Zôo 29 - Bible

Zôo ŋɔmɛni saai gbɛɛ-ŋai

¹ Naa kɛ́ɛ tíi, Zôo è ŋɔ́nɔ pɛ̀lɛ lónoɔɔ ma ǹyɛɛi,

² “Ŋákɛ-ɣeniɛi èei máŋ kɛ̀ a ǹɛ́lɛɛ yɛ̂ɛ berei è kɛ̀ la tãi Ɣâla è wɔ́lɔ kɛ̀ mɛi kâai lai.

³ Ɣâla ŋɔkwaa ponoɔɔi è kɛ̀ ŋ́gɔ̀lɛ a ɣele kélee gɛ́ ḿɛi kâa ŋ́zia-pere su a kpíni.

⁴ Ŋá wɔ́lɔ kɛ̀ a ŋ́gbonôi kpanaŋɔɔ, Ɣâla kɛ́ ŋápɛrɛi mɛi kâa.

⁵ Ŋ̀wála-wâla kélee Ɣalai è kɛ̀ ŋ́gɔ̀lɛ, ŋá ńîa-pɛlɛɛi tínaŋɔɔ ḿâ.

⁶ Ŋá niŋa-ŋai díkɛ̀ ŋíni-ya támaa tɛɛ̂i, ŋáɔle wuru-ŋai wúlɔ kɛ́ yɛ̀ŋ yɛ̂ɛ ya lêe.

⁷ Tãi ŋá kâa lì la daa nuu-pɔlɔ-ŋai díkɔ̃yɛŋ sui, ŋá sée daa mɛi káa-ƃelai díkɔyɛ̂ŋ too kwaai mai,

⁸ ǹyaŋkpa-ŋai ŋ́gâai da kûla pôlu. Ǹúu-pɔlɔ-ŋai da ŋ́gàa, dí dímu siɣe dítɔɔ ɣelêi a ƃaa kɛ́-maa pere.

⁹ Ǹúu láa túɛ-ƃelai da ŋ́gàa, da kpêra lônoi, dí díyee pɛ́lɛ díla.

¹⁰ Daa-nua kpaya-kpaya-ŋai máŋ da dímɛi sâa.

¹¹ “Diai kélee kpɔ́ ḿaa mɛ̂ni mɛnii, díwɔlɔ sɛɣɛ-fei tɛ̀ɛ ḿbɔ. Diai kélee ŋ́gàai dímɛni lɛ́lɛɛ ƃó é pîlaŋ ḿâ.

¹² Gôlo-ƃelai da dee lôŋ-ŋai kélee da kâa ḿarê kɛ̀ kpɔŋ mâa mɛni mai, ŋa kâa dɛ̀ɛ dípɔ.

¹³ Diai nyii-ŋai kɛ̀ saa-wolo lai, dílûwa tòo ḿâ. M̀ɛnii ŋá gɛ̀ bɔɔ-nɛyãai dîɛi è gɛ̀ dílii-nɛ̃ɛ kula.

¹⁴ M̀ɛni lɛ́lɛɛi ŋá gɛ̀i, è kɛ̀ yɛ̂ɛ ŋáseɣe tôo ŋ́gɔŋ ḿâ. Ŋá mɛni ŋá tèe a ǹɛ́lɛɛ, ǹyaŋ è kɛ̀ yɛ̂ɛ ŋà kɛ̀ ḿaa yirîi.

¹⁵ Ŋá kɛ̀ a ŋ̀ɛ́i-pu-ƃelai ŋɛ́i-gao, ŋ́gɛ ƃò a gɔɔ-pu-ƃelai kɔ́ɔ.

¹⁶ Ŋá gôlo-ƃelai maa kɔ̃ɔ, ŋ́gɛ ŋɔ̃ya-ŋai maa kɔ̃ɔ m̀ɛni sâa ƃó-kerei mu.

¹⁷ Ŋá ŋ̀wana-lɔ̂ɔ-ƃelai díwala-wala-laai kûla díyêei. Ŋá díkpɔara-ƃelai kùla díyêei.

¹⁸ “Kili kɛ-zu káa ńyêei a gɛɛ ŋa pâi tûai ɣele ma ŋá sáa ŋápɛrɛi mu lii-see su.

¹⁹ Ŋá kɛ̀ yɛ̂ɛ wúru nyii gáa tɔɔ̂ni yá kɔ̀lɛ nyii lúu a pû ǹáa mà a kpínii.

²⁰ Ǹûai díkɛ̀ kpɔ́ nɔ́ ƃaa kɛ́-maa tɛɛ̂i ḿbɔ. Ŋáwala-wala-laai su fé niî wɔ́lɔ saa ní.

²¹ Ǹûai da kâa ḿaa kpɛ̂ŋ, dí díwoli tɔ́ɔ ǹia-wooi mâ ŋa kâa dɛ̀ɛ dípɔi.

²² M̀ɛnii ŋa kâa mò dîai, núu da fa kâa zîa tòo. Ŋ́oo a kâa làa kpɔ́ dílii ma yɛ̂ɛ tuna-kao a pìlaŋ lɔii kpâla ma.

²³ Da kâa kɛ̀ ḿaa kpɛ́nii yɛ̂ɛ nûa ƃé tuna maa kpɛ́nîi, díŋɛi kɛ́ ƃò ḿberêi yɛ̂ɛ kpâlaŋ ŋá tii-kɛ-nuu à kɛ̀ dunai maa-ŋuŋ maa kpɛ̂nii.

²⁴ À kɛ̀ ŋà ɣɛ̀lɛ ńa kɔlɛ, kili kɛ-zu a kɛ̂ díyêei. Ŋ́ɛlɛ-ŋɛi a dílii mu sîɣe.

²⁵ Ńyãa ƃé kɛ̀ a dílaa túɛ-nuu ŋ́gɛ díteniŋ tɔ̀ɔ. Ŋá kɛ̀ dísama yɛ̂ɛ kâloŋ ƃé ŋɔkɔ-kuluƃa-ŋai sáma, ŋ́gɛ díŋa-nɛnɛ yɛ̂ɛ núu à kɛ̀ saa wɔ̂lɔ kɛ́-ƃela ŋánɛnɛ̂i.”