Zaaan 'yliwʋgbʋnya 18 - Kouya

Babilɔnʋgbee bhlibhlie

¹ -Mʋʋ 'bɩgʋ, 'ɩn ɩn yia 'anzɩ -putu -yɔyɩ yalɩ 'bhʋda. We ka 'tɩtɛ, 'ɩn we san nynia dʋdʋʋ da weee.

² We 'kpɩa 'wʋ 'tɩtɛɛ, we nɛɛ: «Ɔ ka bhli, Babilɔnʋgbe 'kadʋ ka bhli. -Bha zuzu 'nyii dɩlɩa -slɛɛn la. Pʋɩnkazuzu weee -yɔ pʋɩnkazia weee -we wa nyɛa 'wʋ, mʋ dɩlɩa -bha la.

³ Nɩɩ, ɔ ka laga weee ɔ nʋ 'nyɛ sa duun, 'ɩn -mɔmɔ -ka ɔ nʋ 'ma, 'ɩn -mɔɔ -kanyɔ bhlilia ɔ mʋtnɩ lʋ. Dʋdʋgʋ -nyɩmaa 'wlulapɩlɩnya -yɔ ɔ 'sɔ ka -budu 'wʋdɩ. 'Ya, ɔ 'ŋnɩmnɩe 'kadʋʋ 'gbʋ, dʋdʋ -gʋʋ -valɛpanya ka 'gwɛzi duun 'yɩ.»

⁴ 'Ɩn ɩn yia wɛlɩ -putu 'bhʋa yalɩ 'nʋ, we nɛɛ: «Na nyɩma, a 'tla Babilɔnʋgbe nʋkplɛ. A -ka we lɛnʋ, a 'na 'ka ɔ gbʋnyuu glaa -mɩ, 'ɩn sɩasɩe -we yia ɔ bhɩtɩa, a 'na 'ka we 'wʋ -mɩ.

⁵ Nɩɩ, ɔ gbʋnyii ylɩa yalɩ. -Lagɔ 'nɩ ɔ lɛnʋgbʋ 'nyii 'wʋdlʋ.

⁶ Sa ɔ nʋa ɔ nyɩma, a nʋ 'sa ɔ. -We ɔ nʋa nyɩma -yla lɛ, a nʋ we -zakpa 'sɔ lɛ ɔ -yla. 'Kɔpʋ -we 'wʋ ɔ 'nyɛnɩa nyɩma nʋ, a palɩ -mɔ 'tɛlɔ nʋʋ -zakpa 'sɔ ɔ -yla.

⁷ 'Dɛɛ 'ylimanɩe -yɔ 'ŋnɩmnɩe ɔ 'yɩbhaa. We 'dɛɛ 'gbʋ, a 'nyɛ ɔ 'sasʋkpa -sɩasɩe -yɔ guwʋwlʋwlʋe. Ɔ nɛɛ ɔ 'dɛ -yla: ‹Ɩn -dɩ 'ŋnɩmnɩkpe -gʋla. Ɩn 'nɩ -dʋgbaŋwnɔ, 'ɩn gu 'na 'ka 'mɩ 'wʋwlʋ.›

⁸ We 'dɛɛ 'gbʋ, sɩasɩe 'kadɩ -we yia ɔ ylɩa 'ylɩ -bhlo nya, mʋ nɩ: nyɩmɛ -bhagu klaa, guwʋwlʋwlʋe klaa, we -yɔ ŋwɔ. We 'dɛ weee yia ɔ -gbɛ yia. 'Ɩn -kosu 'ka ɔ -sie. Cɩɩn, Jejitapɛ -ɔ 'bhua ɔ -yɔgbʋ 'wʋ, ɔ ka 'tɩtɛ.»

⁹ Nɩɩ, dʋdʋgʋ -nyɩmaa 'wlulapɩlɩnya -yɔ ɔ ka -budu 'wʋdɩ. Wa ka ɔ 'gwɛzi li. We mɩ 'saa 'gbʋ, -kosu -we yia ɔ -siea, wa -ka we gbeylo -yɔyɩ, wia wa yia. -Gle wa yia 'paa wee 'gbee 'gbʋ.

¹⁰ Wa 'na 'ka we kwesi lanyni, -we ka gbʋ -wa, nyanɔ wa yia nʋa wee sɩasɩe 'kadʋʋ 'gbʋ, 'ɩn wa 'ka gbaɛ: «Gbʋnyuu! Gbʋnyuu! Babilɔnʋgbe 'kadʋ, 'gbe 'tɩtɛ, -Lagɔɔ 'cɛ 'kadʋ ka ɔ lasa 'lɛlɩ -bhlogbɔɔ nya.»

¹¹ Nɩɩ, dʋdʋ -gʋʋ -valɛpanya mɩ wida, wa mɩ -gle 'pada wee 'gbee 'gbʋ. Wa -valɛ'ɛ zɔ -slɛɛn.

¹² Wa pɛlʋpa -li nɩ: -can klaa, 'gwɛzi 'pʋpa klaa, tʋkpa -zɔnʋ klaa, 'pɛlɩlɩ klaa, 'naa -zɔnʋ klaa, 'naa -zalʋ -we ka -valɛ 'tɛa klaa, -mislɔ naa klaa, we -yɔ suu 'yli -bhlo -bhlo -we wa'a 'yɩa bhebhe. Tɛlɩtɛlɩli mɩ 'ya -bha, tɔlʋa mɩ lʋɛgla nya, tɔlʋa mɩ su -zɔnʋ nya, tɔlʋa mɩ nɛtɛ -zɔnʋ nya, 'ɩn tɔlʋa mɩa tʋkpa 'nanɩ nya.

¹³ -Zapʋʋ nnanɩli mɩ -bha, -li -we ka ŋnɛ mɛnɩa, we mɩ 'ya -bha, -mʋ -wa: *-lasiklɔ klaa, *milɩ klaa, we -yɔ 'wlɩ. Nɩɩ, nʋ klaa, 'kpɩ klaa, bleya -yɔ we bhʋbhʋ klaa, 'bhlinya klaa, bhlabhlɛnya klaa, nɩmɛsʋʋnnya klaa, we -yɔ -nɩmɛsʋʋʋn 'wʋgbizewotlonya mɩ 'ya -bha. 'Bhie, galɩ -yɔ nyɩma tɔlʋa mɩ -bha.

¹⁴ Nɩɩ, -valɛpanya nɛɛ wee 'gbe -ylaɛ: «-Lu weee a 'yɩbhaa, wa'a 'yɩ -slɛɛn we amaa -gbɛ. -We ka -valɛ 'tɛa, -we nanɩa 'yli, we ka amaa -gbɛ mnɔ, wa 'na 'ka 'maslɛɛn we 'yɩ amaa -gbɛ.»

¹⁵ -Valɛpanya, -wa 'yɩa 'gwɛzi wa -valɛ 'bɩ wee 'gbe 'wʋ, wa 'na 'ka we kwesi lanyni. Nyanɔ wa yia nʋa wee sɩasɩe 'kadʋʋ 'gbʋ. Wia wa yia, -gle wa yia 'paa.

¹⁶ 'Wʋ wa yia 'kpɩaɛ: «Gbʋnyuu! Gbʋnyuu! Gbe 'kadʋ mɩa da nɩ, 'naa -zɔnʋ -yɔ 'naa -zalʋ -we ka -valɛ 'tɛa, zlɩmɛ mʋ kaa we kuu. -Can klaa, tʋkpa -zɔnʋ klaa, we -yɔ 'pɛlɩlɩ, 'mʋ ɔ kpelia zlɩmɛ.

¹⁷ Nɩɩ, 'lɛlɩ -bhlogbɔɔ nya we -li -zɔnʋ weee 'bhʋa la.» Batoo -panya weee klaa, -wa plɩlɩa gumunyu -gʋ klaa, we -yɔ -wa nʋa batoo 'wʋ lubho -yɔ -wa yɩa wanʋʋ lililu 'nyu -gʋ -valɛpapɩe 'bɩ, wa 'dɛ weee ka wee 'gbe gwevla.

¹⁸ -Kosu mɩa wee 'gbe -sieda, wa -ka we gbeylo -yɔyɩ, 'ɩn wa 'kpɩa 'wʋɛ: «Gbe mɩa dɛ, we 'sɔnʋ 'nɩ -mɩ.»

¹⁹ Bla wa slua 'wluo, -zugba wa wi, wa pa -gle, wa gbaɛ: «Gbʋnyuu! Gbʋnyuu! Babilɔnʋgbe 'kadʋ, nyɩma weee -wa plɩlɩa amaa -gbɛ batoo 'wʋ gumunyu -gʋ, wa ka 'gwɛzi -cɩan -zɛ amaa 'gbʋ. Ama 'bhʋa la 'lɛlɩ -bhlo nya.»

²⁰ Yalɩ, wee 'gbe ka labhʋ, a li 'mʋna. -Lagɔnyɩma, ɔ tietienya, ɔ gbʋʋ -falɩpanya, amɩa li 'ya 'mʋna. Nɩɩ, -Lagɔ ka wee 'gbe ɔ 'cɛ 'klʋslolu gbʋ -we we nʋa lɛ aɩn -yla, we 'gbʋ.

²¹ Tɔʋn, 'anzɩ 'tɩtɛ yabhlo yia tʋkpa 'wʋbhu. Nɩɩ, wee tʋkpa wɔlʋ 'wʋ -glɩgbɔ 'bhisa. We 'bhua we 'wʋ, we vitelia we gumunyu lʋ, 'ɩn we nɛɛ: «A yla, 'sa -bhlokpadɛ wa yia Babilɔnʋgbe vitelia, 'ɩn we 'ka labhʋ.

²² Wa 'na 'ka 'maslɛɛn lʋʋ 'nʋ Babilɔnʋgbe nʋkplɛ. Wa 'na 'ka -petee wɛlɩ 'nʋ. Wa 'na 'ka 'maslɛɛn lɛglɛ 'nʋ. Wa 'na 'ka lubho -yɔ lubhonʋnya 'yɩ. Wa 'na 'ka 'maslɛɛn 'wuu -jiji 'nʋ.

²³ 'Napɛɛ san 'na 'ka 'maslɛɛn lɩ -mɔ Babilɔnʋgbe nʋkplɛ. Wa 'na 'ka nyimeslɔyu -yɔ ɔ 'ŋwnɔɔ wɛlɩ 'nʋ. Nɩɩ, amaa -valɛpanya 'ylia -benyi dʋdʋ weee -gʋ, 'ɩn a yia laga weee -dawli 'wʋnʋ amaa ylisi nya.»

²⁴ Nɩɩ, -Lagɔgbʋʋ -falɩpanya -yɔ -Lagɔnyɩmaa tlɩtlɩe, we -yɔ nyɩma weee -wa wa 'bhaa dʋdʋ -gʋʋ tlɩtlɩe mɩ ɔ 'wlu.