Zôna 2 - Bible

Zôna è Ɣâla fɛ̀li

^1-2 Tãi Zôna è kɛ̀ la ǹyɛ̃ɛi koi è Ŋɔɣâlai Yâwɛɛ fɛ̀li ǹyɛɛi, “Ŋá wɔ́lɔ Nuu-namui ma tãi ŋá kɛ̀ la mɛni-kpɔ̂lu sui, ǹyaŋ è ŋ́oo mɛ̀ni. Ŋá wɔ̀lɔ saa-taa í ŋ́oo mɛ́ni.

³ Í ḿbìli yúo bari sáma, ǹyái é tínaŋ ḿâ. Ǹyá-ɣîliŋ da nya-fulei dí ḿɛi pɛ̂lɛ.

⁴ Nya ƃe ŋá mò a gɛɛ ƃa ŋ́gbɛ ŋa kula íŋɛi. Ŋa pɔ̂ri ŋɔ́nɔ ípɛrɛ maa waai kâai léŋ?

⁵ Ǹyái è ńzòŋ a ŋ́gwana, barii tínaŋɔɔ ḿâ. Ǹyái-tuma-laa-ŋai dí kpìniŋ ŋ́uŋ ma.

⁶ Ŋá yèŋ ŋá seri ǹyái kpóŋ ma. Tãi ŋá sèri la saa-taai, nàa ge-ti-ŋai sɔ́ɔŋ è tòo ḿbôlu-pere wɔlɔ-wɔlɔ da wɔlɔ-wɔlɔ. Kɛ́lɛ óo Yâwɛɛ Ŋáɣâlai, í ŋ́ùla m̀olôŋ su í pá a ńyãa pôlu fúlu-laa su.

⁷ Tãi ŋámɔ̂leŋ è fòa la ŋ́gbonôi, Yâwɛɛ kíli è tòo ŋá ŋáɣâla-fɛli-wooi é seri mà Ŋɔɣâla-pɛrɛ Kɛ́tɛi mu.

⁸ Diai da díkili pù ǹúu-kpɛtɛ-ɣâla-ŋai dîa nyii-ŋai díkaa nɔ́ kpɛ́ni-kpɛ́nii, da dípôlu tɔ̀ɔ Ɣâla ŋɔƃɛlɛ-seei ma.

⁹ Kɛ́lɛ ńyãai sɛɣɛ-fêi-woo káa ńai, ŋa pâi sâla kulâi mà. M̀ɛnii ŋá maa-kono-tee kɛ̀i, ŋa pâi gɛ̂i. Ŋuŋ-ma-ƃô a kûla Yâwɛɛ yêei.”

¹⁰ Nya ƃe Yâwɛɛ è lòno ǹyɛ̃ɛi pɔ́, é mài a Zôna zîŋ ma.