Zasua 11 - Bible

Zasua è gâloŋ Zaƃiŋ yée mɛi ɣále da m̀arâa kaloŋ-ŋai

¹ Azɔ kaloŋ Zaƃiŋ kɛ́ɛ a duŋ ŋí mɛ̀nii, è worɛ̂ tɛ̀ɛ Medɔŋ kaloŋ Zoƃa, Sirɔŋ kaloŋ da Asa kaloŋ-ni pɔ́ naa,

² gâloŋ-ŋai kɛ̀ Kpɛlɛɛ-pere ǹyée lɔii sui, nyíi-ŋai kɛ̀ Araba Galalii Poai kwára-pere da ditiŋ lɔii sui é pɛ́lɛ diai pɔ́ naa kɛ̀ Nafɔdɔ vóloi liî-perei.

³ È worɛ̂ tɛ̀ɛ máŋ Keena-ŋai pɔ́ naa nyíi-ŋai kɛ̀ vóloi kulâi-pere pere da ǹiî-perei, Amɔra-ŋai, Ita-ŋai, Pɛriza-ŋai, da Zɛbuza-ŋai kɛ̀ ǹyée lɔii sui é da Iva-ŋai kɛ̀ Ɛmɔŋ Yeei kwára Mipa lɔii sui.

⁴ Dí pà a kɔ-kûluƃa támaa, soo-ŋa da kɔ́ kɔ́-keleŋ-ŋa támaa kpɔ́ yɛ̂ɛ yúo ma ŋãya.

⁵ Nya ƃe Gâloŋ-ŋai ŋí kélee dí díŋaa tɛ̀ gîe ma ƃûu tɔnɔ su Meerɔŋ Yai kɔlɛ a gɛ́ɛ dí kɔ́ Eezuɛ-ŋai pɔ́.

⁶ È kɛ̀ tí, Yâwɛɛ è mò Zasua ma ǹyɛɛi, “Ífe yào, ŋa pâi tínaa ǹûai ŋí tɛɛ̂i ípɔ a tãi kɛ́ɛ ŋí a gɛ́ɛ í dípaa. Ya pâi dísoo-ŋai kɔ́ɔ pôlu zamiŋ teêi í díkɔ kɔ́ keleŋ-ŋai kéreŋ.”

⁷ Nya ƃe Zasua da ŋɔkɔ kûluƃa-ŋai dí kɔ́ pɛ̀lɛ díkpɔara-ƃelai dîa dítɛ̂i pere m̀ûui su Meerɔŋ Yai kɔlɛ.

⁸ Yâwɛɛ è gɛ̀ Eezuɛ-ŋai dí díkpɔara-ƃelai yée mɛi ɣále dí lɛ́ɛ díkpɛ̂i dí tɛ́ Sidɔŋ taai gɛ́tɛi su da Mirefo Miŋ daâi dí tɛ́ɛ naa dí li Mipa Potoi su. Ǹaa ƃé dí dípaa naa dítɔnɔ kpîŋ da fé lɛ̀ɛ ní.

⁹ Zasua è gɛ̀ a dîa yɛ̂ɛ berei Yâwɛɛ è mò la mai. È dísoo-ŋai kɔ́ɔ pôlu zamiŋ tèe é díkɔ kɔ́ keleŋ-ŋai kéreŋ.

¹⁰ Nya ƃe Zasua è tìnaŋ pôlu é Azɔ taa-leei síɣe é naa kaloŋ páa, kpɛ́ni fêi, Azɔ ƃé kɛ̀ a gâloŋ-ŋai tí kélee dítaa lêe kɛ́tɛi.

¹¹ Zasua-ni dí Azɔ-ƃelai kélee pàa a ƃóa-sɔ̂kpɔ, dí ǹaa wólo dí ǹaa kéreŋ.

¹² Daa lêe-ŋai kélee Zasua-ni dí ǹaa siɣêi dí naa kaloŋ-ŋai kélee pàa a ƃóa-sɔ̂kpɔ yɛ̂ɛ berei Yâwɛɛ yée mu nuui Mose è mò mai.

¹³ Kɛ́lɛ daa lêe-ŋai nûa dí dɔ̀ɔ taa-kâme-ŋa ŋái, dífe da kéreŋ ní fɛ̂ɛ nɔ́ Azɔ taa-leei nyíi Zasua ǹyaa kpîŋ è gèreŋ.

¹⁴ Zãa sɔ̃ɔ kpanaŋɔɔ-ŋai da daa-tûlɛ-ŋai kɛ̀ daa lêe-ŋai tí sui, Eezuɛ-ŋai dí gélee siɣe a dípɔɔ. Kɛ́lɛ dí vúlu sãai kélee pàa kɛ̀ naai, dítɔnɔ kpîŋ fé lɛ̀ɛ ní.

¹⁵ M̀ɛnii tí ƃé Yâwɛɛ è mò ŋɔyée mu nuui Mose ma a gɛ́ɛ é gɛ́. M̀ɛnii kélee Yâwɛɛ è mò Mose mai, Mose è mò Zasua ma. Ǹyaŋ Zasua è Yâwɛɛ wóo mɛni. Zasua è m̀ɛnii kélee kɛ̀ Yâwɛɛ è mò Mose mai.

Ǹɔii-ŋai Zasua è zìɣei

¹⁶ Nya ƃe Zasua è Keena lɔii kélee sìɣe. È ǹyée kpaya-kpaya lɔii sîɣe nyíi kɛ̀ yá-ŋûa-perei da ǹyée pɛlɛ-pɛlɛɛ lɔii nyíi kɛ̀ ǹyai kwára-perei. È, vɛ̃ɛ-kpâlaŋ sîɣe, Gosɛŋ lɔii da Zɔdiŋ tiŋ-tiŋ su lɔii.

¹⁷ Dí tɛ̀ɛ naa dí Ala Yeei ma siɣe nyíi ǹɛɣɛ̂i Idɔŋ taa-lee kɔlɛ mai, é lɛ́ɛ la zu dí lí Beega nyíi gáa Lɛƃanɔŋ Potoi su Ɛmɔŋ Yeei kwára perei. Zasua è ǹaa kaloŋ-ŋai kélee sòŋ é dípaa.

¹⁸ Zasua da gâloŋ-ŋai ŋí-ni dí kɔ̀ a zu kóya é lɛ́ɛ pâi díyee mɛi ɣâlei.

¹⁹ Taa-lêe da fé kɛ́ ní naa nyíi da Zasua-ni dí lii-sêe mɛni kpɛ̀tɛ díloai. Iva-ŋai kɛ̀ Giƃiyɔŋ taai sui, dia nɔ́ ƃé da dia-ni dí gɛ̀ tí. Zasua è daa-lêei kpéli-ŋai kélee sòŋ,

²⁰ kpɛ́ni fêi, Yâwɛɛ è gɛ̀ daa lêe-ŋai ŋí su-ƃelai líi su é kpanaŋ a gɛ́ɛ da Eezuɛ-ŋai dí kɔ́ kɔ́ a gɛ́ɛ Eezuɛ-ŋai dí dípaa, dífe dímaloŋ kàa yɛ̂ɛ berei Yâwɛɛ è mò la Mose mai.

²¹ Maa tãi tí Zasua è pà é Anakiŋ-ŋai páa é dítaa lêe-ŋai ŋí wólo: Iburɔŋ taa-leei, Dibɛ, Ana, Zuda yee lɔii su taa-lêei, da Eezuɛ yee lɔii su taa-lêe-ŋai kélee.

²² Anakiŋ-ŋai dɔnɔ kpîŋ fé lɛ̀ɛ ni Eezuɛ-ŋai dílɔii su. Ƃɛ́i nɔ́ da-ŋa dí lɛ̀ɛ naai, ǹaa ƃa Geza taa-leei, Gâa da Asɔdɔ taa-leei.

²³ Nya ƃe Zasua è ǹɔii kélee sìɣe yɛ̂ɛ berei Yâwɛɛ è mò la Mose mai. È ŋ̀áa kɔ̀lɛ Eezuɛ-ŋai dîa yɛ̂ɛ berei dísîi káa lai. Nya ƃe Eezuɛ-ŋai dí nâa kɛ̀ lii-see su.