Zasua 9 - Bible

Giƃiyɔŋ-ƃelai dí Eezuɛ-ŋai pɛ̂lɛ

¹ Gâloŋ-ŋai kélee kɛ̀ vóloi liî-pere Zɔdiŋ Ya-leei pôlu pere nyíi-ŋai kɛ̀ ǹyée pɛlɛ-pɛlɛɛi da ǹyée kpaya-kpaya lɔii sui dí m̀ɛnii kélee m̀ɛni Eezuɛ-ŋai dí gɛ̀i. Gâloŋ-ŋai kɛ̀ Mɛditɛrenia Yuoi ma-pere da Lɛƃanɔŋ lɔii sui dia máŋ dí m̀ɛni. Gâloŋ-ŋai ŋí ƃa Ita-ŋai, Amora-ŋai, Keena-ŋai, Periza-ŋai, Iva-ŋai da Zɛbusa-ŋai díkâloŋ-ŋai.

² Gâloŋ-ŋai ŋí kélee dí díŋaa tɛ̀ díkîe ma dí mɛni kpɛtɛɛ kɛ́ a gɛ́ɛ dí kɔ́ pɛ́lɛ Zasua ma da Eezuɛ-ŋai dîa.

³ Kɛ́lɛ Giƃiyɔŋ-ƃelai kɛ́ɛ da mɛ̀ni berei Zasua è Zɛleko da Eea sìɣe lai,

⁴ dí táre mɛni da kpɛ̀tɛ. Dí lì dí mii-sã̂a pú ƃɔrɔ sâa su dí zèe díwɛlɛ-sôoi mɛi, dí sua-kɔlɔ gonoŋ sàa pɛ́ŋ pɛlɛɛ sée m̀ɛi.

⁵ Dí kpáŋkpali saa pɛ́ŋ-pɛlɛɛ lɔ̀ díkɔɔ ŋá, dí seɣe sâa too dîa, dí pûŋ kpolo siɣe.

⁶ Nya ƃe dí pà m̀ûui su Geega Zasua pɔ́ naa da Eezuɛ kpakolo-ŋai dîɛ dîai, “Kwa kulâi kwaa kóyaa ma. Mɛni ma, kwa kúkono tée kúkîe-ni yêei.”

⁷ Kɛ́lɛ Eezuɛ kpakolo-ŋai dí m̀o Iva-ŋai dîa dîyɛɛi, “Gáa yɛ̂ɛ kákaa kúkɔlɛ ma, Gɛ̀ ní, lé mɛni ƃe fɛ̂ɛ nɔ́ kúkono têe kɛ́ la kúkîe-ni yêei?”

⁸ Dí mò Zasua ma dîyɛɛi, “Kúkaa a íyêe mu-ƃela.” Nya ƃe Zasua è dímarê kɛ̀ ǹyɛɛ dîai, “Gbɛ̂ɛ ƃa káa? Mí ƃé ká kùla naai?”

⁹ Dí mò ma dîyɛɛi, “Kú kùla kwaa kóyaa ma. Kú pà, kpɛ́ni fêi, kú mɛnii mɛni Káɣâlai Yâwɛɛ è gɛ̀ Ize lɔii sui,

¹⁰ da nyíi è gɛ̀ a Amɔra kaloŋ feerɛi kɛ̀ Zɔdiŋ Ya-leei polui, Ɛsibɔŋ kaloŋ Siɔŋ da Basãŋ kaloŋ Oŋ nyíi zeɛ́ɛ è kɛ̀ Asɛtarɔ taa-leei sui.

¹¹ Nya ƃe kúnuu pɔlɔ-ŋai da kúlɔii su-ƃelai kélee dí m̀o kûa dîyɛɛi, ‘Ka mii-saa siɣe ká lí dípɔ naa ká m̀ó dia-ni kâa kúkaa a káyee mu-ƃela, ka pá kú kono-tee kɛ́ kúkîe-ni yêei.’

¹² Gbóloi ká ŋí kú pà lai. È kɛ̀ a vãa tãi kú gùla kúpɛrɛ-ŋai mu a gɛ́ɛ kú pá la a kúsia kɔnɔŋ, kɛ́lɛ gáa, aâ kpála pûŋ a zòŋ.

¹³ Zua-kɔlɔ gonoŋ-ŋai ŋí dí kɛ̀ a nina, dílaa fɛ́ɛ kúkɛɛ pâi. Kɛ́lɛ gáa gélee aâ ƃéla-ƃela. Ǹyaŋ kúyokpo-ŋai kélee da fála-fàla, kúkɔɔ ŋá kɔlɔ-ŋai kpóŋ a tée zia kóyaai ŋí su.”

¹⁴ Nya ƃe Eezuɛ kpakolo-ŋai dí fàa díwoo ma dí díkpoloi da mii. Kɛ́lɛ dífe Yâwɛɛ marê kɛ́ ní a gɛɛ dí gɔ́lɔŋ à kɛ̀ vâai ma da ǹûai ŋí ni dí mɛni kpɛtɛɛ kɛ́ da díkîe-ni loai.

¹⁵ Nya ƃe Zasua e góno-tee Giƃiyɔŋ-ŋai yêei a gɛ́ɛ Eezuɛ-ŋai dífe pâi dípaâi. Ǹyaŋ Eezuɛ láa túɛ-ƃelai dia máŋ dí díkono tèe díyêei.

¹⁶ Ɣele kûu saaƃa tɛɛ pôlu ma, Eezuɛ-ŋai dí gɔ̀lɔŋ a gɛ́ɛ Giƃiyɔŋ-ŋai díkaa a díkɔlɛ ma-ƃela.

¹⁷ Nya ƃe Eezuɛ kɔ-kuluƃa-ŋai dí fólo saaƃa sìɣe dí tɛ́ Giƃiyɔŋ-ŋai dítaa-lêe-ŋai su. Dítaa-lêe-ŋai ƃé kɛ̀ a Giƃiyɔŋ, Sefira, Bɛɛrɔ da Kiria-Zeriŋ.

¹⁸ Kɛ́lɛ Eezuɛ-ŋai dífe Giƃiyɔŋ-ŋai pàa ni, kpɛ́ni fêi, Eezuɛ láa túɛ-ƃelai dí dífòo Giƃiyɔŋ-ŋai yêei a Eezuɛ-ŋai Díɣâlai Yâwɛɛ láa a gɛ́ɛ dífe pâi dípaâi. Nya ƃe Eezuɛ-ŋai dí dílii ŋwàna dílaa túɛ-ƃelai dîa.

¹⁹ Kɛ́lɛ Eezuɛ láa túɛ-ƃelai dí mò Eezuɛ lonii dîa dîyɛɛi, “Kwaa gbâa kúfoo ǹûai ŋí yêei a Eezuɛ Ŋɔɣâlai Yâwɛɛ láa. M̀ɛni ma, kúfa pɔri mɛni da kɛ̂i a dîa.

²⁰ Kúfe pâi dípaai Yâwɛɛ fa lâa ǹíi ŋwana la kûa voo-wooi mɛni ma kú gɛ̀ díyêei.”

²¹ Nya ƃe dílaa túɛ-ƃelai dí mò dîa dîyɛɛi, “Káfe dípàa, kɛ́lɛ da pâi kɛ̂i a kɔi siɣe-ƃela da yá kɔɔ-ƃela Eezuɛ-ŋai kélee mɛni ma.”

²² Nya ƃe Zasua è Giƃiyɔŋ-ŋai tòli ǹyɛɛ dîai, “Ká kúpɛ̀lɛ lé mɛni ma ká mò kâa kâ kulâi kwaa kóyaa ma, ǹyaŋ ká kɛ́ ƃò nɔ́ kúkɔlɛ ma ƃɛ́?

²³ M̀ɛni ma, náɣaŋ káa kâa. Ká ta-ŋa ka pâi kɛ̂i a luɛ-ŋa, ká kɛ́ kɔi sîɣe, ká kɛ́ yá kɔɔ Ŋáɣâlai ŋɔpɛ́rɛi mu mɛni ma.”

²⁴ Dí mò Zasua ma dîyɛɛi, “Kú gɛ̀ ti, kpɛ́ni fêi, kú mɛ̀ni a gɛ́ɛ Káɣâlai Yâwɛɛ è mò ǹyée mu-nuui Mose ma a gɛ́ɛ é ǹɔii kélee tɛ́ɛ ípɔ í zu-ƃelai kélee páa. Mɛni ma kú kɛ̀ yaôi kúfulu-laai su láŋ mɛni ma.

²⁵ Ǹyaŋ, gáa kúkaa nâa íyêei. M̀ɛnii nyíi í gɔ́lɔŋ ǹɛ̂lɛɛi kúmɛni mai gɛ́ a kúa.”

²⁶ Nya ƃe Zasua è dímɛi kàa. È gɛ̀ Eezuɛ-ŋai dífe da paa ní.

²⁷ Kɛ́lɛ m̀aa ɣêlei tí, Zasua è díkɛ̀ a kɔi síɣe-ƃela da yá kɔɔ-ƃela Eezuɛ-ŋai mɛni ma da Yâwɛɛ ŋɔteƃelei mɛni ma ƃɛ́i kélee da vɛli naai. Díkaa sâa m̀ɛni-ŋai ŋí kɛ̂i Eezuɛ-ŋai dîɛ.