Zasua 17 - Bible

Ǹɔii kpuai ká ŋí Zasua è dɛ̀ɛ Manasɛ ŋɔsuui su-ƃelai pɔ́i

¹ Ǹɔii ká ŋí Zasua è dɛ̀ɛ Zosɛ ǹóŋ maa-ŋuŋ Manasɛ pɔ́i. Masi ƃé kɛ̀ a Manasɛ ǹóŋ maa-ŋuŋ. Masi ǹóŋ láa kɛ̀ a Gilia. Zasua è Gilia da Basãŋ lɔii tɛ̂ɛ Maka pɔ́, kpɛ́ni fêi, è a kɔ-kûluƃa.

² Dí ǹɔii ŋáa ɔlɛ Manasɛ ŋɔsuui su-ƃelai dîa yɛ̂ɛ berei dísuui è kɛ̀ lai. Ŋɔsuui su-ƃelai ƃé kɛ̀ a Eebi-ezɛ, Elɛ, Asuri-eɛ, Sɛkɛŋ, Ifɛ da Siimida. Ǹûai ŋí ƃé kɛ̀ a Zosɛ ǹóŋ Manasɛ ǹônii-sinaai.

³ Manasɛ ǹóŋ Masi ǹóŋ surɔŋ láa ƃé kɛ̀ a Gilia. Gilia ǹóŋ Ɛfɛ ŋɔlóŋ surɔŋ láa ƃé kɛ̀ a Zelofeya, kɛ́lɛ Zelofeya fé lóŋ-surɔŋ da maa sɔlɔ ƃó ní. Ǹônii kélee díkɛ̀ a nɛyãa. Dílaa ƃé kɛ̀ a: Mala, Nôa, Ogila, Maaka da Tiɛza.

⁴ Nya ƃe Zelofeya ǹônii-nɛyãai dí pà zâla láa-soŋ nuui Elieza, Nuŋ ǹóŋ Zasua da Eezuɛ láa túɛ-ƃalai ŋɛ́i túɛ dîɛ dîai, “Yâwɛɛ è mò Mose ma a gɛ́ɛ ǹɔii gáa kúkaayɔɔ-ŋai mɛni mai, é kúwɔ̂i tɛ́ɛ kúpɔ.” Ǹyaŋ Zasua è gɛ̀ yɛ̂ɛ berei Yâwɛɛ è mò la Mose mai.

⁵ Manasɛ ŋɔlɔii è kɛ̀ a lɔii kpûa puu é kúla Gilia da Basãŋ lɔii pôlu, nyíi kɛ̀ Zɔdiŋ Ya-leei kɔlɛ ma vóloi kulâi-perei,

⁶ kpɛ́ni fêi, dí lɔii tɛ̂ɛ Manasɛ ǹônii nɛyãai pɔ́ díkaayɔɔ-ŋai díwɔ̂ lɔii ma. Gilia lɔii è kɛ̀ a Manasɛ ŋɔsuui su-ƃelai gbéli-ŋai pɔ́ɔ

⁷ Manasɛ ŋɔlɔii è sìɣe Asɛ ŋɔlɔii ma é tóo Mameta taa-leei ma, nyíi gáa Sɛkɛŋ vóloi kulâi-perei. Ǹɔii ŋí ŋɔkoyaŋ perei è kùla naa é lí Tapua-ŋai dílɔii kwára pere.

⁸ Tapua lɔii káa a Manasɛ pɔ́ɔ. Kɛ́lɛ Tapua taa-leei nyíi kɛ̀ Manasɛ lɔii goyaŋ perei mai, gáa a Ifiraŋ ǹônii-sinaai pɔ́ɔ.

⁹ Ǹɔii ŋí ŋɔgoyaŋ perei è yèŋ Kena Yai kwára. Daa lêe-ŋai Kena kwára perei díkaa a Ifiraŋ pɔ́ɔ berei máŋ dí kɛ̀ la Manasɛ lɔii kpuai mai. Manasɛ lɔii è tɛ̀ Kena Yai ŋûa pere é kóyaŋ Mɛditɛrenia Yuoi ma.

¹⁰ Ifiraŋ lɔii ǹyaŋ káa ǹyái kwára pere, Manasɛ ŋ̀ɔi kɛ́ ƃò ǹyái ŋûa pere. Dífeerɛ dígoyaŋ perei nyíi kɛ̀ vóloi liî-perei ƃé kɛ̀ a Mɛditɛrenia Yuoi. Asɛ lɔii è kɛ̀ Manasɛ lɔii ŋûa pere, Isaka ŋ̀ɔi kɛ́ ƃò Manasɛ lɔii vóloi kulâi-pere.

¹¹ Daa-ŋai ŋí da díkpanâŋ-ŋai díkaa Isaka da Asɛ lɔii mai, díkaa a Manasɛ pɔ́ɔ. Dia ƃa: Bɛsãŋ, Ibiliaŋ, Dɔɔ taa-leei nyíi gáa Mɛditɛrenia Yuoi kɔlɛi, Ɛŋdɔɔ, Taana da Mɛgido.

¹² É máŋ kɛ́ tí, Manasɛ ǹônii dífe pɔri ní daa lêe-ŋai ŋí kula yêei kɛ̂i Keena-ŋai yêei. Keena-ŋai díkɛ̀ niî naa.

¹³ Berei máŋ Eezuɛ-ŋai suui su è kɛ̀ kɛ̂tɛi lai, dífe Keena-ŋai kpɛ́ ní daa lêe-ŋai ŋí su. Kɛ́lɛ dí díkɛ̀ a díluɛ-ŋa.

Ifiraŋ da Manasɛ dí Zasua marê kɛ̀ a gɛɛ é dílɔii da pú ma

¹⁴ Zosɛ ŋɔsuui su-ƃelai dí pà Zasua pɔ́ dîɛ mai, “Yâwɛɛ a lûwa láa kûa, a gɛ́ kúkaa ƃûu ƃôi. Lé ƃé kɛ̀ ya lɔii kpua loŋ nɔ́ tɛɛ̂i la kúpɔi?”

¹⁵ Zazua è mò dîa ǹyɛɛi, “À kɛ̀ kátâmai, Ifiraŋ Yee lɔii kuro té kámɛni ma, ka lí Pereiza-ŋai da Lefaiŋ-ŋai díwolâi su ká ǹaa kpɛtɛ kámɛni ma.”

¹⁶ Dì mò m̀a dîyɛɛi, “Ǹyée lɔii tí fé kpɔ̂ɔ ní kúmɛni ma. É kúla nyíŋi pôlu, Keena-ŋai díkaa Bɛsãŋ taa-leei da Zariɛɛ lɔii tiŋ-tiŋ sui, kɔ́ kɔ́-keleŋ-ŋa kpɛtɛɛ a kɔli káa díyêei.”

¹⁷ Zasua è mò dîa ǹyɛɛi, “Kátâmai, káwala-wâla. Ǹɔii kpûai ŋí fé kpɔ̂ɔ ní kámɛni ma.

¹⁸ Ŋa pâi ǹyée lɔii tɛɛ̂i kápɔ berei máŋ ǹaa káa la a wolâi. Ka pâi ǹaa gwaa kélee kpɛtɛ̂i ká kɛ́ naa, kpɛ́ni fêi, ka pâi Keena-ŋai kpɛ̂i naa berei máŋ kɔ́ kɔ́-keleŋ-ŋa kpɛtɛɛ a kɔli káa la díyêei díwala-wâlaai.”