Zasua 19 - Bible

Ǹɔii dí dɛ̀ɛ Simiɔŋ ŋɔsuui su-ƃelai pɔi

¹ Ǹúu suui veerɛi Zasua è lɔii tɛ̂ɛ bɔ́i ƃé kɛ̀ a Simiɔŋ ŋɔsuui. Simiɔŋ da Zuda dílɔii è kɛ̀ a búɔɔ gîei.

² Simiɔŋ ŋɔtaa-ŋai ƃé kɛ̀ a: Bɛɛsiba, Seƃa, Molada,

³ Aza-sua, Beela, Iizeŋ,

⁴ Ɛɛtola, Bɛtu, Oma,

⁵ Zikila, Bɛ-maikabo, Aza-susa,

⁶ Bɛ-lebao da Sarueŋ. Da-ŋai ŋí díkɛ̀ a taa-lêe puu káo saaƃa da díkpanâŋ-ŋai.

⁷ Simiɔŋ ŋɔtaa-lêei da-ŋa ƃé kɛ̀ a Aiŋ, Limɔŋ, Etɛ da Asaŋ-taa-lee é pɛ́lɛ dí díkpanâŋ-ŋai dîa.

⁸ Daa lêe-ŋai ŋí da maa kpânaŋ-ŋai kélee káa ǹɔii ŋí ma é lɛ́ɛ la zu é seri Beela Biɛ taai ma nyíi gáa ǹɔii kwára perei. (Beela-biɛ taai láa kpéli ƃa Lama.) Ǹɔii ŋí ƃé dí dɛ̀ɛ Simiɔŋ ŋɔsuui su-ƃelai pɔ́ yɛ̂ɛ berei dísuui è kɛ̀ lai.

⁹ Dí Zuda ŋɔlɔii da tɛ̀ɛ Simiɔŋ ŋɔsuui su-ƃelai pɔ́, kpɛ́ni fêi, Zuda lɔii è kɛ̀ a gɛ́tɛ é tɛ́ɛ ŋɔsuui su-ƃelai dîa.

Ǹɔii dí dɛ̀ɛ Zɛbulɔŋ ŋɔsuui su-ƃelai pɔi

¹⁰ Ǹúu suui zaaƃai dí lɔii tɛ̂ɛ zu-ƃelai pɔ́i ƃé kɛ̀ a Zɛbulɔŋ. Dí ǹɔii ŋí tɛ̀ɛ dípɔ yɛ̂ɛ berei dísuui è kɛ̀ lai. Dílɔii è seri Sari taai ma.

¹¹ Goyaŋ perei è kùla Sari é lí vóloi liî-pere Mariɛ taai ma é pîlaŋ Dabesɛ taai ma. Goyaŋ perei ŋí è kùla naa é lí ǹyá-loŋ ma Zonia vóloi kulâi-perei.

¹² Goyaŋ perei è kùla ŋɔ́nɔ Sari taai ma é lí vóloi kulâi-pere é síɣe Kure-tabɔ taa-leei kóyaŋ ma. Goyaŋ perei è kùla naa é lí Dabɛra taai ma, é tɛ́ɛ naa é lí Zafia.

¹³ È kùla naa é tɛ́ɛ vóloi kulâi-pere é lí Gaifɛ taai su, é tóo Ɛdeziŋ é tɛ́ɛ naa é tóo Limɔŋ, é tínaŋ Nea taa-leei ma pere.

¹⁴ Gɛ̀ ní goyaŋ perei è tɛ̀ a ǹɔii é tínaŋ é lí Anatɔ̃ŋ taa-leei ma, é kóyaŋ Ifitaɛɛ Potoi ma.

¹⁵ Daa-ŋai ǹɔii ŋí mai da-ŋa ƃa Kata, Naala, Siŋrɔŋ, Idala da Bɛpeleɣɛ̃ɛ. Díkɛ̀ a taa-lêe puu káo feerɛ da díkpanâŋ-ŋai.

¹⁶ Ǹɔii ká ŋí dí dɛ̀ɛ Zɛbulɔŋ ŋɔsuui su-ƃelai pɔ́ da ǹaa taa lee-ŋai é pɛ́lɛ díkpanâŋ-ŋai dîa kɛ̀ naai yɛ̂ɛ berei dísuui è kɛ̀ lai.

Ǹɔii dí dɛ̀ɛ Isaka ŋɔsuui su-ƃelai pɔi

¹⁷ Ǹúu suui ǹáaŋ ɣelei dí lɔii tɛ̂ɛ zu-ƃelai pɔ́i ƃé kɛ̀ a Isaka ŋ̀ɔ-ŋai. Dí dɛ̀ɛ dípɔ yɛ̂ɛ berei dísuui è kɛ̀ lai.

¹⁸ Daa-ŋai kɛ̀ naai ƃa: Zariɛɛ, Sesulo, Suneŋ,

¹⁹ Afaraiŋ, Siyiɔŋ, Aneara,

²⁰ Lebi, Kesiɔŋ, Ibezi,

²¹ Lemɛ, Eŋ-ganiŋ, Eŋ-ada da Bɛ-paze.

²² Dílɔii ŋɔgoyaŋ perei è sèri máŋ Tabɔ taa-leei ma, Saazuma da Bɛ-semɛɛ taa-leei. Goyaŋ perei è kòyaŋ Zɔdiŋ Ya-leei ma. Taa-lêe puu káo lɔ́ɔlu mɛi-da ƃé kɛ̀ naa da díkpanâŋ-ŋai.

²³ Dí ǹɔii ŋí tɛ̀ɛ Isaka ŋɔsuui su-ƃelai pɔ́ yɛ̂ɛ berei dísuui è kɛ̀ lai.

Ǹɔii dí dɛ̀ɛ Asa ŋɔsuui pɔi

²⁴ Ǹúu suui ǹɔ́ɔlu ɣelei dí lɔii tɛ̂ɛ zu-ƃelai pɔ́i ƃé kɛ̀ a Asɛ.

²⁵ Dítaa-ŋai ƃé kɛ̀ a: Ɛɛka, Ali, Beteŋ, Asa,

²⁶ Elaŋmelɛ, Ema da Misaa. Vóloi liî-pere goyaŋ perei è kòyaŋ Kamɛɛ Yeei ma da Siɔɔ-lina Ya-loŋ.

²⁷ Goyaŋ perei è tìnaŋ é lí vóloi kulâi-pere é lí Bɛ-dagɔŋ taai ma é pîlaŋ Zɛbulɔŋ lɔii ma da Ifitaɛɛ Potoi ǹɔii ŋûa pere, é tóo Bɛ-iɛmɛ da Nɛiɛɛ taai ma. È sìɣe naa tɛ́ ǹɔii ŋûa pere é sèri Kabɔ,

²⁸ Iburɔŋ, Leo, Amɔŋ, Kana, é lɛ́ɛ la zu é seri Sidɔŋ taai ma.

²⁹ Goyaŋ perei ŋí è tìnaŋ é lí Lama, é tɛ́ɛ naa é seri Taya taa-leei ma. Goyaŋ perei ŋí è tìnaŋ ŋɔ́nɔ naa é lí Osãŋ taai su, é kóyaŋ Mɛditɛrenia Yuoi ma. Asa lɔii su taa-ŋai da-ŋa ƃé kɛ̀ a: Maala, Aizi,

³⁰ Uma, Afɛ da Leo. Taa-lêe buu feerɛ káo feerɛ ƃé kɛ̀ naa da díkpanâŋ-ŋai.

³¹ Ǹɔii ká ŋí zu taa lee-ŋai da gbanâŋ-ŋai dí dɛ̀ɛ Asɛ suui su-ƃelai pɔi. Dí dɛ̀ɛ dípɔ yɛ̂ɛ berei dísuui è kɛ̀ lai.

Ǹɔii ká ŋí dí dɛ̀ɛ Nɛfɛtɛli ŋɔsuui su-ƃelai pɔi

³² Ǹúu suui ǹɔ́ɔlu mɛi da ɣelei dí lɔii tɛ̂ɛ zu-ƃelai pɔ́i ƃé kɛ̀ a Nɛfɛtɛli. Dí ǹɔii tɛ̂ɛ dípɔ yɛ̂ɛ berei dísuui è kɛ̀ lai.

³³ Ǹɔii ŋí ŋûa pere goyaŋ perei è kùla Ɛlɛ é tóo Za-ananiŋ wuru kɛ́tɛi ma, Adami-neke da Zanee taai, é seri Lakuŋ. Ǹɔii ŋí kóyaŋ ƃé kɛ̀ a Zɔdiŋ Ya-leei.

³⁴ Goyaŋ perei è ŋɔ́nɔ kùla naa é lí vóloi liî-pere é seri Anɔtaƃɔ, é tɛ́ɛ naa é pîlaŋ Ukɔ taai ma, é yéŋ é pîlaŋ Zɛbulɔŋ lɔii ma, é pîlaŋ Asɛ lɔii ma vóloi liî-pere, é lí Zɔdiŋ Ya-leei ma vóloi kulâi-pere.

³⁵ Daa-ŋai siɣãŋ è kɛ̀ a dínaŋɔɔ dîa Nɛfɛtɛli ŋɔlɔii ŋí sui ƃa Zidiŋ, Zeɛɛ, Ama, Leka, Kinere,

³⁶ Adama, Lama, Azɔ,

³⁷ Kedɛ, Eŋ-dure-i, Eŋ-azɔ,

³⁸ Yirɔŋ, Migida-eɛ, Ore, Bɛ-ana da Bɛɛsimɛ. Taa-lêe puu káo lɔ́ɔlu mɛi náaŋ ƃé kɛ̀ naa da díkpanâŋ-ŋai.

³⁹ Ǹɔii ká ŋí da zu taa lee-ŋai da díkpanâŋ-ŋai dí dɛ̀ɛ Nɛfɛtɛli suui su-ƃelai pɔ́i. Dí dɛ̀ɛ dípɔ yɛ̂ɛ berei dísuui è kɛ̀ lai.

Ǹɔii ká ŋí dí dɛ̀ɛ Daŋ ŋɔsuui su-ƃelai pɔi

⁴⁰ Ǹúu suui ǹɔ́ɔlu mɛi feerɛ ɣelei dí lɔii tɛ̂ɛ zu-ƃelai pɔ́i ƃé kɛ̀ a Daŋ ŋɔsuui su-ƃelai. Dí dɛ̀ɛ dípɔ yɛ̂ɛ berei dísuui è kɛ̀ lai.

⁴¹ Dítaa-ŋai ƃé kɛ̀ a: Zora, Ɛssit-o, I-semɛ,

⁴² Sa-alabiŋ, Aizalɔŋ, Iila,

⁴³ Ɛlɔŋ, Tiŋna, Ɛkulɔŋ,

⁴⁴ Ɛtekɛ, Giƃetɔ̃ŋ, Beela,

⁴⁵ Zeu, Bene-bera, Gaa-rimɔŋ,

⁴⁶ Me-zakɔ̃ŋ da Lekɔ̃ŋ é tóo Zâpa-taai kɔlɛ ma.

⁴⁷ Gɛ́ɛ ǹûai ŋí ni dífe pɔri ní ǹɔii ŋí kúla yêei kɛ̂i, dí lì dí kɔ́ tóo Lesɛŋ taa-lee ma dí ǹaa-ƃela kélee páa. Nya ƃe dí dínâŋ pɔlɔi Daŋ láa sèe Lesɛŋ taai ma.

⁴⁸ Ǹɔii ká ŋí zu taa-ŋai da díkpanâŋ-ŋai dí dɛ̀ɛ Daŋ ŋɔsuui su-ƃelai pɔi. Dí dɛ̀ɛ dípɔ yɛ̂ɛ berei dísuui è kɛ̀ lai.

Zasua ŋɔlɔii ká ŋí Eezuɛ-ŋai dí dɛ̀ɛ bɔ́i

⁴⁹ Zasua-ni kɛ́ɛ da kpɛɛ a ǹɔii ŋáa kɔlɛɛi, Eezuɛ-ŋai dí ŋɔlɔii tɛ̂ɛ bɔ́.

⁵⁰ Yâwɛɛ è mò Eezuɛ-ŋai dîa a gɛ́ɛ dí daai tɛ́ɛ Zasua pɔ́ nyíi a ŋ̀wɛ̂lii. M̀ɛni ma dí Tina-sera taa-leei tɛ̂ɛ bɔ́ nyíi kɛ̀ ǹyée lɔii su Ifiraŋ lɔii mai. Nya ƃe è daai tɔ̂ɔ pôlu é sée naa.

⁵¹ Ǹɔii ká ŋí zâla láa soŋ-nuui Elieza, Nuŋ ǹóŋ Zasua da Eezuɛ láa túɛ-ƃelai dí ŋ̀áa kɔ̀lɛ Eezuɛ-ŋai diai. Dí díŋaa tɛ̀ ma Silo taai su, dí ǹɔii ŋí ŋáa kɔ́lɛ a kpɛɛŋ tóɔɔ. Dí gbɛɛŋ ŋí tòo Yâwɛɛ ŋɔsua kɔ̂lɔ pɛrɛi ŋɛ́i túɛ. Ǹyaŋ ǹɔii ŋáa kɔlɛ pêre ká kɛ̀ tí dîɛ.