Zɛnɛse 37 - Bible

Zosɛ da ǹêɣe é pɛ́lɛ ǹîa-ni dîa

¹ Zeeka è sèe Keena lɔii su nyii ǹâŋ è kɛ̀ zu a ŋɔ̃yai.

² Zeeka ŋɔsuui maa mɛni pɔlɔi ká ŋí. Zosɛ kɛ́ɛ a kóraŋ puu káo lɔ́ɔlu mɛi feerɛi, da ǹîa-ni dí kɛ̀ ƃála mɛi kâai. Dia ƃe kɛ̀ a ǹâŋ ŋɔnɛyâai Bila da Zipa dílônii-sinaai. Zosɛ è dítûa-pere nyɔŋ kélee pù dínâŋ ŋɛ́i.

³ Ǹyaŋ Zeeka è kɛ̀ a Zosɛ wɛ́liɛɛ é tɛ́ɛ ǹônii kélee dîa. Kpɛ́ni fêi, ǹyaa ƃé kɛ̀ a bɔlɔ lôŋ. Nya ƃe è yokpo kôya lɛ́lɛɛ sɔ̀lɔ mì.

⁴ Kɛ́lɛ tãi ǹîa-ni dí gàa la a gɛɛ dínâŋ è kɛ̀ a ŋwɛ́liɛɛ é tɛ́ɛ díkelee diai, dí gbɔ̀ara a sɛŋ dífe ŋɔ́nɔ kɛ́ ní lônoi bɔ́ a ǹɛ́lɛɛ.

⁵ Nya ƃe Zosɛ è sèe ƃô. Tãi è zee-wooi ƃô la ǹîa-ni diai, dí gbɔ̂ara a zu kɛ́tɛ.

⁶ Nya ƃe è mò dîa ǹyɛɛ, “Zeei ŋá mòi, ka mɛni.

⁷ Kú kɛ̀ mɔlɔŋ ɣirîi gbâlaŋ ŋá, ǹyaŋ ŋámɔlɔŋ-kɔŋ è sìɣe é tɔ́ɔ, káwɔ̂-ŋai dí tínaŋ ma dí pú ŋ́ɔ̂i kɔ́ɔ mu.”

⁸ Ǹîa-ni dí mò ma dîyɛɛi, “Ƃa ŋ̀wɛ̂lii í kɛ́ kúmɛi a kâloŋ?” Dí gbɔ̀ara kpɔ́ a ŋánaa ŋɔsee-wooi mɛni ma da ŋ̀óo-ŋai.

⁹ È ŋɔ́nɔ see da kpɛ́ni ƃò, é mó ǹîa-ni dîa ǹyɛɛi, “Ŋá see da kpɛ́ni ƃò. Vóloi da ŋ̀áloŋ é pɛ́lɛ pɛ̂mɛlɛŋ-kao puu káo tɔnɔ̀ɔi mâ dí kɛ̀ pɛlɛ̂i ŋ́gɔɔ mu.”

¹⁰ Kɛ́lɛ tãi è zee-wooi ŋí ƃò la ǹâŋ ma da ǹîa-ni, ǹâŋ è ǹia-woo ƃò ǹyɛɛ mai, “Zeei ŋí í mòi, ǹyaa ƃa lé? Gáa a sɛŋ kwa ílee da ílîa-ni kú pɛ́lɛ íkɔɔ mu?”

¹¹ Nya ƃe ǹîa-ni dí nâa kɛ̀ tólo kulâi mà. Kɛ́lɛ ǹâŋ è ŋ̀óo-ŋai lâai kɛ̀ gíli ŋá.

Dí Zosɛ kɔ̀lɛ Ize

¹² È kɛ̀ a tãi tɔnɔ Zosɛ ǹîa-ni dí lì a dínâŋ ŋɔƃála-ŋai vɛ̃ɛ-kpâlaŋ su Sɛkɛŋ kɔlɛ mâ.

¹³ Nya ƃe Zeeka è mò Zosɛ ma ǹyɛɛi, “Ílîa-ni díkaa m̀ála-ŋai mɛi kâai Sɛkɛŋ. Pá ŋá ítɛɛ dípɔ naa.” È mò mà ǹyɛɛi, “Ńyãa ká ŋí.”

¹⁴ Ǹâŋ è mò ma ǹyɛɛi, “Lí í ílîa-ni naa káa da m̀ála-ŋai. À kɛ̀ díkɔlɔ̂i ponoɔ̂ɔi í pá í mó ḿâ.” Mɛni ma è gùla Iburɔŋ yeei kwára é dɛ́ɛ Sɛkɛŋ.

¹⁵ Nalôŋ tɔnɔ è gàa sîa-siai vɛ̃ɛ-kpâlaŋ su é marê kɛ́ ǹyɛɛ ma, “Lé ƃé íkaa gɔ̂rii?”

¹⁶ Ńyɛɛ mai, “Ŋ́gaa ńîa-ni kɔ̂rii. Kpera yɛ̂ ƃɛ́i lɛ́ ḿâ díkaa m̀ála-ŋai mɛi kâai naai.”

¹⁷ Nalôŋ ǹyɛɛ mai, “Da lí, kpɛ́ni fêi, ŋá mɛ̀ni díla dîyɛɛi, ‘Kwaa kú lí Dotaŋ.’ ” Nya ƃe Zosɛ è lɛ̀ɛ ǹîa-ni pôlu é díkaa Dotaŋ.

¹⁸ Dí gàa pâi kwaa kôya ma. É lɛ́ɛ pâi serîi dîa, dí gbɛ̀tɛ a gɛɛ dí bàa.

¹⁹ Dí mò díkîe-ni dîa dîyɛɛi, “Zee-ƃo-nuui ká tí pâi.

²⁰ Ka pá kú bàa kú bíli ǹóai su. Gɛ̀ ní kwa pâi môi a gɛɛ fɛnɛ-sãa nyɔmɔɔ ŋàa ƃé mîi. Kwa pâi nâa gâai mɛnii pâi kɛ̂i a ŋɔsee-wooi.”

²¹ Kɛ́lɛ tãi Lubiŋ è mɛni-kpɛtɛɛi ŋí mɛ̀ni lai, è kɛ̀ ŋ̀wɛ̂lii é Zosɛ kula ǹîa-ni yêei. È mò dîa ǹyɛɛi, “Kúfe bàa.”

²² Lubiŋ è mò dîa ǹyɛɛi, “Káfe ŋ̀ãa pù. Ka bìli nɔ́ ƃɛ́ ǹóai su vɛ̃ɛ-kpâlaŋ su, kɛ́lɛ káfe káyee pɛ̀lɛ ma.” È kɛ̀ ŋ̀wɛ̂lii a gɛɛ é gùla díyêei é pá la ǹâŋ pɔ́.

²³ Tãi Zosɛ è sèri la ǹîa-ni diai, dí ŋɔyokpo lɛ́lɛɛi kùla mà.

²⁴ Dí lí a Zosɛ dí bíli ǹóai su. Ǹóai è kɛ̀ a vólo, yá fé kɛ́ ní zu.

²⁵ Nya ƃe dí sèe díkɛ dílaa mìi. Dí díŋuŋ mu sìɣe dí Isima-ŋai káa kulâi Gilia díkɛ pà a díkpulu kɛ́tɛ soo-fáleŋ-ŋa mɛi. Dí kɛ̀ pâi a wúru-malaŋ, tuma-laa kúŋ nɛ̃ɛ da wúlɔ kúŋ nɛ̃ɛ. Dí kɛ̀ liî Ize.

²⁶ Nya ƃe Zuda è mò m̀arâai dîa ǹyɛɛi, “Lé lɛ́lɛɛ ƃé kwa pâi zɔlɔ ƃôi à kɛ̀ kwa kúlêɣe pàa kú bàa mɛni lòo?

²⁷ Ka pá kú gɔlɛ Isima-ŋai dîa. Kúfe kúyee pɛ̀lɛ mà, kpɛ́ni fêi, gáa a kúlêɣe, kú ƃô a kpono tɔnɔ.” Nya ƃe m̀arâai dí fàa ŋ̀óo mâ.

²⁸ Midiɛŋ pɔni tɔɔ-ƃela dí kɛ̀ tɛɛ̂i naa kɔlɛ mâ. Nya ƃe Zosɛ ǹîa-ni dí gùla ǹóai su dí gɔlɛ Isima-ŋai dîa a káne kpua-kpua buu feerɛ. Nya ƃe dí lì a Zosɛ Ize.

²⁹ Tãi Lubiŋ è lì la pôlu ǹóai lái, vé Zosɛ káa ní zui, è ŋɔseɣei fála a lii-soli.

³⁰ É lí pôlu m̀arâai pɔ́ naa ǹyɛɛ diai, “Ǹôloŋ fé naa. Mí ƃé ŋa pɔ̂ri liî naa?”

³¹ Nya ƃe dí Zosɛ ŋɔyokpoi sîɣe dí ƃoli páa dí ǹɔ́ m̀oli ŋãai su.

³² Dí lì la dínâŋ pɔ́ díyɛɛ mai, “Kú ǹyokpoi ŋí kàa. Gáa à kɛ̀ gáa a íloŋ pɔ́.”

³³ Nya ƃe è maa kpɛ̂ɛ ǹyɛɛi, “Ńoŋ ŋɔyokpoi ká ŋí. Fɛnɛ-sɛŋ nyɔ́mɔɔ a ńoŋ míi. Ńâai la vɛnɛ-sɛŋ nyɔ́mɔɔi tí è Zosɛ su tèe a gbua-kpûa!”

³⁴ Nya ƃe Zeeka è ŋɔseɣei fâla é maloŋ too-maa seɣɛ tôo mà é wɔ́lɔ kpɔ́ ǹóŋ mɛni ma a ɣele kûu támaa.

³⁵ Ǹônii-sinaai da ǹônii-nɛyãai kélee dí dímu sìɣe dí lí a gɛɛ dí ŋ̀á nɛnɛ. Kɛ́lɛ vé fáa ní a gɛɛ dí ŋ̀á nɛnɛ. È mò ǹyɛɛi, “Kpao, ŋa pâi lɛɛ̂i ńoŋ maa wɔ̂lɔ kɛ̂i é lɛ́ɛ la zu ŋá sáa.”

³⁶ Midiɛŋ-ŋai dí lì dí Zosɛ kɔ̀lɛ gɔkuluƃa-ŋai kɛ́ Ize kaloŋ mɛi kâai laa-tuɛ nuu kɛ́tɛi mâ Ize. Nalôŋ kpîŋ láa ƃe kɛ̀ a Potifa.