1 Kini 17 - The Keyagana NT and 25 OT books

Ilaiyaʼmo Isaleli kotegaeʼmo koʼmo oʼaigiye, huno huʼniya gemae

¹ Ilaiyaʼmo Tisame taonimo Giliyati avemo haopaleʼmo maiʼniya vekamoʼmo kini vekamo Ehapitegamo uno ina ge huno ha paiʼniye. Nagaemo Ala kava neʼmo Isaleli vayaʼmogi Gotiʼapimoʼmo afaʼa maige maige huno neʼmaiya vekamo aulagaleʼmo he tiʼna maiʼneʼna agiʼaletiʼmo alagi lama gemo huʼnaeʼmo, Mago kafugamo koʼe haniʼilaga lao yaʼeʼmo mopafiʼmo emi noʼmeno afaʼa haneme haneme neʼvisigeʼnaeʼmo nagaemo ge hisuva afinakeʼmo emiʼnegaiye, huno ha paiʼniye.

² Inagi Ala kava neʼmoʼa Ilaiyafeʼmo ha painoʼaeʼmo,

³ Kagaemo mani kotetiʼmo ataleka uka yegemo haine neʼeya haopalegamo aise aniʼmo Kiliti aniʼmoʼa Yoneni anipiʼmo uno nelamiya aniʼmo haopaleʼmo fala kika maiyo.

⁴ Kagaemo ani aniʼmo negane. Nagaemo mago nama anagaʼmogi apakiʼapimo Leveni nama anagaʼaifeʼmo, aniʼmo haopaleʼmo neʼyaʼmo hanilitutapa amiyo, huʼna ago hapa paiʼnove, huno ha paiʼniye.

⁵ Ha paiʼniyaʼmofeʼmo Ilaiyaʼmo Ala kava neʼmo geʼamo akame huno uno Kiliti aniʼmo Yoneni anipiʼmo uno nelamiya aniʼmo haopaleʼmo maiʼniye.

⁶ Maiʼnigeʼapaeʼmo Leveni nama anagaʼmogimo netepiʼmo peleti mayaʼe afumo ameʼaʼeʼmo haniliʼuʼa amige uneʼmo peleti mayaʼe afumo ameʼaʼeʼmo haniliʼuʼa amige huʼnae. Agaemo ani aniʼmo neʼniye.

⁷ Mago afinaʼmo ago utegeno Isaleli kotegamo koʼmo oʼaiʼniyaʼmofeʼmo ani aniʼeʼmo ago leno laneʼniye.

Ilaiyaʼmo mago kogu a kanoʼeʼmo maiʼniya gemae

⁸ Aniʼmo ago leno laneʼnigenoʼaeʼmo Ala kava neʼmoʼa Ilaiyafeʼmo ha painoʼaeʼmo,

⁹ Kagaemo he tika uka Yalefati taonimo Sainoni koʼmo haopaleʼmo maiyo. Ani taonifiʼmo mago kogu a kanoeʼmo, yagaika ato, huʼna ha paiʼnove, huno ha paiʼniye.

¹⁰ Ha paiʼnigeno Ilaiyaʼmo he tino Yalefati taonifiʼmo uno taonile yafa kegiʼya kipateʼmo avaʼyi hutenoʼaeʼmo ageyana mago kogu aʼmoʼa yosa akopa atamo alino anupa nehigeno ageʼniye. Agaemo a kanoeʼmo, Kahaoke hove, huno, aniʼmo he fika alinikeka namiyo, huno huʼnigenoʼaeʼmo

¹¹ geʼamo afiteno aniʼmo he filino esiyafeʼmo neʼvigenoʼaeʼmo Ilaiyaʼmo hunoʼaeʼmo, Mago aise peleti mayaʼeʼmo alinikeno, huno ha paiʼniye.

¹² Kogu a kanomoʼmo, Ala kava neʼmo Gotikamoʼmo afaʼa maiʼniye, huʼna alagi lama gemo nehuva kava huʼna ina gemo huʼnaeʼmo, Peleti mayaʼnimo alagi ohaneʼniye. Nagaemo mago talamufiʼmo aise falaovageʼmo hanete aise olivi uvelimo alu samofiʼmo hanete huʼniye. Hemenimo nagaemo ani falaovaʼmo kaesuvafeʼmo yosa akopa atamo aliniʼna visuvafeʼmo neʼaluve. Inagi laʼagaemo mafaʼneʼniʼeʼmo ani atupa neʼyaʼmo netetaʼaeʼmo faliguʼae, huno ha paiʼniye.

¹³ Huʼniyaʼmonanafa Ilaiyaʼmo ha painoʼaeʼmo, koli osuvo. Nehana agufa kavaʼmo huganaʼmonanafa hogoteka ani falaovafatiʼmo aiseʼamo alika uvelikafiʼmo kaeteka alinikeka namiyo. Henagaʼamo lanakae peleti mayamo kaeka kagaeʼe mafaʼnekaʼeʼmo negaʼae.

¹⁴ Ala kava neʼmo Isaleli vayaʼmogi Gotiʼapimoʼmo hunoʼaeʼmo, Talamufiʼmo haneʼniya falaovaʼe uveliʼeʼmo hano osuno haneme haneme neʼvisigeʼnaeʼmo Ala kava neʼmoʼnamo, mopafiʼmo koʼmo aliʼna atalesugeno emiʼnegaiye, huno huʼniyaʼmofeʼmo koli osuvo, huno ha paiʼniye.

¹⁵ Inagi a kanomo notegamo uno Ilaiyaʼmo ha paiʼniya agufa kavaʼmo huʼniye. Agaiʼagi Ilaiyaʼagi mafaʼneʼagi huʼa asole afinaʼmo ani neʼyaʼmo neʼnae.

¹⁶ Ala kava neʼmoʼa Ilaiya avayafatiʼmo ha paiʼniya kavaʼmo huno talamufi falaovaʼamo hano osuge samofiʼmo haneʼniya uveliʼamo hano osuge huʼniye.

Kogu aʼmo mafaʼneʼamo faliʼnigenoʼaeʼmo Ilaiyaʼmo alino he tino ateʼniya gemae

¹⁷ Henagaʼamo ani a kanomo mafaʼneʼamo kaitaʼmo hauʼniye. Alopa kaitaʼmo hauʼnigeno faliʼniye.

¹⁸ Faliʼnigenoʼaeʼmo a kanomoʼmo Ilaiyafeʼmo hunoʼaeʼmo, Goti vekamogae, huno, na kava higekaeʼmo nagaetegamo ani kavaʼmo huʼnane. Nagaemo hosu kavaʼnieʼmo nagesamo afisugeka mafaʼneʼnimo amagisanafeʼmo eʼnapiye, huno ha paiʼniye.

¹⁹ Ilaiyaʼmo ha painoʼaeʼmo, Mafaʼnekamo avaleka namiyo, huno huteno ayapatiʼmo ani mafaʼnemo agufamo aliteno agaiʼamo nehavaeya yapilagamo alinino uno haino hipaleʼmo maleʼniye.

²⁰ Maleʼnenoʼaeʼmo lokiya vaino nunumuʼmo hunoʼaeʼmo, O Ala kava neʼmo Gotiʼnimogae, huno, Ani kogu a kanomo yagaino neʼnateya a kanomo alopa kana yaʼmo amiteka mafaʼneʼamo amagiʼnapiye, huno nunumuʼmo huteno

²¹ Ilaiyaʼmo ani mafaʼnemo amulagepaleʼmo loleʼe magoʼe kanaleʼmo havaeʼneno Ala kava nefeʼmo lokiya vaino nunumu hunoʼaeʼmo, O Ala kava neʼmo Gotiʼnimogae, huno, mani mafaʼnemo aunemeʼamo afaʼa ategeno eno halate agufafiʼmo faleno haino, huno huʼniye.

²² Nunumuʼmo huʼnigenoʼaeʼmo Ala kava neʼmoʼa Ilaiya geʼamo afitenoʼaeʼmo mafaʼnemo aunemeʼamo alino ategeno eno ani mafaʼnemo agufafiʼmo faleno haiʼnigeno he tiʼniye.

²³ Ilaiyaʼmo avalelino uno lamino itaʼamoʼmo amitenoʼaeʼmo, Ago, huno, mafaʼnekamo he tino afaʼa maiʼniye, huno ha paiʼniye.

²⁴ Inagi ani a kanomoʼmo Ilaiyafeʼmo hunoʼaeʼmo, Ani kavatetiʼmo kageʼnovana kagaemo Goti vekaʼamo maiʼnane. Kavayafatiʼmo Ala kava neʼmo geʼamo alagi lama geʼageʼmo nehane, huno ha paiʼniye.