Zasua 10 - Bible

Dí Amɔra-ŋai yée mɛi ɣàle

¹ Zerusâlɛŋ kaloŋ Adonizɛdɛ è mɛ̀ni a gɛ́ɛ Zasua a Eea wólo, a naa-ƃelai kélee páa da díkâloŋ yɛ̂ɛ berei è gɛ̀ la a Zɛleko da naa kaloŋ. E mɛ̀ni máŋ a gɛ́ɛ Giƃiyɔŋ-ŋai da díkpîŋ tɛ́ɛ Eezuɛ-ŋai pɔ́.

² Zerusâlɛŋ-ƃelai díkâloŋ è mɛ̀ni a gɛ́ɛ Giƃiyɔŋ-ŋai da díkpîŋ tɛɛ Eezuɛ-ŋai pɔ́, díkɛ ƃò dí sámai, yao támaa è pà díkponôi, kpɛ́ni fêi, Giƃiyɔŋ è kɛ̀ a taa-lêe kɛ́tɛ yɛ̂ɛ daa-lêe kɛ́tɛ-ŋai da nyíi kâloŋ káa m̀ɛi. È kɛ̀ a gɛ́tɛ é tɛ́ɛ Eea ma kɔ-kûluƃa wála-wâla-ŋa dí ƃò naa.

³ Nya ƃe Gâloŋ Adonizɛdɛ è worɛ̂ tɛ̀ɛ Iburɔŋ kaloŋ Oãŋ pɔ́ naa, Zamu kaloŋ Piraŋ, Laki kaloŋ Zafi da Ɛloŋ kaloŋ Dibɛ ni ǹyɛɛ dîai,

⁴ “Ka pá ká kpɔ́ŋ ma kwaa lí kú kɔ́ pɛ́lɛ Giƃiyɔŋ-ŋai dîa, kpɛ̂ni fêi, da díkpîŋ tɛ́ɛ Zasua da Eezuɛ-ŋai pɔ́.”

⁵ Nya ƃe Amɔra kaloŋ lɔ́ɔlui ŋí dí díkɔ kûluƃa-ŋai pù gîei dí lí dí kɔ́ pɛ́lɛ Giƃiyɔŋ-ŋai dîa.

⁶ Gɛ́ɛ tíi, Giƃiyɔŋ kpakolo-ŋai dí worɛ̂ tɛ̀ɛ Zasua pɔ́ naa m̀ûui su Geega dîyɛɛ m̀ai. “Ífe íyee kùla íyee mu-ƃelai mu. Pá a maa félaa í kpɔ́ŋ kûa í kúkula yêei kɛ́, kpɛ́ni fêi, Amɔra kaloŋ-ŋai kùla ǹyéei sui, dí kélee da kɔ́ pɛ́lɛ kûa.”

⁷ Nya ƃe Zasua da ŋɔkɔ-kuluƃa-ŋai kélee dí díkpîŋ kpɛ̀tɛ dí dímu siɣe Geega dí kɛ́ lí gɔ́i ma.

⁸ Zasua-ni dí lɛ́ɛ pâi liî, Yâwɛɛ è m̀o ma ǹyɛɛ, “Ífe yao Amɔra-ŋai dîa, kpɛ́ni fêi, ŋa díkelee dítɛɛ ípɔ. Dítɔnɔ kpîŋ fé pâi pɔrîi tɔɔ̂i íŋɛ́i.”

⁹ Nya ƃe Zasua-ni dí kùla Geega a maa kpinii tí dí kɔ́ pɛ́lɛ Amɔra-ŋai dîa dítɛ̂i pere.

¹⁰ Yâwɛɛ è Amɔra-ŋai kɛ̀ wúlee, é gɛ́ Eezuɛ-ŋai dí dámaa páa Giƃiyɔŋ dílɛɛ gbéli-ŋai kpɛ̂i dí tɛ́ Bɛorɔŋ, díkɛ dípàa é lɛ́ɛ la zu dí sèri Azeka da Makeda daai.

¹¹ Díkɛɛ pûi Eezuɛ-ŋai yêei díkɛ kùla Bɛorɔŋ dí kɛ́ lì Azekai, Yâwɛɛ è gɛ̀ sãɔ-ŋa dí kúla ŋ̀elei su dí kɛ́ tòo dîa. Zãɔi è dámaa pàa é tɛ́ɛ nyíi-ŋai dîa Eezuɛ-ŋai dí dípàa a ƃóa-sɔkpɔ-ŋai.

¹² Ŋ̀elei Yâwɛɛ è Amɔra-ŋai tɛ̀ɛ la Eezuɛ-ŋai pɔ́i, Zasua è lòno Yâwɛɛ Eezuɛ-ŋai ŋɛ́i ǹyɛɛi, “Yâwɛɛ, gɛ́ vóloi é lɛ́ɛ tɔɔni Giƃiyɔŋ mɛi, ŋ̀áloŋ é lɛ́ɛ tɔɔni Aizalɔŋ Potoi mɛi.”

¹³ Nya ƃe vóloi da ŋ̀áloŋ dí lɛ̀ɛ tɔɔni dítɔɔ̂i é lɛ́ɛ la zu Eezuɛ-ŋai dí díkpɔara-ƃelai yée mɛi ɣále. M̀ɛni pɔlɔi ŋí pɔ̃yɛ̂ɛi Zasua Ŋɔkɔlɔi su. Vóloi da ŋ̀áloŋ dí lɛ̀ɛ tɔɔni dítɔɔ̂i tɔnɔ ma a ɣele kûu tɔnɔ é lɛ́ɛ la zu Eezuɛ-ŋai dí díkpɔara-ƃelai yée mɛi ɣále.

¹⁴ M̀ɛnii ŋí da fé tá kɛ́ ní a bɔlɔ. Ǹyaa ƃa núu-kpune kɛ̂ɛ é gɛ́ Yâwɛɛ kɛ́ é mɛni da kɛ́ yɛ̂ɛ berei è kɛ̀ la Zasua ŋɔtãi mai. È kɛ̀ tí, kpɛ́ni fêi, Yâwɛɛ è kɛ̀ kɔ̂i Eezuɛ-ŋai mɛni ma.

¹⁵ Nya ƃe Zasua da Eezuɛ-ŋai kélee dí lène pôlu díƃûui su Geega.

Zasua è Amɔra kaloŋ lɔ́ɔlui pàa

¹⁶ Amɔra kâloŋ lɔ́ɔlui dí pù dí díloo kɔni wôlo da su Makeda.

¹⁷ Dí mò Zasua ma dîyɛɛi, “Kwaâ gâloŋ lɔ́ɔlui káa. Díloôi kɔni wôlo da su Makeda.”

¹⁸ Nya ƃe Zasua è mò dîa ǹyɛɛi, “Ka kɔni ƃela-ŋa tɔɔ gɔni wôloi lá, ká kpakolo-ŋa kɛ́ dí kɛ́ ǹaa mɛi kâa.

¹⁹ Kɛ́lɛ káa kpîŋ káfe lɛ̀ɛ tɔɔni naa. Ka kákpɔara-ƃelai kpɛ́ ká dímaa tíyeŋ. Káfe ǹɛɛ naa dí tɛ́ dítaa lêe-ŋai su, kpɛ́ni fêi, Káɣâlai Yâwɛɛ a dítɛɛ kápɔ.”

²⁰ Zasua da Eezuɛ-ŋai kɛ́ɛ da Amɔra-ŋai dámaa páai, gbéli-ŋai dí pù dí tɛ́ dítaa lêe maa kónaŋɔɔ-ŋai su.

²¹ Eezuɛ-ŋai kélee dí lène pôlu Zasua pɔ́ naa m̀ûui su Makeda nɛ́ŋ kpɛrɛɛ. Ǹɔii tí su nuu da fé lóno nyɔ́mɔɔ da kɛ́ ní é pîlaŋ Eezuɛ-ŋai dîa.

²² Nya ƃe Zasua è mò dîa ǹyɛɛi, “Ka gɔni wôloi lá ƃó ká pá a gâloŋ lɔ́ɔlui tí ḿbɔ.”

²³ Ǹyaŋ dí gɛ̀ tí. Dí gâloŋ lɔ́ɔlui kùla gɔni wôloi su dí pá a dia bɔ́. Gâloŋ-ŋai ƃé kɛ̀ a Zerusâlɛŋ kaloŋ, Iburɔŋ kaloŋ, Zamu kaloŋ, Laki kaloŋ da Ɛgulɔŋ kaloŋ.

²⁴ Dí páa a dia Zasua pɔ́i, è Eezuɛ-ŋai kélee ŋáa tɛ̀ ma é m̀ó gɔ-kuluƃa-ŋai láa túɛ-ƃelai dîa ǹyɛɛi, “Ka pá ƃɛ́ ká kákɔɔ tɔ́ɔ gâloŋ-ŋai ŋí kɔŋ lá.” Nya ƃe dí pà dí gɛ́ tí.

²⁵ Zasua è mò dîa ǹyɛɛi, “Káfe yào kpaa máŋ kálii é tóo pôlu. Ka tɔɔ a gbanaŋɔɔ ká kálii kpéle, kpɛ́ni fêi, bere ƃé Yâwɛɛ a pâi gɛ̂i la a kákpɔara-ƃelai kélee.”

²⁶ Ǹaa kɛ́ɛ tíi, Zasua è dípàa é dísɛ̂lɛŋ wúru lɔ́ɔlu ma. Dí lɛ̀ɛ a dísɛ̂lɛŋɔɔ é lɛ́ɛ la zu ɣele wûlii é kɛ́.

²⁷ Kɛ́lɛ gbínii kɛ̂ɛ pâi, è gɛ̀ dí díkula ŋ̀úrii ma dí dípili gɔni wôloi su dí kɛ̀ a díloɔɔ naai. Dí kɔni kpaya-kpaya-ŋa tɔ̀ɔ gɔni wôloi lá. Gɔni-ŋai ŋí díkaa naa é tóo sâa mai.

Zasua è Amɔra taai dámaa sòŋ

²⁸ Zasua è Makeda sìɣe a maa ɣêlei tí é ǹaa kaloŋ páa. È daai wôlo é naa-ƃelai kélee páa kpɔ́ kpúŋ, é naa kaloŋ páa yɛ̂ɛ berei è gɛ̀ la a Zɛleko kaloŋ.

²⁹ Nya ƃe Zasua da ŋɔkɔ kûluƃa-ŋai dí tɛ̀ɛ Makeda dí lí Lina dí kɔ́ pɛ́lɛ ǹaa-ƃelai dîa.

³⁰ Yâwɛɛ è Lina taai da ǹaa kaloŋ tɛ̂ɛ Eezuɛ-ŋai pɔ́. Zasua è ǹaa-ƃelai kélee pàa a ƃóa-sɔ̂kpɔ. È ǹaa kaloŋ pâa yɛ̂ɛ berei è Zɛleko kaloŋ pâa lai.

³¹ Da Eezuɛ-ŋai dí tɛ̀ɛ Lina dí lí Laki dí kɔ́ pɛ́lɛ ǹaa-ƃelai dîa. Dí tìnaŋ daai ma dí ǹaa sìɣe.

³² Ǹyaŋ Yâwɛɛ è Laki taai tɛ̂ɛ Eezuɛ-ŋai pɔ́ a ŋ̀elei veerɛ ɣelei. Dí ǹaa-ƃelai kélee pàa a ƃóa-sɔ̂kpɔ yɛ̂ɛ berei dí gɛ̀ la a Lina taai su-ƃelai.

³³ Nya ƃe Gezɛ kaloŋ Oraŋ è pà a gɛ́ɛ é kpɔ́ŋ Laki-ƃelai dîa. Kɛ́lɛ Zasua è ǹyée mɛi ɣâle da ŋɔkɔ kûluƃa-ŋai. È díkelee dí pàa, dítɔnɔ kpîŋ fé lɛ̀ɛ ní.

³⁴ Zasua-ni dí tɛ̀ɛ naa dí lí Ɛgulɔŋ. Dí tînaŋ ǹaa ma dí kɔ́ pɛ́lɛ m̀a.

³⁵ Dí daai sîɣe a maa ɣêlei tí dí ǹaa-ƃelai kélee páa kpɔ́ kpúŋ a ƃóa-sɔ̂kpɔ, yɛ̂ɛ berei dí gɛ̀ la a Laki-ƃelai.

³⁶ Gɛ́ɛ tíi, Zasua-ni dí kùla Ɛgulɔŋ dí tɛ́ Iburɔŋ dí naa siɣe.

³⁷ Dí ǹaa-ƃelai kélee pâa da díkâloŋ é pɛ́lɛ ǹaa kɔlɛ ma taa-ŋai su-ƃelai dîa. Dí dípàa a ƃóa-sɔ̂kpɔ yɛ̂ɛ berei dí gɛ̀ la a Ɛgulɔŋ-ƃelai.

³⁸ Nya ƃe Zasua-ni dí tɛ̀ Dibɛ dí kɔ́ pɛ́lɛ ǹaa-ƃelai dîa.

³⁹ Zasua è ǹaa sìɣe é gâloŋ sóŋ da ǹaa kɔlɛ ma taa-ŋai kélee. È ǹaa-ƃelai kélee pàa a ƃóa-sɔ̂kpɔ yɛ̂ɛ berei è gɛ̀ la a Iburɔŋ, Lina-ƃelai da díkâloŋ-ŋai.

⁴⁰ Zasua è nâa lɔii-ŋai ŋí kélee sìɣe: ǹyéei su taai, vɛ̃ɛ-kpâlaŋ su-taai, díŋ-tiŋ su-taai, da ǹyéei pɛ̂rɛi taa-ŋai. È ǹaa-ƃelai kélee da díkâloŋ-ŋai pâa, kpɛ́ni fêi, Yâwɛɛ, Eezuɛ Ŋɔɣâlai è mò mà a gɛ́ɛ é gɛ́ tí.

⁴¹ Zasua è lɛ̀ɛ lɔii kula yêei kɛ̂i é síɣe Kedɛ Bania é seri Geza da Gosɛŋ é tóo Giƃiyɔŋ.

⁴² Zasua è ǹɔii-ŋai ŋí kélee sìɣe é ǹaa kaloŋ-ŋai sóŋ tɛi-tɛ́i é lɛ́ɛ la zu é dí kélee dísoŋ, kpɛ́ni fêi, Yâwɛɛ, Eezuɛ Ŋɔɣâlai è kɛ̀ kɔ̂i Eezuɛ-ŋai mɛni ma.

⁴³ Nya ƃe Zasua da ŋɔkɔ kûluƃa ŋai dí lène pôlu m̀ûui su Geega.