeʼmo maiʼnaya vayaʼeʼmo kamemo huteʼa asole Siliya vayaʼmo kamitimo hapaeteʼa huʼa aeʼa apaka seʼnae.

²² Ani Goti gemo alinineno aeno hakalo nehiya vekamoʼmo eno Isaleli kini vekamo Ehapifeʼmo ha painoʼaeʼmo, Siliya kini vekamoʼmo henagaʼamo esiya kafugamo yasimo alino hano hisiya afinaʼmo eno lapakaeʼeʼmo halate kamemo hugiyaʼmofeʼmo kagesamo afitekaeʼmo, na agufa kavaʼmo hugufi, huka huteka lapakaitapimo alika lokiya vaika lapato.

Isaleli vayaʼmogi halate Siliya vayaʼeʼmo kamemo huteʼa huʼa aeʼa apaka seʼnaya gemae

²³ Inagi Siliya kini vekamo aliʼyaʼamo neʼaliya vayaʼmogi ha paiʼapaeʼmo, Isaleli vayaʼmogi gotiʼapimogimo aveleʼmo neʼyagaiyaʼmofeʼmo aeʼa laga seʼnae. Aeʼa laga seʼnayaʼmonanafa lagaemo otu koteʼmo apakaeʼeʼmo kamemo hisunaʼmoʼmo lagaemo huta aeta apaka segaune.

²⁴ Kagaemo ina kavaʼmo huvo. Kagaemo kini vayaʼmogimo magoʼe huʼa ati vayaʼaiteʼmo yagaiʼa oʼapategayanagi hapa faika apataleteka apaimuʼyaleʼmo ami vayaʼaiteʼmo neʼyagaiya vayaʼmo alika apato.

²⁵ Kagaemo asole ati vayaʼmo apavalegeʼa hogoteʼa asole ami vayaʼmo maiʼnaya agufa kavaʼmo huʼa maiyo. Kagaemo asole hosi anagaʼmo apavalege talalamo alige hugeʼa ani hosi anagaʼe talalaʼe mo ago aliʼa hosu huʼa apataleʼnaya yaʼmogi apaimuʼyaleʼmo maigae. Huʼnisageta lagaemo uta Isaleli vayaʼeʼmo otu koteʼmo kamemo huteta huta aeta apaka segaune, huʼa ha paiʼnageno ani gemo afitenoʼaeʼmo ani ha paiʼnaya kavaʼmo huʼniye.

²⁶ Henagaʼamo eʼniya kafugamo yasimo alino hano huʼniya afinaʼmo kini vekamo Meniheʼneʼmo ami vayaʼamo apavaleʼnigeʼa uʼa Isaleli vayaʼeʼmo Efeki taonifiʼmo kamemo hisayafeʼmo uʼnae.

²⁷ Inagi Isaleli kini vekamoʼmo ati vayaʼaeʼmo ge huʼnigeʼa eʼa aliʼa anupa huteʼa kamemo hisaya yaʼmo alo huʼa aliteʼa uʼnae. Apakaemo Siliya vayaʼmo maiʼnaya yategamo uteʼa Isaleli vayaʼmogimo lole haopalegamo seli noʼapimo aliʼa he tiʼa ateʼnae. Isaleli vayaʼmo alagi aise nofi vayaʼmo lole meme anagaʼmo aliʼa alu aiʼa neʼmaiya agufa kavaʼmo huʼa maiʼnae. Maiʼnayaʼmonanafa Siliya ami vayaʼmo muki haopalegamo asole vayaʼmo aiʼa atagu faeʼa maiʼnae.

²⁸ Inagi mago Goti vekaʼamoʼmo Isaleli kini vekalegamo eno ha painoʼaeʼmo, Ala kava neʼmoʼa hunoʼaeʼmo, Siliya vayaʼmogimo huʼapaeʼmo, Ala kava neʼmo ave kotekeʼmo neʼyagaiya Gotiʼa maiʼnifa otu koteʼmo noʼyagaiya Gotiʼae, huʼa huʼnayaʼmofeʼmo nagaemo ani asole ami vayaʼmo apavaleliʼnuʼna kayapiʼmo apatesugetapa kagaeʼe vayakamogiʼeʼmo nagaefeʼmo Ala kava neʼmo maiʼnane, hutapa nagegae, huno huʼniye, huno ha paiʼniye.

²⁹ Siliya vayaʼe Isaleli vayaʼeʼmo aluga aluga vayaʼmo seli noʼapimo aliʼa he tiʼa ateteʼa seveniʼa afinaʼmo maiʼnae. Seveni afinaʼmo aepa faiʼa kamemo huʼnae. Isaleli vayaʼmogimo Siliya ati vayaʼmo vani hataleti tauseniʼa vayaʼmo kamitimo hapaeʼnageʼa faliʼnae.

³⁰ Afaʼa maiʼnaya Siliya ati vayaʼmo apaune hetaleʼa Efeki taonifiʼmo uʼa haiʼnae. Uʼa haiʼnagenoʼaeʼmo taonile alopa yafa kegiʼyamoʼmo aino nakupaeno tuveti seveni tauseniʼa ati vayaʼaiteʼmo asagauno aiʼniye. Kini vekamo Meniheʼneʼeʼmo aune hetaleno taonifiʼmo uno haino mago nopiʼmo akamelegamo aeʼa hanagi maleʼnaya yapilagamo uno haino fala kiʼniye.

³¹ Fala kiʼnigeʼapaeʼmo aliʼyaʼamo neʼaliya vayaʼmo agaetegamo uʼa ina ge huʼa ha paiʼnae. Afiyo, huʼa, Isaleli kini vayaʼmogimo hapau huʼa apateteʼa hapa neʼmaya vayane, huʼa huʼnageta afiʼnone. Kahao ke hone, huʼa, kagaemo lategeta kogu kukenamo vaiteta lugotifiʼmo makalaniletiʼmo aita kiteta Isaleli kini vekalegamo visunageno fikumo hau huno kateteno kamitimo okamagisifigeta agegaune, huʼa ha paiʼnae.

³² Inagi apakaemo kogu kukenamo vaiteʼa lugoʼapifiʼmo makalaniletiʼmo aiʼa kiteʼa Isaleli kini vekalegamo uʼa ina ge huʼa ha paiʼnae. Meniheʼneʼmo aliʼyakamo neʼaliya vekamoʼmo hunoʼaeʼmo, Kahaoke hove, huno, kamitimo oʼnamagiyo, huno huʼniye, huʼa ha paiʼnageno Ehapiʼmo hunoʼaeʼmo, Agaemo afaʼageʼmo maiʼnifiye. Agaemo nepuʼnimokana huno maiʼniye, huno hapa paiʼniye.

³³ Apakaemo hau huno atesifi, huteʼa agesayafeʼmo maiʼnageno Ehapiʼmo, nepuʼnimoʼae, huno huʼniya gemo afiteʼapaeʼmo hau huno ategaiye, huʼa apakesamo afiʼnayaʼmofeʼmo malage huʼa ani nepuʼnimoʼae, huno huʼniya gemo aliteʼapaeʼmo he, Meniheʼneʼmo nepukamoʼmo maiʼniye, huʼa huʼnageno, avalelitapa eyo, huno hapa paiʼnigeno Meniheʼneʼmo agaetegamo eʼniye. Ehapiʼmo hunoʼaeʼmo, Talalaʼnifiʼmo eka haikeno, huno ha paiʼniye.

³⁴ Meniheʼneʼmo Ehapifeʼmo ha painoʼaeʼmo, Afoʼnimoʼmo kagae afokamoʼeʼmo kame huteno ani muki aliʼniya taoniʼamo anonaleʼmo kamisugeka Namasakasi taonifiʼmo nagaemo afoʼnimoʼmo Sameliya taonifiʼmo huʼniya agufa kavaʼmo huka maketi kumaʼmo ali malegane, huno ha paiʼnigeno Ehapiʼmo hunoʼaeʼmo, Ani kotalakemo kagaeʼeʼmo hu maleteʼna katesugeka ugane, huno huteno afaʼa ateʼnigeno uʼniye.

Mago polofeti vekamoʼmo, Ehapiʼmo hosu hanageke yaʼmo aligiye, huno huʼniya gemae

³⁵ Meniheʼneʼmo ago utegenoʼaeʼmo inagi Ala kava neʼmoʼa mago Gotitegati gemo aliniʼeʼa aeʼa hakalo nehaya vayapatiʼmo mago vekaʼapimo aipa agesamo alino he tino ateʼnigeno ani polofeti vekamoʼmo alu polofeti vekaeʼmo ha painoʼaeʼmo, kagaemo namagiyo, huno huʼniye. Huʼniyaʼmonanafa ani alu polofeti vekamoʼmo haʼao, huno huʼniye.

³⁶ Huʼnigeno ha painoʼaeʼmo, Ala kava neʼmo geʼamo amagika ataleʼnanaʼmofeʼmo kagaemo nataleka visanaʼmoʼmo mago laiyonimoʼmo kahaesigeka faligane, huno huʼniye. Huʼnigenoʼaeʼmo ani alu vekamo neʼvigenoʼaeʼmo mago laiyonimoʼmo haeʼnigeno faliʼniye.

³⁷ Inagi polofeti vekamoʼmo alu vekalegamo uno ina gemo huno ha painoʼaeʼmo, Kahaoke hove, huno, Kagaemo namagiyo, huno huʼnigeno ayamukiki huno amagino agufamo aino atalagauʼniye.

³⁸ Amagiʼniya polofeti vekamoʼmo vayaʼmogimo agaemae, huʼa ageʼa aeto osisayafeʼmo lavolavo atupaletiʼmo augosafiʼmo aino ati kaeno aliteno uno ka haopaleʼmo kini vekamo Ehapiʼmo esiyaʼaeʼmo he tino agava maiʼniye.

³⁹ Kini vekamo eno avaʼyi huʼnigenoʼaeʼmo polofeti vekamoʼmo hunoʼaeʼmo, Kini vekae afiyo. Nagaemo kamefiʼmo maiʼnogenoʼaeʼmo mago lagae ati vekamo mago kame vekamo avalelino nagaetegamo eno naha painoʼaeʼmo. Ani vekamo alagepa huka yagaika ato. Agaemo aune hesiyaʼmoʼmo nagaemo kamitimo kamagisugeka faligane. Kamitimo okamagisuvafeʼmo inagi kagaemo teti tauseni kina siluva yafaʼmo agotimo miya faiyo, huno naha paiteno ago uʼniye.

⁴⁰ Nagaemo asole aliʼyaʼmo aliteʼna ani kame vekaleʼmo alagepa huʼna oʼyagaiʼnogeno aune heʼniye, huno ha paiʼnigeno kini vekamoʼmo ina gemo huno ha paiʼniye. Kagaikamo ago agoti huka kateʼnanaʼmofeʼmo kagaetegamo ani agufa kavaʼmo afole aigiye, huno ha paiʼniye.

⁴¹ Ha paiʼnigeno polofeti vekamoʼmo malage huno augosafiʼmo aino ati kae maleʼniya lavolavo atupamo alino ataleʼnigenoʼaeʼmo kini vekamoʼmo polofeti vayapati vekamae, huno ageno aeto huʼniye.

⁴² Polofeti vekamoʼmo kini vekaeʼmo ha painoʼaeʼmo, Ala kava neʼmoʼa ina ge huʼniye, Nagaemo Ala kava neʼmoʼnamo huʼnaeʼmo, Nagaemo, ago faligiye, huʼna lekana paiʼna ateʼnova vekamo afaʼa atenageno uʼniyaʼmofeʼmo agae aimuʼyaleʼmo kagaemo falisanageʼa ati vayakamo ati vayaʼamogi apaimuʼyaleʼmo faligae, huno huʼniye.

⁴³ Isaleli kini vekamoʼmo ani gemo afitenoʼaeʼmo ani geeʼmo ohauʼnigeno hosu aipamo kaliʼnigeno uno Sameliya taonifiʼmo maiʼniye.