Zasua 14 - Bible

Zɔdiŋ Ya-leei pôlu pere lɔii ŋáa kɔlɛ mɛni

¹ Ǹyaŋ ǹɔii ká ŋí Eezuɛ-ŋai dí zɔlɔ ƃô Keena lɔii sui. Diai ǹɔii ŋí ŋáa kɔ̀lɛ Eezuɛ-ŋai dîai dia ƃa zâla láa soŋ-nuui Elieza, Nuŋ ǹóŋ Zasua da Eezuɛ-ƃelai dísuu láa túɛ-ƃelai.

² Dí ǹúu sûu lɔ́ɔlu mɛi náaŋ da gbûrai díwɔ̂ lɔii ŋáa kɔ̀lɛ a kpɛɛŋ tóɔɔ yɛ̂ɛ berei Yâwɛɛ è mò la Mose mai,

³ kpɛ́ni fêi, Mose è ǹúu su feerɛ da gburai díwɔ̂ lɔii tɛ̂ɛ dípɔ Zɔdiŋ Ya-leei pôlu vóloi kulâi-pere. Kɛ́lɛ vé ǹɔii da tɛ̀ɛ ní Liiva-ŋai pɔ́.

⁴ Zosɛ ǹônii dí kɛ̀ a núu suu feerɛ. Manasɛ da Ifiraŋ. Kɛ́lɛ dí taa lêe-ŋa tɛ̀ɛ dípɔ da lɔii kpûa dítaa-tûlɛ-ŋai láa mii mɛni ma.

⁵ Ǹûai dí ǹɔii ŋáa kɔ̀lɛ yɛ̂ɛ berei Yâwɛɛ è mò la Mose mai.

Dí Iburɔŋ lɔii tɛ̂ɛ Kelɛ pɔ́

⁶ Nya ƃe Zuda-ƃelai dí pà Zasua pɔ́ Geega. Zɛfune ǹóŋ Kelɛ nyíi kùla Keniza-ŋai dísuui sui, è mò Zasua ma ǹyɛɛi, “Í m̀ɛnii kɔ́lɔŋ Yâwɛɛ è mò Ŋ̀âla-nuui Mose ma Kedɛ Bania é pîlaŋ kwa yá kûai.

⁷ Ŋ́gɛɛ a kóraŋ buu náaŋ, Yâwɛɛ yée mu nuui Mose è ńdɛ̀ɛ a gɛ́ɛ ŋá lí ŋá Keena lɔii maa kpɛ́ɛ. Ŋá gɛ̀ tí ŋá pà pôlu bɔ́ a tɔ̃yâ koraŋ ƃò.

⁸ Kɛ́lɛ diai kwa dîa-ni kú lii, dí pà pôlu Eezuɛ-ŋai pɔ́ a lii-too pôlu koraŋ ƃò. É máŋ kɛ́ tí, ŋá ńii kélee tɛ̀ɛ Ɣâla Yâwɛɛ pɔ́.

⁹ Nya ƃe Mose è góno tèe ńyêei a maa ɣelei tí ǹyɛɛi, ‘Ǹɔii í lì í maa kpɛ́ɛi, a pâi kɛ̂i a íwɔ̂ kɔ̃liŋ ka ílônii wɔ́lɔ-wɔlɔ da wɔ́lɔ-wɔlɔ, kpɛ́ni fêi, í ílii kélee tɛ̀ɛ Yâwɛɛ pɔ́, í m̀ɛnii kɛ́ è mò yâi.’

¹⁰ Ǹyaŋ gáa, Yâwɛɛ a gɛ́ ŋa lɛɛ a ḿvulu tãi ŋí a seri yɛ̂ɛ berei è mò lai. Gono têei ŋí kɛ́ɛ Yâwɛɛ mì Mose yêei a kɛ́ a kóraŋ buu náaŋ káo lɔ́ɔlu, Eezuɛ-ŋai kɛ́ɛ kɛ̀ vɛ̃ɛ-kpâlaŋ sui. Ǹyaŋ gáa, ŋ́gaa nâa a kóraŋ buu lɔ́ɔlu mɛi saaƃa káo lɔ́ɔlu.

¹¹ Ŋ́gbonôi kpanaŋɔ̂ɔi nɔ́ niî yɛ̂ɛ berei è kɛ̀ la a tãi Mose è ńdɛ̀ɛ lai. Ŋ́wala-wâlai niî kɔ́ kɔ́ mɛni ma yɛ̂ɛ berei è wɔ́lɔ kɛ̀ lai.

¹² M̀ɛni ma, ǹyée lɔii ŋí tɛ́ɛ ḿbɔ nyíi Yâwɛɛ è góno tèe la ńyêei kpɛ́ni fêi, yá kpîŋ í m̀ɛni a maa ɣêlei tí berei Anakiŋ-ŋai dí kɛ̀ la naa dítaa lêei-ŋai maa tínaŋɔɔ a siɣãŋ. Kɛ́lɛ Yâwɛɛ a pâi kpɔŋ mâa tɛɛ̂i ḿbɔ ŋá díkpɛ yɛ̂ɛ berei è mò lai.”

¹³ Nya ƃe Zasua è lûwa tòo Kelɛ, Zefunɛ ǹóŋ ma é Iburɔŋ lɔii tɛ́ɛ bɔ́ a gɔ̃̂liŋ.

¹⁴ M̀ɛni ma, Iburɔŋ lɔii è nâa kɛ̀ a Zefunɛ ǹóŋ Kelɛ pɔ́ɔ nyíi kùla Keniza-ŋai dísuui su, kpɛ́ni fêi, è làa a Eezuɛ Ŋɔɣâlai Yâwɛɛ, é ǹíi kélee tɛ́ɛ bɔ́.

¹⁵ Kelɛ é lɛ́ɛ pâi ǹɔii ŋí siɣêi, ǹaa ƃé Anakiŋ-ŋai díwala-wâla nuu kɛ́tɛi Aba seɛ́ɛ è kɛ̀ naa. M̀ɛni ma, dí ǹáa sèe ǹɔii ŋí ma a Aba. Kelɛ kɛ́ɛ ǹaa sìɣei, dí ǹaa láa maa fâleŋ a Iburɔŋ. Gɛ́ɛ a ǹaa soŋ, gɔ̂i è nâa kpera Eezuɛ-ŋai dí kɛ́ ƃò lii-sêe su.