Zɛnɛse 22 - Bible

Ɣâla è mò Eberaɣɛ̃ɛ ma a gɛɛ é Aise kula a sâla

¹ M̀ɛni-ŋai ŋí pôlu ma, Ɣâla è Eberaɣɛ̃ɛ su kɔ̀ɔŋ. È dòli ǹyɛɛ ma, “Eberaɣɛ̃ɛ!” Eberaɣɛ̃ɛ ǹyɛɛ ma, “Ńyãa ká ŋí!”

² Ɣâla ǹyɛɛ ma, “Ílii ma loŋ Aise siɣe, nyii í ŋwɛ́lini a ŋánaai, í lí la Moraiya lɔii su, í gula naa a kéreŋ sala ǹyée-ŋai dɔnɔ ma nyii ŋa pâi ǹɛ̂i yâi.”

³ Nya ƃe Eberaɣɛ̃ɛ è mu sìɣe a ɣele-wala pɛpɛ é ŋɔwɛlɛ-sôoi maa ɣíri, é ŋɔtíi-kɛ-ƃelai veerɛ síɣe da ǹóŋ Aise. È gɔii têe géreŋ salai mɛni ma. È mu síɣe é lí ƃɛ́i mâ Ɣâla è naa lɛ̀ mai.

⁴ Ŋ̀ele-kûui zaaƃa-ɣelei Eberaɣɛ̃ɛ è ŋuŋ mu sìɣe é maa kwaai mâ káa kwaa kôyaa ma.

⁵ Nya ƃe Eberaɣɛ̃ɛ è mò ŋɔtíi-kɛ-ƃelai dîa ǹyɛɛi, “Ka lɛɛ ƃɛ́ ŋwɛlɛ-sôoi kɔlɛ, kwa ǹôloŋ kwa liî mánaa tí kú Ɣâla fɛli kú pá pôlu.”

⁶ Eberaɣɛ̃ɛ è géreŋ salai kéreŋ kɔii sìɣe é ǹáa ǹóŋ Aise ŋûa é ŋɔŋ sóŋ ǹyée ŋá da móai. Nya ƃe da ǹóŋ dí lì.

⁷ Aise è mò ǹâŋ Eberaɣɛ̃ɛ ma ǹyɛɛi, “Ńâŋ!” Ǹâŋ ǹyɛɛ mai, “Ńóŋ, ńyãa ká ŋí.” Aise ǹyɛɛ mai, “Gáa, ŋɔŋ káa ƃɛ́ da gɔii, kɛ́lɛ m̀álai kɔɔ géreŋ salai kula mɛni ma?”

⁸ Eberaɣɛ̃ɛ ǹyɛɛ mai, “Ńoŋ, Ɣâla ǹyaa kpîŋ a pâi málai tɛɛ̂i géreŋ salai mɛni ma.” Nya ƃe dífeerɛ dí lì.

⁹ Tãi dí sèri la ƃɛ́i Ɣâla è nàa lɛ̀ Eberaɣɛ̃ɛ mai, Eberaɣɛ̃ɛ è Ɣâla-teƃele tɔ̀ɔ naa é gɔii pú ŋ̀á a ǹɛ́lɛɛ. È ǹóŋ Aise sòŋ é ŋíri é ǹáa gɔii mɛi zâla-kula teƃelei ŋá.

¹⁰ Eberaɣɛ̃ɛ è nâa móai sìɣe a gɛɛ é ǹóŋ páa la.

¹¹ Kɛ́lɛ Yâwɛɛ ŋɔkélai wóo è kùla ŋ̀elei su é dóli ǹyɛɛ mai, “Eberaɣɛ̃ɛ, Eberaɣɛ̃ɛ!” Eberaɣɛ̃ɛ ǹyɛɛ mai, “Ńyãa ká ŋí.”

¹² Ŋ̀âla-taa-kelai ǹyɛɛ mai, “Ífe íyee pɛ̀lɛ ǹôloŋ ma, kpaa máŋ í mɛni da kélee kɛ̀ la, kpɛ́ni fêi, ŋâa gɔ́lɔŋ nâa a gɛɛ ƃa yào Ɣâla ma, ífe ílii ma loŋ kùla ní ǹyêei.”

¹³ Nya ƃe Eberaɣɛ̃ɛ è ŋuŋ mu sìɣe é gɔlɛ mâ káa. È ƃála-sirɛ tɔnɔ káa tɔɔni bôlu-pere sɛŋ da piliɛɛ m̀ĩlai. Eberaɣɛ̃ɛ è lì é m̀álai kúla, é géreŋ salai kúla la ǹóŋ pɔ́ ŋá.

¹⁴ Nya ƃe Eberaɣɛ̃ɛ è maa kwaai tí ma tòli a “Yâwɛɛ a pâi dɛ̂ɛi” yɛ̂ɛ berei da mò la tãi ŋí sui, “Yâwɛɛ a pâi dɛ̂ɛi ŋɔyéei ma.”

¹⁵ Ŋ̀âla-taa-kelai wóo è kùla ŋ̀elei su é Eberaɣɛ̃ɛ tóli a tãi veerɛ-ɣelei,

¹⁶ Ǹyɛɛ mai, “Yâwɛɛ ǹyɛɛ, ŋá ŋ́gono tée ńyãa kpîŋ ńyêei a gɛɛ tãi nɔ́ ífe íkpɔɔi loŋ maa kɔ̃ɔ ní la mâi,

¹⁷ ŋa pâi lûwa lâai yâ a zu kɛ́tɛ, ŋá ísuui táma yɛ̂ɛ bɛ̂mɛlɛŋ-kao-ŋai díkaa ŋ̀elei sui da Yúo ma ŋãyai. Ísuui a pâi ŋɔkpɔara-ƃelai yée mɛi ɣâlei.

¹⁸ Ǹɔii-ŋuŋ-ŋai kélee da pâi ḿarê kɛ̂i a gɛɛ ŋá kpɔ́ŋ dîa ísuui sârai. Kpɛ́ni fêi, í ŋ́oo mɛ̀ni.”

¹⁹ Nya ƃe Eberaɣɛ̃ɛ è pà pôlu ŋɔnûai pɔ́, dí dímu síɣe da dîa-ni dí lí Bɛɛsiba ƃɛ́i Eberaɣɛ̃ɛ è sèe naai.

Naɔ suu pîlaŋ-pere

²⁰ Mɛni-ŋai ŋí kɛ́ɛ pôlu ma Eberaɣɛ̃ɛ è mɛ̀ni a gɛɛ Maka da Eberaɣɛ̃ɛ ǹêɣe Naɔ dí nîa-pɛlɛɛ maa sɔlɔ ƃô.

²¹ Dínîa-pɛlɛɛi láa ká ŋí. Uzi ƃé kɛ̀ a díloŋ maa-ŋuŋ, Buzi kɛ́ ƃò a ǹêɣe-surɔ̂ŋ da Kemuɛ nyii kɛ̀ a Araŋ ǹâŋ,

²² da Kese é pɛ́lɛ Azo ma da Pida, Zila da Bɛtuɛ.

²³ Bɛtuɛ ƃé Lubɛka maa sɔlɔ ƃô. Nîa-pɛlɛɛ lɔ́ɔlu mɛi saaƃai ŋí bé Maka da Naɔ dí dímaa sɔlɔ ƃô.

²⁴ Naɔ ŋɔnɛnîi veerɛ-ɣelei nyii da kâa kɛ̀ ma Leumai, da ǹyaa dí Teba maa sɔlɔ ƃô da Gaaŋ é pɛ́lɛ Taasa ma da Maaka.