Zakari 5 - Bible

Zĩ̂ai bîlaŋɔɔi gɔlɔi ma a kôoŋ

¹ Ŋá nàa kàa ŋɔ́nɔ ŋá kɔlɔ káa gɛ́ kôoŋ ŋ̀elei su.

² Ŋ̀âla-taa-kelai è ḿarê kɛ̀ ǹyɛɛi, “Lé ƃé ƃa gâai?” Ŋá ŋ̀óo su tòo ńyɛ̂ɛi, “Ŋá kɔlɔ kàa gɛ́ kôoŋ ŋ̀elei su, ŋɔkôya kɛ́ ƃò a ŋwaaŋ lɔ́ɔlu mɛi náaŋ. Ŋɔsu-kɛ̂tɛ è ƃò a ŋwaaŋ náaŋ da gbûra.”

³ È mò ḿâ ǹyɛɛi, “Foo-wôo pɔ̃yɛ̂ɛi ma gɛ́ lì ǹɔii gwaa kélee. Gɔlɔi m̀éla tɔnɔ a môi a gɛɛ ǹúui a ŋúma kɛi, da pâi gulâi ǹɔii ma. M̀éla gbélii kɛ́ mò a gɛɛ ǹúui a vòo a lɛ́ɛi, da pâi gulâi ǹɔii ma máŋ.

⁴ Ŋ̀wála-wâla kélee Yâwɛɛ è mò a gɛɛ foo-wôo káa gwaa kélee, a pâi ŋúma-nuu ŋɔpɛ́rɛi mu da ǹúui a vòo a lɛ́ɛi ŋɔpɛ́rɛi mu. A pâi lɛɛ̂i dípɛrɛ-ŋai mu é lɛ́ɛ la zu é gélee wólo.”

Ǹɛnîi kɛ̀ gbɔ̂lɔi sui maa zĩ̂ai

⁵ Ŋ̀âla-taa-kelai è pà ŋɔ́nɔ ǹyɛɛi, “Ƃɛ́ káa! Sɛŋ da kpɛ́ni káa pâi.”

⁶ Ŋá m̀arê kɛ̀ ńyɛɛi, “Lé ƃé tí?” È zu tòo ǹyɛɛi, “Kpɔ̂lɔ ká tí, dɔɔ̂i ǹɔii kélee ŋɔsɔŋyɔ̂ŋ mɛni ma.”

⁷ Gbɔ̂lɔi lá-tɛ-sɛŋ è kɛ̀ a fomâ. Tãi ŋá kɛ̀ nàa kâai lai, gbɔ̂lɔi lá-tɛ sɛŋ è mù sìɣe, ǹyaŋ nɛnîi tɔnɔ è kɛ̀ seêni zu!

⁸ Ŋ̀âla-taa-kelai è mò ǹyɛɛi, “Ǹɛnii ŋí tɔɔ̂i ŋwana-lɔ̂ɔ pɔ́ɔ ŋá.” È kɛ̀ tí, è ǹɛnîi tùaŋ pôlu gbɔ̂lɔi su é ǹáa tɛ́.

⁹ Ŋá ŋ́uŋ mu sìɣe ŋá nɛnî feerɛ káa díkɛ kòoŋ díkɛ pà ḿbɔ naa-pere díkoôŋ su kpanaŋɔɔ yɛ̂ɛ kuɛ. Dí gbɔ̂lɔi sîɣe dí tɛ́ la ŋ̀elei su.

¹⁰ Ŋá Ŋ̀âla-taa-kelai marê kɛ ńyɛ̂ɛi, “Mí ƃé da liî la naai?”

¹¹ È ŋ́oo su tòo ǹyɛɛ, “Da liî la Bɛbelɔŋ lɔii su ƃɛ́i da pâi pɛ́rɛ tɔɔ̂i naa mɛni mai. Tãi bɛ́rɛi a kpɛ̂ɛ lai, da pâi gbɔ̂lɔi seêi naa díkɛ vɛ̀li.”