Zasua 12 - Bible

Gâloŋ-ŋai Mose è díyee mɛi ɣâlei

¹ Gâloŋ-ŋai ká ŋí Eezuɛ-ŋai dí díyee mɛi ɣâle dí dílɔii-ŋai síɣei. Dí ǹɔii-ŋai ŋí siɣe é kúla Zɔdiŋ Ya-leei pôlu vóloi kulâi-pere pere é tóo Ano tiŋ-tiŋ su Ɛmɔŋ Yeei kwára da vɛ̃ɛ-kpâlaŋ su kélee vólo-kulâi-pere.

² Gâloŋ-ŋai Mose è díyee mɛi ɣâlei dɔnɔ ƃé kɛ̀ a Amɔŋ kaloŋ Siɔŋ nyíi kɛ̀ a Zeɛ́ɛ Ɛsibɔŋ taa-leei sui. Daa-ŋai kɛ̀ ǹyée mui dɔnɔ ƃa Aroɛ taa-leei nyíi kɛ̀ Ano tiŋ-tiŋ kɔlɛ, é síɣe daa-lêei kɛ̀ ǹaa sâmai, é tóo Zabɔ Yai kɔlɛ Amɔra-ŋai dílɔii kóyaŋ ma nyíi gáa a Gilia lɔii gbua dai.

³ Ŋɔlɔii è ŋɔ́nɔ sìɣe vɛ̃ɛ-kpâlaŋ ma Galalii Poai kɔlɛ é tóo Ǹyúo Saai ma vóloi kulâi-pere pere, da Bɛzesimɔŋ, é pɛ́lɛ ǹɔii ma gáa Piga Yeei kwára perei.

⁴ Gâloŋ veerɛi Mose è ǹyee mɛi ɣâlei ǹyaa ƃé kɛ̀ a Basãŋ kaloŋ Oŋ. È kɛ̀ a ǹúu wála-wala nuu kpului su nuui lɛ̀ɛ pôlui gbɛɛ ŋái nuui dɔnɔ nyíi da kâa dòli a Liifaŋ. È kɛ̀ máŋ a kâloŋ Atarɔ da Ɛdirɛ taa-leei mɛni ma.

⁵ È kɛ̀ a kâloŋ Ɛmɔŋ Yeei kwára pere lɔii mɛi da Saleka taa-leei. È ŋɔ́nɔ kɛ̀ Basãŋ lɔii gwaa kélee mɛi da Gesɔ é pɛ́lɛ Maka lɔii ma Vóloi-kulâi-pere. Gilia lɔii gbua gbéli è kɛ̀ ǹyêei máŋ é tóo Ɛsibɔŋ kaloŋ Siɔŋ ŋɔlɔii kóyaŋ ma.

⁶ Yâwɛɛ yée mu nuui Mose da Eezuɛ-ŋai dí gâloŋ feerɛi ŋí yée mɛi ɣâle. Mose è dílɔii ŋáa kɔ̀lɛ Lubiŋ, Gâa, da Manasɛ ŋɔsuui su-ƃelai kpéli dîa.

Gâloŋ-ŋai Zasua è díyee mɛi ɣâlei

⁷ Gâloŋ-ŋai ká ŋí Zasua da Eezuɛ-ŋai dí díyee mɛi ɣâle dí dílɔii-ŋai síɣe kɛ̀ Zɔdiŋ Ya-leei kɔlɛ vóloi liî-pere é síɣe Beega Lɛƃanɔŋ tiŋ-tiŋ su é tóo Ala Yeei ma gɛ́ lì Idɔŋ taa-leei ma pere. Zasua è ǹɔii-ŋai ŋí sìɣe é ŋ̀áa kɔ́lɛ Eezuɛ-ŋai dîa yɛ̂ɛ berei dísîi káa lai.

⁸ Ǹɔii-ŋai Zasua è ŋ̀áa kɔ̀lɛ Eezuɛ-ŋai dîai ƃa: Ǹyée lɔii, ǹyée pɛlɛ-pɛlɛɛ lɔii, Zɔdiŋ tiŋ-tiŋ da ǹyéei pɛ́rɛ ma lɔii-ŋai, ǹyée pɛ́rɛ ma lɔii nyíi gáa vóloi kulâi-pere perei da vɛ̃ɛ-kpâlaŋ su lɔii. Ǹɔii ŋí ƃé kɛ̀ a Ita-ŋai, Amɔra-ŋai, Keena-ŋai, Pɛriza-ŋai, Iva-ŋai, da Zɛbuza-ŋai dílɔii.

⁹ Eezuɛ ŋai dí gâloŋ-ŋai yée mɛi daa-lêe-ŋai ŋí su: Zɛleko, Eea nyíi kɛ̀ Bɛtɛ kɔlɛi,

¹⁰ Zerusâlɛŋ, Iburɔŋ,

¹¹ Zamu, Laki,

¹² Ɛlɔŋ, Gezɛ,

¹³ Dibɛ, Gedɛ,

¹⁴ Ɔma, Ara,

¹⁵ Lina, Adora,

¹⁶ Makeda, Bɛtɛ,

¹⁷ Tapua, Ifɛ,

¹⁸ Afɛ, Lasarɔŋ,

¹⁹ Medɔŋ, Azɔ,

²⁰ Siŋrɔŋ Miiruŋ, Asa,

²¹ Taana, Mɛgido,

²² Kedɛ, Zɔneaŋ nyíi kɛ̀ Kamɛɛi,

²³ Dɔɔ nyíi kɛ̀ Nafɛdɔɔ̂i, Goiiŋ nyíi kɛ̀ Galalii,

²⁴ da Taaza. Gâloŋ-ŋai kélee dí díyee mɛi ɣâlei, díkɛ̀ a kâloŋ buu saaƃa káo tɔnɔ.