Zɛnɛse 47 - Bible

¹ Nya ƃe Zosɛ è lì é mó gâloŋ ma ǹyɛɛi, “Ńâŋ da ŋánûai kélee é pɛ́lɛ díƃala-ŋai dîa, dítaa-tulɛ-ŋai da díkɔ̃liŋ kélee da kula Keena lɔii su da pá. Díkaa Gosɛŋ lɔii-kpiniŋ su.”

² È kpakolo lɔ́ɔlu kùla ǹêɣe da ǹîa-ni sáma é lí a dîa é dítɔɔ gâloŋ ŋɛ́i-tuɛ.

³ Nya ƃe gâloŋ è dímarê kɛ̀ ǹyɛɛ diai, “Kátii ƃa lé?” Díyɛɛ mai, “Kûai a íyee mu-ƃelai kúkaa a ƃála mɛi-kaa-ƃela yɛ̂ɛ berei kúnâŋ-ni dí kɛ̀ lai.”

⁴ Díyɛɛ gâloŋ mai, “Kwa pá a gɛɛ kú sée ǹɔii ŋí su. Ǹyaŋ kútaa-tulɛ-ŋai láa miî fé ŋɔ́nɔ ma, kpɛ́ni fêi, burii ŋánaai Keena lɔii su. Mɛni ma kwa íkperai fêi a gɛɛ í íyee mu-ƃelai lɛ́ɛ naa dí sée Gosɛŋ lɔii-kpiniŋ su.”

⁵ Gâloŋ è mò Zosɛ ma ǹyɛɛi, “Ínâŋ da ílêɣe é pɛ́lɛ ílîa-ni dîa da pá ípɔ.

⁶ Ize lɔii ká ŋí. Ínûai dísee ǹɔii ǹɛ́lɛɛi ma. Dí sée Gosɛŋ lɔii su. À kɛ̀ ínuu da kɔ́lɔŋ dísama, nyii-ŋai da pɔ̂ri ŋátaa-tulɛ-ŋai mɛi kâai, gɛ̀ ní dípu dímɛi.”

⁷ Nya ƃe Zosɛ è pà a ǹâŋ Zeeka gâloŋ ŋɛ́i-tuɛ. Zeeka è lûwa tòo gâloŋ ma.

⁸ Gâloŋ è mò Zeeka ma ǹyɛɛi, “Íkoraŋ káa ɣɛɛlu?”

⁹ Zeeka ǹyɛɛ mai, “Ŋásia-sia kóraŋ-ŋai da kɛ́ a kóraŋ ŋuŋ tɔnɔ pôlu buu saaƃa (130). Ŋáfulu-laai ŋɔtãi su kpuâai, ǹáa fɛ́ɛ a mɛni-kpɔ̂lu. Vé yɛ̂ɛ ńâŋ-ni dífulu-laai su sia-siai ŋɔtãi.”

¹⁰ Nya ƃe Zeeka è lûwa tòo gâloŋ ma é kúla.

¹¹ Nya ƃe Zosɛ è ǹâŋ da ŋɔnûai tɛ̀ɛ Ize lɔii gwaa lɛ́lɛɛ ma. Nàa ƃé kɛ̀ a Laŋse taa-leei ŋɔlɔii-kpîniŋ su ƃɛ́i è lɔii tɛ̂ɛ naa dípɔ, yɛ̂ɛ berei gâloŋ è mò la mai.

¹² Zosɛ è mii-sɛŋ tɛ̀ɛ ǹâŋ pɔ́, ǹêɣe da ǹîa-ni é pɛ́lɛ ǹâŋ ŋɔpɛ́rɛi mu-ƃelai kélee dîa tɛi-tɛi, yɛ̂ɛ berei dínîa-pɛlɛɛi dí kɛ̀ lai.

Burii

¹³ Mii-sɛŋ fé kɛ́ ní ǹɔii su. Kpɛ́ni fêi, burii è kɛ̀ kpɔ́ a doɔɔ a ŋánaa. Ize lɔii da Keena lɔii dí kɛ̀ mɛni-soli kâai burii yêei.

¹⁴ Zosɛ è Ize lɔii da Keena lɔii su-sɛŋ-kaoi kélee ŋá tɛ̀ ma mii-sɛŋ kɔlɛɛ su. È zɛŋ-kaoi ŋí kélee tɛ̀ɛ gâloŋ pɔ́.

¹⁵ Tãi zɛŋ-kaoi kélee è kpɛ̀ɛ la Ize lɔii da Keena lɔii su-ƃelai yêei, Ize-ƃelai dí pà Zosɛ pɔ́ díyɛɛ mai, “Mii-sɛŋ tɛɛ kúpɔ, ífe nɛ̀ɛ naa kú saa. Kúsɛŋ-kaoi kélee a kpɛɛ.”

¹⁶ Nya ƃe Zosɛ è díwoo su tòo ǹyɛɛi, “A kɛ̀ kásɛŋ-kaoi a kpɛɛ, ka pá a kátaa-tulɛ-ŋai ŋá maa fáleŋ a mii-sɛŋ.”

¹⁷ Nya ƃe dí pà a dítaa-tulɛ-ŋai Zosɛ pɔ́. Zosɛ è mii-sɛŋ tɛ̀ɛ dípɔ dísoo-ŋai mɛni ma, díƃala-ŋai, dítaa-tulɛ-ŋai da díwɛlɛ-sôo-ŋai. È mii-sɛŋ tɛ̀ɛ dípɔ, dítaa-tulɛ-ŋai kélee mɛni ma a maa kóraŋ tí.

¹⁸ Tãi maa kóraŋ è kpɛ̀ɛ lai, dí ŋɔ́nɔ pà Zosɛ pɔ́ a bôlu ma kóraŋ díyɛɛ mai, “Kúfe pâi dɔ̃yâi loôi yâ, Kúnuu-namui, a gɛɛ kúsɛŋ-kaoi a kpɛɛ. Kútaa-tulɛ-ŋai díkaa a ípɔɔ. Sɛŋ da kélee fé ŋɔ́nɔ naa kú dɛɛ ípɔ fɛ̂ɛ nɔ́ kúkpono da kúlɔii.

¹⁹ Ífe nɛ̀ɛ naa kú sáa. Kú yá kwa kúlɔii-ni a mii-sɛŋ. Kwa pâi kɛ̂i a gâloŋ ŋɔluɛ-ŋa. Sí-sɛŋ tɛɛ kúpɔ a gɛɛ kú lɛ́ɛ ɣele ma kúfe sàa, a gɛɛ máŋ kúlɔii fé lɛ̀ɛ a vólo.”

²⁰ Nya ƃe Zosɛ è Ize lɔii kélee yà gâloŋ mî. Ize-ƃelai dí dílɔii-ŋai kélee kɔ̀lɛ gâloŋ ma. Kpɛ́ni fêi, burii è kɛ̀ a ŋánaa dîa. Ize lɔii kélee è nâa kɛ̀ a gâloŋ pɔ́ɔ.

²¹ Zosɛ è ǹûai kɛ̀ a gâloŋ ŋɔluɛ-ŋa é seri ǹɔii kóyaŋ ma.

²² Zâla láa-soŋ-ƃelai dílɔii nɔ́ ƃé vé ǹyá ní. Dífe dílɔii kɔlɛ ní Zosɛ ma, kpɛ́ni fêi, dí kɛ̀ mii-sɛŋ sɔlɔ ƃôi gâloŋ yêei.

²³ Nya ƃe Zosɛ è mò ǹûai dîa ǹyɛɛi, “Ka gáa, é síɣe sâa ma ŋa káya da kálɔii gâloŋ mî. Sí-sɛŋ-kao ká ŋí ká zí ǹɔii ma.

²⁴ Tãi ka zí-sãai ƃá kùla lai, ka ǹɔ́lu-ɣelei tɛ́ɛ gâloŋ pɔ́, gbélii é lɛ́ɛ káyêei, zí-mɛni ma da kákɔnɔŋ ka kánûai.”

²⁵ Dí mò ma dîyɛɛi, “Ƃa kúfulu-laai ŋuŋ ma ƃó. Ƃa kúsoŋ a ǹɛ́lɛɛ, ǹyaŋ kwa pâi kɛ̂i a gâloŋ ŋɔluɛ-ŋa.”

²⁶ Zosɛ è nâa gbɛ̀tɛ a tɔ̂ŋ Ize lɔii su a gɛɛ gâloŋ é zí-sãai ƃá ǹɔ́lu-ɣelei sɔlɔ ƃó. Díkɛ̀ dɔ̂ŋ ŋí mɛi kâai. Zâla láa-soŋ-ƃelai dílɔii nɔ́ ƃé vé kɛ́ ní a gâloŋ pɔ́.

Zeeka ŋɔmɛni-kpɛtɛɛi gbɛɛ ŋái

²⁷ Eezuɛ-ŋai dí sèe Gosɛŋ lɔii-kpiniŋ su Ize lɔii su. Nàa è kɛ̀ a dípɔɔ, dí ƃûu ƃó kpɔ́ naa a zu kɛ́tɛ.

²⁸ Zeeka è kɛ̀ Ize lɔii su a kóraŋ puu káo lɔ́ɔlu mɛi feerɛ. Ǹyaŋ Zeeka è kɛ̀ ɣele ma a kóraŋ ŋuŋ tɔ̂nɔ pôlu buu náaŋ káo lɔ́ɔlu mɛi feerɛ (147).

²⁹ Tãi Zeeka saa tãi è lɛ̀ɣɛ lai, è ǹóŋ Zosɛ tòli ǹyɛɛ mai, “A kɛ̀ ílii lâai ḿɛni ma, íyee lɔ́ ŋ́wɛrɛ mu í íkono tée a gɛɛ ƃa pâi tɔ̃yâ da wɛli-kɛ-maa kɛ̂i a ńyãa. Ífe ǹoo Ize lɔii su.

³⁰ Kɛ́lɛ tɔɔ ŋá láa ńâŋ-ni kɔlɛ. Ŋ́gula Ize lɔii su í lí a ńyãa í ńoo díloai.” È ŋ̀óo su tòo ǹyɛɛi, “Ŋa pâi gɛ̂i yɛ̂ɛ berei í mò lai.”

³¹ Zeeka ǹyɛɛ mai, “Ífoo ńyêei.” Nya ƃe è vòo ǹyêei. Zeeka è pɛ̀lɛ ŋ̀úme ŋá ŋɔgbìŋ ŋuŋ tûɛ é Ɣâla sɛɣɛi fé.