Zasua 24 - Bible

Zasua è lòno Eezuɛ-ƃelai Sɛkɛŋ taa-leei su

¹ Zasua è Eezuɛ-ƃelai kélee tòli Sɛkɛŋ. È Eezuɛ ǹuu pɔlɔ-ŋai, ǹúu-laa túɛ-ƃelai, m̀ɛni-sâa ƃó-ƃelai, da díi kɛ́-ƃelai kélee tòli dí pá Ɣâla ŋɛ́i-tuɛ.

² È m̀o ǹûai kélee dîa ǹyɛɛi, “Yâwɛɛ, Eezuɛ Ŋɔɣâlai ǹyɛɛ, ‘Kánâŋ pɔlɔ-ŋai dí wɔ́lɔ kɛ̀ Yufeletii Ya-leei pôlu. Tera nyíi kɛ̀ a Eberaɣɛ̃ɛ da Neɔ dínâŋ díkɛ̀ tíi kɛ̂i ɣâla da kpɛ́ni-ŋa dîɛ.

³ Ŋá kánâŋ Eberaɣɛ̃ɛ kùla ǹɔii tí su ŋá gɛ́ é sía Keena lɔii gwaa kélee ma ŋá nîa-pɛlɛɛ támaa tɛ́ɛ bɔ́. Ŋá Aise tɛ̀ɛ bɔ́.

⁴ Ŋá Isɔɔ da Zeeka tɛ̀ɛ Aise pɔ́ a ǹônii. Ŋá Siɛ lɔii ǹyée lɔii su tɛ̀ɛ Isɔɔ pɔ́ a bɔ́ɔ. Kɛ́lɛ, Zeeka da ǹônii dí lí Ize.

⁵ Ŋá Mose da Eelɔŋ ni tɛ̀ɛ naa. Ŋá mɛni kpɔ̂lu làa Ize-ŋai dîa a m̀ɛni-ŋai ŋá gɛ̀ dísamai. Ǹaa pôlu ma, ŋá kákùla naa ŋá pá a káa pôlu.

⁶ Ŋá kánâŋ-ni kùla Ize, dí pá yúo ma. Ize-ŋai dí lɛ̀ɛ kánâŋ-ni pôlu díkɛ ƃò soo-sia kêleŋ-ŋa su da kɔ-kûluƃa-ŋa kɛ́ ƃò soo-ŋa mɛi é lɛ́ɛ la zu dí seri Ǹyúo Kpɔ̂lui ma.

⁷ Dí wɔ̀lɔ Yâwɛɛ ḿâ, ŋá kpíni tóo káloai ka Ize-ƃelai. Ŋá gɛ̀ ǹyái é pá gîe ma é Ize-ŋai mɛi pɛ́lɛ. Ká m̀ɛni-ŋai kâa ŋá gɛ̀ a Ize-ŋai. “ ‘Ká gɛ̀ vɛ̃ɛ-kpâlaŋ su a zu kôyaa.

⁸ Ŋá pà a káa Amora-ŋai dílɔii su Zɔdiŋ Ya-leei m̀élai nyíti ma. Dí kɔ́ pɛ̀lɛ kâa, kɛ́lɛ ŋá dítɛ̀ɛ kápɔ ká díyee mɛi ɣále, ká dílɔii sîɣe a kápɔɔ. Ŋá dípâa ŋá díkula káŋɛi-tuɛ ká kɛ́ɛ pâi dîai.

⁹ Môa Kaloŋ Balaa kɛ̀ a Zifɔ ǹóŋ è kɔ́ pɛ̀lɛ Eezuɛ ma. È Beɔ ǹóŋ Balaaŋ tòli a gɛ́ɛ é kánaɣaŋ láa,

¹⁰ kɛ́lɛ ḿve ŋ́oli tɔɔ ní Balaaŋ ma. Ŋá gɛ̀ è lûwa tòo kâa. Berei sîi ŋí su, ŋá káŋuŋ ma ƃò, ƃò Balaaŋ yêei.

¹¹ Ká Zɔdiŋ Ya-leei tîyeŋ ká pá Zɛleko. Zɛleko-ƃelai, Amora-ŋai, Pɛriza-ŋai, Keena-ŋai, Ita-ŋai, Gɛga-ŋai, Iva-ŋai da Zɛbusa-ŋai dí kɔ́ pɛ̀lɛ kâa. Kɛ́lɛ, ŋá gɛ̀ káyee é tɛ́ɛ dîa.

¹² Kákɛɛ kɛ̀ lɛɣɛ̂i a diai, ŋá gɛ̀ Amora kaloŋ feerɛi kɛ̀ ká túɛ perei dí yao dí pú dí kúla kátuɛ. Káa fé m̀ɛnii ŋí kɛ́ ní a káƃoa-sɔ̂kpɔi, kpaa máŋ a kákerâŋ.

¹³ Ŋá lɔii tɛ̂ɛ kápɔ nyíi káfe m̀aa kôlo ƃó nii. Ŋá taa lêe-ŋa tɛ̀ɛ kápɔ nyíi-ŋai káfe dítɔɔ ní, kɛ́lɛ ká káa sâa naai. Ká kpɔmɔ-ƃa mìi da ɔle nyíi-ŋai káfe dísi nii.’

¹⁴ “M̀ɛni ma, ká ƃaa kɛ́-maa tɛ́ɛ Yâwɛɛ pɔ́, ká tíi kɛ́ mì a tɔ̃yâ-laa da teniŋ ƃô pere. Ka kápôlu tɔɔ ŋ̀âla-ŋai kánâŋ pɔlɔ-ŋai da kâa kɛ̀ dífɛlîi Mɛsɛpotemia da Ize lɔii sui dîa. Ká tíi kɛ́ Yâwɛɛ mì.

¹⁵ À kɛ̀ káfe ŋ̀wɛ̂lii a gɛ́ɛ ká tíi kɛ́ Yâwɛɛ mì, ka sâa ǹúui lɛ́ nyíi ka pâi kɛ̂i tíi kɛ̂i m̀ii. À kɛ̀ kà pâi tíi kɛ̂i ŋ̀âla-ŋai kánûai díkɛ̀ dífɛlîi dîɛ Mɛsɛpotemia kpiniŋ sui, kpaa máŋ Amora-ŋai díɣâla-ŋai nyíi-ŋai kákaa dílɔii sui, ka m̀ó ḿâ. Kɛ́lɛ, mɛni a kpera ḿâ, kwa ŋá ǹûai, kwa pâi tíi kɛ̂i Yâwɛɛ mì.”

¹⁶ Nya ƃe ǹûai dí zu tòo dîyɛɛi, “É folôŋ kûa a gɛ́ɛ kú kúpôlu tɔ̀ɔ Yâwɛɛ ma, kúkɛ tíi kɛ́ ɣâla da kpɛ́ni-ŋa dîɛ,

¹⁷ kpɛ́ni fêi, Kúɣâlai Yâwɛɛ ƃé kúnâŋ pɔlɔ-ŋai kûla Ize lɔii su ǹuɛ-laai su é ŋɛi kɛ́-maa támaa kɛ́ kúŋɛi. È kúmɛi kâa kúkɛɛ tɛɛ̂i ǹɔii-ŋûŋ-ŋai sámai.

¹⁸ Kúkɛɛ kɛ̀ pâi, Yâwɛɛ è ǹɔii-ŋûŋ-ŋai kpɛ̀ kúperêi da Amora-ŋai nyíi-ŋai kɛ́ ǹɔii su kúkɛ pà naai. M̀ɛni ma, kwa pâi tíi kɛ̂i Yâwɛɛ mì, kpɛ́ni fêi, ǹyaa ƃé gáa a Kúɣâlai.”

¹⁹ Kɛ́lɛ, Zasua è m̀o ǹûai dîa ǹyɛɛi, “Káfa pɔ̂ri Yâwɛɛ fɛlîi, kpɛ́ni fêi, gáa a Ɣâla nyíi m̀aa waai, gɛ́ ƃò a tólo Ɣala. Vé pâi kásu mɛ̂ni lɛɛ̂i kátua pere nyɔ̂ŋ-ŋai mɛni ma, kpaa kásɔnyɔ̂ŋ-ŋai mɛ̂ni ma.

²⁰ À kɛ̀ ka kápôlu tɔ̀ɔ Yâwɛɛ ma, ká tíi kɛ́ ɣâla da kpɛ́ni-ŋa dîɛ, a pâi tínanîi é kákula maa kɛ́, é kápaa, berei máŋ è mɛni lɛ́lɛɛ kɛ̀ la kâai.”

²¹ Ǹûai dí Zasua wóo su tòo dîyɛɛ m̀a, “Kpao, kɛ́lɛ kwa pâi tíi kɛ̂i Yâwɛɛ mì.”

²² Zasua è m̀o ǹûai dîa ǹyɛɛi, “Káa ƃa kákpîŋ sere-ŋa a gɛ́ɛ kaâ fáa ma a gɛ́ɛ kákɛ tíi kɛ̀ Yâwɛɛ mì.” Dí m̀o mà dîyɛɛi, “Óoei, kúkaa a sêre-ŋa.”

²³ È m̀o dîa ǹyɛɛi, “Gɛ̀ ní ka káyee kúla ŋ̀âla da kpɛ́ni-ŋai díkaa kásamai fɛli mɛ̂ni mu, ká káyee sée Eezuɛ Ŋɔɣâlai Yâwɛɛ mu.”

²⁴ Ǹûai dí Zasua wóo su tòo dîyɛɛi, “Kúɣâlai Yâwɛɛ nɔ́ ƃé kwa pâi tíi kɛ̂i mì, kú ŋ̀óo ŋ̀aa-see kɛ́.”

²⁵ Zasua è kpanaŋ-wôo kɛ̀ ǹûai yêei a m̀aa ɣelei tí. É dɔ̂ŋ da mɛni tɔ̂ŋ da kpɛ́ni-ŋa tɛ̀ɛ dípɔ Sɛkɛŋ.

²⁶ Zasua è ŋ́oo-ŋai ŋí pɔ̃yɛ Ɣâla ŋɔtɔ̂ŋ kɔlɔi su. Nya ƃe è kɔni kɛ́tɛ tɔ̂nɔ sìɣe é ǹáa naa ôo wurui mu Yâwɛɛ ŋɔpɛ́rɛi kɔlɛ.

²⁷ Nya ƃe Zasua è m̀o ǹûai dîa ǹyɛɛi, “Gɔnii ŋí a pâi kɛ̂i a sêre kúmɛni mà, kpɛ́ni fêi, aâ m̀ɛni-ŋai kélee mɛ́ni Yâwɛɛ è m̀o kûai. M̀ɛni ma a pâi kɛ̂i a sêre kámɛ̂ni ma káfa la tûa la a Káɣâlai a lɛ́ɛ pere.”

²⁸ Nya ƃe Zasua è ǹûai kélee tɛ̀ɛ dípɛrɛ-ŋai lá tɛi-tɛi.

Zasua da Elieza saa mɛ̂ni

²⁹ M̀ɛni-ŋai ŋí pôlu ma, Zasua nyíi kɛ̀ a Yâwɛɛ ŋɔtíi kɛ́-nuui è sàa. È kɛ̀ ɣele ma a kóraŋ ŋuŋ-tɔ̂nɔ pôlu puu (110).

³⁰ Nya ƃe Eezuɛ-ƃelai dí ǹoo gbɔ́ɔi lɔii ma Tiŋna-sera nyíi gáa ǹyée lɔii su Ifiraŋ ŋɔlɔii ma. Gwaai ŋí ma káa Gaasa Yeei ŋɔyá-ŋûa-pere.

³¹ Zasua kɛ́ɛ ɣele mai, Eezuɛ-ŋai kélee díkɛ̀ nɔ́ tíi kɛ̂i Yâwɛɛ mì. Zaá pôlu ma, ǹûai dí kɛ̀ nɔ́ niî tíi kɛ̂i Yâwɛɛ mì tãi ǹûai kɛ̀ a díi-ŋai kɔ́lɔŋɔɔ Yâwɛɛ è gɛ̀ Eezuɛ-ŋai dîɛi, dí kɛ̀ nîi la ɣele mai.

³² Eezuɛ-ŋai kɛ́ɛ kulâi Ize lɔii sui, dí pà a Zosɛ káo. Dí lì la dí ǹoo Sɛkɛŋ taa-leei su. Dí ǹoo naa ǹɔii kpûai ma Zeeka è wɔ́lɔ ǹya Amɔ ǹóŋ Sɛkɛŋ yêei a sɛŋ-káo kpua-kpua ŋuŋ-tɔnɔi (100). Gwaai ŋí ma è nâa kɛ̀ a Zosɛ ŋɔsuui su-ƃelai kɔ̃̂liŋ.

³³ Eelɔŋ ǹóŋ Elieza kɛ́ɛ a saai, dí ǹoo ǹóŋ Finea ŋɔtaai su nyíi da dòli a Giƃia Ifiraŋ ǹyée lɔii ma.