Zasua 21 - Bible

Eezuɛ-ŋai dí taa-lêe-ŋa tɛ̀ɛ Liiva-ŋai pɔ́

^1-2 Eezuɛ-ŋai dí díƃûui pù Silo taa-leei su Keena lɔii su. Díkɛɛ naai, Liiva-ŋai láa túɛ-ƃelai dí lì zâla láa soŋ-nuui Elieza, Nuŋ ǹóŋ Zasua da Eezuɛ suui su-ƃelai láa túɛ-ƃelai pɔ́ naa dîɛ dîai, “Yâwɛɛ è mò Mose ma a gɛ́ɛ é taa lêe-ŋa tɛɛ kúpɔ da kútaa tulɛ-ŋai láa mii kwa ma.”

³ Nya ƃe Eezuɛ-ŋai dí gɛ̀ yɛ̂ɛ berei Yâwɛɛ è mò la Mose mai. Dí daa lêe-ŋai ŋí tɛ̀ɛ Liiva-ŋai pɔ́ da dítaa tulɛ-ŋai láa mii kwaa ma.

⁴ Dí ŋ̀áa kɔ̀lɛ dîa kpɛɛŋ toɔ́ɔ su. Gbɛɛŋ m̀aa ŋuŋ è ǹɛ̃ɛ Koɣa suui su-ƃelai dîa nyíi-ŋai kɛ̀ a zâla láa soŋ-ƃelai kùla Eelɔŋ ŋɔsuui sui. Dí taa puu káo saaƃa tɛ̀ɛ dípɔ nyíi-ŋai kɛ̀ Zuda, Simiɔŋ da Bɛŋsima-ni dílɔii kpîniŋ sui.

⁵ Ǹaa pôlu ma Koɣa ŋɔsuui su-ƃelai gbéli-ŋai dítaa lêe puu sɔlɔ ƃô Ifiraŋ, Daŋ da Manasɛ-ni dílɔii kpîniŋ su.

⁶ Dí taa-lêe puu káo saaƃa tɛ̀ɛ Gesɛŋ ŋɔsuui su-ƃelai pɔ́. Daa lêe-ŋai ŋí dí kɛ̀ Isaka, Asɛ, Nɛfɛtɛli da Manasɛ-ni dílɔii kpîniŋ su Basãŋ lɔii ma.

⁷ Melali suui su-ƃelai díwɔ̂ taa lee-ŋai dí kɛ̀ puu káo feerɛ. Daa lêe-ŋai ŋí dí kɛ̀ Lubiŋ, Gâa da Zɛbulɔŋ-ni dí lɔii kpîniŋ su.

⁸ Eezuɛ-ŋai dí daa lêe-ŋai ŋí tɛ̀ɛ Liiva-ŋa pɔ́ da dítaa tûlɛ-ŋai láa mii kwaa ma. Dí dɛ̀ɛ dípɔ kpɛɛŋ tóɔɔ su yɛ̂ɛ berei Yâwɛɛ è mò la Mose mai.

⁹ Dí daa lêe-ŋai ŋí tɛ̀ɛ Liiva-ŋai pɔ́ Zuda da Simiɔŋ-ni dílɔii su.

¹⁰ Dí daa lêe-ŋai ŋí kélee tɛ̀ɛ zâla láa-soŋ-nuui Eelɔŋ ǹônii pɔ́ nyíi-ŋai kɛ̀ a Liiva-ŋai kùla Koɣa lɔii-kpiniŋ sui, kpɛ́ni fêi, dia ƃé gbɛɛŋ m̀aa-ŋuŋ è ǹɛ̃ɛ dîa.

¹¹ Dí Kiria Aba taai tɛ̀ɛ dípɔ nyíi da ǹáa tòli máŋ a Iburɔŋ da dítaa tûlɛ-ŋai láa mii kwaa ma ǹyée lɔii su Zuda lɔii kpiniŋ su. (Aba è kɛ̀ a Ana ǹâŋ.)

¹² Kɛ́lɛ ǹɔii daa-lêei ŋí è kɛ̀ mai, da ǹaa kɔlɛ ma kpanaŋ-ŋai, dí kɛ̀ a Zefune ǹóŋ-surɔŋ Kelɛ pɔ́ɔ.

¹³ Eelɔŋ nyíi kɛ̀ a zâla láa soŋ-nuui ŋɔsuui su-ƃelai diaŋ díwɔ̂ taa lee-ŋai láa ká ŋí: Iburɔŋ nyíi kɛ̀ a maa kɔ̃̂ɔ taa-leei dɔnɔi da taa-tûlɛ láa mii kwaa-ŋa mai, Lina da taa-tûlɛ-ŋa láa mii kwaa-ŋa ma,

¹⁴ Zati da taa-tûlɛ-ŋa láa mii kwaa-ŋa ma, Ɛsitemoa da taa-tûlɛ-ŋa láa mii kwaa-ŋa ma,

¹⁵ Olɔŋ da taa-tûlɛ-ŋa láa mii kwaa-ŋa ma, Dibɛ da taa-tûlɛ-ŋa láa mii kwaa ma,

¹⁶ Aiŋ da taa-tûlɛ-ŋa láa mii kwaa-ŋa ma, Zuta da taa-tûlɛ-ŋa láa mii kwaa-ŋa ma, Bɛ-simɛ da taa-tûlɛ-ŋa láa mii kwaa-ŋa ma. Dí daa lêe-ŋai ŋí tɛ̀ɛ dípɔ da dítaa tûlɛ-ŋai láa mii kwaa-ŋai ma. Daa-lêe-ŋai ŋí díkɛ̀ a taa-lêe lɔ́ɔlu mɛi náaŋ nyíi-ŋai kɛ̀ Zuda da Simiɔŋ-ni dílɔii mai.

¹⁷ Dí daa lêe-ŋai ŋí tɛ̀ɛ Liiva-ŋai pɔ́ da taa-tûlɛ-ŋa láa mii kwaa ma Bɛŋsima ŋɔlɔii ma: Gebiyɔŋ, Geƃa,

¹⁸ Anatɔ da Amɔŋ. Díkɛ̀ a taa-lêe náaŋ.

¹⁹ Daai kélee dí dɛ̀ɛ Liiva-ŋai pɔ́ kùla Eelɔŋ ŋɔsuui sui, è kɛ̀ a taa-lêe puu káo saaƃa da dítaa tûlɛ-ŋai láa mii kwa ma.

²⁰ Dí Ifiraŋ ŋɔlɔii ma taa lee-ŋai da tɛ̀ɛ Liiva-ŋai pɔ́ nyíi-ŋai kùla Koɣa ŋɔsuui sui.

^21-22 Dí daa-lêe náaŋ ŋí tɛ̀ɛ dípɔ: Sɛkɛŋ nyíi kɛ̀ a maa kɔ̃̂ɔ taa-leei dɔnɔi, Ifiraŋ yee lɔii-kpiniŋ su, Gezɛ, Kibezaiŋ da Bɛorɔŋ taa-lee da dítaa tûlɛ-ŋai láa mii kwaa-ŋa ma.

²³ Daa lêe-ŋai dí dɛ̀ɛ Liiva-ŋai pɔ́ é kúla Daŋ ŋɔsîi su-ƃelai dílɔii sui ƃa: Ɛteke, Giƃetɔ̃ŋ,

²⁴ Aizalɔŋ, Ga-rimɔŋ da taa-tûlɛ-ŋa láa mii kwaa-ŋa ma. Daa-lêe-ŋai ŋí dí kɛ̀ a taa-lêe náaŋ.

²⁵ Dí daa lêe-ŋai ŋí kùla Manasɛ ŋɔsuui kpéli ŋɔlɔii ma dí dɛɛ Liiva-ŋa pɔ́, nyíi-ŋai kɛ̀ Zɔdiŋ Ya-leei pôlu vóloi liî-perei. Daa lêe-ŋai ƃa: Taana da Gɛrimɔŋ da dí taa-tûlɛ-ŋa láa mii kwaa ma. Díkɛ̀ a taa-lêe feerɛ.

²⁶ Daai kélee dí dɛ̀ɛ Liiva-ŋai pɔ́ nyíi-ŋai kùla Koɣa ŋɔsuui sui, è kɛ̀ a taa-lêe puu. Dí daa lêe-ŋai ŋí tɛ̀ɛ dípɔ da dítaa tûlɛ-ŋai láa mii kwaa ma.

²⁷ Dí taa-lêe feerɛ tɛ̀ɛ Liiva-ŋai pɔ́ nyíi-ŋai kùla Gesɛŋ ŋɔsuui su Manasɛ ŋɔlɔii ma. Daa lêe-ŋai ŋí dí kɛ̀ Manasɛ ŋɔsuui su-ƃelai dílɔii ma nyíi-ŋai kɛ̀ Zɔdiŋ Ya-leei kɔlɛ vóloi kulâi-perei. Dia ƃé kɛ̀ a Golaŋ nyíi kɛ̀ Basãŋ kpiniŋ sui, gɛ́ ƃò ŋɔ́nɔ a m̀aa kɔ̃̂ɔ taa-leei dɔnɔ da Bɛ-esitera. Dí daa lêe-ŋai ŋí tɛ̀ɛ dípɔ da dítaa tûlɛ-ŋai láa mii kwaa ma.

²⁸ Dí daa lêe-ŋai ŋí tɛ̀ɛ máŋ dípɔ Isaka sii ŋɔlɔii ma. Dia ƃa: Kesiyɔŋ, Dabɛra,

²⁹ Zamu da Eganiŋ. Dí daa lêe-ŋai ŋí tɛ̀ɛ dípɔ da dítaa tûlɛ-ŋai láa mii kwaa ma. Díkɛ̀ a taa-lêe náaŋ.

³⁰ Daa lêe-ŋai dí dɛ̀ɛ dípɔ Asɛ sii ŋɔlɔii mai dia ƃa: Masa, Abidɔŋ,

³¹ Ɛɛka da Leeo. Dí daa lee-ŋai ŋí tɛ̀ɛ dípɔ da dítaa tûlɛ-ŋai láa mii kwaa ma. Díkɛ̀ a taa-lêe náaŋ.

³² Dí daa lêe-ŋai ŋí tɛ̀ɛ dípɔ da dítaa tûlɛ-ŋai láa mii kwaa ma Nɛfɛtɛli ŋɔlɔii ma: Kedɛ nyíi kɛ̀ a m̀aa kɔ̃ɔ taa-leei dɔnɔ Galalii kpiniŋ sui, Amɔdɔ da Kataŋ. Díkɛ̀ a taa-lêe saaƃa.

³³ Daai kélee dí dɛ̀ɛ Liiva-ŋai pɔ́ kùla Gɛsɛŋ suui sui da-ŋa dílɔii sui è kɛ̀ a taa-lee puu káo saaƃa. Dí ǹɔii ŋí tɛ̀ɛ dípɔ da dítaa tûlɛ-ŋai láa mii kwaa ma.

³⁴ Dí taa-lêe puu káo feerɛ tɛ̀ɛ máŋ Liiva-ŋai gbéli-ŋai pɔ́ kùla Melali suui sui. Dí daa-lêe náaŋ ŋí tɛ̀ɛ dípɔ Zɛbulɔŋ ŋɔlɔii ma. Dia ƃa: Zoniaŋ, Kata,

³⁵ Dina da Naala. Dí daa-lêe náaŋ ŋí tɛ̀ɛ dípɔ da dítaa tûlɛ-ŋai láa mii kwaa ma.

³⁶ Daa-lêe náaŋ kùla Lubiŋ sii ŋɔlɔii mai ƃa: Bezɛ, Zaa,

³⁷ Kedemɔ da Mɛfea. Dí daa lêe-ŋai ŋí tɛ̀ɛ dípɔ da dítaa tûlɛ-ŋai láa mii kwaa ma.

³⁸ Daa-lêe náaŋ kɛ̀ Gâa ŋɔlɔii mai, m̀aa taa lêe-ŋai láa ƃa Lemɔ nyíi kɛ̀ Gilia sii lɔii-kpiniŋ sui, gɛ́ ƃò máŋ a m̀aa kɔ̃̂ɔ taa-leei dɔnɔi, Maanaiŋ,

³⁹ Ɛsibɔŋ da Zaazɛ. Dí daa lêe-ŋai ŋí tɛ̀ɛ dípɔ da dítaa tûlɛ-ŋai láa mii kwaa ma.

⁴⁰ Daa lêe-ŋai ká tí dí dɛ̀ɛ Liiva-ŋai pɔ́ kùla Melali ŋɔsuui su-ƃela kpɛ́-kpɛ̂ɛ-ŋa pɔ́i. Dí daa-lêe puu káo feerɛi ŋí tɛ̀ɛ dípɔ da dítaa tûlɛ-ŋai láa mii kwaa ma.

⁴¹ Daai kélee Eezuɛ-ŋai dí dɛ̀ɛ Liiva-ŋai pɔ́, dí kɛ̀ a taa-lêe buu náaŋ káo lɔ́ɔlu mɛi saaƃa.

⁴² Dí dɛ̀ɛ dípɔ da dítaa tûlɛ-ŋai láa mii kwa ma.

Eezuɛ-ŋai dí sèe Keena lɔii ma

⁴³ Berei ŋí ƃé Yâwɛɛ è Keena lɔii kélee tɛ̀ɛ la Eezuɛ-ŋai pɔ́ yɛ̂ɛ berei è góno tèe la dínâŋ-ni yêei. Dí nâa gwaai kélee sìɣe dí sée naa.

⁴⁴ Yâwɛɛ è gɛ̀ Eezuɛ-ŋai díkɛ ƃò lii-sêe su Keena lɔii gwaa kélee yɛ̂ɛ berei è góno tèe la dínâŋ-ni yêei. È gɛ̀ díkpɔara-ƃelai da fé wɔ́lɔ díyee mɛi ɣále ní.

⁴⁵ Yâwɛɛ è ŋɔkono têe-ŋai kélee ŋàa sèe kɛ̀ Eezuɛ-ŋai yêei. Vé dɔnɔ kpîŋ lɛ̀ɛ ní pôlu.