Samu 8 - Anatunya Buku Baepole Ole Testamene Pii Lapo dee Nuu Tesamene

Anatu Range Neta Renge Ingyuo Karo Akali Kando Rungi Rungi Pingi

¹ O Kamongo, namwana Kamongo, yuu muu peparae emba andake ingyuo pelyamo doko kandelyaminyi. Embena kingi lakandase dokome pao yake sungwapyamosa

² wane wanakepe nyaŋape opetaeko kenane pyao lakandelyaminyi. Emba range kame pyuo minyaro karapisa yanda pimwainya panda mai nalene dokona randa jerami ingya nalyamo.

³ Nambame yake panda kandapu dokopa bui neta kanape nakamana yuu range karara lao wasiinyi dokona rao karapyamo kandelyo.

⁴ Wambu dupwa akinde dokona embame baa suupyale pyale karese? Dee wambu dupwa apimawana lao embame ketae pyambuo karese?

⁵ Embame emba range mupwa wakasa ingyuo kararonopa akali baa mee mende emba yaleko ingyuo karara lao wasii. Embame baa neta renge ingyuo ketae pyambuo lakanda minya minya pilini.

⁶ Embame bange peparaena baa kyawa nyuo karo wasiinyi dupwana iso karena lee.

⁷ Mena sipisipi bulamakao dee rae lengepe dupwa opetaeko rapu pyuo

⁸ oma yakape kata papingi bange peparae ipwa kotana silyamopape dupwa isinya leeyako.

⁹ O Kamongo, namwana Kamongo, yuumuu peparaena emba andake ingyuo pelyamo doko kandelyaminyi.