Zakari 6 - Bible

Gɔ́kɔ-kêleŋ náaŋ maa zĩ̂ai

¹ Ŋá zĩ̂ai da kpɛ́ni kàa ŋɔ́nɔ. Maa tãi tí ŋá kɔ́kɔ-kêleŋ náaŋ kàa díkɛ kùla yée kpɔ̂lu feerɛ loai soo-ŋa díkɛ zìa.

² Soo kpɔ̂lu ƃé kɛ̀ géleŋ maa-ŋúŋ siâi, géleŋ veerɛi, soo tɛ̂i kɛ́ zia,

³ zaaƃai soo kôle kɛ́ zìa, ǹáaŋ soo pɔ̃yɛ kɛ́ zìa.

⁴ È kɛ̀ tí, ŋá Ŋ̀âla-taa-kelai marê kɛ̀ ńyɛ̂ɛi, “Ŋánuu-namui, géleŋ-ŋai ŋí díkaa lé mɛni ma?”

⁵ È ŋ́oo su tòo ǹyɛɛi, “Nyíŋi-ŋai ŋí da liî ǹɔii m̀éla náaŋ ma-pere, da kula Kúnuu-namui pɔ́naa nyii gáa ǹɔii kélee mɛi.”

⁶ Géleŋ nyii zoo tɛ̂i-ŋai dí kɛ̀ ziâi, è kɛ̀ liî Babelɔŋ lɔii ŋûa-pere, nyíi zoo kôle-ŋai dí kɛ̀ ziâi gɛ́ lì vóloi-lîi-pere, nyii zoo pɔ̃yɛ-ŋai dí kɛ̀ ziâi gɛ́ lì nɔlii-kwára-pere.

⁷ Tãi zoo pɔ̃̂yɛ-ŋai dí pà lai, dí kɛ̀ ŋ̀wɛ̂lii dí lí dí ǹɔii maa kpɛ́ɛ. Ŋ̀âla-taa-kelai è mò dîa ǹyɛɛi, “Ka lí ká ǹɔii ma kpɛ́ɛ.” Ǹyaŋ dí gɛ̀.

⁸ È kɛ̀ tí Ŋ̀âla-taa-kelai è làɣi ǹyɛɛ ḿâ, “Zoo-ŋai lì ǹɔii ŋûa-perei da Kúnuu-namui ŋɔlii-ŋwânai ŋáa yéŋ.”

Dí Zasua kɛ̀ a núu kɛ́tɛ

⁹ Yâwɛɛ ƃé ŋ̀orɛ̂-wooi ŋí tɛ̀ɛ ḿbɔ.

¹⁰ È mò ḿâ ǹyɛɛi, “Zama-sãai síɣe Ɛdai yêei da Toƃiya ƃɛ́lɛ Zɛdaya ma. Ǹûai ŋí dí kùla Babelɔŋ dí pá pôlu. Lí a maa félaa Zosâya ŋɔpɛ́rɛi lá nyii gáa a Zɛfɛnâya ǹóŋ.

¹¹ Ƃɔrɔ kpɛtɛ a káne da gôo nyii ǹûai dí dɛ̀ɛ ípɔi í zee Zeozada-ǹóŋ Zasua ŋûa nyii gáa a zâla láa-soŋ-nûu kɛ́tɛi.

¹² M̀ó mà a gɛɛ Ŋ̀wála-wâla kélee Yâwɛɛ a môi ǹyɛɛi, ‘Nalôŋ da dòli a Ŋ̀oŋoi a pâi ƃɔlɔ̂i ƃɛ́i gáa naai, ǹyaŋ a pâi Yâwɛɛ Ŋɔpɛ́rɛi tɔɔ̂i.

¹³ Ǹyaa ƃa ǹúui pâi ŋápɛrɛi tɔɔ̂i é ƃaa-kɛ́-maa sɔlɔ ƃó nyii gáa gâloŋ mɛ̂ni mai, ǹyaŋ a pâi kɛ̂i ŋɔnûai mɛi. Ǹyaŋ sâla-láa-soŋ-nuu a pâi kɛ̂i tɔɔ̂ni ŋɔkâloŋ-see-seŋ kɔlɛ, ǹyaŋ da ǹyaa da pâi tíi kɛ̂i gîe ma woo-lâa-maa su da lii-sêe.’

¹⁴ Gâloŋ-ƃɔrɔi a pâi kɛ̂i Yâwɛɛ ŋɔpɛ́rɛi mu a kili-too-ŋa Ɛɛdai, Toƃiya, Zɛdaya da Zɛfɛnâya ǹóŋ Zosâya dímɛni ma.”

¹⁵ Diai díkaa kwaa kôya mai, da pâi pâi dí kpɔŋ-mâa kɛ́ Ŋ̀âla-pɛrɛi tɔɔ mɛ̂ni ma. Ǹyaŋ ka pâi gɔ́lɔnîi a gɛɛ Ŋ̀wála kélee Yâwɛɛ ƃé ńdɛ̀ɛ kápɔ naa. A pâi kɛ̂i à kɛ̀ kà m̀ɛnii kɛ̀ Yâwɛɛ Káɣâlai a mò kâai.