Zakari 14 - Bible

Zerusâlɛŋ da ǹɔii-ŋûŋ-ŋai

¹ Ká gáa, Yâwɛɛ ŋɔɣelei káa pâi tãi da pâi kásãâi ŋáa kɔlɛ̂i la káŋɛi dí gùla káyêei.

² Yâwɛɛ a pâi pâi a ǹɔii-ŋûŋ-ŋai kwaa tɔ̂nɔ ma dí kɔ́ pɛ́lɛ Zerusâlɛŋ ma, dí daai yée mɛi ɣále dí bɛ́rɛ-ŋai wólo dí ǹɛyâai kɛ́ a dínɛyâa a wála-wâla-laa. À kɛ̀ tí, daâi m̀éla tɔnɔ a pâi liî luɛ-lâa su, m̀éla gbéli é lɛ́ɛ naa.

³ À kɛ̀ tí, Yâwɛɛ a pâi kɔ́ pɛlɛ̂i ǹɔii-ŋûŋ-ŋai dîa yɛ̂ɛ berei a kâa gɛ̀ la a bɔlɔ a kɔ́-kɔ tãi.

⁴ Maa ɣêlei tí, a pâi tɔɔ̂i Ŋ̀úlɔ-wuru Yeei tôŋ su nyii gáa Zerusâlɛŋ vóloi-kulâi-perei. Gɛ̀ ní Ŋ̀úlɔ-wuru Yeei su a pâi ƃêlai feerɛ é síɣe vóloi-kulâi-pere é lí ǹiî-pere. Nàa a pâi kɛ̂i a tiŋ-tiŋ ŋá. M̀ɛni ma ǹyée-ƃela feerɛi ŋí dɔnɔ a pâi liî ǹɔii-ŋûa-pere, gbéli é li ǹɔii kwára-pere.

⁵ Ka pâi pûi a ŋáyeei ŋɔtiŋ-tiŋ su-pere nyii ǹyéei ŋáa kɔ̀lɛ gîei feerɛ. Ka pâi pûi yɛ̂ɛ berei ká wɔ́lɔ pù la Zuda kaloŋ Uzia ŋɔtãi ma tãi ǹɔii è wɔ́lɔ kpɛ̀liŋ lai. Gɛ̀ ní Yâwɛɛ nyii gáa a Káɣâlai a pâi pâi da ŋɔpôlu-ƃelai kélee.

⁶ Maa ɣêlei tí kɔ́lɛ fé pâi kɛ̂i naa kpaa máŋ lúu.

⁷ Ǹyaŋ ɣele ƃɔ́ɔ nɔ́ ƃé pâi kɛ̂i naa, (Yâwɛɛ nɔ́ ƃé gɔ́lɔŋ) ɣele ƃɔ́ɔ da kpíni dífe pâi kɛ̂i naa, kpɛ́ni fêi, a kɛ̀ a ɣele wûlii tãi, ɣele ƃɔ́ɔ a pâi kɛ̂i naa.

⁸ Maa ɣêlei tí fúlu-laa ya a pâi kulâi Zerusâlɛŋ é li Ǹyúo Saai su vóloi-kulâi-pere, m̀éla tɔnɔ é li Mɛditɛrenia Yuoi su vóloi-liî pere. A pâi kɛ̂i nɔ́ tí a fólo-laa ƃóɔɔ da sama-ya ɣele.

⁹ Gɛ̀ ní Yâwɛɛ a pâi kɛ̂i a kâloŋ ǹɔii gwaa kélee. Maa ɣêlei tí Yâwɛɛ a pâi kɛ̂i nɔ́ tɔnɔɔ, ǹyaŋ ǹáa kɛ́ ƃò tɔnɔɔ.

¹⁰ À kɛ̀ tí ǹɔii gáa Zerusâlɛŋ-taai kwára-perei, é síɣe Géba é lí Limɔŋ a pâi kɛ̂i a tiŋ-tiŋ ŋá. Kɛ́lɛ Zerusâlɛŋ a pâi lɛɛ̂i nɔɔ ǹyéei ma é síɣe Bɛŋsima ŋɔgêtii lá é lí geti pɔlɔi lá, é lí zônoŋ su-getii lá, é kúla Ananɛ Ŋɔyeŋkêŋ lá é lí gâloŋ ŋɔŋwã̂ai-kpɛtɛ teei lá.

¹¹ Ǹyaŋ ǹûa da pâi naa, foo-wôo fé pâi kɛ̂i ŋɔ́nɔ dípôlu. Zerusâlɛŋ-ƃelai da pâi seêi naa a díŋuŋ-maa ƃóɔɔ.

¹² Gɔlɔ-fela nyɔ́mɔɔi Yâwɛɛ a pâi dɛɛ̂i ǹûai kélee mɛni ma da kɔ́ pɛ́lɛ Zerusâlɛŋ mai, ǹyaa ká ŋí: Da pâi lɛɛ̂i a dífulu díkɔlɔ kɛ́ lùla dîa, díŋɛi-gao kɛ́ lùla díŋɛi-gònoŋ su, dínɛŋ kɛ́ lùla dí lá.

¹³ Maa ɣêlei tí, Yâwɛɛ a pâi kpunɛ̂ŋ kɛ́tɛ têei ǹûai loai, núu tɔnɔ kɛ́ m̀arâŋ-nuu kpɛ̀, m̀arâŋ-nuui kɛ́ gɔlɛ-ma-nuui kpɛ̂.

¹⁴ Gɛ̀ ni Zuda-ƃelai máŋ da pâi kɔ̂i Zerusâlɛŋ ŋɔkpɔara-ƃelai pɔ́. À kɛ̀ tí da pâi tɔɔ-sã̂a kulâi ǹɔii-ŋûŋ-ŋai su naa kɔlɛ mai, sɛŋ kɛ́ɛ yɛ̂ɛ gôo, káne, da yokpo kpaya-kpaya támaa.

¹⁵ Ǹyaŋ gɔlɔ-fela tɔnɔi ŋí a pâi kɛ̂i máŋ Zerusâlɛŋ kpɔara-ƃelai dítaa-sûa-ŋai mɛ̂ni ma: Dísoo-ŋai, niŋa ŋai, zoo-felaŋ-ŋai é pɛ́lɛ daa-sûa-ŋai kélee ma dítaai sui.

¹⁶ Mɛni ma ǹɔii-ŋuŋ kélee kɔ́ pɛ̀lɛ Zerusâlɛŋ ma, ǹyaŋ zu-ƃelai nyii-ŋai kùla gɔ́i sui, gáa a sɛŋ dí lí Zerusâlɛŋ a kóraŋ kélee dí Yâwɛɛ Ŋ̀wála-wâla kélee Ɣala fɛ́li nyii gáa Gâloŋ. À kɛ̀ tí, dífe kpèra Díƃûu su Kuui kɛ́ɛ ma a kóraŋ kélee díƃûu-ŋai mu.

¹⁷ À kɛ̀ ǹɔii-ŋûŋ-ŋai ŋ̀éniɛi sui da fé li ní Zerusâlɛŋ a gɛɛ é Gâloŋ fɛli nyii gáa a Ŋ̀wála-wâla kélee Yâwɛɛi, tuna fé pâi pûi dílɔii su.

¹⁸ À kɛ̀ Ize-ƃelai da wàla lí Zerusâlɛŋ dí M̀ûui su Kuui kúla, gɛ̀ ní Yâwɛɛ a pâi a gɔlɔ-fela tɔnɔi dípɔ nyii pà ǹɔii-ŋûŋ-ŋai pɔ́ diai dífe lí ní a gɛɛ dí gúui ŋí kula.

¹⁹ Nyíŋi ƃé pâi kɛ̂i a mɛni-kula-maa kɛɛi Ize mɛni ma da ǹɔii-ŋûŋ-ŋai kélee nyii-ŋai dífe li ní Zerusâlɛŋ a gɛɛ dí M̀ûui su Kuui kulai.

²⁰ Ǹyaŋ maa ɣêlei tí, kɔlɔ pɔ̃̂yɛ da a pâi kɛ̂i zoo-ŋai dítaniŋ-ŋai dîa ǹyɛɛi, “Maa waâi Yâwɛɛ mɛni ma.”

²¹ Gɛ̀ ní ǹeɣi-ŋai kélee gáa Zerusâlɛŋ da Zudai da pa kɛ̂i a dímaa waa Ŋ̀wála-wâla kélee Yâwɛɛ mɛni ma, à kɛ̀ núu da kélee a ŋ̀wɛ̂lii é sâla sɛŋ ɣíli zu yɛ̂ɛ sua, a pɔ̂ri ziɣêi é ŋ̀íli zu. Ǹyaŋ maa ɣêlei tí pɔni tɔɔ-nûu fé ŋɔ́nɔ pâi kɛ̂i Ŋ̀wála-wâla kélee Yâwɛɛ ŋɔpɛ́rɛi mu.