Zasua 2 - Bible

Zasua è mɛni maa kpɛɛ-ƃela tɛ̀ɛ Zɛleko

¹ Nya ƃe Nuŋ ǹóŋ Zasua è mɛni maa kpɛɛ kpakolo feerɛ tɛ̀ɛ loo-pêre su dí kúla Akesia ƃɛ́i díƃûui è kɛ̀ naai, ǹyɛɛ dîai, “Ka lí ká Keena lɔii maa kpɛ́ɛ, ŋuŋ kpîŋ ƃa Zɛleko taa-leei.” Nya ƃe dí lì. Dí seriɛɛ naai, dí lɔ̀ wulu-wulu kɛ́ nɛni tɔnɔ ŋɔpɛ́rɛi mu dí nyíi naa. Ǹɛniî ŋí láa ƃé a Leea.

² Maa kpînii tí nɔ́ ƃé Zɛleko kaloŋ é mɛ̀ni la a gɛ́ɛ Eezuɛ-ŋai da-ni dí káa daa lêei su a gɛ́ɛ dí ǹɔii maa kpɛ́ɛ.

³ Nya ƃe gâloŋ è nɔii kpɛ́-ƃelai da-ŋa tɛ̀ɛ Leea pɔ́ naa dîyɛ mai, “Gbakolo feerɛi díkaa ípɛrɛi mui, dí tɛ́ɛ, kpɛ́ni fei, dí pà a gɛ́ɛ dí ǹɔii gwaa kélee maa kpɛ́ɛ.”

⁴ Kɛ́lɛ ǹɛniî è gbakolo feerɛi lòo. Nya ƃe è mò dîa ǹyɛɛi, “Tɔ̃yâ ma, kpakolo feerɛ dí pà ḿbɔ, kɛ́lɛ fé ƃɛ́i kɔ́lɔŋ dí kùla naai.

⁵ Ǹyaŋ dílɛɛ pâi daa-lêei ŋɔsiɣãŋ láa tɛ̂i a ŋ̀ele wûlii, dífeerɛ dí kùla bɛ́rɛi mu. Kɛ́lɛ fé ƃɛ́i kɔ́lɔŋ dí lì naai. Kà lɛ̀ɛ dípôlu a maa félaa, ka pâi dísoniî.”

⁶ Ǹɛniî è nâa gbakolo feerɛi lòo ŋɔpɛ́rɛi ŋ̀elêi pere ǹyaa kpîŋ é kala pù dímɛi.

⁷ Nya ƃe gâloŋ ŋɔnûai dí pɛ̀lɛ m̀ɛni maa kpɛɛ-ƃela feerɛi ŋí kpɛ́ɛ ma é lɛ́ɛ la zu dí seri Zɔdiŋ Ya-leei lá. Ǹûai ŋí dí kùla kpɔ́ nɔ́ daai su, dí gónaŋ lá tɛ̀.

⁸ Tãi m̀ɛni maa kpɛ́ɛ kpakolo feerɛi ŋí dí kɛ̀ lâani lai, Leea è ŋɔ́nɔ lì bɛ́rɛi ŋ̀elêi pere ƃɛ́i è dí lòo naai,

⁹ ǹyɛɛ dîai, “Ŋá gɔ́lɔŋ a gɛ́ɛ Yâwɛɛ a ǹɔii ŋí tɛ́ɛ kápɔ. Kámaa tûŋ a seri kûa ǹyaŋ kúkelee kúkaa nâa yaôi kâa,

¹⁰ kpɛ́ni fêi, kú mɛ̀ni berei Yâwɛɛ è ǹyái kpàla la kátuɛ kákɛɛ kulâi Ize lɔii sui. Kú ŋɔ́nɔ mɛ̀ni berei ká Siɔŋ da Oŋ pàa la da diai kɛ̀ a Amɔra-ŋai díkâloŋ feerɛi Zɔdiŋ Ya-leei pôlu da berei ŋɔ́nɔ ká nàa-ƃelai pâa lai.

¹¹ M̀ɛ̀nii ŋí mɛniɛɛ kûɛi, kú yào kpɔ́ a ŋ̀ánaa. Berei kú kátuŋ mɛ̀ni lai, lii kpêle fé kɛ́ ní núu da kélee yêei ŋɔ́nɔ, kpɛ́ni fêi, Yâwɛɛ Káɣâlai ƃa Ŋ̀âlai gáa ŋ̀elei su da ǹɔii mɛi.

¹² M̀ɛni ma, ka kákono tée ńyêei Yâwɛɛ láai su a gɛ́ɛ berei ŋá kásòŋ la a ǹɛ́lɛɛi, káa máŋ ka pâi ńzoniî tí a ǹɛ́lɛɛ kwa ŋápɛrɛi mu-ƃelai. Ka ŋɛi kɛ́-maa sɛŋ-lɛɛ ńyêei.

¹³ Ka kákono tée a gɛ́ɛ kà pà, káfe pâi ńâŋ, ńee, ńzaaƃɔlɔ-sinaai, ńêɣe da ńîa ǹɛyâai da dípɛrɛi mu-ƃelai kélee da paâi. Ǹyaŋ ka pâi kúŋuŋ ma ƃôi.”

¹⁴ Nya ƃe Zinâai dí mò mà dîyɛɛi, “À kɛ̀ ƃa wàla m̀ɛnii ŋí da ƃó núu da ma a gɛ́ɛ kú pà ǹɔii ŋí maa kpɛɛ̂i, kwa pâi tûai a yá a ǹɛ́lɛɛ à kɛ̀ Yâwɛɛ a ǹɔii ŋí tɛ̀ɛ kúpɔ, kwa wàla gɛ́ tí, gɛ̀ ní Ɣâla é kúpaa”

¹⁵ Nya ƃe Leea è ɣɛli kpûlɔŋ wônai lá a gɛ́ɛ ǹûai dí yéŋ la galai pôlu pere, kpɛ́ni fêi, Leea ŋɔpɛ́rɛi è kɛ̀ galai kpono ma.

¹⁶ Nya ƃe è mò dîa ǹyɛɛi, “Ka lí ǹyéei su ka káloo naa fólo saaƃa yée mu, ka kásoŋ-ƃelai ká fa lâa koyɛ̂ŋ la. À kɛ̀ kásoŋ-ƃelai da pà pôlu, gɛ̀ ní ka lí pôlu káƃûui su.”

¹⁷ Ǹûai dí mò ma dîyɛɛi, “Kwa pâi gono têei ŋí ŋ̀aa-see kɛ̂i nyíi ƃa gɛ́ kwa kúfoo la íyêei.

¹⁸ Ƃɛ́ káa, tãi kwa pâi pâi la a gɔ́i ǹɔii ŋí sui, ŋ̀ɛli kpɔ̂lui ŋí píli íwônai lá ƃɛ́i í kútɛ̀ɛ naai. À kɛ̀ tí, í ínâŋ, ílee, da ípɛrɛi mu-ƃelai kélee ŋáa tɛ́ ma ípɛrɛi mu.

¹⁹ Kɛ́lɛ à kɛ̀ núu da kélee a kùla bɛ́rɛi mu a lì ŋ̀énei ŋá, gɛ̀ ní è lì zaâi kɔ̂rii, kúsɔŋ fé pâi kɛ̂i zu. Kɛ́lɛ à kɛ̀ núu da a ǹyée pɛ̀lɛ ípɛrɛi mu-ƃelai da ma, gɛ̀ ní kúa ƃé gɛ̀.

²⁰ Kɛ́lɛ à kɛ̀ ƃa m̀ɛnii ŋí da ƃò núu da ma, gɛ̀ ní kúfe pâi gono têei ŋ̀aa-see kɛ̂i nyíi kú gɛ̀ íyêei.”

²¹ È mò dîa ǹyɛɛi, “Yɛ̂ɛ ƃerei ka m̀ó lai, tɔ́ɔ é kɛ́ tí.” Nya ƃe ǹûai dí lì, ǹyaŋ é ŋ̀ɛli kpɔ̂lui ɣíri ŋɔwônai lá.

²² Nya ƃe m̀ɛni-maa kpɛ́ɛ-ƃelai feerɛi dí lì ǹyéei su dí gɛ́ naa a fólo saaƃa é lɛ́ɛ la zu dísoŋ-ƃelai lì díkɔ̂rii dí lene pôlu Zɛleko, kpɛ́ni fêi, dí díkɔ̀ri kwa kélee ma dífe díkaa ní.

²³ Gɛ́ɛ tíi, ǹúu feerɛi ŋí dí kùla ǹyéei su dí ǹya lêei tíyeŋ dí lí Nuŋ ǹóŋ Zasua pɔ́ naa dí m̀ɛnii kélee ƃó mà nyíi kɛ̀ a dîai.

²⁴ Dí mò Zasua ma dîyɛɛi, “Tɔ̃yâ ma Yâwɛɛ a ǹɔii kélee tɛ́ɛ kúpɔ, ǹyaŋ ǹɔii su-ƃelai kélee da nâa yaôi kûa.”