Zasua 18 - Bible

Zasua è ǹɔii gbéli ŋáa kɔ̀lɛ

¹ Eezuɛ-ŋai kɛ́ɛ da ǹɔii kélee síɣei, dí díŋaa tɛ̀ ma Silo taa-leei su dí Yâwɛɛ ŋɔsua kɔ̂lɔ seɣe pɛrɛi pîlaŋ naa.

² Eezuɛ suu lɔ́ɔlu mɛi feerɛ ƃé lɛ̀ɛ nyíi Zasua fé niî kɛ̀ lɔii tɛɛ ní dípɔi.

³ Nya ƃe Zasua è Eezuɛ-ŋai marê kɛ̀ ǹyɛɛ dîai, “Lé ƃé ka gɛ̂i káfe liî ká ǹɔii síɣe nyíi Yâwɛɛ kánâŋ-ni Díɣâlai a dɛ̀ɛ kápɔi?

⁴ Ka kpakolo saaƃa-saaƃa kula kásuui su tɛi-tɛi ká dítɛɛ ḿbɔ. Ŋa pâi dítɛɛ̂i a gɛ́ɛ dí ǹɔii maa kpɛ́ɛ dí ǹaa mɛni-ŋai pɔ̃yɛ dí pá pôlu a maa koraŋ-ƃoi ḿbɔ ƃɛ́i da ŋ̀wɛ̂lii kámɛni mai ŋá gɔ́lɔŋ.

⁵ Da pâi ǹɔii ŋáa kɔ̂lɛi gîei lɔ́ɔlu mɛi feerɛ, Zuda ŋɔsuui su-ƃelai dílɛɛ ǹɔii kwára pere, Zosɛ ŋ̀ɔ-ŋai dílɛɛ ǹɔii ŋûa-pere.

⁶ Ka pâi ǹɔii kpua-kpua lɔ́ɔlu mɛi feerɛi kɛ́-pere pɔ̃yɛ̂i kɔlɔ ma ká pá la ḿbɔ. Gɛ̀ ní ŋa pâi kpɛɛŋ toôi káɣâlai Yâwɛɛ ŋɛ́i ŋá gɔ́lɔŋ ƃɛ́i a ǹaa wɛ̂lii kámɛni mai.

⁷ Fé ǹɔii da tɛ̀ɛ ní Liiva-ŋai pɔ́, kpɛ́ni fêi, Yâwɛɛ ŋɔsâla láa soŋ tii ƃa díwɔ̂ pɔɔ-sɛŋ. Gâa, Lubiŋ da Manasɛ suui su-ƃelai gbéli-ŋai dí díwɔ̂i sɔlɔ ƃô Mose, Yâwɛɛ yée mu-nuui yêei Zɔdiŋ Ya-leei kɔlɛ vóloi kulâi-pere.”

⁸ Gbakolo-ŋai ŋí kɛ́ɛ da dímu sìɣe a gɛ́ɛ dí líi, Zasua è mò dîa ǹyɛɛi, “Ka lí ká sía ǹɔii su ká gɛ́ pere pɔ̃yɛ kɔlɔ ma ká pá la ḿbɔ. Gɛ̀ ní ŋa pâi kpɛɛŋ toôi Silo ƃɛ́ Yâwɛɛ ŋɛ́i.”

⁹ Nya ƃe gbalolo-ŋai dí lì dí sía ǹɔii kpîniŋ su. Dí ǹɔii kɛ́-pere mɛni da ǹaa taa-ŋai kélee láa pɔ̃yɛ kɔlɔ ma, dí ŋáa kɔ́lɛ gîei lɔ́ɔlu mɛi feerɛ. Gɛ́ɛ tí, dí pà pôlu Zasua pɔ́ m̀ûui su Silo a m̀aa koraŋ-ƃoi.

¹⁰ Nya ƃe Zasua è kpɛɛŋ tôo naa Yâwɛɛ ŋɛ́i é ǹɔii ŋáa kɔ́lɛ naa Eezuɛ-ŋai dîa.

Zasua è lɔii tɛ̂ɛ Bɛŋsima ŋɔsuui su-ƃelai pɔ́

¹¹ Ǹúu suui maa-ŋuŋ Zasua è ǹɔii tɛ̂ɛ bɔ́i ƃé kɛ̀ a Bɛŋsima ŋɔsuui su-ƃelai. Dí lɔii è kɛ̀ Zuda da Zosɛ dísuui su-ƃelai dílɔii loai.

¹² Dílɔii ŋûa-pere goyaŋ perei kɔ́ɔ è pìlaŋ Zɔdiŋ Ya-leei ma é kúla naa é lí Zɛleko. È kùla naa é lí ǹyée lɔii su vóloi liî-pere é tɛ́ɛ naa é kóyaŋ Bɛaveŋ fɛ̃ɛ-kpâlaŋ ma.

¹³ Goyaŋ perei ŋí è ŋɔ́nɔ kùla naa é tɛ́ɛ é yéŋ Lu taa-leei kwára pere. (Lu taa-leei láa da ƃa Bɛtɛ.) Gɛ̀ ní goyaŋ perei è kùla naa é yéŋ Atarɔ Ada. Ataro Ada káa ǹyéei ma Bɛorɔŋ kwára pere.

¹⁴ Goyaŋ perei ŋí è tìnaŋ é kúla ǹyéei kwára pere é tɛ́ɛ naa é kóyaŋ Kiria-aba taa-leei ma nyíi da dòli máŋ a Kiria-Zeriŋ. Daa-lêei ŋí káa a Zuda ŋɔsuui su-ƃelai pɔ́ɔ nyíi kɛ̀ a vóloi liî-pere goyaŋ pere kóyaŋ.

¹⁵ Ǹɔii kwára pere goyaŋ perei kɔ́ɔ è pìlaŋ Kiria-Zeriŋ taa-leei kɔlɛ. Goyaŋ perei ŋí è kùla naa é lí Efurɔŋ taa-leei ma, é kúla naa é lí Nɛtoa Ya-toŋ ma.

¹⁶ È ŋɔ́nɔ kùla naa é yéŋ ǹyéei kóyaŋ ma Inɔŋ Potoi mɛi, nyíi gáa a Liifaŋ Potoi ŋɔgoyaŋ perei. È ŋɔ́nɔ yèŋ Inɔ̃ŋ Potoi su é tɛ́ɛ naa é lí Zerusâlɛŋ taa-leei kwára gɛ̀ yèŋ Erogee Yai ma.

¹⁷ Goyaŋ perei ŋí è tìnaŋ é tɛ́ Ɛsimɛɛ Yai ŋûa pere, é tɛ́ɛ naa é lí Gelilo nyíi gáa Adumiŋ Yeei téniŋ mai. Goyaŋ perei è yèŋ Lubiŋ ǹóŋ Boaŋ ŋɔkɔnii ma.

¹⁸ È ŋɔ́nɔ kùla naa é tɛ́ Bɛ-araba ŋûa pere é yéŋ Araba Tiŋ-tiŋ su.

¹⁹ Gɛ̀ ní goyaŋ perei è tɛ̀ɛ naa é tɛ́ Bɛola taai ŋûa pere. Ǹɔii ŋûa pere goyaŋ perei è làa a Ǹyúo Saai kóo, ǹɔii kwára pere goyaŋ perei kɛ́ ƃò a Zɔdiŋ Ya-leei pîlanii.

²⁰ Vóloi kulâi-pere goyaŋ perei ƃé kɛ̀ a Zɔdiŋ Ya-leei. Ǹɔii ŋí ƃé lɛ̀ɛ Bɛŋsima ŋɔsuui su-ƃelai yêei yɛ̂ɛ berei dísuui è kɛ̀ lai.

²¹ Daa lêe-ŋai kɛ̀ ǹɔii ŋí ma dí dɛ̀ɛ Bɛŋsima ŋɔsuui su-ƃelai pɔi, dîa ƃa: Zɛleko, Bɛ-ogila, Imɛkezi,

²² Bɛ-araba, Zemaraiŋ, Bɛtɛ,

²³ Aviŋ, Para, Ofura,

²⁴ Kefa-famɔni, Ofini da Geƃa. Gélee káa a taa-lêe puu káo feerɛ da díkpanâŋ ŋai.

²⁵ Daa-lêe-ŋai ŋí díkɛ̀ Bɛŋsima ŋɔsuui su-ƃelai dílɔii ma: Giƃiyɔŋ, Lama, Bɛ-ɛro,

²⁶ Mipɛ, Sifira, Moza,

²⁷ Lekɛŋ, Iripee, Tarala,

²⁸ Zela, Aielɛ, Zabusi (zu-kulâi ƃa Zerusâlɛŋ) Giƃe-a da Kiria-Zeriŋ. Gélee káa a taa-lêe puu káo náaŋ da díkpanâŋ-ŋai. Ǹɔii ŋí ƃé dí dɛ̀ɛ Bɛŋsima ŋɔsuui su-ƃelai pɔi.