Zakari 8 - Bible

Yâwɛɛ è góno tèe a gɛɛ e Zerusâlɛŋ tɔɔ pôlu

¹ Nya ƃe Yâwɛɛ è lòno ḿbɔ ǹyɛɛi,

² “Tólo kpɛɛ pôlu káa ńii su Zãiyɔŋ mɛni ma, ǹyaŋ tólo kpɛɛ pôlu káa ńii su ŋɔkpɔara-ƃelai mɛni ma.

³ Ŋa pâi penêi pôlu Zãiyɔŋ ŋá sée Zerusâlɛŋ, ǹyaŋ da pâi Zerusâlɛŋ tôlii a tɔ̃yâ taa-lee dí ŋáyeei tóli a yée maa waa.

⁴ Siɛ-pɔ̂lɔ-ŋa da nɛi-pɔ̂lɔ-ŋa da pâi ŋɔ́nɔ seêi Zerusâlɛŋ taa-lee su-pere-ŋai ma, túaŋ kɛ́ ƃò díyêei, kpɛ́ni fêi da pɔlɔ.

⁵ Ǹyaŋ daa-lêei láa a pâi fɛ̂ɛi a sinâa-nɛyaa da nɛyâa-nɛyaa díkɛ pêle kɛ̀ góli-ŋai su bere-ŋai ma.

⁶ “Nyíŋi a pɔ̂ri kɛ̂i a mɛni kpanaŋɔɔ diai ŋɛ́i lɛ̀ɛ pôlu tãi ŋí su, kɛ́lɛ vé a mɛni kpânaŋ ḿaa mɛ̂ni ma.

⁷ Ŋa pâi ŋánûai ƃâloi ǹɔii-ŋûŋ-ŋai su díkaa vóloi kulâi-pere da vóloi liî-pere.

⁸ Ǹyaŋ ŋa pâi pâi a dia dí sée Zerusâlɛŋ. Da pâi kɛ̂i a ŋánûa ǹyaŋ ŋ́gɛ ƃò a Díɣâla laa-laa su da tɔ̃yâ-laa su.

⁹ “Tɔɔ káyee su é kpanáŋ káai kákaa ŋ̀óo-ŋai ŋí mɛnîi gɛ́ kùla ŋálono kɛ́-ƃelai lá é síɣe tãi ma dí Ŋápɛrɛi tɔɔ pôlu kɔ́ɔ pìlaŋ lai.

¹⁰ Maa tãi tí é lɛ́ɛ pâi serîi, núu da fé kɛ́ ní naa a pɔ̂ri núu da kɛ̂i a gɛɛ é tíi kɛ́ ḿî kpaa máŋ sua-ŋa, kpaa máŋ núu da è kɛ̀ naa nyii a pɔ̂ri ƃâloi ŋɔkpɔara-ƃelai yêei. Ŋá ǹûai kɛ̀ a gɛɛ dí díkîe-ni kpɔara.

¹¹ Kɛ́lɛ tãi ŋí su fé pâi tûai a nɛ̀ɛ-pôlu-ƃelai yɛ̂ɛ berei ŋá tùa la a maa-ŋuŋ-ƃelai.

¹² Kpɛ́ni fêi, da pâi dísi-sɛŋ-ŋa sîi lii-sêe su. Díkpɔmɔ-kpâlaŋ-ŋai da pâi ƃâi ǹɔii é dísi-saai kɛ́ dí kpɛtɛ. Ǹyaŋ tuna támaa a pâi pûi dísi-sãai dîa. Ǹyaŋ zãâi ŋí kélee a pâi kɛ̂i a nɛɛ-pôlu-ƃelai pɔ́ɔ.

¹³ Óo Zuda da Eezuɛ-ƃelai! Yɛ̂ɛ berei dí kálaa sìɣe a foo-wôo ǹɔii-ŋûŋ-ŋai sámai, ŋa pâi káƃâloi ká kɛ́ a lûwa ǹûai mɛni ma. Káfe yào, kɛ́lɛ káyee su é kpanaŋ.”

¹⁴ Ŋ̀wála-wâla-kélee Yâwɛɛ a môi ǹyɛɛi, “Yɛ̂ɛ berei ŋá gbɛ̀tɛ la a gɛɛ ŋá mɛni nyɔ́mɔɔ kɛ́ a káa tãi kánuu-pɔ̂lɔ-ŋai dí ŋ́gɛ̀ la ńii é ŋwánai, ǹyaŋ fé ńii maa fáleŋ níi,

¹⁵ ǹyaŋ ŋa nâa gbɛ̀tɛ ŋ́gili ŋá a gɛɛ ŋá mɛni lɛ́lɛɛ kɛ́ a Zerusâlɛŋ da Zuda-ƃelai. Káfe yào.

¹⁶ M̀ɛni-ŋai káa ŋí maa nɛ̃ɛ̂i ká gɛ́i: Ka tɔ̃yâ ƃó kákîe-ni dîa, ká mɛni-sâa ƃó a tɔ̃yâ nyii a pâ a lii-sêei.

¹⁷ Káfe mɛni nyɔ́mɔɔ kpɛ̀tɛ kálii su kákîe-ni mɛni ma. Káfe wôya kperɔ mìi kpɛ́ni fêi, fé m̀ɛni-ŋai ŋí wɛ́lini.”

¹⁸ Ŋ̀wála-wâla kélee Yâwɛɛ wóo è pà ḿbɔ ǹyɛɛi,

¹⁹ “Ŋ̀áloŋ náaŋ, ǹɔ́ɔlui, mɛi feerɛi da buui maa sûŋ siɣe ɣêle-ŋai da pâi kɛ̂i a lii-nɛ̃̂ɛ ɣele kɛ́tɛ-ŋa Zuda-ƃelai mɛ̂ni ma. M̀ɛni ma ka tɔ̃yâ wɛ́li da lii-sêe.”

²⁰ Ŋ̀wála-wâla kélee Yâwɛɛ a môi ǹyɛɛ, “Nûa da pâi siɣêi taa-lêe támaa su dí pá.

²¹ Nûa da pâi siɣêi dítaa-lêei su dí lí da kpɛ́ni su dí mó ǹûai dîa, ‘Kwaa lí a maa félaa kú Ŋ̀wála-wâla kélee Yâwɛɛ ŋɔƃɛlɛ-sêei kɔ́ri kú vɛli. Ka pá kú lí.’

²² Núu támaa da pâi pâi da lɔii-ŋûŋ wála-wâla-ŋa dí Ŋ̀wála-wâla kélee Yâwɛɛ kɔ́ri Zerusâlɛŋ a gɛɛ dí ŋɔkpɔŋ-mâai kɔ́ri.

²³ Maa ɣêle-ŋai tí su, núu puu da pâi kulâi lɔii-ŋûŋ kélee su dí Zuda-nuu tɔnɔ ŋɔyokpoi wóŋ sóŋ dîyɛɛi, ‘Kwa káa-ni kwa liî, kpɛ́ni fêi, kwa mɛni a gɛɛ Ɣâla káa kápôlu.’ ”