Zasua 23 - Bible

Zasua ŋɔlaa-ti maa wooi gbɛɛ ŋái

¹ Tãi su-kôyaa tɛɛ́ pôlu ma, Yâwɛɛ è gɛ̀ Eezuɛ-ŋai díkɛ ƃò ŋɔ́nɔ lii-sêe su. Tãi ŋí yée mu, Zasua è nâa kɛ̀ a bɔlɔɔ kpɔ́ a ŋ̀ánaa.

² È Eezuɛ-ƃelai kélee tòli, ǹɔii mɛi-ƃela kpaya-kpayai, ǹúu-láa túɛ-ƃelai, m̀ɛni-sâa ƃó-ƃelai da díi kɛ́-ƃelai kɛ̀ ǹûai sámai ǹyɛɛ dîa, “Ŋa nâa pɔ̀lɔ.

³ Ká m̀ɛni-ŋai kélee naa kàa Káɣâlai Yâwɛɛ è gɛ̀ a ǹɔii-ŋûŋ-ŋai dítinaŋɔɔ̂i kâai kámɛni ma. È kɛ̀ kɔ̂i kámɛni ma.

⁴ Ǹɔii ŋá gùla lɔii-ŋuŋ-ŋa yée mɛi ɣáleɛɛ sarâi da nyíi-ŋai fé nîi dí kula yêei kɛ́ níi, ŋá dí ŋáa kɔ̀lɛ ká núu-suu-ŋai dîa a díkɔ̃liŋ, é síɣe vóloi kulâi-pere Zɔdiŋ Ya-leei ma é tóo Mɛditɛrenia Yuoi ma nyíi gáa vóloi liî-perei.

⁵ Káɣâlai Yâwɛɛ ǹyaa kpîŋ a pâi gɛ̂i dípu káyêei. A pâi díkpɛ̂i káŋɛi túɛ kà kɛ̀ lɛɣɛ̂i a dia. Ka pâi dílɔii kulâi díyêei yɛ̂ɛ berei Káɣâlai Yâwɛɛ è góno tèe la káyêei.

⁶ M̀ɛni ma, ka tɔɔ a gbanaŋɔɔ, ká kámɛi káa, ká m̀ɛni-ŋai díkaa Mose Ŋɔtɔ̂ŋ kɔlɔi sui díwoo ŋ̀aa-see kɛ́. Káfe kápôlu tɔ̀ɔ ma kátinaŋ kɔɔ-yêe kpaa máŋ làa-mii yêe mɛi pere.

⁷ Ǹɔii-ŋuŋ-ŋai lɛ̂ɛ kákɔlɛ mai, káfe da ŋɔɣâla-ŋai da fɛ̀li, kpaa máŋ ká káfoo a díɣâla-ŋai da láa. Da dîa-ni káfe kɛ̀ loai-laa su.

⁸ Kɛ́lɛ, ka Káɣâlai Yâwɛɛ fɛli a teniŋ ƃô pere yɛ̂ɛ berei ka lɛ̂ɛ gɛ̂i la a seri sâa mai.

⁹ Yâwɛɛ è lɔii-ŋuŋ kpaya-kpaya wála-wâlaa-ŋa kpɛ̀ káŋɛi túɛ, ǹyaŋ díta fé pɔri ní kɛ̀ tɔɔ̂i káŋɛ́i túɛ.

¹⁰ Katɔ̂nɔ da a pɔ̂ri gɛ̂i núu wála tɔnɔ (1,000) é pú, kpɛ́ni fei, Káɣâlai Yâwɛɛ a pâi kɛ̂i kɔ̂i kámɛni ma yɛ̂ɛ berei è góno tèe lai.

¹¹ M̀ɛni ma, ka kámɛi káa ká Káɣâlai Yâwɛɛ wɛ́li.

¹² À kɛ̀ káfe tûa ní a teniŋ ƃô pere, ká ǹɔii-ŋûŋ-ŋai kákaa zui zu-ƃela tûa pere siɣe, ka dîa-ni kákɛ nɛyâa kula kákîe-ni loai,

¹³ gɛ̀ ní é lɛ́ɛ kákili ŋá a gɛ́ɛ Káɣâlai Yâwɛɛ fé pâi ǹɔii-ŋûŋ-ŋai ŋí kpɛ̂i káŋɛi túɛ kà kɛ̀ lɛɣɛ̂i a dia. Kɛ́lɛ, da pâi kɛ̂i a ƃáre-ŋa kpaa máŋ a lóa kpôŋ kôyaa-ŋa kámɛni ma da sɛŋ-sôli maa kɛ́ɛ yɛ̂ɛ fáa ƃé da núu lôkwai la bôlu, kpaa máŋ yɛ̂ɛ ɣalêŋ a kɛ̀ núu ŋɛ́i kámaa mɛ̂ni ma. Ǹyaŋ m̀ɛnii ŋí a pâi lɛɛ̂i kɛ̂i a káa é lɛ́ɛ la zu sáa kátɔ̂nɔ da fa pɔ̂ri sêei ǹɔii lɛ́lɛɛi ŋí ma nyii Káɣâlai Yâwɛɛ è wɔ́lɔ dɛ̀ɛ kápɔi.

¹⁴ “Ńzaa tãi a seri. Kákelee ká gɔ́lɔŋ kálii da kámɔ̃leŋ su a gɛ́ɛ m̀ɛni-ŋai Káɣâlai Yâwɛɛ è góno-tee a gɛ́ɛ a pâi gɛ̂i, a gélee ŋ̀aa-see kɛ́. Dɔnɔ kpîŋ fé lɛɛ ní pôlu.

¹⁵ Berei nɔ́ a ŋɔkono têei-ŋai kélee ŋ̀aa-see kɛ́ lai, bere nɔ́ ƃé ŋ̀ɛ́i káa la kâa a gɛ́ɛ ká m̀ɛni-ŋai kélee a mò kâai, ŋ̀aa-see kɛ́ la. À wàla kɛ́ tí, a pâi kákula maa kɛ̂i yɛ̂ɛ berei è mò lai.

¹⁶ À kɛ̀ kà wàla Káɣâlai Yâwɛɛ ŋɔkpanaŋ-wooi ŋ̀aa-see kɛ́, ká kɛ́ ɣâla da kpɛ́ni-ŋa fɛ̀li, a pâi ǹíi ŋwânai é kákula maa kɛ́. À kɛ̀ tí, gɛ̀ ní kátɔ̂nɔ da kpîŋ fé pâi lɛɛ̂i ǹɔii lɛ́lɛɛi ŋí ma è dɛ̀ɛ kápɔi.”