Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Kini 18 - The Keyagana NT and 25 OT books


Ilaiyaʼmo kini vekamo Ehapitegamo uʼniya gemae

1 Asole afinaʼmo koʼmo oʼaino alopa yegemo loleʼe magoʼe kafugamo letegenoʼaeʼmo Ala kava neʼmoʼa Ilaiyafeʼmo ha painoʼaeʼmo, Uka kini vekamo Ehapi aulagaleʼmo he tisanageʼnaeʼmo nagaemo halate koʼmo aliʼna atalesugeno eminegaiye, huno ha paiʼniye.

2 Inagi Ilaiyaʼmo Ehapi aulagaleʼmo uno he tisiyafeʼmo uʼniye. Ani afinaʼmo Samaliya kotegamo neʼyafeʼmo lusi kava huʼa kafu huʼnae.

3 Kafu huʼnageno kini vekamo Ehapiʼmo alopa noʼaleʼmo neʼyagaiya vekamo Omanaiyafeʼmo keya aeno ge huʼnigeno eʼniye. Omanaiyaʼmo Ala kava nefeʼmo lusi kava huno koli huʼniya vekamae.

4 Koli huʼniyaʼmofeʼmo kuvini a kanomo Yeyemeliʼmo Ala kava neʼmo geʼamo aliniʼeʼa aeʼa hakalo nehaya vayaʼmo kamitimo apamagiʼnigeʼa faliʼnagenoʼaeʼmo Omanaiyaʼmo ani agufa vayaʼmo Ala kava neʼmo geʼamo aliniʼeʼa aeʼa hakalo nehaya vayaʼmo vani hataletiʼa vayaʼmo apavaleno alino alopa yafa kapiʼmo fala kino apateʼniye. Agaemo alu yafa kapiʼmo fifitiʼa vayaʼmo fala kino apateteno alu yafa kapiʼmo fifitiʼa vayaʼmo fala kino apateʼniye. Agaemo yagaino apateʼnenoʼaeʼmo neʼyaʼmo apamige aniʼmo apamige huʼniye.

5 Omanaiyaʼmo ago eʼnigenoʼaeʼmo Ehapiʼmo ha painoʼaeʼmo, Laʼagaemo muki nagaemo yagaiʼnova kotegamo utaʼa meti anitegagi muki aise anitegagi hutaʼa umenitata huguʼae. Inagi ani haopalegamo hosimogiʼe nokimogiʼeʼmo nesaya kahauveʼmo kahauya hutaʼa agesuʼafi oʼagesuʼafigetaʼa kahaumo haneʼnisiyaʼmoʼmo yuna afumo oʼapamagigune, huno huʼniye.

6 Inagi anakaemo mopamo aliʼana fako huteʼanaeʼmo Ehapiʼmo agaiʼageʼmo mago kotegamo uʼnigeno Omanaiyaʼmo agaiʼageʼmo alu kotegamo uʼniye.

7 Omanaiyaʼmo neʼvigenoʼaeʼmo Ilaiyaʼmo kateʼmo neʼegeʼana fotu huʼnaʼae. Omanaiyaʼmo, Ilaiyaʼa maiʼniye, huno agetenoʼaeʼmo mopafiʼmo augosalegatiʼmo asagauno aiteno ina ge huno ge huno afi geʼniye. Kava vekaʼnimo Ilaiyagamo maiʼnapiye, huno huʼniye.

8 Ilaiyaʼmo geʼaleʼmo aeno atagaina hunoʼaeʼmo, He, nagaemo Ilaiyaʼnageʼmae. Uka kava vekaeʼmo, Ilaiyaʼmo manileʼmo maiʼniye, huka ha paiyo.

9 Omanaiyaʼmo ha painoʼaeʼmo, Na agufa hosu kavaʼmo huʼnovaʼmofeʼmo Ehapiʼmo kamitimo namagisiyafeʼmo kagaemo navalelika uka ayapiʼmo amigane.

10 Ala kava neʼmo Gotikamoʼmo afaʼa maiʼniye, huʼna alagi lama gemo nehuva kava huʼna ina gemo huʼnaeʼmo, Agaemo kini vekamoʼmo halate kagaemo kagesiyafeʼmo vayaʼmo muki kotegamo uʼeʼa huʼa kahauya huʼa kagesayafeʼmo alino apateʼnigeʼa uʼnae. Apakaemo oʼmaiʼniye, huʼa huʼnageno Ehapiʼmo ani koteʼmo yagaiʼniya vekaeʼmo, Anagatiʼmo alagi lama gemo huʼnaeʼmo, mani koteʼmo oʼmaiʼniye, huka huvo, huno huʼniye.

11 Huʼniyaʼmonanafa hemenimo kagaemo nagaefeʼmo, uka kava vekaeʼmo, Ilaiyaʼmo manileʼmo maiʼniye, huka ha paiyo, huka naha paiʼnane.

12 Nagaemo kataleʼna neʼvisugenoʼaeʼmo Ala kava neʼmo Aunemeʼamoʼmo nagaemo mago oʼageʼnisuva kotegamo kavalelino ugiye. Nagaemo uʼna Ehapifeʼmo ha paisugeno Ehapiʼmo eno kagaefeʼmo kahauya hisiyana okagenoʼaeʼmo kamitimo namagigiye. Nagaefeʼmo kagesa afiyo. Nagaemo aliʼyakamo neʼaluva vekamoʼnamo neya mafaʼnemo maiʼnova afinatetiʼmo Ala kava nefeʼmo koli hume hume eʼna hemenimo maiʼnove.

13 Yeyemeliʼmo Ala kava neʼmo geʼamo aliniʼeʼa aeʼa hakalo nehaya vayaʼmo kamitimo apamagiʼnigeʼa faliʼnageʼnaeʼmo Gotitegati gemo aliniʼeʼa aeʼa hakalo nehaya vayaʼmo vani hataletiʼa vayaʼmo fifiti fifti huʼna lole yafa katalapiʼmo aliʼna fala kiʼna apateʼnove. Yagaiʼna apateteʼna neʼyaʼmo apamige aniʼmo apamige huʼnove. Mago vekamoʼmo huʼnova kavafeʼmo ava gemo huno kaha opaiʼnifiye.

14 Ani kavaʼmo huʼnovaʼmonanafa hemenimo hukaeʼmo, Uka kava vekaeʼmo, Ilaiyaʼmo manileʼmo maiʼniye, huka ha paiyo, huka naha paiʼnane. Agaemo kamitimo namagigiye, huno ha paiʼniye.

15 Inagi Ilaiyaʼmo ha painoʼaeʼmo, Asole vayaʼaiteʼmo neʼyagaiya Ala kava neʼmo aulagaleʼmo he tiʼna maiʼnova Gotiʼa afaʼa maiʼniye, huʼna alagi lama gemo nehuva kava huʼna ina gemo huʼnaeʼmo, Hemenimo uʼna aulagaleʼmo alagi he tiʼna maiguve, huno ha paiʼniye.

16 Inagi Omanaiyaʼmo kini vekamo Ehapiʼeʼmo fotu hisiyafeʼmo uno agetenoʼaeʼmo, Ilaiyaʼmo manileʼmo maiʼniye, huno ha paiʼnigeno Ehapiʼmo Ilaiyaʼeʼmo fotu hisaʼafeʼmo uʼniye.

17 Ehapiʼmo Ilaiyaʼa agetenoʼaeʼmo, Kagaemo Isaleli vayaʼmo hanageke yaʼmo alika neʼapamina vekamo kagaemo maiʼnapiye, huno huʼnigenoʼaeʼmo

18 geʼaleʼmo aeno atagaina hunoʼaeʼmo, Nagaemo Isaleli vayaʼmo hanageke yaʼmo oʼapamiʼnovaʼmonanafa kagaeʼe afokamo nofi vayaʼmogiʼekeʼmo hanageke yaʼmo apamiʼnae. Kagaemo Ala kava neʼmoʼa hiyo, huno laha paiʼniya gemo amagita ataletetapa aigofe gotiʼa asole Meo auneʼaeʼmo mono hutetapa akame nehaya kavatetiʼmo Isaleli vayaʼmo hanageke yaʼmo alita apamiʼnae.

19 Inagi muki Isaleli vayaʼmo nagaetegamo eʼa aliʼa anupa huʼa maisayafeʼmo ge huka atalegeʼa Kame avefiʼmo eyo. Meo geʼamo aeʼa hakalo nehaya vayaʼmo fo hataleti fifitiʼa vayanagi Yeyemeliʼmo neʼyaʼapimo neʼapamiya vayaʼmo a kanomo gotiʼa Asila geʼamo aeʼa hakalo nehaya vayaʼmo fo hataletiʼa vayanagi huka apavalelika eno, huno ha paiʼniye.


Ilaiyaʼmo aigofe mono vayaʼmo aeno apaka seʼniya gemae

20 Inagi Ehapiʼmo muki Isaleli vayaʼaifenagi muki aigofe gemo aeʼa hakalo nehaya vayaʼaifenagi huno ge huʼnigeʼa Kame aveleʼmo eʼa aliʼa anupa huʼnae.

21 Ilaiyaʼmo muki vayaʼaitegamo eno ina gemo huʼniye. Na magi afinaʼmo lole lapakesamo afime afime ugae. Ala kava neʼmo lama ge Gotiʼmo maiʼnisiyaʼmoʼmo agaiʼageʼmo akame hiyo. Meoʼa lama ge Gotiʼmo maiʼnisiyaʼmoʼmo akame hiyo, huno hapa paiʼnigeʼapaeʼmo vayaʼmogimo geʼaleʼmo magoke gemo huʼa aeʼa atagaina huʼa osuʼnae.

22 Inagi Ilaiyaʼmo vayaʼaifeʼmo hapa painoʼaeʼmo, Ala kava neʼmo geʼamo aliniʼeʼa aeʼa hakalo nehaya vayapatiʼmo nagaemo magokeʼageʼmo maiʼnovaʼmonanafa Meo geʼamo aeʼa hakalo nehaya vayaʼmo fo hataleti fifitiʼa vayaʼmo maiʼnae.

23 Inagi lole ve pulumakalaʼmo anavalelita eyo. Meo geʼamo aeʼa hakalo nehaya vayaʼmogimo mago ve pulumakamo lekana paiʼa avalegae. Apakaemo ofalinimo hisayafeʼmo amagiʼa heʼa lapake hugae. Apakaemo ofalini hiʼyalamuteʼmo atamo maleʼneʼa ani ameʼamo atamo agotofuleʼmo malegayaʼmonanafa apakaemo atamo kani aeʼa okaegae. Nagaemo alu ve pulumakamo avaleʼna magoke agufa kavaʼmo huʼna ofalinimo hisuvafeʼmo alo hu malegauvaʼmonanafa nagaeʼeʼmo atamo kani aeʼna okaegauve.

24 Inagi lapakaemo gotitapimogi apakiʼapileʼmo aetapa keya aesageʼnaeʼmo nagaemo Ala kava neʼmo agiʼaleʼmo aeʼna keya aegauve. Ani Gotiʼa ataletiʼmo getileʼmo aeno atagaina huno hisigetaeʼmo agaekeʼmo lama ge Gotiʼmae, huta hugune, huno hapa paiʼnigeʼa muki vayaʼamogimo huʼapaeʼmo, Kanale gemo huʼnane, huʼa huʼnae.

25 Inagi Ilaiyaʼmo Meo geʼamo aeʼa hakalo nehaya vayaʼaifeʼmo hapa painoʼaeʼmo, Lapakaemo asole vayaʼmo maiʼnayaʼmofeʼmo mago ve pulumakamo lekana paitapa avalelitetapa alo hiyo. Alo hugayaʼmonanafa atamo kani aeta okaetapa goti agi aletiʼmo keya aeta ge hiyo.

26 Inagi apakaemo apamiʼnaya ve pulumakamo avaleliʼuʼa alo huteʼa netepatiʼmo aepa faiteʼa Meo agiʼaletiʼmo keya aeʼa ge huliʼuʼa felugakukuʼmo huʼnae. Keya aeʼa ge huʼapaeʼmo, O Meo, huʼa, getimo afiyo, huʼa keya aeʼa ge huʼnayaʼmonanafa mago vekamoʼmo agemo aiteno geʼapileʼmo aeno atagaina huno hapa opaiʼniye. Apakaemo aeʼa hailo hailo huʼa hu maleʼnaya yafa hiʼyalamuʼmo aiʼa vego huʼnae.

27 Felugakukuʼmo Ilaiyaʼmo kigi yokalo gemo huno hapa painoʼaeʼmo, Agaemo gotiʼa maiʼniyaʼmonanafa hemenimo mago alu yafeʼmo agesamo neʼafisifi aliyaʼamo neʼalisifi mago kotegamo uʼnisifi huʼnegaiye. Havaeno maiʼnisifigi lapakaemo hauneyo. Alopa gefatiʼmo keya aeta ge hiyo, huno hapa paiʼniye.

28 Inagi apakaemo alopa gefatiʼmo nehaya kavaʼmo huʼa ge huge apakaiʼapi apakufamo haginaletiʼmo lagauge huʼnae. Lagauʼnagenoʼaeʼmo apakufafatiʼmo kolaʼapimo heno lamiʼniye.

29 Ago unetiʼnigeʼapaeʼmo Meo geʼamo aeʼa hakalo hume hume neʼvagenoʼaeʼmo uneʼmo ofalinimo nehaya kanamo afole aiʼniye. Huʼnayaʼmonanafa agemo oʼaige geʼapileʼmo aeno atagaina huno ge osuge mago gotiʼa geʼapimo oʼafige huʼniye.

30 Inagi Ilaiyaʼmo vayaʼaifeʼmo hapa painoʼaeʼmo, Lapakaemo nahaopaleʼmo etapa hogo hiyo, huno hapa paiʼnigeʼa muki vayaʼamo haopaleʼmo eʼa maiʼnageno Ilaiyaʼmo Ala kava neʼmo yafa hiʼyalamuʼmo aliʼa naku paeʼa ataleʼnaya hiʼyalamuʼmo halate alino alagepa huno huʼniye.

31 Agaemo yafa hiʼyalamuʼmo hisiyafeʼmo tuolofuʼa yafaʼmo aliʼniye. Yekopu tuolofuʼa mafaʼne anagapatiʼmo tuolofuʼa nofi vayaʼaitefeʼmo tuolofuʼa yafaʼmo aliʼniye. Ala kava neʼmoʼa Yekopufeʼmo hunoʼaeʼmo, Kagikamo Isaleligae, huʼa aegae.

32 Inagi Ilaiyaʼmo ani yafaʼmo alino Ala kava neʼmo agiʼalefeʼmo ofalinimo amisiya hiʼyalamuʼmo huʼniye. Yafa hiʼyalamuteʼmo ani kaʼmo vailino vego huno ateʼniye. Ani ani kaʼmoʼmo fotini lita aniʼmo atafauno hanesiyafeʼmae.

33-34 Agaemo yafa hiʼyalamuteʼmo atamo alino maleʼneno pulumakamo ameʼamo lagauno atamo agotofuleʼmo maletenoʼaeʼmo, Loleʼe loleʼe samofiʼmo aniʼmo hefilitetapa ofalini ameʼaleʼmo lakige ataleʼmo lakige hiyo, huno hapa paiʼnigeʼa lakiʼnagenoʼaeʼmo, halate keʼmo lakiyo, huno hapa paiʼnigeʼa lakiʼnagenoʼaeʼmo, halate magoʼe hutapageʼmo lakiyo, huno hapa paiʼnigeʼa loleʼe magoʼe kanaleʼmo aniʼmo lakiʼnae.

35 Aniʼmo yafa hiʼyalamutetiʼmo uno lamino ani kapiʼmo havai teʼniye.

36 Uneʼmo ofalinimo nehaya kanaleʼmo Gotitegati gemo alinineno aeno hakalo nehiya vekamo Ilaiyaʼmo uno yafa hiʼyalamuʼmo haopaleʼmo nunumuʼmo hunoʼaeʼmo, Ala kava nene, huno Emalehamuʼagi Aisakiʼagi Isaleliʼagi huka Gotiʼapimogamo kagaikageʼmo maiʼnekaeʼmo, nagaemo Isaleli vayaʼmogi Gotiʼapimoʼnamo maiʼnove, huka alika apave liyo. Nagaemo aliʼyakamo neʼaluva vekamo maiʼneʼna kagae gegeʼmo akame huʼna ani muki kavaʼmo huʼnovanagi agesayafeʼmo alika apave liyo.

37 O Ala kava nene, huno, geʼnimo afiyo, geʼnimo afiyo. Afisanageʼa kagaefeʼmo huʼapaeʼmo, Agaemo Ala kava neʼmo Gotiʼa maiʼnenoʼaeʼmo laipamo alino aino afe leno lateʼnigeta halate atagineta agaetegamo eʼnone, huʼa hisayafeʼmo alika apave liyo, huno nunumuʼmo huʼniye.

38 Inagi Ala kava neʼmoʼa atamo alino atalegeno emineno ani ofalinimo alagi lege maleʼniya atamo lege hiʼyalamuʼmo hu maleʼniya yafaʼmo lege hiʼyalamuʼmo haopaleʼmo haneʼniya mopamo lege huʼniye. Ani kaʼmo vai maleʼniya yapiʼmo haneʼniya aniʼeʼmo alagi leno laneno ataleʼniye.

39 Muki vayaʼmogimo ani kavaʼmo ago ageteʼapaeʼmo apaugosalegatiʼmo asagauʼa aiteʼa ina ge huʼa huʼnae. Ala kava nekeʼmo Gotiʼae. Ala kava nekeʼmo Gotiʼae, huʼa huʼnae.

40 Inagi Ilaiyaʼmo hapa painoʼaeʼmo, Lapakaemo Meo geʼamo aeʼa hakalo nehaya vayaʼmo apatafautapa alagi hiyo. Magoke vekamo afaʼa atalegeno aune oseno, huno hapa paiʼnigeʼa apatafauʼa alagi huʼnagenoʼaeʼmo Ilaiyaʼmo ani vayaʼmo Kaiyoni aniʼmo agiʼnaleʼmo apavalelino uno lamino kamitimo apamagiʼnigeʼa faliʼnae.


Isaleli kotegamo koʼmo oʼaiʼniya kavaʼmo hano huʼnigeno halate koʼmo aiʼniya gemae

41 Inagi Ilaiyaʼmo Ehapifeʼmo ha painoʼaeʼmo, Nagaemo afuvana alopa agemo ailino neʼegi malage huka uka neʼyaʼmo no, huno ha paiʼniye.

42 Ha paiʼniyaʼmofeʼmo Ehapiʼmo neʼyaʼmo nesiyafeʼmo uno haiʼniye. Ilaiyaʼe aliʼyaʼamo neʼaliya vekaʼeʼmo Kame avefiʼmo uʼana haiʼnaʼae. Ilaiyaʼmo lole aleʼyalaʼmo folagapiʼmo ape huno agenopamo ategeno uno lamiʼniye.

43 Agaemo aliʼyaʼamo neʼaliya vekaeʼmo ha painoʼaeʼmo, Kagaemo uka haika mugalegatiʼmo solovala anitegamo aulu heka ago, huno ha paiʼnigeno uno aulu heno agegenoʼaeʼmo halate atagineno eno mago yaʼmo oʼageʼnove, huno ha paiʼnigeno Ilaiyaʼmo, halate uka haika aulu heka ago, huno seveniʼa afinaʼmo magoke agufa geʼageʼmo huʼniye.

44 Aliʼyaʼamo neʼaliya vekamoʼmo napa seveni afinaʼmo halate eno hunoʼaeʼmo, Nagaemo solovalapatiʼmo mago hiyaʼmo afole aiʼnigeʼna agovana aiseʼatoʼamo vayaʼmogi apayakana agufa kavaʼmo huʼniye, huno ha paiʼnigenoʼaeʼmo, Kagaemo malage huka uka kini vekamo Ehapifeʼmo ha paikaeʼmo, Talalakamo alo huteka malage huka uka lamiyo. Fiku yanageno koʼmo kaino katafauno kategaiye, huka ha paiyo.

45 Inagi hiyaʼmo malage huno alino anupaʼage huteno kokuʼnateʼmo kino aino ati kaeʼnigeno yasimo aliteno alopa koʼmo aiʼniyaʼmofeʼmo Ehapiʼmo talalaʼafiʼmo uno haino maiteno Yesali taonifilagamo neʼvaya kateʼmo uʼniye.

46 Ala kava neʼmo lokiyaʼamo Ilaiyateʼmo afole aiʼnigenoʼaeʼmo kenaʼamo alino alagi huno hapino aliteno nagu nagu huno uno Ehapi talalaleʼmo uno hogotetegeʼana anakaemo uʼana Yesali taonifiʼmo avaʼyi huʼnaʼae.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ