Zɛnɛse 45 - Bible

Zosɛ è gbîŋ lɛ̀ ǹêɣe da ǹîa-ni dîa

¹ Zosɛ fé pɔ̂ri ní nâa ǹíi maa sonîi ǹûai kɛ̀ gɔlɛi ŋɛ́i-tuɛ. Nya ƃe è làɣi ǹyɛɛi, “Ǹúui kélee dí dísu kula mâ.” Tãi è gbîŋ lɛ̀ la ǹêɣe da ǹîa-ni diai, núu da kpɛ́ni fé kɛ́ ní naa díkɔlɛ.

² È wɔ̀lɔ kpɔ́ a zu kɛ́tɛ Ize-ƃelai dí ŋ̀óo mɛ́ni gâloŋ ŋɔpɛ́rɛi mu-ƃelai dí ŋ̀óo mɛ́ni máŋ.

³ Nya ƃe Zosɛ è mò ǹêɣe da ǹîa-ni dîa ǹyɛɛi, “Zosɛ ƃa ńyãa. Ńâŋ káa niî ɣele mâ?” Kɛ́lɛ ǹêɣe da ǹîa-ni dífe kɛ̀ pɔ̂rii m̀are-kɛɛi su toôi. Kpɛ́ni fêi, dí kɛ̀ yaôi mà.

⁴ Zosɛ è mò dîa ǹyɛɛi, “Ka kpera kâa ka lɛɣɛ a ńyãa.” Dí lɛ̀ɣɛ la. È mò dîa ǹyɛɛi, “Kálêɣe Zosɛ ƃa ńyãa, nyii ká gɔ̀lɛ Izei.

⁵ Káfe yào kpaa máŋ kálii fé sɛ̀lɛŋ a gɛɛ ká ŋ́gɔ̂lɛ ƃɛ́. Kpɛ́ni fêi, Ɣâla ƃé ńdɛ̂ɛ kátuɛ a gɛɛ ŋá káfulu-laai maa kɔ̃ɔ.

⁶ Kpɛ́ni fêi, burii a gɛ́ ǹɔii su a kóraŋ feerɛ. A lɛɛ pôlu a puru kóraŋ lɔ́ɔlu nyii sí-sɛŋ sí-mɛni kpaa máŋ sí-sɛŋ ƃâ kula-mɛni fé pâi kɛ̂i naai.

⁷ Ɣâla è ńdɛ̂ɛ kátuɛ a gɛɛ kásuui é lɛ́ɛ ɣele ma. É ńdɛ̂ɛ kátuɛ a gɛɛ ŋá kátamaa-ɣele ƃálo, ŋá káfulu-laai lɛ́ɛ káyêei.

⁸ Mɛni ma káfe ńdɛ̂ɛ ní ƃɛ́. Ɣâla ƃé ńdɛ̂ɛ ƃɛ́. Ǹyaŋ a ŋ́gɛ a núu kɛ́tɛ gâloŋ ŋɔpɛ́rɛi mɛi. A ŋ́gɛ́ a Ize lɔii kélee mɛi-nuu.

⁹ “Ka lí a maa félaa ńâŋ pɔ́ naa ká mó ma kâa, íloŋ Zosɛ ǹyɛɛ, ‘Ɣâla a ŋ́gɛ a Ize lɔii kélee mɛi-nuu. Pá ḿbɔ ífe tãi sìɣe.

¹⁰ Ƃa pâi seêi Gosɛŋ lɔii-kpiniŋ su. Ǹyaŋ ƃa pâi kɛ̂i ŋ́gɔlɛ mâ, ka ínîa-pɛlɛɛi da díwɔ̂ nia-pɛlɛɛi, íƃala-ŋai da ítaa-tulɛ-ŋai é pɛ́lɛ íkɔ̃liŋ kélee mà.

¹¹ Ǹaa ƃé ƃa pâi kɛ̂i naa ŋ́gɛ íŋaa kɔ̀ŋ, kpɛ́ni fêi, puru kóraŋ lɔ́ɔlu káa niî pôlu. Fé ŋ̀wɛ̂lii sɛŋ da kélee wɛ́li é íkɛ ka ípɛrɛi mu-ƃelai.’ ”

¹² “Káŋɛi káa kwaa kâai, ńêɣe Bɛŋsima ŋɛ́i kɛ́ kwaa kâa a gɛɛ ńyãa kpîŋ ƃé lônoi kápɔ.

¹³ Ka ŋáwala-walai kélee maa mɛni ƃó ńâŋ ma nyii gáa ńyêei Ize lɔii su da nyii kélee ka gáai. Ka pá a ńâŋ ƃɛ́ a maa félaa.”

¹⁴ Nya ƃe è ɣîri Bɛŋsima kɔŋ ma é wɔ́lɔ, Bɛŋsima ǹyaŋ é wɔ́lɔ.

¹⁵ È ǹá-gbɔ sèe ǹîa-ni kélee dîa é wɔ́lɔ dîa. Nyíŋi pôlu ma da ǹîa-ni dí lòno díkîe-ni pɔ́.

¹⁶ Tãi gâloŋ ŋɔpɛ́rɛi mu-ƃelai dí mɛ̀ni la a gɛɛ Zosɛ ǹêɣe da ǹîa-ni da pâi, gâloŋ da ŋɔtíi kɛ́-ƃelai dílii è nɛ̃ɛ kpɔ́ a ŋánaa.

¹⁷ Nya ƃe gâloŋ è mò Zosɛ ma ǹyɛɛi, “Mó ílêɣe da ílîa-ni dîa a gɛɛ dí díkpîri-ŋai ɣíri díwɛlɛ-sôo-ŋai pôlu dí lí pôlu Keena lɔii su,

¹⁸ dí pá a dínâŋ da dínûai kélee ḿbɔ. Ŋa pâi Ize lɔii ǹɛ́lɛɛ tɛɛ̂i dípɔ. Da pâi ǹɔii ŋ̀úlɔ kpelêi dílii é láa.

¹⁹ Mó dîa máŋ a gɛɛ dí kéleŋ-ŋa kula Ize lɔii su dínɛyâai da dínîa-pɛlɛɛi mɛni ma, dí pá a dínâŋ.

²⁰ Dífe díkili ŋá sìa díkɔ̃liŋ mɛni ma, kpɛ́ni fêi, Ize lɔii su-sãai ǹɛ́lɛɛ kélee a pâi kɛ̂i a dípɔɔ.”

²¹ Zeeka ǹônii dí gɛ̀ tí. Zosɛ è kéleŋ-ŋa tɛ̀ɛ dípɔ yɛ̂ɛ berei gâloŋ è mò lai, é mii-sɛŋ tɛɛ dípɔ a díperêi kɔ̀nɔŋ.

²² È kúu kula yôkpo tɛ̀ɛ díkelee dípɔ tɛi-tɛi. Kɛ́lɛ è káne kpua-kpua ŋuŋ saaƃa (300) tɛ̀ɛ Bɛŋsima pɔ́ da kúu kula yôkpo lɔ́ɔlu.

²³ Zãâi ŋí ƃé è dɛ̀ɛ ǹâŋ mì. Wɛlɛ-soo sirɛ puu nyii-ŋai Ize sãai ǹɛ́lɛɛ-ŋa dí kɛ̀ dípôlu a kpîrii, wɛlɛ-sôo saa puu, nyii-ŋai mii-sɛŋ sìi támaa è kɛ̀ dípôlu a kpîrii. È nyíŋi-ŋai tɛ̀ɛ a ǹâŋ ŋɔperêi kɔ̀nɔŋ.

²⁴ È nâa ǹêɣe da ǹîa-ni tɛ̀ɛ ǹyɛɛ diai, “Káfe laa-saa kɛ̀ berei su.”

²⁵ Dí kùla Ize lɔii su dí pá pôlu Keena lɔii su dínâŋ Zeeka pɔ́.

²⁶ Dí mò ma dîyɛɛi, “Zosɛ káa niî ɣele ma! Ǹyaa ƃé gáa a Ize lɔii kélee mɛi-nuu!” Kɛ́lɛ Zeeka líi mu fé siɣe ní. Kpɛ́ni fêi, vé láa ní a díwoo.

²⁷ Kɛ́lɛ tãi mɛnii Zosɛ è mò diai dí gélee ƃò la Zeeka ma da géleŋ-ŋai Zosɛ è dítɛ̀ɛ a gɛɛ é lí zui, ǹíi mu è sìɣe.

²⁸ È mò ǹyɛɛi, “Nyíŋi támâai, ńoŋ Zosɛ káa niî ɣele ma! Tɔɔ ŋá lí ŋá gáa ŋá lɛ́ɛ saâi.”