Zôo 9 - Bible

Zôo è Beeda wóo su tòo

^1-2 Tɔ̃yâ ma ŋá m̀ɛnii kɔ́lɔŋ ya lônoi é pîlaŋ mai. Kɛ́lɛ núu da fa pɔ̂ri kɛ̂i Ɣâla ma ńdûa-pere fé nyɔ́ŋ-ni.

³ Núu da Ɣâla dífa pɔ̂ri mɛni-sâa ƃôi. Ɣâla é máŋ m̀arê kɛ́, va pɔ̂ri zu kulâi a dɔnɔ kpîŋ.

⁴ Ɣâla táreɛi, ŋ́wala-wala. Núu da a pɔ̂ri tɔɔ̂i Ɣâla ma é Ɣâla yée mɛi ɣále? É folôŋ mà.

⁵ Ɣâla a ǹyée kpaya-kpayai tûmo-tumo é díwolo. Va mò núu da ma. A díwolo-wolo kpɛ́ni-fei a ǹíi ŋwàna dîa.

⁶ Ɣâla a ǹɔii tûmo é síɣe gɔ́ɔ pîlanii, é gɛ́ gɔni-ŋai díkɛ kpɛ̃liŋ.

⁷ Ɣâla a lôno vóloi pɔ́ a gɛɛ vé ƃèla, é mó bɛ́mɛlɛŋ-kaoi ma a gɛɛ vé fôlo.

⁸ Ɣâla ǹya tɔ̂nɔ ƃé ŋ̀ele-kɔlɔŋ kpɛ̂tɛ é ǹáa ǹâai, é ƃɔ́rɔŋ ǹyúo-zele kalii ma a gɔ́ɔ.

⁹ Ɣâla è bɛ̂mɛlɛŋ-kaoi kpɛ̂tɛ nyii da kɛ̂ dîa ǹiyeŋ-kpului, é dípu yá-ŋua-pere ŋ̀elei su, é nyii-ŋai da kɛ̂ dîa géleŋ-ma-wûui pú ŋ̀ele-kɔlɔŋ su máŋ. È yá kwára-pere pɛmɛlɛŋ-kao-ŋai kpɛ̂tɛ é dí pú ŋ̀elei su.

¹⁰ A zugbɛrɛ-gbɛrɛ mɛni-ŋa kɛ̀ nyii núu fa târe zu. Ŋɔzugbɛrɛ-gbɛrɛ mɛni-ŋai tâmaai, núu da fa pɔ̂ri ǹônoi.

¹¹ Ɣâla è tɛ̀ɛ ḿâ ńdɛ̂i-pere. Ḿve kɛ́ ní a gɔ́lɔŋɔɔ a gɛɛ è kɛ̀ naa.

¹² A sɛŋ da sìɣe núu da fa pɔ̂ri gulâi ǹyêei, núu da fa pɔ̂ri kɛ̂i mà, “Lé mɛni ƃé í gɛ̀ tí lai?”

¹³ Ɣâla ŋɔlii ŋwânai fa sîɣe dɔɔ̂i. È yúo-zele-kalii ŋɔkpɔŋ maa-ƃelai yée mɛi ɣâle.

¹⁴ Ŋa pɔ̂ri ŋ́gbîŋ maa kɔ̃ɔ-woo kâai mí ŋá maa kɔ̃ɔ la Ɣâla ŋɛ́i-tuɛ?

¹⁵ Berei máŋ ḿve mɛni da kɛ́ ní lai, ḿva pɔ̂ri ŋ́gbîŋ maa kɔ̃ɔi ǹyêei. Ŋa pâi m̀arê kɛ̂i a gɛɛ é malôŋ kaa.

¹⁶ À kɛ̀ ŋa Ɣâla sɔ̀ŋ lâa gâloŋ ŋɛ́i a gɛɛ kú mɛni-saa ƃó, ḿve pâi lâai la a gɛɛ Ɣâla a pâi ŋ̀oli tɔɔ̂i ḿâ.

¹⁷ È gɛ̀ vãai é ǹókwa, ŋ̀gbono gwaa kélee ma gbîmiliŋ é tɛ́, berei máŋ ŋ́zɔŋ fé kɛ́ ní la zui.

¹⁸ Vé ǹɛ̂ɛi naa ŋá ŋ́vîŋ lá kúla, a ŋá kɛ̀ ɣéniɛi kpona ńyêei.

¹⁹ À kɛ̀ a wála-wala mɛni, Ɣâla wála-walai é tɛ́ɛ ḿâ. À kɛ̀ a mɛni sâa ƃó-mɛni, gbɛ̂ɛ ƃé pâi dôlii m̀ɛni sâa ƃóɔɔ sui?

²⁰ Berei máŋ ŋ́zɔŋ fé la m̀ɛnii ŋí sui, Ɣâla a pɔ̂ri gɛ̂i ŋ́gbɔɔi-wooi é m̀ɛnii lɛ́ɛ ḿâ.

²¹ Ŋ́zɔŋ fé m̀ɛnii su. Ḿve nâa kpáaŋ-ni mɛni-sii kélee da mɛni ma. Ŋá kɛ̀ ɣéniɛi mɛni ƃɛlɛ fé ŋɔ́nɔ ŋ́goi.

²² Mɛni da maa kpâaŋ fé ŋɔ́nɔ ḿâ. Ɣâla a zɔŋ-lɛlɛɛ-ƃelai da ŋ̀wana-lɔ̂ɔ-ƃelai kélee dífulu-laai kûla díyêei.

²³ À kɛ̀ ya fɛ̂ɛ kɛ́tɛ da fãa kɛ́tɛ da núu támaa pàa, Ɣâla a ɣɛ́lɛ maa kùla diai dísɔŋ fé dîai díkponôi.

²⁴ Ɣâla a ǹɔii tɛ́ɛ ŋ̀wana-lɔ̂ɔ-ƃelai pɔ́. A ǹyée pɛ́lɛ m̀ɛni-sâa ƃó-ƃelai ŋɛ́i a gɛɛ dífe mɛni-sâa ƃò a teniŋ ƃô-pere. À kɛ̀ Ɣâla fé mɛni-ŋai ŋí kɛ́ ní, gɛ̀ ní gbɛ̂ɛ ƃé dí kɛ̀i?

²⁵ Ŋáfulu-laai aâ gbâa kpɛ́ɛ, fé mɛni lɛ́lɛɛ da kula ní zu.

²⁶ Ŋáfulu-laai a tɛɛ̂i a maa félaa yɛ̂ɛ yá-ŋa keleŋ. Yɛ̂ɛ kuɛ ƃé yenîi gɔ́nɔŋ ma.

²⁷ Ɣâla, à kɛ̀ ŋa kpèra mɛni saâi yâ, ŋa pâi ŋ́ɛi ponôi íperêi a lii-nɛ̃ɛ.

²⁸ Ŋá gɔ́lɔŋ a gɛɛ mɛni kpɔ̂lu da kpɛ́ni a pâi lâai ḿâ. Ŋá gɔ́lɔŋ máŋ a gɛɛ ífe pâi môi a gɛɛ ŋ́zɔŋ fé m̀ɛnii ŋí su.

²⁹ Ŋá gɔ́lɔŋ a gɛɛ m̀ɛnii ŋí káa a ŋ́zɔ̀ŋ. Lé mɛni ƃé ŋa pâi kɛ̂i ńa ŋá ŋánai lai?

³⁰ À kɛ̀ ŋa ŋ́wàa a yá séɣeŋɔɔ, kpaa máŋ ŋá ńyee ŋá wáa a dîleŋ-kpolo ŋwana,

³¹ ya pâi nɔ́ ńdôoi lóa su liƃiɛɛ su, ǹyaŋ ḿɛ̀lɛ a pâi kpɛɛ̂i ŋ́gbîŋ seɣei koi.

³² Eêi kɛ̀ Ɣâla káa a núu-kpune yɛ̂ɛ ńyãa, ŋ́âi pɔ̀ri ŋ̀óo su toôi a gɛɛ kwa ǹyaa kú lí m̀ɛni-sâa ƃó-kerei mu kú mɛni-sâa ƃó.

³³ Kɛ́lɛ núu da fé naa é lɔ́ kú kúloai. Núu da fé naa a gɛɛ é kú m̀ɛnii ŋá tée kwa Ɣâla.

³⁴ Núu da fé naa é Ɣâla kpera mɛni ŋánaa kɛ̂i a ńyãa, é gbera ḿaa yaôi a ŋɔmɛni kula maa kɛɛi.

³⁵ Ŋa pɔ̂ri lônoi a lii kpêle-pere kpɛ́ni fêi, ŋá ŋ́gbɔɔi líi su kɔ́lɔŋ.