Zasua 8 - Bible

Zasua è Eea taa-leei sôŋ

¹ Nya ƃe Yâwɛɛ è mò Zasua ma ǹyɛɛi, “Ífe yào kpaa máŋ ílii é tóo pôlu. Íkɔ kɔ́-ƃelai kélee síɣe ká lí ká kɔ́ tóo Eea taa-leei ma. Gáa, ŋaâ naa kaloŋ tɛ́ɛ ípɔ, ŋɔnûai, ŋɔtaa-lêei da ŋɔlɔii.

² Ǹyaŋ ya pâi naa su-karâi í ǹaa kaloŋ páa yɛ̂ɛ berei í gɛ̀ la a Zɛleko da ǹaa kaloŋ. Zãa lɛ́lɛɛ-ŋai da daa-tûlɛ-ŋai nɔ́ ƃé ka pâi ziɣêi a kápɔɔ. Ka gbã tée naa-ƃelai dîa daai pôlu pere.”

³ Nya ƃe Zasua è gbîŋ kpɛ̀tɛ da ŋɔkɔ́ kɔ́-ƃelai kélee a gɛ́ɛ dí tɛ́ Eea. Zasua è kɔ-kûluƃa wála buu saaƃa tɛ̀ɛ tuɛ a gbínii.

⁴ È mò dîa ǹyɛɛi, “Ka gáa, ka káloo daai pôlu-pere. Káfe kámaa kôya naa ma, ka kákpîŋ kpɛtɛ.

⁵ Kwa gɔ́-kûluƃai nyíŋi-ŋai kwa pâi lɛɣɛ̂i a daai. Da kùla a gɛ́ɛ dí kɔ́ kúpɔ yɛ̂ɛ berei dí gɛ̀ lai, kwa pâi pɛlɛ̂i púɔɔ ma.

⁶ Gɛ̀ ní da pâi pɛ̂lɛi kúkpɛ̂i kú gɛ́ dí kúla daai ma, kpɛ́ni fêi, Eea-ƃelai da pâi môi dîyɛɛ, ‘Daâ ŋɔ́nɔ kɛ́ pûi kúyêei yɛ̂ɛ berei dí gɛ̀ la a bɔlɔi.’

⁷ Gɛ̀ ní ka pâi kulâi ǹóo perei su ká daai síɣe, kpɛ́ni fêi, Kúɣâlai Yâwɛɛ a pâi daai tɛɛ̂i kúpɔ.

⁸ Ǹyaŋ à kɛ̀ kà daai sîɣe, ka ǹaa kéreŋ yɛ̂ɛ berei Yâwɛɛ è mò la kâai. Dɔ̂ŋ-ŋai ká ŋí ŋa dɛ̀ɛ kápɔi.”

⁹ Nya ƃe Zasua è ŋɔkɔ́ kuluƃa wála buu saaƃai tɛ̀ɛ tuɛ. Dí lì Bɛtɛ da Eea loai vóloi liî-pere dí díloo naa. Kɛ́lɛ Zasua da gɔ-kûluƃai kpéli-ŋai dí nyìi m̀ûui su.

¹⁰ Ǹyaŋ Zasua è mu sìɣe a ŋ̀ele wâla pɛ̀pɛi é gɔ-kuluƃa-ŋai ŋáa tɛ́ gîe ma da Eezuɛ-ŋai túɛ-ƃelai a gɛ́ɛ dí lí Eea.

¹¹ Zasua da gɔ-kuluƃa-ŋai dí tɛ̀ɛ daai ŋɛ́i túɛ pere dí díƃûui pú naa ǹyái ŋûa pere. Poto è kɛ̀ díƃûui loai da Eea.

¹² Nya ƃe è kpakolo kɛ́ɛ yɛ̂ɛ wála lɔ́ɔlu (5,000) tɛ̀ɛ a gɛ́ɛ dí díloo Bɛtɛ da Eea loai, Eea taa-leei vóloi-lîi pere.

¹³ Gɔ-kuluƃa-ŋai kɛ̀ a díloɔɔ daai pôlu perei dí nâa díkpîŋ kpɛ̀tɛ gɔ́i kɔ́ mɛni ma. Kpului dɔnɔ è kɛ̀ daai ŋɔyá-ŋûa pere, gbélii kɛ́ ƃò daai vóloi liî-pere. Kɛ́lɛ Zasua è nyìi Botoi su a maa kpînii tí.

¹⁴ Eea kaloŋ kɛ́ɛ a Zasua ŋɔkɔ kuluƃa-ŋai káai, è m̀u sìɣe a maa félaa da ŋɔkɔ kuluƃa-ŋai dí lí Zɔdiŋ tiŋ-tiŋ su ƃɛ́i dí kɔ̀ naa a bɔlɔi a gɛ́ɛ da Eezuɛ-ŋai dí kɔ́. Kɛ́lɛ vé kɛ́ ní a gɔ́lɔŋɔɔ a gɛ́ɛ Zasua ŋɔkɔ kûluƃa-ŋai da-ŋa da pâi kulâi dípôlu pere.

¹⁵ Dí kɛ́ɛ gɔ́i kɔ̂i, Zasua da ŋɔkɔ kuluƃa-ŋai dí kɛ̀ gɛ̂i yɛ̂ɛ ǹya ƃé da pûi Eea kɔ-kuluƃa-ŋai yêei vɛ̃ɛ-kpâlaŋ su-pere. Eea kɔkuluƃa-ŋai dí ǹaa kàa nɔ́, díkelee dí kúla daai su díkɛ dí kpɛ̀. Dí kɛ́ɛ díkpɛ̂i, dínaa è kòya daai ma.

¹⁶ Nya ƃe dí mò ǹûai kélee dîa gɛ́ɛ dí Zasua-ni kpɛ́ dí kúla daai ma. Zasua è gɛ̀ díkelee dí kúla daai su.

¹⁷ Kpakolo tɔnɔ kpîŋ fé lɛ̂ɛ ní Eea kpaa máŋ Bɛtɛ. Díkelee dí lɛ̀ɛ Zasua-ni kpɛ̂i dí kúla daai su. Dí daai lɛ́ɛ a ǹáa ƃóɔɔ dí kɛ́ Eezuɛ-ŋai kpɛ́.

¹⁸ Gɛ́ɛ tíi, Yâwɛɛ è mò Zasua ma ǹyɛɛi, “Gbálai sã́a Eea mɛi pêre, kpɛ́ni fêi, ŋa pá naa tɛɛ̂i ípɔ.” Nya ƃe Zasua è gɛ̀ tí.

¹⁹ Gɔ-kûluƃa-ŋai kɛ̀ ǹóo pêrei su kɛ́ɛ da Zasua káa ǹyée tɛ̂i ɣelêi, dí kùla a kîrɛ dí tɛ́ daai su dí naa síɣe. Daai síɣeɛɛ dîɛi, dí naa kèreŋ a maa félaa.

²⁰ Eea kɔ-kuluƃa-ŋai dí dípôlu kàa nɔ́, dí luri káa tɛ̂i ŋ̀elei su. Kɛ́lɛ dípu pêre fé kɛ́ ní ma, kpɛ́ni fêi, diai kɛ̀ díkpɛ̂i dí tìnaŋ dí pɛ́lɛ kɔ̂i dípɔ.

²¹ Zasua è gɔ́lɔŋ a gɛ́ɛ ŋɔkɔ kuluƃa-ŋai daâ daai síɣe da ŋɔŋ pú mai, è tìnaŋ é pɛ́lɛ Eea kɔ-kuluƃa-ŋai paâi.

²² Zasua ŋɔkɔ kuluƃa-ŋai kɛ̀ daai sui, dí pɛ̀lɛ Eea kɔ-kuluƃa-ŋai kpɛ̂i. Eea kɔ-kuluƃa-ŋai dí gàa a gɛ́ɛ díkaa Zasua ŋɔkɔ kuluƃa-ŋai kpulu feerɛi loai. Nya ƃe Zasua ŋɔkɔ kuluƃa-ŋai dí díkelee dípàa. Dítɔnɔ kpîŋ fé lɛ̀ɛ fé lɛ̀ɛ ní.

²³ Kɛ́lɛ dí Eea kaloŋ sôŋ a vúlu dí pá la Zasua pɔ́.

²⁴ Eezuɛ kɔ-kuluƃa-ŋai kɛ́ɛ da Eea kɔ-kuluƃa-ŋai kélee páa vɛ̃ya-kpâlaŋ sui, dí pà pôlu Eea dí naa-ƃelai kélee páa.

²⁵ Dí Eea-ƃelai kélee pàa a maa ɣelei tí, sinâa da nɛyâa. Díkelee dí kɛ̀ a núu wála puu káo feerɛ (12,000).

²⁶ Kɛ́lɛ Zasua yée è lɛ̀ɛ a dɛ́ɛ ɣelei é lɛ́ɛ la zu dí Eea-ƃelai kélee páa.

²⁷ Daa-tulɛ-ŋai da zãai nɔ́ ƃé Eezuɛ-ŋai dí ziɣe a dípɔɔ yɛ̂ɛ berei Yâwɛɛ è mò la Zasua mai.

²⁸ Nya ƃe Zasua-ni dí Eea kèreŋ. Naa káa a pilêŋ ŋá é tóo sâa ŋí ma.

²⁹ Zasua è Eea kaloŋ pâa a Zɛ̂lɛŋɔɔ wúru ma é lɛ́ɛ la zu ɣele wûlii é kɛ́. Ɣele wûlii kɛ́ɛi, è mò ǹûai dîa a gɛ́ɛ dí bomai kúla ŋ̀úrii ma dí ǹáa Eea siɣãŋ lá dí kɔni pú mɛi. Ǹyaŋ gɔnii-ŋai ŋí káa tɔɔni naa é tóo sâa.

Dí Ɣâla Ŋɔtɔ̂ŋ lôno Eba Yeei ma

³⁰ Nya ƃe Zasua è ɣâla tebele tɔ̀ɔ Ibaa Yeei ma Eezuɛ Ŋɔɣâlai Yâwɛɛ mɛni ma

³¹ yɛ̂ɛ berei Yâwɛɛ yée mu-nuui Mose è mò la Eezuɛ-ŋai dîai. Dɔ̀ɔ yɛ̂ɛ berei bɔ̃yɛ̂ɛi la Mose ŋɔtɔ̂ŋ kɔlɔi su nyíi mò ǹyɛɛ, “Ƃà kɛ̀ ɣâla teƃele tɔɔ̂i ḿî, ífe gɛ̀ a kɔni nyíi kɔli pɔɔ káa mai.” Ǹaa ƃé ka pâi kɛ̂i kéreŋ sala kulâi naa, ká kɛ́ lii-sêe sama-sɛŋ tɛ̀ɛ naa Yâwɛɛ pɔ́.

³² Nya ƃe Zasua è kɔni-ƃela siɣe é Mose ŋɔtɔ̂ŋ ŋí pɔ̃yɛ ma Eezuɛ-ŋai kélee ŋɛ́i túɛ.

³³ Eezuɛ-ŋai kélee, díŋuŋ túɛ-ƃelai, díkɔ kuluƃa-ŋai láa túɛ-ƃelai, dímɛni ŋáa tée-ƃelai da ŋɔ̃ya-ŋai kɛ̀ dísamai dí díŋaa kɔ̀lɛ a núu kpûlu feerɛ. Zâla láa soŋ-ƃelai díkɛ ǹúu-kpûlu feerɛi ŋí loai dí kɛ́ lì a Yâwɛɛ ŋɔkono-têe gãlai. Ǹúu kpului dɔnɔ è kɛ̀ a bôlu féɛɛ Gɛriziŋ Yeei ma, gbélii pôlu féɛɛ Ibaa Yeei ma pere yɛ̂ɛ berei Yâwɛɛ ŋɔyée mu-nuui Mose è mò la dîa a gɛ́ɛ dí tɔ́ɔ lai dí Yâwɛɛ ŋɔlûwai sɔlɔ ƃói.

³⁴ Nya ƃe Zasua è dɔ̂ŋ-ŋai kélee lòno a ɣelêi pere ǹûai dîɛ, ǹûwa-ŋai da naɣaŋ-lâai kɛ̀ dɔ̂ŋ kɔlɔi ŋí sui.

³⁵ Zasua è Mose ŋɔtɔ̂ŋ-ŋai kélee lòno Eezuɛ-ŋai kélee dîɛ, ǹɛyâai da ǹîa-pɛlɛɛi da ŋɔ̃ya-ŋai kɛ̀ dísamai.