Zasua 4 - Bible

Dí kili-too ŋ̀á kɔni-ŋa tɔ̀ɔ

¹ Tãi Eezuɛ-ŋai kélee dí Zɔdiŋ Ya-leei tîyeŋ lai, Yâwɛɛ è mò Zasua ma ǹyɛɛi,

² “Kpakolo tɛi-tɛ́i kúla Eezuɛ-ŋai dísuu puu káo feerɛi sáma,

³ í mó dîa yɛ̂i, ‘Ka lí Zɔdiŋ Ya-leei sâmai ká kɔni tɔnɔ-tɔnɔ síɣe ƃɛ́i zâla láa soŋ-ƃelai díkɛ̀ tɔɔ̂ni naai, ká lí la ká ŋ̀áa tɛ́ ma ƃɛ́i ka pâi sâa nyîi naai.’ ”

⁴ Nya ƃe Zasua è gbakolo puu káo feerɛi tòli nyíi-ŋai kùla Eezuɛ-ŋai dísuu puu káo feerɛi sámai.

⁵ Zasua è mò dîa ǹyɛɛi, “Ka tɛɛ Káɣâlai Yâwɛɛ ŋɔkono-têe gãlai ŋɛ́i túɛ ká lí Zɔdiŋ Ya-leei sáma ká kɔni tɛi-tɛ́i síɣe naa yɛ̂ɛ berei kásuui káa lai, ká ǹáa ká kâraŋ ŋá ká pá la.

⁶ Gɔni-ŋai ŋí da pâi kɛ̂i a ŋɛi kɛ́-maa kasama tãi ká nia-pɛlɛɛi da pâi kámâre kɛ̂i la dîyɛɛi, ‘Gɔni-ŋai ŋí díkaa tɔɔni ƃɛ́ lé mɛni ma?’

⁷ Gɛ̀ ní, ka pâi m̀ôi dîa a gɛ́ɛ Zɔdiŋ Ya-leei su è tèe káperêi ká tɛ́ɛ naa lɔii kpâla ma a Yâwɛɛ ŋɔkɔno-tee gãlai. Mɛni ma, gɔni-ŋai ŋí da pâi kɛ̂i a kili-too ŋ̀á sɛŋ Eezuɛ-ŋai mɛni ma wɔ́lɔ-wɔlɔ da wɔ́lɔ-wɔlɔ.”

⁸ Yɛ̂ɛ berei Yâwɛɛ è mò la Zasua mai zinaai dí ŋ̀óo mɛni, dí gɔni puu káo feerɛi siɣe Zɔdiŋ Ya-leei sâmai dí lì a dîa dí dítɔɔ m̀ûui su.

⁹ Zasua è ŋɔ́nɔ gɛ̀ ǹûai dí kɔni pu káo feerɛ tɔ́ɔ Zɔdiŋ Ya-leei sáma ƃɛ́i zâla-laa soŋ-ƃelai kɛ lii a góno-tee gãlai, díkɛ, tɔɔni naai. Gɔni-ŋai ŋí dí lɛ̀ɛ naa é lɛ̀ɛ la zu dí gɔlɔi ŋí pɔ̃yɛ,

¹⁰ kpɛni fêi, zâla-laa soŋ-ƃelai kɛ̀ liî a gono-tee gãlai dí lɛ̀ɛ tɔɔni ǹyái sáma é lɛ́ɛ la zu m̀ɛnii kélee ŋ̀áa see é kɛ́ nyíi Yâwɛɛ è mò Zasua ma a gɛ́ɛ dí gɛ́i. Dí gɛ̀ yɛ̂ɛ berei Mose è mò la Zasua mai. Ǹûai dí Zɔdiŋ Ya-leei tîyeŋ a kîrɛ.

¹¹ Ǹûai kɛ́ɛ da ǹyái tìyeŋ, zâla láa soŋ-ƃelai dí Yâwɛɛ ŋɔkono-tee gãlai sìɣe dí tɛ́ la zîŋ ŋá ǹûai ŋɛ́i.

¹² È kɛ̀ tí, Lubiŋ da Gâa dílônii da Manasɛ ǹônii sinaai kpéli-ŋai dí tɛ̀ɛ ǹûai túɛ pere, díkpîŋ kpɛtɛ kɔ́ kɔ́ mɛni ma yɛ̂ɛ bere Mose è mò la dîai.

¹³ Ǹúu sûui ŋí su kɔkɔ́-ƃelai dí kɛ̀ a wála buu-náaŋ (40,000). Dí díkpîŋ kpɛ̀tɛ kɔ́ kɔ́ mɛni ma dí tɛ́ɛ Yâwɛɛ ŋɔkono-tee gãlai túɛ díkɛ lì díŋ-tiŋ su Zɛleko kɔlɛ ma.

¹⁴ Maa ɣêlei tí, Yâwɛɛ è ƃaa kɛ́-maa kɛ́tɛ tɛ̀ɛ Zasua pɔ́ Eezuɛ-ŋai kélee sáma. Ŋumɛ mâa kɛ́tɛ è kɛ̀ Eezuɛ-ŋai yêei Zasua mɛni ma, ŋɔkɛ-ɣéniɛi su yɛ̂ɛ berei è kɛ̀ la díyêei Mose mɛni mai.

¹⁵ Yâwɛɛ è mò Zasua ma ǹyɛɛi,

¹⁶ “M̀ó Zâla-laa soŋ-ƃelai dîa liî a gono-têe gãlai a gɛ́ɛ dí kúla ǹyái su.”

¹⁷ Nya ƃe Zasua è m̀o zâla-láa soŋ-ƃelai dîa ǹyɛɛi, “Ka kúla ǹyái su,”

¹⁸ Zâla-laa soŋ-ƃelai kɛ̀ liî a Yâwɛɛ ŋɔkono-tee gãlai kɛ́ɛ da kùla la nyái su da tɛ́ zîŋ ŋái, ǹyái è làa pôlu ǹâai, é ŋɔ́nɔ fɛ́ɛ yɛ̂ɛ berei è kɛ̀ la a bɔlɔi.

¹⁹ Ǹûai dí kùla ǹyái su a ŋ̀áloŋ maa-ŋuŋ ŋɔfólo puu ɣele, dí díƃûui pú Geega. Geega è kɛ̀ vóloi kulâi-pere pere Zɛleko kɔlɛ ma.

²⁰ Gɔni puu káo feerɛi tí ǹûai e gùla Zɔdiŋ Ya-leei sui, Zasua è dítɔ̀ɔ Geega.

²¹ Nya ƃe Zasua è mò ǹûai dîa ǹyɛɛi, “À kɛ̀ kánîa-pɛlɛɛi da tínaa tuɛ-pere dínâŋ-ni mâre kɛ́ dîɛ dîa, ‘Gɔni-ŋai ŋí díkaa lé mɛni ma?’

²² Ka m̀ó dîa kâai, ‘Eezuɛ-ŋai dí Zɔdiŋ Ya-leei tîyeŋ lɔii kpâla ma.’

²³ Kpɛ́ni fêi, Káɣâlai Yâwɛɛ è Zɔdiŋ Ya-leei kpâla kútuɛ kú tɛ́ɛ naa yɛ̂ɛ berei Yâwɛɛ è Ǹyúo Kpɔ̂lui kpàla la Eezuɛ-ŋai túɛ díkɛɛ kulâi Ize lɔii sui.

²⁴ È gɛ̀ tí a gɛ́ɛ ǹûai kélee ɣele mai dí gɔ́lɔŋ a gɛ́ɛ Yâwɛɛ wála-wâlai. È gɛ̀ tí a gɛ́ɛ ka yao ǹyaa Yâwɛɛ Káɣâlai ma wɔ́lɔ-wɔlɔ da wɔ́lɔ-wɔlɔ.”