1 Kini 19 - The Keyagana NT and 25 OT books

Ilaiyaʼmo falisiya kavapatiʼmo faino kasalo paeno aune hetaleno Holepi avelegamo uʼniya gemae

¹ Kini vekamo Ehapi aʼmo kuvini a kanomo Yeyemefeʼmo muki Ilaiyaʼmo huʼniya kavafeʼmo ha paiʼniye. Inagi Ilaiyaʼmo muki Meo geʼamo aeʼa hakalo nehaya vayaʼmo naipeletiʼmo kamitimo apaiʼniya kavaʼefeʼmo ha paiʼniye.

² Yeyemeʼmo afitenoʼaeʼmo Ilaiyategamo ina ge huno ge huno atalegeno uʼniye. Inagi nagaemo kagaemo ani Meo geʼamo aeʼa hakalo nehaya vayaʼmo kamitimo apaiʼnana agufa kavaʼmo huʼna egamo mani hemeni agufa kanaleʼmo kaisugeka apaiʼnana vayakana huka maigane. Nagaemo ani agufa kavaʼmo osisuvaʼmoʼmo kanale kavanageʼa gotigimo kamitimo namagigae, huno huteno agoʼyamo ataleʼniye.

³ Huʼnigeno Ilaiyaʼmo ani gemo afitenoʼaeʼmo ofalino afaʼa maisiyafeʼmo he tino aune heno visiyafeʼmo aliʼyaʼamo neʼaliya vekamo avaleteno anakaemo Yuta kotega Miyasima taonifiʼmo uʼana avaʼyi huteʼanaeʼmo Ilaiyaʼmo aliʼyaʼamo neʼaliya vekamo ani taonifiʼmo ateteno

⁴ agaiʼageʼmo hau huʼniya kaʼme kotegamo folagapiʼmo magoke afinaʼmo uʼniye. Agaemo uno mago yosamo aepaleʼmo avaʼyi huteno aepafiʼmo itopaleʼmo maiʼnenoʼaeʼmo falisiyafeʼmo nunumuʼmo hunoʼaeʼmo, Ala kava nene, huno, Hainageka afaʼa neʼmauva yaʼnimo hemenimo afaʼa aligane. Nagaemo alagepa vekamo oʼmaiʼneʼna naginago vayaʼmo aeʼna oʼapaka seʼnovaʼmofeʼmae, huno huʼniye.

⁵ Huteno ani yosamo aepafiʼmo havaeʼnigenoʼaeʼmo mago enisole vekamo emineno agufaleʼmo ame alino haunetenoʼaeʼmo, Kagaemo he tika neʼyaʼmo no, huno huʼniye.

⁶ Inagi Ilaiyaʼmo ageyana agenopamo haopaleʼmo mago peleti mayamo ata hokanufaleʼmo kaeʼnaya peleti mayaʼe ani samoʼeʼmo haneʼnigeno ageteno alino neteno halate havaeʼniye.

⁷ Ala kava neʼmo enisole vekaʼamo halate haunetenoʼaeʼmo, Visana kaʼmo afagi kateʼmo haneʼniyaʼmofeʼmo ka aesana lokiyakamo ohaneʼniyanagi he tika neʼyaʼmo no, huno ha paiʼniye.

⁸ Inagi Ilaiyaʼmo he tino neʼyaʼmo nege aniʼmo nege huʼnigeno agufamo lokiya vaiʼnigeno felugaʼe haniʼilagaʼeʼmo fotiʼa afinaʼmo uʼniye. Uno ani Holepi avemo Goti aveleʼmo avaʼyi huʼniye.

⁹ Ilaiyaʼmo mago yafa kapiʼmo haniʼilagamo uno haino havaeʼniye. Inagi Ala kava neʼmoʼa Ilaiyategamo emineno ina ge huno ge huno afi geʼniye. Ilaiyao, huno, Na agufa kavaʼmo higekaeʼmo eka manileʼmo maiʼnane, huno huʼnigenoʼaeʼmo,

¹⁰ Nagaemo Ala kava neʼmo asole vayaʼaiteʼmo yagaino neʼapateya Gotitefeʼmo naya mukiki huʼna aliʼyaʼamo neʼaluve. Isaleli vayaʼmogimo hu maleʼnana kotalakemo atalege ofalinimo hisaya yafa hiʼyalamukamo aliʼa naku paege kagaetegati gemo alini eʼa aeʼa hakalo nehaya vayaʼmo naipeletiʼmo kamitimo apaige huʼnageʼnaeʼmo nagaiʼnimo magokeʼageʼmo maiʼnogeʼapaeʼmo hemenimo nagaeʼeʼmo kamitimo namagisageʼna falisuvafeʼmo nehae, huno huʼniye.

^11-12 Ala kava neʼmoʼa Ilaiyafeʼmo, Kagaemo yafa kapatiʼmo eka emikeka aveleʼmo naulagaleʼmo he tika maiyo, huno ha paiʼniye. Afiyo, Ala kava neʼmo eno uʼnigeno lusi kava huno lokiya yasimo aliteno aveʼe yafaʼeʼmo alino anaku paeʼniye. Ala kava neʼmo ani yasifiʼmo oʼmaiʼniye. Yasimo alitegenoʼaeʼmo imimaʼmo aliʼniye. Ala kava neʼmo ani aliʼniya imimapiʼmo oʼmaiʼniye. Imimaʼmo alitegenoʼaeʼmo ata leʼniye. Ala kava neʼmo ani atafiʼmo oʼmaiʼniye. Atamo letegenoʼaeʼmo mago vekamoʼmo aise gefatiʼmo sumi sumi huno ge huʼniye.

¹³ Ilaiyaʼmo ani gemo afitenoʼaeʼmo augosafiʼe yatala kukena yaʼaleʼeʼmo aino ati kaeteno kelifatiʼmo ataleno uno keli avayamo haopaleʼmo he tino maiʼniye. Maiʼnigenoʼaeʼmo malage huno gemo hunoʼaeʼmo, Ilaiyao, huno, Na agufa kavaʼmo higekaeʼmo eka manileʼmo maiʼnane, huno huʼnigenoʼaeʼmo

¹⁴ Nagaemo Ala kava neʼmo asole vayaʼaiteʼmo yagaino neʼapateya Gotitefeʼmo naya mukiki huʼna aliʼyaʼamo neʼaluve. Isaleli vayaʼmogimo hu maleʼnana kotalakemo atalege yafa hiʼyalamukamo aliʼa naku paege kagaetegati gemo alini eʼa aeʼa hakalo nehaya vayaʼmo naipeletiʼmo kamitimo apaige huʼnageʼnaeʼmo nagaiʼnimo magokeʼageʼmo maiʼnogeʼapaeʼmo hemenimo nagaeʼeʼmo kamitimo namagisageʼna falisuvafeʼmo nehae, huno huʼniye.

¹⁵ Inagi Ala kava neʼmoʼa Ilaiyafeʼmo ha painoʼaeʼmo, Kagaemo atagineka Namasakasi taonimo haopaleʼmo hau huʼniya kaʼme koteʼmo uvo. Uka avaʼyi hutekaeʼmo Hayiyoʼmo agetekaeʼmo Siliya kini vekamo maisiyafeʼmo uvelimo agenopafiʼmo lakika ato.

¹⁶ Ani kava huka Yiyuʼmo Nimasi mafaʼnemoʼmo Isaleli vayaʼmogi kini vekaʼapimo maisiyafeʼmo agenopafiʼmo uvelimo lakika ato. Ani kavaʼmo huteka Ilaisaʼmo Sefati mafaʼnemo Emeli-Mihola taonifi vekamoʼmo kagae kaimuʼyaleʼmo maiʼneno nagaetegati gemo alinineno aeno hakalo hisiyafeʼmo agenopafiʼmo uvelimo lakika ato.

¹⁷ Hayiyoʼmo kini vekamo maisiya afinaʼmo asole vayaʼmo kamitimo apamagigiye. Mago vayaʼamo agaetegatiʼmo faiʼa kasalo paeʼa apaune hesayana Yiyuʼmo kamitimo apamagigiye. Mago vayaʼamo agaetegatiʼmo faiʼa kasalo paeʼa apaune hesayana Ilaisaʼmo kamitimo apamagigiye.

¹⁸ Faligayaʼmonanafa nagaemo seveni tauseniʼa Isaleli vayaʼmogimo aigofe gotiʼmo Meotefeʼmo apaleyaʼmo ofaige auneʼamo haeʼa oʼnege agaetefeʼmo monoʼmo osuge huʼnaya vayaʼmo hapa maesugeʼa afaʼa maigae, huno ha paiʼniye.

Ilaiyaʼmo Ilaisaʼa lekana paino ateʼnigeno noʼamo ataleno eno Ilaiyaʼmo akame huʼniya gemae

¹⁹ Inagi Ilaiyaʼmo ani kotetiʼmo ataleno halate uno ageyana Ilaisaʼmo Sefati mafaʼneʼe alu leveniʼa vayaʼeʼmo hoyafiʼmo lokaeʼa aliʼyaʼmo neʼaligeno ageʼniye. Leveniʼa vayaʼmogimo aiʼyumo aisayafeʼmo lole pulumakalateʼmo yagaiʼa anatete anatete hutageno Ilaisaʼmo aiʼyumo aisiyafeʼmo apakame huno lole pulumakalateʼmo yagaino anateʼniye. Inagi Ilaiyaʼmo uno Ilaisaʼa aeno neʼagasenoʼaeʼmo agaiʼa yatala kukena yaʼamo asagino Ilaisa agiʼnaleʼmo yaga auʼniye.

²⁰ Ilaiyaʼmo uʼnigenoʼaeʼmo Ilaisaʼmo aliʼyaʼamo ataleno nagu nagu huno Ilaiyaʼmo akame huno neʼunoʼaeʼmo ha painoʼaeʼmo, Afaʼa nategeʼna halate uʼna itaʼni afoʼnilaʼmoganimo hogoteʼna hanaeʼna neteʼna eʼna kakame huguve, huno huʼnigenoʼaeʼmo Ilaiyaʼmo hunoʼaeʼmo, Kanalenagi anakaetegamo afaʼa atagineka uvo. Nagaemo kagaetegamo na agufa kavaʼmo huʼnove, huno ha paiʼniye.

²¹ Inagi Ilaisaʼmo Ilaiyategatiʼmo atagineno uno lole pulumakalaʼmo anamagiteno latapa yosaletiʼmo maleno anatafauno anateʼnigeʼana aiʼyumo neʼaiʼa yosamo alino ata kaeteno pulumakamo ameʼamo kaeteno muki vayaʼamo apamiʼnigeʼa neʼnae. Inagi ani kavaʼmo ago hutenoʼaeʼmo uno Ilaiyaʼmo akame huno uno aliʼyaʼamo alisiya vekamo ha maleʼniye.