Zɛnɛse 10 - Bible

Nôa ǹônii-ni dísuui pîlaŋ-pere

¹ Nôa ǹônii láa ƃe kɛ̀ a, Sɛ̂ŋ, Aaŋ da Zafɛ dísuui pîlaŋ-pere ká ŋí. Ǹûai ŋí dí lônii-sinaa maa sɔlɔ ƃô ǹya-fɛɛi pôlu ma.

² Zafɛ ǹônii-sinaai ƃa. Gomɛ, Magɔɔ, Madai, Zavaŋ, Tuba, Misɛ da Tira.

³ Gomɛ ǹônii-sinaai ƃa, Asikena, Lifa da Togama.

⁴ Zavaŋ ǹônii-sinaai ƃa, Ilisa, Sipîŋ, Kitiŋ da Lôo.

⁵ Yúo koo-ma-ƃelai dí kùla ǹûai ŋí kponôi. Zafɛ ǹônii-sinaai ƃe kɛ̀ a ǹûai nyii-ŋai díkaa dílɔii-ŋuŋ-ŋai su a dísîi-woo tɛi-tɛi-ŋai, yɛ̂ɛ berei dísuu-ŋai da dílɔii-ŋuŋ-ŋai káa lai.

⁶ Aaŋ ǹônii-sinaai ƃa, Kusi, Ize, Lébia da Keena.

⁷ Kusi ǹônii-sinaai ƃa, Seba, Avila, Sabata, Lamɛ da Sateka. Lamɛ ǹônii-sinaai ƃa, Seba da Dedaŋ.

⁸ Kusi ǹóŋ-surɔ̂ŋ láa ƃa, Nimɔrɔ, nyii kɛ̀ a ǹúui maa-ŋuŋ nyii wála-wala támaa è kɛ̀ ǹyêei ǹɔii sui.

⁹ È kɛ̀ a gbâna pili-nuu kɛ́tɛ Yâwɛɛ ŋɛ́i. Mɛni ma da mò dîyɛɛi, “Tɔɔ Yâwɛɛ é í kɛ́ a loŋso kɛ́tɛ yɛ̂ɛ Nimɔrɔ.”

¹⁰ Daa-lee-ŋai è kɛ̀ mɛi dîa ƃa, Beebɛ, Irɛ da Aka. Daa-lee-ŋai ŋí kélee díkɛ̀ Babelɔŋ lɔii sui.

¹¹ È kùla ǹɔii ŋí su é lí Asiria é Ninivɛ taa-leei, Liobɔ Iî taa-leei, da Kâla taa-leei-ŋai tɔ́ɔ naa,

¹² da Lesɛŋ taa-leei, nyii è dɔ̂ɔ Ninivɛ da Kâla taa-lee gɛ́tɛi loai.

¹³ Ize è kɛ̀ a Ludi-ŋai dínâŋ da Anaŋ-ŋai, Lea-ŋai, Nafu-ŋai,

¹⁴ Patusi-ŋai, Kasu-ŋai, da Kulîi-ŋai, nyii-ŋai Felesia-ŋai dí kùla díkponôi.

¹⁵ Keena è kɛ̀ a Sidɔŋ ǹâŋ, nyii kɛ̀ a ǹóŋ maa-ŋuŋ, ǹêɣe kɛ́ ƃô a Ita.

¹⁶ Zɛbusi-ŋai, Amɔra-ŋai, Gigasai-ŋai,

¹⁷ Iva-ŋai, Aki-ŋai, Sini-ŋai,

¹⁸ Avada-ŋai, Zemari-ŋai da Ama-ŋai dí kùla máŋ Keena ŋɔsuui su. Naa pôlu ma Keena-ŋai dísuui è tàa-taa.

¹⁹ Keena-ŋai dílɔii ŋɔsu-kɛtɛ è kùla Sidɔŋ nyii gáa Gera taa-leei ma perei, é seri Geza, Sodɔŋ, Gomora, Adama da Zeƃoyiŋ, é seri Lasa.

²⁰ Aaŋ ǹônii-sinaai ká ŋí yɛ̂ɛ berei dísuui káa la da dísîi-woo-ŋai, é pɛ́lɛ dílɔii-ŋuŋ-ŋai dîa da dínûai.

²¹ Zafɛ ǹîa-surɔ̂ŋ Sɛ̂ŋ nyii kɛ̀ a Ibulu-ŋai kélee dínâŋ, ǹyaa máŋ è nîa-pɛlɛɛ maa sɔlɔ ƃô.

²² Sɛ̂ŋ ǹônii-sinaai ƃe kɛ̀ a, Elaŋ, Asɔdɔ, Apasa, Ludi da Araŋ.

²³ Araŋ ǹônii-sinaai ƃa Uzi, Ɔ̂ɔ, Getɛ da Mɛsi.

²⁴ Apasa è kɛ̀ a Sila ǹâŋ, Sila kɛ́ ƃô a Ibɛ ǹâŋ.

²⁵ Ibɛ è lônii-sinaa feerɛ maa sɔlɔ ƃô. Dɔnɔ láa ƃé kɛ̀ a Pelɛ, kpɛ́ni fêi, ŋɔtãi mâ ǹɔii ŋáa è kɛ̀ a gɔlɛɛ. Gbèlii láa ƃé kɛ̀ a Zotaŋ.

²⁶ Zotaŋ è kɛ̀ a Amɔda ǹâŋ, Silɛfi, Azamavɛ, Zera,

²⁷ Adoraŋ, Uza, Dila,

²⁸ Oba, Abimee, Siba,

²⁹ Ofɛ, Avila da Zoba. Diai ŋí kélee díkɛ̀ a Zotaŋ nônii.

³⁰ Ǹɔii dí kɛ̀ zui ŋɔkôya è kùla Misa é lí Sifa-pere é seri ǹyée lɔii mâ vóloi kulâi-pere.

³¹ Sɛ̂ŋ ǹônii-sinaai ká ŋí yɛ̂ɛ berei dísuui káa la, dísîi-woo-ŋai, dílɔii-ŋuŋ-ŋai da dínûai.

³² Nôa ǹônii-sinaai dísuui ká ŋí yɛ̂ɛ berei dísuu pîlaŋ-pere káa la da dílɔii-ŋuŋ-ŋai. Ǹûai ŋí kponôi ƃé ǹúu suu-ŋai kélee dí kùla naa dí táa-taa ǹɔii su gwaa kélee ǹya-fɛɛi pôlu ma.