Zɛnɛse 49 - Bible

Zeeka ŋɔwóoi gbɛɛ-ŋai

¹ Zeeka è ǹônii-sinaai tòli ǹyɛɛ diai, “Ka káŋaa tɛ́ gîe ma a gɛɛ mɛnii pâi kɛ̂i a káa tínaa tuɛ-perei, ŋá mó kâa.

² “Ka káŋa tɛ́ ma ká ŋ́oo mɛni, Óo ǹônii-sinaai. Ka káwoli tɔ́ ŋ́oo ma.

³ “Lubiŋ, yá ƃa ńoŋ maa-ŋuŋ, íkaa a ŋáwala-walai. Í ƃò a ŋáwala-walai ŋɔƃá maa-ŋuŋ. Íyoŋkaai ítɔɔ̂i, íwala-walai ńônii kéelee sáma.

⁴ Íkaa yɛ̂ɛ ya-fɛɛ, Kɛ́lɛ ítɔɔ̂i fé pâi ŋɔ́nɔ kɛ̂i a gɛ́tɛ. Kpɛ́ni fêi, í lɔ̀ pɔ̂rɔŋ a ŋánɛnîi, í ƃâa kula ínâŋ mà.

⁵ “Simiɔŋ da Liva díkaa a lee kaa tɔnɔ. Da ŋwana-lɔ̂ɔ kɛ̀ a díƃoa-sɔkpɔ-ŋai.

⁶ Fé pâi kɛ̂i a díloo-pere su lono-ŋai kɛ́-nuu da. Fé pâi kɛ̂i a díkoyâŋ su-nuu da. Kpɛ́ni fêi, dílii à ŋwàna, da núu pàa, Díkɛ niŋa-sîrɛ-ŋa kɔ̃̀liŋ a díŋwana-lɔ̂ɔ perei.

⁷ Náɣaŋ káa dílii-wanai ma, kpɛ́ni fêi, maa yikîɛi, náɣaŋ kɛ́ ƃò díkpɔarai-tuai mâ, kpɛ́ni fêi, gáa a ŋwana-lɔɔ. Ŋa pâi díŋaa kɔlɛ̂i Eezuɛ lɔii gwaa kélee. Ŋá dítaa-taa ŋɔnûai sáma.

⁸ “Zuda, ílêɣe da ílîa-ni da pâi ílaa ma tɛ̂i. Íyee a pâi kɛ̂i íkpɔara-ƃelai kɔŋ mâ. Ínâŋ ǹônii-sinaai da pâi pɛlɛ̂i íkɔɔ mu.

⁹ Zuda káa yɛ̂ɛ yala-sûlu-loŋ. A kpɛɛ ŋɔsuai miɛɛ ma, a lî pôlu bɔ́ taai. A lâa é sãa yɛ̂ɛ yala-sulu. Ǹyaŋ núu da fé naa é lɛ́ɣɛ ma.

¹⁰ Zuda ŋɔkâloŋ-wurii fé pâi kulâi ǹyêei. Ŋɔsuui su ƃelai da pâi wɔ́lɔ kɛ̂i nɔ́ a kâloŋ ŋa. Lɔii-ŋuŋ ŋai da pâi kɛ̂i nɔ́ ŋuŋ-fela-fei tɛɛ̂i bɔ́.

¹¹ A ŋɔwɛlɛ-sôoi ɣîri gbɔmɔi-ƃa kpɔmɔ ma. Gbɔmɔi nyii ǹɛ́lɛɛi mâ. É ŋɔseɣei wáa ŋwãai kpɔlu su.

¹² Ŋ̀ɛ́i-gao a pâi kpɔlûi a ŋwãai kpeleɛɛ, Ǹyíŋ kɛ́ kòle a niŋa ŋíni-ya kpeleɛɛ.

¹³ “Zɛbulɔŋ a pâi seêi ǹyái kɔlɛ. Nàa a pâi kɛ̂i a yá ŋá-keleŋ pîlanii. Ŋɔlɔii a pâi serîi Sidɔŋ.

¹⁴ “Isaka wála-walaai yɛ̂ɛ wɛlɛ-sôo. A lâa ŋwɛlɛ-sôo síɣe kpiri-ŋai loai.

¹⁵ È gàa a gɛɛ víi tɔɔ̂i lɛ̂lɛɛi, é ŋɔ́nɔ gáa berei ǹɔii lɛ̂lɛɛi lai, È màa pɛ̂lɛ gbîrii síɣe mɛni ma. Ǹyaŋ è nâa kɛ̀ tíi kpanaŋ kɛ̂i yɛ̂ɛ luɛ.

¹⁶ “Daŋ a pâi ŋɔnûai dítɔ̃yâi maa kɔ̃ɔ̂i. Da pâi kɛ̂i Eezuɛ-ŋai dísuui kpêli-ŋai.

¹⁷ Daŋ a pâi kɛ̂i yɛ̂ɛ kali ƃé perêi, Yɛ̂ɛ kali líi-ŋwanaa ƃé pere ma, Nyii a soo nyîŋ gɔ́ɔ ma a gɛɛ zia-nuui é kúla bôlu é toôi.

¹⁸ “Óo Yâwɛɛ, ŋa íƃalo-laai maa kpɛ̂nii.

¹⁹ “Ŋúma-ƃela da pâi pɛlɛ̂i Gâa ma. Kɛ́lɛ a pâi kɔ̂i dípɔ é díyee mɛi ɣále.

²⁰ “Asɛ ŋɔlɔii a pâi mii-sɛŋ támaa kpɛtɛ̂i, Nyii ǹɛ́lɛɛi kâloŋ mɛni mai.

²¹ “Nɛfɛtɛli káa yɛ̂ɛ kîrɛ ŋánaa siɣe fɛnɛ-sɛŋ. Nyii a lóŋ lɛ́lɛɛ kâai.

²² “Zosɛ káa yɛ̂ɛ ƃá-kpɔmɔ nyii gáa yá kɔlɛi. Ŋoŋo-ŋai naŋîŋɔɔi ziɣãŋ mɛi.

²³ Ŋɔkpɔara-ƃelai da tínaŋ ma. Díkɛ gbɛ̀ a díkerâŋ-ŋai da dítɔ̃a-ŋai a ŋwana-lɔ̂ɔ-pere.

²⁴ Kɛ́lɛ ŋɔkerâŋ fé pâi ɣálei. Ǹyée su fé pâi saâi. Zeeka ŋɔwála-wala kélee Ɣalai ŋɔwála-wala sârai, Nyii gáa a m̀ála mɛi-kaa-nuui da Eezuɛ Maa-kɔ̃ɔ-nuui.

²⁵ Ínâŋ ŋɔɣâlai a pâi kpɔnîi yâ. Ŋ̀wála-wâla kélee Ɣalai a pâi lûwa lâai yâ. A dunai nyii a kulâi ŋ̀elei su da ǹyái nyii a kula ǹɔii mui. Inɛyâai da pâi lóŋ kâai da í taa-tulɛ-ŋai.

²⁶ Ínâŋ ŋɔlûwai tɛɛ̂i ŋɔ́lɔ-wɔlɔ yee-ŋai dílûwai mâ, Tɔɔ ǹûa-ŋai ŋí dí kɛ́ Zosɛ mà, nyii dí gùla ǹîa-ni sámai.

²⁷ “Bɛŋsima káa yɛ̂ɛ baníŋ nyii a sua pâai. A gɔnɔŋ pàa Ŋ̀ele-wâlai da ŋ̀ele-wulii.”

²⁸ Eezuɛ ŋɔsuu puu káo feerɛi ká ŋí. Ǹyaŋ mɛni-ŋai ká ŋí dínâŋ è mò diai. Ǹûwai nyii ǹɛ́lɛɛi kɛ̀ dímɛni ma tɛi-tɛi, è dɛ̀ɛ dípɔ.

Zeeka è sàa dí ǹoo

²⁹ Zeeka è mò ǹônii dîa ǹyɛɛi, “Ŋa pâi liî ŋánûai pɔ́. Ka ńoo ńâŋ-ni kɔlɛ gɔni-ƃoloŋ su nyii gáa Ita-nuui Ɛfɔŋ ŋɔlɔii mai.

³⁰ Ka ńoo gɔni-ƃoloŋ su nyii gáa Mapela lɔii ma, Mamera foloi kulâi-pere Keena lɔii su, nyii Eberaɣɛ̃ɛ è ǹya da ǹɔii kpuai Ita-nuui Ɛfɔŋ yêei mâ gɛɛ é kɛ́ a ŋɔsaa loôi.

³¹ Nàa ƃe dí Eberaɣɛ̃ɛ da ŋɔnɛnîi Seera lòo naa. Dí Aise da ŋɔnɛnîi Lubɛka lóo naa. Ŋá ŋánɛnîi Liɛ loo naa.

³² Dí ǹɔii da gɔni-loai yâ Ita-ŋai yêei.”

³³ Tãi Zeeka è kpɛ̀ɛ la a mɛni-ŋai ŋí ƃóɔɔ ǹônii diai, è gɔ́ɔ tɛ̀ pôlu ŋɔgbìŋ ŋá é sáa é lí ŋɔnûa pɔlɔ-ŋai pɔ́.